Gebirieeli Maariyaami Hasaawisi

Galiilaho Naazireetete katamira heedhannoti Maariyaami yinanni beetto no; ise Elsaabeexi fiixaati. Yooseefi yinanni hanaatsichi Maariyaami adhara coyiꞌramino. Elsaabeexi godobbunku lee agana ikke heeꞌreenna, Gebirieeli yinanni sokkaasinchi Maariyaamiwa marino. Isi togo yiise: ‘Maariyaami, keeru ledokki heeꞌro. Yihowa ate maassiꞌrinohe.’ Maariyaamira Gebirieeli yiinori dileellinose. Hakkiinni isi togo yiise: ‘Godobbe labbaa beetto ilatta; suꞌmano Yesuusa yite fushshattasi. Isi Moote ikkanno. Mangistesino hegerera heedhanno.’

Maariyaami sokkaasinchoho, “Ani seemotena kuni coyi hiitto ikke ikkanno?” yitu. Gebirieeli qole togo yiise: ‘Yihowa dandaannokki coyi dino. Qullaawu ayyaani ate aana dirranno; atino labbaa qaaqqo ilatta. Fiixikki Elsaabeexino godowii no.’ Hakkiinni Maariyaami togo yitu: ‘Ani Yihowa borojjichooti. Ati yootto gede ikkoe.’

Maariyaami Elsaabeexi xaꞌmitara Yerusaalamete katama hadhu. Maariyaami Elsaabeexi daae yituta, Elsaabeexi godowi giddo noo qaaqqi kukkubbi. Elsaabeexi qullaawu ayyaani woꞌmeennase togo yitu: ‘Maariyaami, ate Yihowa maassiꞌrinohe. Mootichiꞌya ama miniꞌyara daase anera lowo ayirrinyeeti.’ Maariyaami, ‘Woꞌmu wodaniꞌyanni Yihowa galaxxeemma!’ yitu. Maariyaami Elsaabeexi ledo sase agana keeshshitu gedensaanni, gobbase Naazireete higgu.

Yooseefi Maariyaami godobbinota afiti, ise agurara hedino. Ikkollana sokkaasinchu haaqeetenni isiwa mare togo yiisi: ‘Ise bushare diassitinona, adha waajjitooti.’ Yooseefi Maariyaami galtesi assiꞌre minisira adhe haꞌrino.