Fooqete Mini Giddo

LAMU barri gedensaanni, Hamusete hashsha Yesuusinna 12 hawaariyaatesi Faasiku ayyaani hurbaate ittara konni halaꞌladu fooqete minira daggino. Gobba hige fulanni noohu Asqorootu Yihudaati. Isi fule haꞌranni noohu kakkalaano Yesuusa amaddanno gara kulansaraati.

Mittu barri albaanni Yihuda kakkalaanonniwa mare togo yee xaꞌmino: ‘Yesuusa amaddinanni gede assummoꞌnero ma uyitinannie?’ Insano, ‘Sajjoo birra’ yitu. Xa Yihuda haꞌranni noohu konni manninni xaade Yesuusi noowa leellishansaraati. Kuni lowo geeshsha busha coye diꞌꞌikkino?

Faasiku ayyaani hurbaati kaino. Ikkollana Yesuusi wole baxxino hurbaate hanafi. Hawaariyaatesira tima oye togo yii: ‘Kuni kiꞌnera uyinanni maalaꞌyaatina itte.’ Hakkiinnino burcuqqote noo woyine uyinsahu gedensaanni, ‘Tini kiꞌne daafira duꞌnantanno mundeeꞌyatina agge’ yiinsa. Qullaawu Maxaafi konne hurbaate, ‘Mootichchu hurbaateeti’ yaanno.

Isiraeelete manni Gibitsete noo waro Maganu sokkaanchi nafaransaanni sainotanna, Gibitsete manni mine noo bayira shiinota qaagate Faasiku ayyaana ayirrissino. Xa kayinni Yesuusi rosaanosi isonna heeshshosi insara sayise uyinota qaaggara hasiꞌrino. Konne baxxino hurbaate diru dirunku ayirrissanno gede kulinonsahuno iseraati.

Mootichchu Hurbaate ittu gedensaanni, Yesuusi hawaariyaatesi worbuullenna ammanatenni jawaattinore ikkitanno gede kulinsa. Goofimarchohono Maganoho faarso faarsitu gedensaanni hadhu. Hakkawote yanna lowo geeshsha hashshitino; hashshu taaloote ikke saino. Hakkiinni kaꞌe hiikka hadhuro hanni laꞌno.