“Foorretewiinni Xooqqe”

1, 2. Beliaami Yihowa gosa gawajjate busha mala malinohu hiittoonniiti?

QULXUꞌME woshshaadanno manchi woshshaadate injiitanno base mare no. Kuni manchi hiittoo qulxuꞌme amada hasiꞌrannoro seekke assaawino. Manxaqqosira qulxuꞌme baxxannore worihu gedensaanni, wayi giddora tugi. Shiima yanna gedensaanni, manxaqqote siiwo lowo geeshsha bedeedantu; hakkiinnino amadino qulxuꞌme goshooshe fushshiꞌri. Muushshi yaanni, ‘Manxaqqoꞌyara qulxuꞌme baxxannore togoore hawalle wodhummo’ yii.

² K.I.A. 1473, Beliaami yinannihu mittu manchi woshshaado ikkannore hasanni no. Isi woshshaada hasiꞌrinori kayinni Maganu gosaati; hakkawaro insa Hexxote Gobbara gamaho Moaabi xawira dukkaꞌnite no. Beliaami ‘Ani Yihowa masaalaanchooti’ yiirono, Isiraeele rumara woxunni hirroonniho hafuuraamo manchooti. Ikkeennano, Beliaami Yihowa hoolinosi daafira Isiraeele maassiꞌrino ikkinnina dirumino. Beliaami woxe adha lowo geeshsha yorino daafira, Isiraeele kabbaade cubbo loossuro Maganu umisi rumannonsa yee insa soꞌrisiisate hedi. Tenne hedosi qineessiꞌrate, Moaabire xumuulle seenne woshshaado asse horoonsiꞌrino.—Zehulqu 22:1-7; 31:15, 16; Ajuuja 2:14.

3. Beliaami malino mali mageeshshi geeshsha qiniino?

³ Beliaami malino mali qiniiyya? Ee, mito geeshsha qiniino. Tonnu kuminni kiirranniri Isiraeelete labballi “Moaabi seenni ledo foorte” woshshaadotenni amadantino. Hakkiinni saꞌeno, Moaabi maganna magansidhino; hatte maganna giddo mittu Feegoori Baꞌꞌaali yinanniho giwisannoho; kuni magani sirote woyi siimu xaadi maganooti. Konne assansanni, 24,000 ikkitanno Isiraeele Hexxote Gobbara gamaho heedhe waxaaxxino. Tini lowo goofaati!—Zehulqu 25:1-9.

4. Kumunni kiirranni Isiraeele foorate widira massinonsahu maati?

⁴ Kageeshshi manna goofate widira massinohu maati? Hakkawote Isiraeelete gosa giddo lowo manni giddonsa busha wodana kalaqiꞌre, Yihowawiinni xeertiꞌre no; Isi kayinni Gibitsetenni fushshinonsaho, halalli gobbara marrainonsahonna hexxote gobba gamira keerunni massinonsa Maganooti. (Ibiraawuyaani 3:12) Hawaariya Phaawuloosi tenne qaage togo yiino: “Insa giddonni gamu foorteenna mittu barrinni lemiina sasu kumi manni waxaaxino gede, foorate gade heedhoonkenke.”a—1 Qorontoosi 10:8, NW.

5, 6. Isiraeele Moaabi xawira loossino cubbire kultanno xagge ninkera lowo geeshsha horoontannota ikkitinohu mayiraati?

⁵ Zehulqu maxaafira noo xagge, xaa yannara hexxote gobbanni lowo geeshsha roorannowa eꞌara kaꞌe noorira Maganu gosara lowo roso afidhino. (1 Qorontoosi 10:11) Lawishshaho siimu xaado lainohunni tenne alamera noo lao, hundite Moaabi gosa lao gedeete, isinni hakkiinni saꞌe maaeeltinote. Qoleno diru dirunku kumunni kiirranni Kiristaani biꞌre Isiraeele amaddu woshshaadonni foorretenni woshshaadamanno. (2 Qorontoosi 2:11) Mittore waajjikki mitte Miidiyaami mancho haare Isiraeele dukkaꞌnitinowa umisi dunkaana eessiꞌrinohu Zemberi yinanni manchi gede, xaa yannara Maganu manni ledo gamba yitannori mitootu mannooti amanynyootu maaeelle Kiristaanu songo giddora eessate woꞌnaaltino.—Zehulqu 25:6, 14; Yihuda 4.

⁶ Xa ateneeto Moaabi xawira noottohu gede assite laꞌꞌatto? Shillimmaatekki yaano seeda yanna agadhitanni keeshshoottota muli yanna giddo daggannota haaro alame quqquxante agadhitanni nootto? Hatto ikkiro, “Foorretewiinni xooqqe” yitanno hajajo agadhitanni Maganu baxillinni fulittokki heeꞌrate dandaamannohere baala assi.—1 Qorontoosi 6:18.

FOORRE MAATI?

7, 8. “Foorre” maati? Foortannori wixidhinoha mixxitannohu hiittoonniiti?

⁷ Qullaawu Maxaafi giddo horoonsiꞌnoonni garinni “foorre” (Girikete afiinni, poorniya) yaanno qaali, Qullaawa Borro faqqaddanno adhama gobbaanni assinanniha hoolloonniha siimu xaado xawisanno. Qoleno kuni qaali soorro, fontete looso loosa, adhaminokki manni assannoha siimu xaado, afoonninna ofollaanchu widoonni assinanniha siimu xaado, hattono adhinoonnikki woyi adhammoonnikki manchiha sirote biso amammadano mitteenni amadannoho. Hakkiinni saeno, meyaati meyaate ledo, woyi labbaahu labbaahu ledo assannohu siimu xaadinna saadate ledo siimu xaado assa, hattono saadanniha sirote biso busha hedonni amammada foorrete widira gaamantanno.b

⁸ Tenne hajo lainohunni Qullaawa Borro yitannori teeꞌlinore diꞌꞌikkino: Foortannori Kiristaanu songo miilla ikkite heedharanna hegere heeshsho ragidhara didandiitanno. (1 Qorontoosi 6:9; Ajuuja 22:15) Togoo mannooti wole gatteenna xa nafa, ammanama hooganna insaneetira ayirrinynye hooga, maatete giddo gaance, xurino tiia, hasiꞌnikki godowa, xiwananna reyo nafa gattukki lowo qarra uminsa aana abbidhanno. (Galatiya 6:7, 8) Buutote qarra abbitannota togoo doogo haꞌra hiittoo gowwimmaati! Batinynyu manni umi soꞌro loosanno wote yaano teeda baꞌino misilla laꞌꞌanno wote, albillittete daara dandaannoha buutote qarra diassaawanno; tini dadillissannote.

TEEDA BAꞌINO MISILLA LAꞌꞌA UMI SOꞌROOTI

9. Teeda baꞌino misilla laꞌꞌa mitu manni yaanno gede gawajjitannokkite? Xawisi.

⁹ Batinynye gobbara, teeda bainore amaddino misilla, filmenna borro gaazeexxa hirranni baseranna hattoo bayichcho woꞌmitino; hattono muuziiqunna televizhiinete widoonni shiqqanno; Interneeteteno togoori woꞌmino.c Togoo misilla mitu manni yaanno gede mittoreno digawajjitannoteni? Deeꞌni! Togoo misilla laꞌannorira maasterbeeshiine (yaano siimu xaadi yorto qiissiꞌrate sirote biso amammaxxa) gade ikkitansara dandiitanno; qolteno siimu xaadi araadonna kalaqamu gobbaanni ikkitino yorto heedhannonsa gede assitannoti, hattono galtete giddo sumuu yaa hooga heedhanno gede, wole gatteenna adhama diigantanno gede assitannoti “saalfachchishshannoti siimu xaadi yorto” kalaqantansara dandiitanno.d (Roomu Sokka 1:24-27; Efesooni 4:19) Mittu xiinxallaanchi, siimu xaadi araado kaanserete xibbi gedeeta ikkitinota coyiꞌrino. Togo yiino: “Lophphitanninna halaꞌlitanni hadhanno. Roore wote woyya hooggara dandiitanno; qoleno ise xagisano ikko hursa kabbaadete.”

10. Yaaqoobi 1:14, 15 nooha xintu seera loosu aana hosiisa dandiineemmohu hiitte doogganniiti? (Qoola 115 noo saaxineno lai.)

¹⁰ Yaaqoobi 1:14, 15 yitannore wodanchi: “Mittu mittunku manchi jifamannohu [“fatanamannohu,” NW] isi umisi yortonni [goshooshamanninna] dogamanniiti. Hakkunni gedensaanni yorto godobbe cubbo iltanno; cubbuno lophphihu gedensaanni reyo ilanno.” Konni daafira busha yorto surrekkira dagganno wote, hatte hedo giddokkinni fushshate rakke qaafo adhi! Lawishshaho hedittokki teeda baꞌino misile laittoro, rakke alba wolewa higi, woyi kompiyutere cufi, woyi televizhiinete xaawa soorri. Maaeela yorto wolqakkira aleenni ikkite qeeltuhekki, togoo yortowiinni xeertiꞌrate hasiisannore baala assi!—Maatewoosi 5:29, 30.

11. Busha yorto qeeꞌlate sharrammeemmo wote, Yihowa addaxxineemmota leellinsheemmohu hiittoonniiti?

¹¹ Ninke umonke anfoommohunni roore afinonke Magani togo yee kaajjishe amaalinonkehu mulla diꞌꞌikkino: “Uulla mannimmaꞌne giddo noo yorto shiiyye; hakkurino foorre, batte, siimu xaadi yorto, busha hasattonna kaphphu magano magansiꞌra ikkitinote hafuurrete.” (Qolasiyaasi 3:5, NW) Tenne assa lowo sharro xaꞌmitannoti dikaandannite. Ikkollana kaaꞌlankera woshshiꞌneemmohu baxillaanchunna cincu iimi Anni noonke. (Faarso 68:19) Konni daafira busha hedo surrekkira dagganno wote, rakke iso woshshiꞌri. “Wolqa” aannohe gede huuccatto assiꞌri; hattono surrekki wole coye assaabbanno gede giddeessi.—2 Qorontoosi 4:7; 1 Qorontoosi 9:27; Qoola 118 noota “Busha Gade Qeeꞌla Dandeemmohu Hiittoonniiti?” yitanno saaxine lai.

12. ‘Wodaninke’ maati? Wodananke agadha hasiissannonkehu mayiraati?

¹² Hayyichchu manchi Salamooni togo yee borreessino: “Agadha hasiissanno coyi baalunkunni roorsite wodanakki agadhi; korkaatuno heeshshote buichcho isiwiinniiti.” (Lawishsha 4:23) ‘Wodaninke’ yaa giddiidi mannimmankeeti, yaano Maganu albaanni noonke ayimmaati. Hakkiinni saeno, hegere heeshsho afiꞌnammora woyi hoongammora dandiineemmohu, wolootu albaanni noonke ayimma garinni ikkikkinni Maganu ‘wodananke’ lae faradanno firde garinniiti. Tini assaawe mittoreno goꞌlitinota diꞌꞌikkitino; qolteno shotinse laꞌnannita diꞌꞌikkitino. Ammanamino manchi Iyyoobi meyaata doogimale laꞌꞌannokki gede illesi ledo gondooro woyi sheemaate eino. (Iyyoobi 31:1) Isi ninkera dancha lawishshaati! Mittu faarsaanchi, “Illeꞌya haafa coye laꞌannota hoolie” yee huucciꞌrasinni Iyyoobite gedee lao noosita leellishino.—Faarso 119:37.

DIINA GOWWIMMATENNI DOODHITINO DOORSHA

13. Diina ayeeti? Ise jaalla doodhitu wote gowwitino yineemmohu mayiraati?

¹³ Fooliishsho 3 laꞌnummonte gede, jaallanke danchu woyi bushu garinni quxxankera dandiitanno. (Lawishsha 13:20; 1 Qorontoosi 15:33) Lawishshaho, Diina yinanniteha Yaaqoobi ilino beetto lawishsha laꞌno. (Kalaqo 34:1) Diina anje danchu garinni lossinoonnita ikkiturono, gowwite Kanaani seenni ledo jaalooꞌmitino. Moaabi gosa gede, Kanaani gosano amanynyootu maaeellenni egennantinoreeti. (Zelewaawuyaani 18:6-25) Annisi maate giddo “baalunkunni roore ayirrado” ikkinohu Seekeeminna wolootu Kanaani labballi mittu qarri nookkiha Diina angansara eessiꞌra dandiitannoha lawinonsa.—Kalaqo 34:18, 19.

14. Diina doodhitino jaaloomi lowo qarra abbinohu hiittoonniiti?

¹⁴ Diina Seekeeminni xaaddu wote isi ledo siimu xaado assate hedo noosekkiha ikkara dandaanno. Ikkollana Seekeemi assinori, rooru Kanaani manni siimu xaadi hasattonsa kaꞌanno wote assannoreeti. Diina coyi goofi wote shelleggamase mittore kaaꞌlitinoseri dino; korkaatuno Seekeemi “amade bushiishinose.” Isi gedenaanni hige ise “lowo geeshsha baxinoha” ikkirono, tini baddalinose baddalo kiissannota diꞌꞌikkitino. (Kalaqo 34:1-4) Diinara iillinori ise calla goddaasinoha diꞌꞌikkino. Ise doodhitino jaaloomi, maatese woꞌma mishiishannorinna shollishannori kalaqamanno gede assino.—Kalaqo 34:7, 25-31; Galatiya 6:7, 8.

15, 16. Gara ikkitino hayyo afiꞌra dandiineemmohu hiittoonniiti? (Qoola 125 noo saaxineno lai.)

¹⁵ Diina tennenni dancha roso afidhinoha ikkiro, roso afidhinohu iillinosehunni buutote qarrinniiti. Yihowa baxxannorinna isira hajajantannori heeshshonsara xaqqamanno roso qarrunni rosa dihasiissannonsa. Insa Maganu yaannore macciishshitanno daafira, ‘hayyootu ledo haꞌra’ doodhitanno. (Lawishsha 13:20⁠a) Konni garinni “dancha doogo baala” hiitteetiro wodanchitanno, hattono hasiisannokki qarrinninna mitiimmanni gattanno.—Lawishsha 2:6-9; Faarso 1:1-3.

¹⁶ Maganuwiinni afiꞌnanni hayyo afiꞌrate lowo geeshsha hasiꞌrannohu, hattono hasiꞌrannota jawaantetenni huucciꞌratenninna Maganu Qaalenna ammanamino borojjichchi shiqishanno borro ganynye xiinxallatenni leellishannohu baalu tenne hayyo afiꞌra dandaanno. (Maatewoosi 24:45; Yaaqoobi 1:5) Hakkiinni saeno, Qullaawa Borro amaalera hajajamate kaaꞌlitannoti rambaꞌne hasiissanno. (2 Negesti 22:18, 19) Lawishshaho, mittu Kiristaanchi wodanisi xagaraamonna busha ikkinota ammane adhara dandaanno. (Ermiyaasi 17:9) Ikkollana gara ikkitinokki doogo haꞌreenna, xawinse baxillunni uyinannisi amaalenna kaaꞌlo adhanno?

17. Mitte maate giddo kalaqantara dandiitanno ikkito hiitteeti? Togoo wote, mittu anni beettosi ledo ammansiisanno garinni hasaawa dandaannohu hiittoonniiti?

¹⁷ Hanni aante noo ikkito assaawi. Mittu anni beettosi mittu wedellichchu Kiristaanchi ledo callase keeshshitannota faqqada giwanno. Beetto kayinni, “Anna, ane diammanattoe yaate? Bushare mittoreno diassineemmowe!” yitu. Tini beetto Yihowa baxxannotanna busha hedo noosekkita ikkitara dandiitanno; kayinni ‘haꞌrinshose Maganu hayyo’ noote yaa dandiinanni? Tini beetto ‘foorretewiinni xooqqanni’ noonso, gowwimmatenni ‘umise wodana addaxxitanni’ no? (Lawishsha 28:26) Tini beettonna annise tenne hajo heeshshi gotti assite assaabbanno gede kaaꞌlannonsahu woluno xintu seeri qulli yaahera dandaanno.—Lawishsha 22:3; Maatewoosi 6:13; 26:41 lai.

YOOSEEFI FOORRETEWIINNI XOOQINO

18, 19. Yooseefira mayi fatani iillisi? Isi konne fatana dandee sainohu hiittoonniiti?

¹⁸ Magano baxannohunna foorretewiinni xooqinohu Yooseefi yinannihu mittu xumu wedellichchi no. Yooseefi Diina ledo anna xaadanno. (Kalaqo 30:20-24) Isi anje heeꞌre rodoosi Diina gowwimmate doogo haꞌrase abbitino qarra laino. Tini xaggenna Maganu baxillinni fulikki heeꞌrate noosi hasatto, yannate gedensaanni Gibitsete gobbara mootichchisi galte amanynyoote bainore assara “barru tuqa” wotawaattusi wote foorretenni agartinositi dihuluullissannote. Hakkawaro Yooseefi borojjichcho ikkino daafira, loososi agure hakkiinni haꞌra didandaanno! Konni daafira konne fatana dandee heeꞌrate hayyichchanna waajjannokkiha ikka hasiissinosi. Konni garinni duuchchaage Phoxifaari galtera gimbi yiino, hattono gedensaanni isewiinni xooqino.—Kalaqo 39:7-12.

¹⁹ Hanni hedi: Yooseefi hatte mancho yortote illenni laꞌꞌannohanna siimu xaadire haaqiiꞌrannoha ikkoommero, coꞌiima uurrinshasi agadha dandaannoni? Dandaannoha dilawanno. Yooseefi cubbu widira massitanno assaawe hiincannoha ikkikkinni, Yihowa ledo noosi fiixooma kaffi asse laꞌꞌannoha ikkinota Phoxifaari galtera coyiꞌrinorinni buuxa dandiinanni. Isi togo yiino: “Mootichchiꞌya ate agurranna mitturino hoꞌlinoeri dino; hakkuno ati galtesi ikkootta daafiraati. Ikkina tenne bayira bunshe asse Maganu aana cubbo hiitto looseemmo?”—Kalaqo 39:8, 9.

20. Yihowa Yooseefira coye injeessinosihu hiittoonniiti?

²⁰ Yihowa, wedellichchu Yooseefi maatesiwiinni xeertiꞌre heeꞌre barru tuqa coꞌiima uurrinshasi agadhinota laꞌꞌanno wote mageeshshi geeshsha hagiidhannoro hedi. (Lawishsha 27:11) Gedensaannino Yooseefi usuru mininni fulanno gede calla ikkikkinni, Gibitsete qara ministerichchanna sagalete murrichcha ikkanno gede Yihowa coye biddi assino! (Kalaqo 41:39-49) Faarso 97:10 yitannori halaaleho! Xiqise togo yitanno: “Yihowa baxxinanniri, bushare gibbe. Isi ammanantannosiri lubbo agaranno; bushuullu angannino gatisannonsa.”

21. Mitte Afiriku gobbara heeꞌrannohu mittu rodii amanynyootunni daffaara ikkinota leellishinohu hiittoonniiti?

²¹ Hatteente gede xaa yannara batinynye Maganu soqqamaano “bushare gibbannotanna danchare baxxannota” leellishshino. (Amootsi 5:15) Mitte Afiriku gobbara heeꞌrannohu mittu wedellichchu rodii, rosu mine ledosi tamaartannoti mitte beetto mittore waajjitukki, ‘Shallagote fatana kaaꞌlittoero ledokki siimu xaado asseemma’ yitinosita coyiꞌrino. Isi togo yiino: “Hakkawontenni hasiꞌreemmokkita kulummose. Coꞌiima uurrinsha agadhaꞌyanni, worqetenninna birrunni roore waaga afiꞌrino ayirrinynyiꞌyanna aneneetira nooeti dancha lao baꞌannota hooꞌloommo.” Cubbu “yannate geeshshi hagiirr[e]” aara dandaannoha ikkirono, kuni harancho yanna hagiirri roore wote lowo qarra abbanno. (Ibiraawuyaani 11:25) Hakkiinni saeno, togoo hagiirri Yihowara hajajamatenni afiꞌnannihu baꞌꞌannokki hagiirri ledo heewisiinsiro mulla coyeeti.—Lawishsha 10:22.

MAAROTE MAGANI AANNOHE KAAꞌLO ADHI

22, 23. (a) Mittu Kiristaanchi kabbaade cubbo loosiro, hexxo dinosi yaa ikkinokkihu mayiraati? (b) Cubbo loosinohu mayi kaaꞌlo afiꞌra dandaanno?

²² Guunte xeꞌinonkere ikkinoommo daafira, ninke baalinke maalu yorto qeeꞌlatenna Maganu albaanni gara ikkinore assate sharrammeemmoreeti. (Roomu Sokka 7:21-25) Yihowa “bushsha ikkinoommota qaaganno” daafira, tenne sharronke afino. (Faarso 103:14) Ikkollana mito wote, mittu Kiristaanchi kabbaade cubbo loosara dandaanno. Ikkina mitte hexxo dinosi yaate? Hatto yaa diꞌꞌikkino. Kayinni kuni manchi Nugusu Daawiti gede wixiꞌrinore mixxasi digattanno. Hakkoyeno ikkiro, Maganu assitinorira gaabbitannorenna cubbonsa “maaxxukki kultannore” ‘gatona yaate ayeewoteno qixxaawinoho.’—Faarso 86:5; Yaaqoobi 5:16; Lawishsha 28:13.

²³ Hakkiinni saeno, Maganu Kiristaanu songora “elto ikkitino labballo” yaano ninke kaaꞌlate ikkado ikkitinorenna hasatto noonsare ayyaanaamittetenni gikki yitino allaalaasine uyino. (Efesooni 4:8, 12, NW; Yaaqoobi 5:14, 15) Insahu qaru alaami, cubbo loosino manchi Maganu ledo noosi fiixooma haaroonsiꞌranno gedenna galagale cubbunniwa higa hoogate ‘wodancha afiꞌranno’ gede kaaꞌlate.—Lawishsha 15:32.

‘WODANCHA AFIꞌRI’

24, 25. (a) Lawishsha 7:6-23 aana kulloonnihu wedellichchu beetti ‘wodancha xeꞌinosiha’ ikkinota leellishinohu hiittoonniiti? (b) ‘Wodancha afiꞌra’ dandiineemmohu hiittoonniiti?

²⁴ Qullaawu Maxaafi ‘wodancha xeꞌinonsa’ mannirenna ‘wodancha afiꞌrino’ mannire coyiꞌranno. (Lawishsha 7:7) ‘Wodancha xeꞌinosi’ manchi, ayyaanaamittetenni gikki yiinohanna Maganu soqqanshora temokkiro noosikkiha ikkino daafira, coye heeshshi gotti asse hedate dandoo ajjasira dandiitanno. Togoo manchi Lawishsha 7:6-23 kulloonnihu wedellichchu beetti gede, kabbaade cubbi giddora garri garimmo laikki eara dandaanno. ‘Wodancha noosihu’ kayinni Maganu Qaale ganynye huuccattote ledo xiinxalle, giddiidi mannimmasi seekke marammadhanno. Guunte noosikki manchi assanno geeshsha, kuni manchi hedosi, hasattosi, macciishshamannosirenna giwesi Maganu hedo ledo sumuu yitanno gede assiꞌranno. Konni garinni “lubbosi baxanno” woyi heeshshosira atoote abbiꞌranno; hakkiinni saeno “seyannosi.”—Lawishsha 19:8.

²⁵ Hanni ateneeto togo yite xaꞌmi: ‘Maganu seeri gara ikkinota woꞌmunni woꞌma ammaneemmo? Konne seera seekke harunsa wolurinni afiꞌnanni hagiirri baalunkunni roore hagiirre abbitannoeta seekke ammaneemmo?’ (Faarso 19:7-10; Isayyaasi 48:17, 18) Tennera hili huluullo nafa heedhuhero, rakke qaafo adhi. Maganu higge lashshi assa abbitanno qarra heeshshi gotti assite hedi. Hakkiinni saꞌeno, halaalu ledo sumuu yaanno garinni heeꞌratenni, hattono gara ikkinore, yaano adda ikkino coye, xalala ikkino coye, keeraancho ikkino coye, baxisanno coyenna dancha ikkino coye surrekkira wonshiꞌratenni “Yihowa dancha ikkinota qamasse lai.” (Faarso 34:8; Filiphphisiyusi 4:8, 9) Tenne assitto kiiro, Maganoho noohe baxilli lexxannota, isi baxannore roore baxxanni haꞌrattotanna isi giwannore roore gibbanni haꞌrattota mittore huluullantooti. Yooseefino ninke gedee manchootilla. Ikkollana Yihowa seeda diro biddi assasiranna Iso hagiirsiisate hasatto heedhannosi gede assasira maahoyye yiino daafira ‘foorretewiinni xooqa’ dandiino. Atino hatto assattora halchonkeeti.—Isayyaasi 64:8.

26. Aantanno fooliishshuwara hiittee hasiissanno hajore laꞌneemmo?

²⁶ Kalaqaanchinke sirote biso uyinonkehu sirrammoranna adhatenninna adhamatenni afiꞌnanni hagiirre afiꞌnammoraati ikkinnina godoꞌlete diꞌꞌikkino. (Lawishsha 5:18) Adhanna adhama lainohunni Maganoho mayi lao noosiro aante nootera lame fooliishshora laꞌneemmo.