Damboowu Hurbaatinni Iimi Moote Daafira Maa Ronseemmo?

1-2. (a) Yesuusi reyosi bikkunni qaangeemmo gede kulasi dhagge ikkitannonkekkihu mayiraati? (b) Konninni aanchine hiittenne Yesuusi akatta xiinxallineemmo?

KIRISTOOSI Reyo Qaagooshshe ayirrinsanni woyite maa maa assinanniro kula dandaatto? Ninke giddo rooriidi Mootichu Hurbaate ayirrinsanni woyite maa assinanniro anfoommo. Mayira? Korkaatuno kuni hurbaati raqaxaminoha diꞌꞌikkino. Ikkirono, tini lowo geeshsha hasiissanno qixxaawooti. Konnira ‘Hurbaatu damboowa woy bikkunniha ikkinohu mayiraati?’ yine xaꞌmineemmoha ikkara dandaanno.

² Yesuusi uullate aana noo yannara, lowo geeshsha hasiisanno halaale raqaxaminokkinna huwatate qarrisannokki garinni rosiisatenni egennamino. (Mat. 7:28, 29) Hatteente gede, isi reyosi amanyootu noo garinninna bikkunni qaangeemmob gede kulinonke. Konninni aanchine Mootichu Hurbaati daafira, hattono Yesuusi coyiꞌrinonna assinore seekkine xiinxallineemmo. Qoleno Yesuusi umosi heeshshi assannoha, worbanna baxillaancho ikkinota albinni roore huwanteemmo; hattono isi lawishsha harunsa dandiineemmo gara ronseemmo.

YESUUSI UMOSI HEESHSHI ASSANNOHO

3. Maatewoosi 26:26-28te kulloonni garinni, Yesuusi xintinohu Qaagooshshu Ayyaani bikkunniho yineemmohu mayiraati? Konni Hurbaatira shiqinohu lamu damboowu coyi maa riqiwanno?

³ Yesuusi 11 ammanantino soqqamaasinesi ledo heeꞌre reyosi Qaagooshshe xintino. Isi Faasiku ayyaaninni gatino hurbaate haaꞌre konne damboowa ayyaana xintino. (Maatewoosi 26:26-28 nabbawi.) Isi hakko nooha irsho nookki timanna woyine horoonsiꞌrino. Yesuusi soqqamaasinesira kuri lamunku coyi shiima yanna gedensaanni insara yee kakkalo asse shiqishannoha maalasinna mundeesi riqiwannota kulinonsa. Soqqamaasinesi kuni lowo geeshsha hasiisannohu haaru hurbaati damboowa ikkasinni dhagge assidhinokkiha ikkara dandaanno. Mayira?

4. Yesuusi Maartara amaalino amaale isi Qaagooshshu Ayyaani bikkunniha ikkanno gede assino korkaata huwatate kaaꞌlitannonkehu hiittoonniiti?

⁴ Hanni boodu agani albaanni Yesuusi uullate anna soqqaminohu sayikki diri giddo muli jaallasi yaano Aliaazaari, Maartanna Maariyaami minira maꞌre heeꞌreenna ikkinore laꞌno. Hatte yannara Yesuusi insa rosiisa hanafino. Maarta mine nooha ikkirono, ayirradu wosinchira sagale qixxeessate kabbi facci yitino. Yesuusi tenne lae, Maarta lowo sagale qixxeessa hasiissannohu woꞌmante yannara ikkinokkita huwattanno gede shaqqillunni amaalinose. (Luq. 10:40-42) Gedensoonni Yesuusi reyara shiima saate gatte heedheenna isi umisi hattenne amaale harunsino. Isi Qaagooshshu Ayyaana bikkunni ayirrisino. Tini Yesuusi daafira maa rosiissannonke?

5. Mootichu Hurbaati bikkunniha ikkasi Yesuusi daafira maa rosiissannonke? Tini Filiphisiyusi Sokka 2:5-8te ledo sumuu yitannohu hiittoonniiti?

⁵ Yesuusi coyiꞌrannorinnino ikko assannorinni umosi heeshshi assannoha ikkinota leellishino. Konnira isi uullate aana sayisinohu jeefote hashsha umosi heeshshi assino. (Mat. 11:29) Yesuusi mannu ooso shiqishshanno kakkalo baalanta roortanno kakkalo shiqishara kae nootanna Yihowa reyotenni kayise iima Moote assannosita afino. Ikkirono, isi reyosi qaagooshshe hoola yinoonni jila jille ayirrinsanni gede hajaje umisira gara ikkinokki ayirrinye dihasiꞌrino. Ikkollana isi rosaanosi dirunni mitte higge konni bikku hurbaatinni reyosi qaaganno gede kulinonsa. (Yoh. 13:15; 1 Qor. 11:23-25) Kuni lowo geeshsha hasiisannohu damboowu hurbaati Yesuusi umosi heeshshi assannoha ikkinota leellishanno. Mootenke umosi heeshshi assannoha ikkinota afanke tashshi assitannonke!—Filiphisiyusi Sokka 2:5-8 nabbawi.

6. Fonqolu iillannonke yannara Yesuusi lawishsha harunsa dandiineemmohu hiittoonniiti?

⁶ Yesuusi gede umonke heeshshi assa dandiineemmohu hiittoonniiti? Uminke horo balaxisiisa agurre wolootu horo balaxisiisatenniiti. (Fil. 2:3, 4) Hanni Yesuusi uullate aana sayisinoha jeefote hashsha qaagi. Yesuusi shiima yanna gedensaanni qarrame reyannota afinoha ikkirono, isi reyonni xissiisidhanno soqqamaasinesiri huluullinosi. Konni daafira, isi jeefote hashsha rosiisinonsa, jawaachishinonsa, hattono sheshifachishinonsa. (Yoh. 14:25-31) Yesuusi umisinni roorse wolootu daafira hede, isonooto heeshshi assannoha ikkinota leellishino. Addaho, isi ninkera dancha lawishsha ikkinonke!

YESUUSI WORBAHO

7. Yesuusi Mootichu Hurbaate xinti gedensaanni worbimma leellishinohu hiittoonniiti?

⁷ Yesuusi Mootichu Hurbaate xinti gedensaanni, worba ikkinota leellishino. Hiittoonni? Yesuusi Magano xonino yine beebbate shinannisita afinoha ikkirono, Annisi fajjinore maahoyye yiino. (Mat. 26:65, 66; Luq. 22:41, 42) Yesuusi, Maganu suꞌminna aliidimmasi ayirritanno gede, hattono maaro eanno manni hegerera heeꞌranno faro afiꞌranno gede Yihowara ammanamino. Qoleno Yesuusi harunsaanosi shiima yanna gedensaanni iillannonsa fonqolira qixxeessinonsa.

8. (a) Yesuusi ammanantino soqqamaasinesira maa kulinonsa? (b) Yesuusi reyi gedensaanni harunsaanosi isi lawishsha harunsitinohu hiittoonniiti?

⁸ Yesuusi yaachishannosi coyi aana illachisha agure ammanantino soqqamaasinesi kaaꞌlate aana illachishasi worba ikkinota leellishshanno. Yesuusi Yihuda haꞌrisi gedensaanni xintinohu bikku hurbaati, ayyaanunni buurantanno harunsaanosi duꞌnantinoti Yesuusi mundeenna haaru gondoori miilla ikkansa kaaꞌlitannonsa gara qaagganno gede assannonsa. (1 Qor. 10:16, 17) Yesuusi harunsaanosi iimira haꞌrate ikkadda ikkitanno gede, Annisinna isi ma assitara hasiꞌrannoro kulinonsa. (Yoh. 15:12-15) Qoleno Yesuusi soqqamaasinesira iillannonsa fonqolo kulinonsa. Hakkiinni isi umisi lawishsha harunsitanno gede “Waajjitinoonte” yiinonsa. (Yoh. 16:1-4a, 33) Lowo diri gedensaannino Yesuusi harunsaano uminsa horo agurtenna worbuulle ikkite isi lawishsha harunsitino. Insa shota ikka hooginsarono, fonqolu iillannonsa yannara mimmito irkissino.—Ibi. 10:33, 34.

9. Yesuusi gede worbimma leellisha dandiineemmohu hiittoonniiti?

⁹ Hatteente gede, ninkeno Yesuusi gede worbimma leellinsheemmo. Lawishshaho, ammanansanni kainohunni dartu iillinonsa roduuwanke kaaꞌlate worbimma hasiissanno. Mito woyite roduuwanke beebbate usurransara dandiinanni. Togoo yannara, insa kaaꞌlate dandiinummore baala assa lawishshaho insara halamme coyiꞌra hasiissannonke. (Fil. 1:14; Ibi. 13:19) Worbimma leellisha dandiineemmoti wole doogo woꞌmante yannara ‘mittoreno bashshi assinummokkinni’ sabbakate. (Soq. 14:3) Yesuusi gede, mannu giwinkerono, hattono darte iillishinkerono Maganu Mangiste sokka duduwate murciꞌnoommo. Mito woyite kayinni waajjineemmoha ikkara dandaanno. Ikkina tenne yannara mayi kaaꞌlannonke?

10. Mootichu Hurbaatira albaanni noo lamallara maa assa hasiissannonke? Mayira?

¹⁰ Kiristoosite wodote kakkalonni afiꞌnoommo hexxo hedanke, albinni roore worbuulle ikkineemmo gede kaaꞌlitannonke. (Yoh. 3:16; Efe. 1:7) Qaagooshshu Ayyaanira albaanni noo lamallara wodote noonke diniqo lexxitanno gede kaaꞌlanno tunceenyi noonke. Tenne yannara Qaagooshshu Ayyaanita Qullaawu Maxaafi niwaawe nabbawi, hattono Yesuusi reyo daafira kultanno xagge huuccatto assidhe hiinci. Hakkiinni Mootichu Hurbaate ayirrisate mitteenni gamba yineemmo woyite, timunna woyine afidhino tiro, hattono kuri coyibba riqibbannota taalle nookki kakkalo daafira seekkine huwanteemmo. Yesuusinna Yihowa assitinonkeri ninkeno ikko banxeemmo manna kaaꞌlanno gara wodanchanke hexxonke kaajjishshanno; hattono goofimarchu geeshsha waajjinummokkinni kaajjine uurrineemmo gede kakkayissannonke.—Ibi. 12:3.

11-12. Xaa geeshsha maa ronsoommo?

¹¹ Xaa geeshsha ronsummonte gede, Mootichu Hurbaati muxxe ikkitinota wodote kakkalo calla ikkikkinni, Yesuusi leellishinoha xagge ikkannoha umo heeshshi assatenna worbimmate akata qaangeemmo gede assannonke. Yesuusi xaano kuri akatta leellishannota afanke tashshi assitannonke; isi Kakkalaanote Biilo ikke ninke gato afiꞌneemmo gede Maganoho eegamannonke. (Ibi. 7:24, 25) Tennera galata qolate, Yesuusi hajajino garinni reyosi qaagooshshe ammanamme ayirrisa hasiissannonke. (Luq. 22:19, 20) Konne ayyaana diru giddo baxxino barra yaano Niisaani 14nni ayirrinseemmo.

¹² Mootichu Hurbaati bikkunniha ikkasi, Yesuusi ninkera yee reyanno gede assinosiha wole akata huwanteemmo gede kaaꞌlannonke. Isi uullate aana noo yannara, konni akatinni egennamino. Kuni akati maati?

YESUUSI BAXILLAANCHOHO

13. Yohaannisi 15:9 nna 1 Yohaannisi 4:8-10 Yihowanna Yesuusi leellishinonke baxille xawissannohu hiittoonniiti? Insa leellishshino baxillinni horo afidhannori ayeooti?

¹³ Yesuusi assootisi baalunkunni Maganu ninke lowo geeshsha baxannonketa leellishino. (Yohaannisi 15:9; 1 Yohaannisi 4:8-10 nabbawi.) Baalunkunni roore Yesuusi baxillunni kae heeshshosi ninkera uyinonke. Qullaawu ayyaaninni buurammoommore woy “wolu geꞌreewi” wido ikkinummorono, Yihowanna Yesuusi wodote kakkalo widoonni leellishshinonke baxillinni horo afiꞌneemmo. (Yoh. 10:16; 1 Yoh. 2:2) Qaagooshshu ayyaaniwa shiqanno coyino Yesuusi rosaanosi baxannotanna insara hedannonsata leellishanno. Hiittoonni?

14. Yesuusi harunsaanosira baxille leellishinohu hiittoonniiti?

¹⁴ Yesuusi raqaxaminoha ikkikkinni bikku hurbaate xinte qullaawu ayyaaninni buurantino harunsaanosi baxannota leellishino. Yannate gedensaanni buurantino harunsaanosi Qaagooshshu Ayyaana diru kiiro babbaxxitino basera lawishshaho usuru mine ayirrisa hasiissinonsa. (Aju. 2:10) Insa Yesuusira hajajante Qaagooshshu Ayyaana ayirrisa dandiitino? Ee dandiitino!

15-16. Mitootu qarru giddo heedhe Qaagooshshu Ayyaana ayirrisa dandiitinohu hiittoonniiti?

¹⁵ Umi xibbi dirinni kayise yannanke geeshsha, addu Kiristaani Yesuusi reyo qaagooshshe ayirrisate sharramanno. Insa dandaaminsa deerrinni Mootichu Hurbaati yannara assinannire assitanno; mitootu togo assitannohu buutote qarri giddo heedheeti. Hanni mite lawishshuwa laꞌno. Roduu Heerooldi Kingi Chayinaho callisi usurame noo yannara Yesuusi reyo qaagooshshe ayirrisate dandaamisire baala assino. Isi noosire horoonsiꞌre maaxame Qaagooshshu Ayyaani yannara horoonsiꞌnanni coyibba qixxeessanno. Qoleno isi dandaamisi deerrinni Qaagooshshu Ayyaana ayirrinsanni barra kiire afate woꞌnaalanno. Qaagooshshu Ayyaana ayirrinsanni yanna iillitanno woyite callisi faarso faarsanno, huuccatto assiꞌranno, hattono Qullaawu Maxaafi aana xintantino lallawo shiqishanno.

¹⁶ Hanni wole lawishsha laꞌno. Layinkihu Alamete Oli yannara usuranyu kaampera usuraminori meya roduuwi heeshshonsa qarru giddo tuge Mootichu Hurbaate ayirrisino. Konne ayyaana ayirrinsanni woyite horoonsiꞌnanni coyibba bikkunnita ikkitino daafira, insa mannu afinsakki Mootichu Hurbaate ayirrisa dandiino. Insa togo yiino: “Timanna woyine waajjo hocco karroonni kursera worre, baalunku mitteenni hubbi yine uurrineemmo. Korreentete caabbichi xawo fushshankera dandaanno daafira shaama qasiꞌnoommo. . . . Wolqanke suꞌmisi qullaawanno gede assate horoonsiꞌneemmo yine Anninkera lende qaale eꞌnoommo.” Kuri roduuwi kaajjado ammana noonsata leellishino! Qoleno Yesuusi qarru giddo nafa heeꞌne Qaagooshshu Ayyaana ayirrinseemmo gede assasi bayira baxillesi leellishshanno!

17. Ninkeneeto mayine xaꞌma dandiineemmo?

¹⁷ Qaagooshshu Ayyaani gambisanno woyite, ninkeneeto togo yine xaꞌma dandiineemmo: ‘Yesuusi gede baxille leellisha dandeemmohu hiittoonniiti? Umiꞌya qiniitinni roorse roduuwiꞌya daafira hedeemmo? Roduuwiꞌya wolqansara aleenni ikkino coye assitanno gede hasiꞌreemmonso, dhukansa hedeemmo?’ Ninke baalunku Yesuusi lawishsha harunsine ‘wolootu qarra uminkehu gede assine’ hendo.—1 Phe. 3:8.

YESUUSI LAWISHSHA HARUNSE

18-19. (a) Albillittete daafira maa hexxa dandiineemmo? (b) Maa assate murciꞌrootto?

¹⁸ Kiristoosi Reyo qaagooshshe ayirrinseemmohu hegere geeshsha diꞌꞌikkino. Yesuusi bayiru qarri yannara ‘daanno’ woyite uullate aana gattinore “Maganu doodhinore” gamba assanno; hakkunni gedensaanni Qaagooshshu Ayyaana diayirrinsanni.—1 Qor. 11:26; Mat. 24:31.

¹⁹ Qaagooshshu Ayyaana ayirrisa agurrihu gedensaannino, Yihowa manni konne bikku hurbaate umo heeshshi assate, worbimmatenna baxillu lawishsha asse qaagannoti egennantinote. Qaagooshshu Ayyaana ayirrisate tunceenya afidhinori, hatte yannara heeꞌranno mannira konni ayyaanire kultannonsati dihuluullissannote; korkaatuno konni ayyaani daafira afansa kaaꞌlitannonsa. Ikkollana xa konni ayyaaninni horo afiꞌrate, Yesuusi gede umonke heeshshi assate, hattono worbimmanna baxille leellishate murciꞌra hasiissannonke. Hatto assinummoro, Yihowa baꞌraasannonketa dihuluullameemmo.—2 Phe. 1:10, 11.