Ayyaanaame Alame Giddo Kaꞌino Finqille
Sheexaanu hamashsho horoonsire Heewani coyishiishi, iseno Sheexaanu Maganu aana kayisino finqillera miilooꞌmitu
Yihowa kalaqinori duuchchanti ayyaanu kalaqama danchuulleho. Mittu sokkaanchi kayinni yannate gedensaanni bunshete widira higi. Isino Sheexaane Daawuloosiiti. Sheexaanu uullate aana noo manni Yihowa magansiꞌrante iso magansiꞌrara hasiꞌri. Ikkinorichchino konni worroonni nooho:
Edenete gannatete giddo, coommanno guma laaltannoti batinynye haqqe no. Yihowa Addaamiranna galtesi Heewanira, tenne haqqe guma hasidhu gede ita dandiitannota kulinonsa. Ikkollana, Maganu gumase ittannokki gede kulinonsati mitte haqqichcho no. Tenne haqqichcho guma ittiniro reyitinanni yiinonsa.—Kalaqo 2:9, 16, 17.
Mitto barra Heewani callase heedheenna hamashshu coyishiishise. Addinta, coyiꞌranni noohu hamashsho ikkikkinni lawise coyiꞌranni noohu Sheexaane Daawuloosiiti. Sheexaanu Heewanira ittooti yinoonni guma itittaro Maganu gede xiinxalla ikkattanna direyatta yiise. Yinoseri kayinni kaphphoho. Ikkollana Heewani Sheexaane ammante hoolloonni guma ittu. Hakkonni gedensaanni keeshshite Addaamirano uyitu isino iti.—Kalaqo 3:1-6.
Tenne halaalaancho xaggenni Sheexaanu finqilanna kaphphaancho ikkasi ronseemmo. Heewanira Maganu hajajo diigittaro direyatta yee kulinose. Kulinoseri kayinni kaphphoho. Iseno ikkito Addaami reyino. Sheexaanu cubbo loosino daafira reyasi digattanno. Ikkollana techcho geeshsha heeshshote keeshshe mannu ooso sorisiisanni no. Xaa geeshsha kaphphosi agurikkinni mannu Maganu seera diiganno gede assate woꞌnaalanni no.—Yohaannisi 8:44.
Wole Sokkaanono Finqiltu
Yannate gedensaanni wole sokkaanono bunshete widira higgu. Kuriuu sokkaano uullate aana noo xumuulle meento laꞌe insa ledo siimu xaadooshshe assa hasidhu. Konni daafira uullara dagge mannu maala uddidhe meento uminsara adhitu. Tini ikkito Maganu hedo ledo sumuu yitannokkite.—Kalaqo 6:1, 2; Yihudi 6.
Bushuulle sokkaano meentu ledo siimu xaadooshshe assate uullara daggu
Tenne sokkaano ikkito mannu oosora buutote qarra iillishshino. Kuriuu sokkaano adhitu meenti ooso ilino, ikkollana tini ooso mannu ilanno gedeere diꞌꞌikkitino. Lophphitu gedensaanni finqilaasine, xagaraammanna jigeeyye ikkitu. Konni gedensaanni uulla finqillete woꞌmitinohura Yihowa jawaatu lolahinni bushuulle manna hunate muri. Konni lolahinni gattinori keeraanchu Nohinna maatesi callaati.—Kalaqo 6:4, 11; 7:23.
Bushuulle sokkaano kayinni ayyaanaame alame higgino ikkinnina, direyitino. Ikkollana qorichchishantino. Maganu maate ikkitino keeraano sokkaanowa higgaranna hattono mannu maala uddidhara difajjinooninsa. Hakkii saeno bayira yoo barra reyitanno.—2 Pheexiroosi 2:4; Yihudi 6.
Sheexaanu Iiminni Tugami
Sheexaanunna bushuulle sokkaanosi iiminni uullara tugantino
Kumunna honsu xibbi diri hanafo qooxeessira, iima olu kaino. Qullaawu Maxaafi kifile ikkinohu Ajuujate maxaafi ikkinore xawisanni: “Hakkunni gedensaanni gordoho iima olu kai; Mikaeeli [reyotenni kainohu Yesuusi Kristoosinna] isi sokkaano dhudhuufunna [Sheexaanu] sokkaanosi ledo olantu. Coyella kayinni dhudhuufunna sokkaanosi qeelantu. Hakkunni gedensaanni gordu iima bayichcho afidhara didandiitino. Lowo dhudhuufino woro hige tugami isino manna duuchcha soꞌrisiisannohu Durriisa woy Sheexaane yaamame woshshamannohu biꞌre hamashshooti. Isino iiminni uullate aanira tugami sokkaanosino isi ledo tugantu” yaanno.
Tini ikkito marichchi guma abbitu? Kuni maxaafi ikkinore lede: ‘Konnira gordunna giddosi heedhinanniri duuchchu hagiidhe!ˈ yaanno. Konni gedensaani bushuulle sokkaano iima heeꞌra dandiitinnokkihura danchuullu sokkaano hagiidhitino. Ikkollana uullate aana heeꞌranno mannina? Qullaawu Maxaafi: ‘Uullatenna baaraho kayinni bayisibao! Hakkuno mayiraati? Sheexaanu shiima yanna gattinota afe lowo hanqinni kiꞌnewa dirrinonaˈ yaanno.—Ajuuja 12:7-9, 12.
Addaho, Sheexaanunna bushuullu miillasi uullate aana noo manna sorisiissanninna buutote qarra iillishshanni no. Kuriuu bushuullu sokkaasine durriissate yaamantanno. Duuchchunku bushuullehonna Maganu diinnaati.