Mittu Sokkaanchi Maariyaami Coyishiishi

TINI xuma mancho Maariyaamiiti. Ise Isiraeelete manchooti; Naaziretete katamira heedhannote. Maganu Maariyaami dancha mancho ikkitinota afino. Sokkaanchosi Gabirieeli coyishiishannose gede soyinohu iseraati. Gabirieeli Maariyaamira marichcho kulara dayinoro afootto? Hanni laꞌno.

Gabirieeli Maariyaami togo yiise: ‘Maassamootta mancho keerunni nootta? Yihowa ate ledo no.’ Maariyaami konne sokkaancho konni albaanni affe diegentino. Qoleno yiinori leellinosekki daafira yaaddu. Gabirieeli kayinni waajjitannokki gede jawaachchishise.

Togo yiise: ‘Maariyaami, waajjitooti. Yihowa atenni lowo geeshsha hagiidhino. Konni daafira dancha coye assaheraati. Muli yanna giddo labbaa qaaqqo ilatta; suꞌmasino Yesuusi yite fushshatta.’

Gabirieeli lede togo yee xawise kulise: ‘Kuni qaaqqi bayira ikkanno; qoleno Ayirradu Magani Beetto yaamamanno. Yihowa Daawiti nugusa assinte gede isono nugusa assannosi. Ikkollana Yesuusi hegerera moohanno; mangistesino hegereta ikkitanno!’

Maariyaami qolte togo yitu: ‘Kuni baalu hiitto ikke ikkanno? Ani mine diassiꞌroomma. Qoleno labbaahu ledo goxe diegennoomma; ikkina qaaqqo hiitto ikke ileemma?’

Gabirieeli qole, ‘Maganu wolqa atewa dagganno. Konni daafira ilamanno qaaqqi Maganu Beetto yaamamanno’ yiise. Qoleno togo yiise: ‘Fiixakki Elsaabeexi qaagi. Mannu, ise ooso ilate geedhitino yiino. Ise kayinni xa muli yanna giddo labbaa qaaqqo iltaraati. Maganoho hoogamannosiri dinona.’

Maariyaami qolte togo yitu: ‘Ani Yihowa borojjichchooti! Ati yiitto gede ikkoe.’ Hakkunni gedensaanni sokkaanchu haꞌri.

Hakkiinnino Maariyaami Elsaabeexi laꞌara hakkawotenni hadhu. Elsaabeexi Maariyaami huuro macciishshituta, godobbe noo qaaqqi hagiidhe kubbi. Elsaabeexi Maganu ayyaaninni woꞌmite, ‘Ati meentu duuchchunku mereero maassamoottate’ yite Maariyaamira coyidhu. Maariyaamino Elsaabeexi ledo sase agana keeshshite qaese Naazireete higgu.

Maariyaami Yooseefi yinanni manchira assidhara qixxaabbe no. Yooseefi kayinni, Maariyaami godobbe noota afiti adhasera dihasiꞌrino. Maganu sokkaanchi kayinni togo yiisi: ‘Maariyaami adha waajjitooti. Ise godobbinohu Maganu ayyaaninniitina.’ Konni daafira Maariyaaminna Yooseefi adhame, Yesuusi ilamanno yanna agari.