Maganisi Sheshifachishinosi

1, 2. Hakkoye baxxino barra Eeliyaasi horo hawannokkihu hiikku coyi ikkino?

GOMICHU gobba tunsiise nooha ikkirono, Eeliyaasi xeenu giddo dodanni no. Isira Iyiziraeeli Katama iillate lowo doogo gatte noosi; qoleno isi aja beetto diꞌꞌikkino. Ikkollana Yihowa “wolqa” dagginosi daafira, isi jawaate doda diagurino. Isira hattoo wolqa hakkuyira albaanni horo heedhe diegentinosi. Isinni Eeliyaasi, Moote Akiaabi ofolle noota mootete faradi gaare goshooshanni noo farado nafa hune sae haꞌrino!—1 Mootoolla 18:46 nabbawi.

² Eeliyaasi xa callisi seeda doogo haꞌranni no. Hanni isi xeenu cororo illete aaninni fiiꞌranni, hakkoye baxxino barra ikkino coye hedanni dodanno gara hedi. Hakku barri Eeliyaasi Maganira Yihowaranna halaalu magansiꞌrara qeellete barraati! Eeliyaasi xa lowo geeshsha xeertiꞌre haꞌrino daafiranna xeenunna gomichu gobba tunsiisino daafira, Qermeloosi Ilaali dileellannosi; kuni Ilaali Yihowa Eeliyaasi horoonsiꞌre maalaletenni Baꞌꞌaali ammaꞌno shollishino bayichooti. Hakko barra 450 Baꞌꞌaali masaalaano kaphaasine ikkitinoti xabbe leeltino; insano hasiisannonsa qoricha adhitino. Hakkiinni Eeliyaasi sase dironna lee agana gobba gawajjitino moolle hoolanno gede Yihowa huucciꞌrino. Yihowa xaano Eeliyaasi huuccatto macciishshe xeena ganino!—1 Mot. 18:18-45.

3, 4. (a) Eeliyaasi Iyiziraeeli Katama haꞌri woyite lowore hexxinohu mayira ikkara dandaanno? (b) Hiikkuri xaꞌmuwara dawaro afiꞌneemmo?

³ Eeliyaasi wayi giddo calba calba yaanni 30km Iyiziraeeli Katami geeshsha haꞌri woyite, xaate coyi woyyaawanno yee hexxinoha ikkara dandaanno. Isi Baꞌꞌaali masaalaano shinoonni daafira, lowo coyi woyyaawanno yee hedinoha ikkara dandaanno. Xaate Akiaabino woyyaawa hasiissannosi! Akiaabi hakko barra ikkinore baalankare laino daafira, Baꞌꞌaali magansiꞌra agura, minaamasi Mootitte Elzaabeeli hayi yaa, hattono Yihowa soqqamaasine gawajja agura hasiissannosi.

⁴ Coyi hendoommo gede ikkanno woyite, lowore hexxanke nooreentilla. Hattoo yannara, xaate heeshshonke woyyaabbanno woy amadinonkehu buutote qarri nafa hoꞌlanno yine hexxinammora dandiineemmo. Eeliyaasi “ninke gedee mancho” ikkino daafira, togoore hexxinoha ikkiro, tini dhagge diꞌꞌikkitannonke. (Yai. 5:17) Ikkollana, Eeliyaasi qarri xaano digoofino. Isinni Eeliyaasi shiima saate gedensaanni, lowo geeshsha waajjinonna hexxo mudhino daafira reyo halchino. Isi togo ikkinohu mayiraati? Yihowa masaalaanchisira ammanasi roore jawaattanno gedenna wirro worba ikkanno gede kaaꞌlinosihu hiittoonniiti? Hanni laꞌno.

Hendoonnikki Coyi Ikki

5. Akiaabi Qermeloosi Ilaalira ikkinore laihu gedensaanni, Yihowa ayirrisa hasiissannosita rosino? Tenne mayinni anfeemmo?

⁵ Akiaabi Iyiziraeeli Katamira noohu mootete minisira higi woyite, woyyaawinota leellishannore assinoni? Qullaawu Maxaafi togo yaanno: “Moote Akiaabi galtesira Elzaabeelira Eeliyaasi assinore baalanna Baꞌꞌaali himanaano asse gudino gara kulise.” (1 Mot. 19:1) Akiaabi hakko barra ikkinore Elzaabeelira kuli woyite, Eeliyaasi Maganiha Yihowaha suꞌma sada nafa gaꞌninokkita wodanchi. Akiaabi maalu hedo noosi manchooti ikkinnina Maganu hedanno garinni hedannoha diꞌꞌikkino. Isi hakko barra laino maalale ‘Eeliyaasi assinoreeti’ yeella hedino. Addanko Akiaabi, Magano Yihowa ayirrisa hasiissannosita dirosino. Rabbisiꞌra baxxannoti minaamasi hiitto ikkituyya?

6. Elzaabeeli Eeliyaasira mayitanno sokka sokkino? Hatto yaase mayyaate?

⁶ Elzaabeeli hanqite gobba guddu! Hanqite fuu yitinoti mite, Eeliyaasira togo yite sokka sokku: “Ateno gaꞌa tenne yannara tenne himanaano assitto gede assa hoogummahero, aneno maganna shitoe.” (1 Mot. 19:2) Hatto yaase, Eeliyaasi shaate mixidhe kaꞌinota leellishshanno. Wole yaattonni, Elzaabeeli ‘Baꞌꞌaali masaalaano shiinotera Eeliyaasi layinki barri geeshsha shee rabbisiꞌra hoogummaro, ane shinoe’ yite xaartinohu gedeeti. Eeliyaasi biite xeena gananna goxe noowa, Elzaabeeli sokkino sokkaanchi iso goxinowiinni kayise tenne waajjishshanno sokka kulisi woyite Eeliyaasi hiitto ikkinoro hanni hedi. Isi tenne sokka macciishshihu gedensaanni hiitto ikkiyya?

Hexxo Mudhino, Hattono Waajjino

7. Eeliyaasi Elzaabeeli waajjishiishshusi woyite hiitto ikkino? Hakkiinni isi maa assino?

⁷ Eeliyaasi Baꞌꞌaali ammaꞌno ledo gaarameemmo gaari xaate goofino yee hagiidhinoha ikkiro, hatti hexxosi bayichonko baꞌino. Elzaabeeli xaano kakkachitella no. Ise alba ammanantinore lowo masaalaano shiishiishshino; tenne kayi Eeliyaasi shiishiishshara mixidhino. Eeliyaasi, Elzaabeeli waajjishiishshusita hiitto ikkiyya? Qullaawu Maxaafi, “Eeliyaasino waajjino” yaanno. Eeliyaasi, Elzaabeeli shetisse shitannosi gara hedinokka? Isi togoore hedinoha ikkiro, roore waajjinoti dihuluullissannote. Ikkihano ikkiro, Eeliyaasi “lubbosi gatisiꞌrate . . . [xooqino].”—1 Mot. 18:4; 19:3.

8. (a) Pheexiroosi Eeliyaasi gede waajjinohu hiittoonniiti? (b) Eeliyaasinna Pheexiroosi xaggenni maa ronseemmo?

⁸ Ammanantinori Maganu soqqamaasine giddo waajjinohu Eeliyaasi calla diꞌꞌikkino. Lowo diri gedensaanni heeꞌrinohu Pheexiroosino waajjino woyiti no. Lawishshu gedera, Pheexiroosi Yesuusi isi ledo wayi aana haꞌranno gede assisi yannara, “bubbete wolqa [laꞌꞌa]” hanafino. Hakkiinni waajjino daafira baaru giddo itama hanafi. (Maatewoosi 14:30 nabbawi.) Eeliyaasinna Pheexiroosi xaggenni kaajja roso ronseemmo. Worbuulle ikkine heeꞌra hasiꞌnummoro, waajjineemmo gede assannonkere heda dihasiissannonke. Hatteentenni, hexxonkenna jawaantenke Buicho ikkinoha Yihowa heda hasiissannonke.

“Xaate Ikkinoe”

9. Eeliyaasi haꞌrino doogonna isi haꞌri woyite hiitto ikkinoro xawisi.

⁹ Eeliyaasi waajjino daafira, alba wodiidi galchimira wodhe, mite 150km xeertiꞌre noohu Bersaabe yinanni katami geeshsha xooqino; kuni Yihudunnihu wodiidi danni mule noo katamaati. Isi soqqamaanchosi hakko agure, callisi halallitte gobba hige haꞌrino. Qullaawu Maxaafi Eeliyaasi “mitto barra woꞌma” haꞌrino yaanno daafira, isi sinqe nafa adhikkinni soodo arrishsho fultanna haꞌrinota heda dandiineemmo. Lowo geeshsha dadillinohunna waajjinohu kuni masaalaanchi, halalla eaa-fulcho doogora arrishsho shitannasi haꞌranni no. Hatti umo damuunsitino arrishsho hawarreenna eꞌara kaꞌuta, Eeliyaasi daafure haꞌra hoogi. Daafure delecci yiinohu kuni masaalaanchi, mittu ittanchu haqqi hunda ofolli; hige hattenne zarage taꞌinote halalli baattora hakkii sainohu fooliishshiꞌnanni bayichi dino.—1 Mot. 19:4.

10, 11. (a) Eeliyaasi huucciꞌrino huuccatto mayi tiro afidhino? (b) Qummeeshshuwa horoonsidhe, wolu ammanamino manni hexxo mudhi woyite hiitto ikkinoro xawisi.

¹⁰ Eeliyaasi lowo geeshsha hexxo mudhe heeꞌre huuccatto assiꞌrino. Isi shiie yee huucciꞌrino. Isi hakkawote, “Ani akaakkaꞌya dirooroommo” yiino. Eeliyaasi hakkawote akaakkasi reyite bushsha ikkitinotanna mittoreno kaaꞌla dandiitannokkita afino. (Ros. 9:10) Eeliyaasi, ‘Anino insa gede tidhoommori dinooho’ yee hedino. Hakko daafira, isi “Xaate ikkinoe” yaasi dhagge assiꞌnannita diꞌꞌikkitino. Isi ‘Heeꞌraꞌya xa maa kaaꞌlitanno?’ yiinohu gedeeti.

¹¹ ‘Maganu manchi togo ikke hexxo mudha hasiissannosi?’ yine maalaꞌla hasiissannonke? Dihasiissannonke. Qullaawu Maxaafi giddo kulloonnihu batinyu ammanamino labballinna meenti lowo geeshsha dadille hexxo mudhino woyiti no; kuri giddo gamu: Ribiqa, Yaiqoobi, Musenna Iyyoobiiti.—Kal. 25:22; 37:35; Kir. 11:13-15; Iyo. 14:13.

12. Hexxo mudhatto gede assannoheri tuncu yaannohe woyite, Eeliyaasi lawishsha harunsa dandaattohu hiittoonniiti?

¹² Heeꞌnoommohu “qarrissanno yanna” giddo ikkino daafira, batinyu manni wole agurina ammanantinori Maganu soqqamaano nafa mito woyite hexxo mudhansa maalaꞌlinannita diꞌꞌikkitino. (2 Xim. 3:1) Atino hexxo mudhatto gede assannohehu buutote qarri amadihero, Eeliyaasi gede giddokkita gudisse Maganoho hasaaphi. Mayira yiniro, Yihowa “jawaante baalate [Maganooti].” (2 Qorontoosi 1:3, 4 nabbawi.) Isi Eeliyaasi sheshifachishinoyya?

Yihowa Masaalaanchisira Wolqa Ikkinosi

13, 14. (a) Yihowa sokkaasinchisi widoonni dadillino masaalaanchosi baxannota leellishinohu hiittoonniiti? (b) Yihowa ninke mittu mittunku daafira, dhukinke jilbino gatikki, baalankare afinota afanke sheshifachishshannonke yineemmohu mayiraati?

¹³ Yihowa gordoho heeꞌre, kuni baxanno masaalaanchisi halalla haqqichote hunda ofolle hexxo mudhe reyo huucciꞌranna lai woyite hiitto ikkinoha lawannohe? Tennera huluullama dihasiissannonke. Eeliyaasi natare goxe heeꞌreenna, Yihowa sokkaasinchosi isiwa soyino. Sokkaasinchu Eeliyaasi sununni kise kayise, “Kaꞌe iti!” yiisi. Eeliyaasi, sokkaasinchu shaqqillunni iibbino timanna waa oyeennasi kae iti. Isi tennera sokkaasincho galata nafa galatinoni? Qullaawu Maxaafi, Eeliyaasi itenna age kae galagale goxinotalla kulanno. Isi lowo geeshsha dadillino daafira coyiꞌra giwisinosi ikka? Ikkihano ikkiro, sokkaasinchu xaano layinkimeeshsho goxinowiinni kayisinosi; xa kayisinosihu miteekke duuꞌmo saaqqanna ikkara dandaanno. Xaano sokkaasinchu “Kaꞌe iti” yiisi; isi hakkawote, “Haꞌrattoti doogo seedatena” yaasi dhagge ikkitannote.—1 Mot. 19:5-7.

¹⁴ Sokkaasinchu Maganu uyinosi wodanchanni, Eeliyaasi mamira haꞌranni nooro afino. Qoleno isi, Eeliyaasi kageeshshi doogo umisi wolqanni haꞌra dandaannokkita afino. Maa assa hasiꞌneemmoronna dhukinke mageeshshihoro ninkenni roore afino Maganira soqqama lowo geeshsha sheshifachishshannote! (Faarso 103:13, 14 nabbawi.) Eeliyaasi hattee sagale itasi kaaꞌlitinosihu hiittoonniiti?

15, 16. (a) Eeliyaasi Yihowa uyinosi sagale itasi kaaꞌlitinosihu hiittoonniiti? (b) Yihowa yannankera soqqamaasinesira jawaante aanno doogo naada hasiissannonkehu mayiraati?

¹⁵ Qullaawu Maxaafi togo yaanno: “Isino kae sagale ite waano agi. Hattenne itino wolqanni Siina yinannihu Kaaliiqi ilaali geeshsha 40 barranna 40 hashsha woꞌma haꞌri.” (1 Mot. 19:8) Eeliyaasi, isi heeꞌrino dirinni mitu lewu xibbi diri albaanni heeꞌrinohu Musenna mitu 1,000 diri gedensaanni heeꞌrinohu Yesuusi gede, 40 barranna 40 hashsha qatumino. (Ful. 34:28; Luq. 4:1, 2) Hatti mitte hige itino sagale qarrasi baalanka tirtino yaa ikka hoogirono, maalaletenni jawaante afiꞌranno gede kaaꞌlitinosi. Kuni geedhino manchi hattenne halalli gobbara mannu haꞌranno doogo nafa nookkiwa, mitto agananna darate meddi yitanno yanna callisi haꞌrino gara hanni hedi!

¹⁶ Yannankerano Yihowa soqqamaasinesira jawaante aanno; tenne assannohu kayinni maalaamittete sagale widoonni maalaletenni wolqa afidhanno gede asse ikkikkinni, hakkiinni roortino doogonniiti. Isi soqqamaasinesira ayyaanaamittete sagale aanno. (Mat. 4:4) Qullaawu Maxaafinninna Qullaawu Maxaafi aana xintantino borronni Maganunnire rosa, ayyaanaamittete jawaante afiꞌneemmo gede assitannonke. Togoota ayyaanaamittete sagale sagaꞌlanke qarranke baala tirtanno yaa ikka hoogirono, wonaatiro cincine anfeemmokki qarra cincineemmo gede kaaꞌlitannonke. Qoleno togoo sagale “hegere heeshsho” afiꞌneemmo gede kaaꞌlitannonke.—Yoh. 17:3.

17. Eeliyaasi mamira haꞌrino? Hakku bayichi lowo xagge afiꞌrinoho yineemmohu mayiraati?

¹⁷ Eeliyaasi mite 320km ikkitanno doogo haꞌrihu gedensaanni, jeefote Korebi Ilaala (woy Siina Ilaala) iilli. Kuni ilaali, Maganu Yihowa lowo diri albaanni sokkaasinchisi widoonni buwanno citi mule Musera leellinowanna gedensoonni Israeelete dagara Seera uyino bayicho ikkino daafira, lowo xagge afiꞌrinoho. Eeliyaasi hakkiicho godu giddo galannowa afiꞌri.

Yihowa Masaalaanchosi Sheshifachishinonna Jawaachishino Gara

18, 19. (a) Yihowa sokkaasinchisi widoonni Eeliyaasi mayyee xaꞌmino? Eeliyaasi mayyee qoliyya? (b) Eeliyaasi hexxo mudhanno gede assinosiha hiikkonne sase coye kuꞌlino?

¹⁸ Yihowa Korebi Ilaaliwa Eeliyaasi (tenne sokka abbinohu mitto sokkaasincho ikkikki digatino) togo yee mitte harancho xaꞌmo xaꞌmisi: “Eeliyaasi, konniicho maꞌꞌassitanni nootto?” Tini xaꞌmo shaqqillunni xaꞌminoonnita ikkitukki digattino; mayira yiniro, Eeliyaasi tenne xaꞌmo xaꞌminisita, giddosita gudise fushshe hasaaphino! Isi togo yiino: “Olantote Mooticha Kaaliiqa! Ane ate laala amaddinoe. Israeelete manni ate ledo eino gondooro hunino; kakkalote dargakkino diigino; himanaanokki baalano shee gudeenna kune ani callu gatoommo. Kune aneno shaaera hasanni nooe.” (1 Mot. 19:9, 10) Eeliyaasi hexxo mudhanno gede assinosiha ajayi ajeenna sase coye kulino.

¹⁹ Umihunni, Eeliyaasi loosiꞌya mulla daafurooti yee hedino. Isi lowo diro qullaawa Maganu suꞌmanna halaalu magansiꞌra wolu baalunkurinni roorsiꞌre Yihowara soqqamate ‘laalaatanni’ heeꞌrinoha ikkirono, xa coyi horo anganni fulanni haꞌrinoha lawinosi. Israeelete manni xaano ammana nookkihonna finqilaho; qoleno kaphu ammaꞌno roore halaꞌlitanni no. Layinkihunni, Eeliyaasi callatino. Isi Yihowara soqqantannori giddo gatinohu iso calla laweennasi, “Kune ani callu gatoommo” yiino. Sayikkihunni, Eeliyaasi shinannie yee waajjino. Wonanni batinye ammanantino masaalaano shine kaꞌnoonni daafira, anetino iseentilla yee hedino. Eeliyaasira giddosi hedo baala fushshe hasaapha shota ikka hooggasira dandiitanno; ikkirono, isi naaxxe woy saalfate tenne assa diagurino. Isi wodanisi hedo huuccattotenni Maganoho hasaaphe, ammanamino manni baalunkura dancha lawishsha ikkino.—Far. 62:8.

20, 21. (a) Eeliyaasi Korebi Ilaali aana godu xullichira heeꞌre maa lainoro xawisi. (b) Yihowa wolqasi leellishino doogonni Eeliyaasi maa rosino?

²⁰ Yihowa Eeliyaasi yaaddonna waajja qeeꞌlanno gede kaaꞌlate maa assino? Sokkaasinchu isira godu giddonni fule xullichoho uurranno gede kulisi. Eeliyaasi mayi ikkaraatiro afinokkiha ikkirono, hajajame fule uurri. Hedeweelcho lowo bubbe bubbissu! Tini bubbe ilaalla daddartannonna kinna cancantanno geeshshi wolqa afidhinota ikkitino daafira, hakkawote macca beeshshitanno huuro kalaqantukki digattino. Eeliyaasi mitte anganni illesi goꞌle, mitte anganni kayinni saadate ordanni gannoonni uddanosi bubbe adhite hadhannokki gede seekke cuꞌmiꞌrino gara hanni hedi. Hakkiinni baatto huxidheenna qooxeessu shafamita, Eeliyaasi uurra hooge gaggawino gara heda dandaatto. Hatteeno qoꞌlikki lowo giira dirriteenna, buwanu itannosikki gede rahe godu giddora higino.—1 Mot. 19:11, 12.

²¹ Qullaawu Maxaafi kuni mittu mittunku coyi ikki woyite, hattee kalaqamu wolqa giddo Yihowa nookkita kulanno. Eeliyaasi, Yihowa Baꞌꞌaali gede kalaqamu wolqa giddo heeꞌranno Magano ikkinokkita afino; Baꞌꞌaali magansidhannori Baꞌꞌaali “gomicho gulufannoho” woy xeena gananno maganooti yite ammantanno. Yihowa kalaqamu giddo noote waajjishshanno wolqa baalante Buichooti; ikkirono, isi kalaqino coye baalanka lowo geeshsha rooranno. Isinni, gordu nafa iso haaꞌra didandaanno! (1 Mot. 8:27) Eeliyaasi tenne baala laꞌꞌasi kaaꞌlitinosihu hiittoonniiti? Eeliyaasi lowo geeshsha waajje noota qaagi. Kayi togooti waajjishshanno wolqa noosi Magani Yihowa ledosi noo daafira, isi Akiaabinna Elzaabeeli waajja horonta dihasiissannosi!—Faarso 118:6 nabbawi.

22. (a) Eeliyaasi macciishshinoti “shiima huuro” isi waagu noosiha ikkinota huwatanno gede kaaꞌlitinosihu hiittoonniiti? (b) Hatti “shiima huuro” ayeta ikkitara dandiitanno? (Lekkaalliidi qaagiishsha lai.)

²² Giira saꞌuhu gedensaanni, gobba qaxaqaꞌa yitu; hakkiinni Eeliyaasi “shiima huuro” macciishshi. Tini huuro Eeliyaasi giddosita galagale hasaaphanno gede jawaachishshannote; hakko daafira, isi layinkimeeshsho yaachishinosire baala kuꞌli.a Hatto assasi roore sheshifatanno gede kaaꞌlitusikki digattino. Ikkollana, hatti “shiima huuro” hakkuyi gedensaanni kultinosiri roore sheshifachishinositi dihuluullissannote. Yihowa, Eeliyaasi waagu noosiha ikkinota kule jawaachishinosi. Hiittoonni? Maganu Baꞌꞌaali ammaꞌno Israeelete gobbanni hunate albillitte maa assara hedinoro Eeliyaasira kulinosi. Addanko, Eeliyaasi loosinori beebbate daafuro diꞌꞌikkino; mayira yiniro, Maganu xaano Baꞌꞌaali ammaꞌno hunate assannore diagurino. Hakkiinni saeno, Yihowa Eeliyaasira mito mito biddishsha oye wirro loosoho soqqinosi daafira, iso xaano masaalaancho asse horoonsiꞌra diagurino.—1 Mot. 19:12-17.

23. Yihowa Eeliyaasi callimmatenni fulanno gede kaaꞌlinosihu hiittenne lame doogonniiti?

²³ Eeliyaasi callimmatenni fuliyya? Yihowa tennera Eeliyaasi kaaꞌlate lamere assino. Umihunni, isi gedensoonni iso lekkise soqqamanno gede Elsai buuranno gede kulinosi. Kuni aju beetti Eeliyaasira miila ikkanno, hattono lowo diro isira kaaꞌlaancho ikke soqqamanno. Addanko tini Eeliyaasira lowore kaaꞌlitanno! Layinkihunni, Yihowa mitto dhagge ikkanno duduwo kulinosi; togo yiino: “Israeelete giddonni Baꞌꞌaalira kumbuultinokkirenna misilesi sunqitinokkire 7,000 manna gatisiꞌroommo.” (1 Mot. 19:18) Addanko, Eeliyaasi ada callicho diꞌꞌikkino! Isi Baꞌꞌaali magansiꞌrannokkihu lowo kume ikkannohu ammanamino manni noota afasi lowo geeshsha hagiirsiissinositi dihuluullissannote. Eeliyaasi hattenne quuxxote yannara ammaname Yihowara soqqamasi, insano isi faale hadhanno gede kaaꞌlitannonsa. Eeliyaasi Yihowa sokkaanchi widoonni tenne “shiima huuro” macciishshasi lowo geeshsha jawaachishshinositi dihuluullissannote.

24, 25. (a) Xaa yannara Yihowata “shiima huuro” macciishsha dandiineemmohu ma garinniiti? (b) Eeliyaasi Yihowa sheshifachishinosi daafira jawaatino yineemmohu mayiraati?

²⁴ Ninkeno Eeliyaasi gede, kalaqamu giddo noota waajjishshanno wolqa laꞌneemmo woyite maalaꞌlinammora dandiineemmo; maalaꞌlankeno garankolla. Kalaqaanchu wolqa kalaqamu aana xabbe leeltanno. (Rom. 1:20) Yihowa xaano gawalo nookki wolqasi horoonsiꞌre ammanantino soqqamaasinesi kaaꞌla baxanno. (2 Dud. 16:9) Ikkollana, Maganu roorenka hasaawisannonkehu Qaalisi Qullaawu Maxaafi widoonniiti. (Isayaasi 30:21 nabbawi.) Maganu Qaali massagankera maahoyye yineemmoha ikkiro, kuni Qaali Eeliyaasi macciishshite “shiima huuro” gede ikkannonke. Yihowa Qaalisi widoonni seejjannonke, jawaachishannonke, hattono baxannonketa huwanteemmo gede kaaꞌlannonke.

²⁵ Eeliyaasi, Yihowa Korebi Ilaali aana sheshifachishinosi daafira jawaatino? Ee, jawaatino! Isi bayichonko bashshosi gede worbanna ammanamino masaalaancho ikke, mannu kaphu maganna magansiꞌrannokki gede qorowisiisa hanafino. Ninkeno qullaawu ayyaaninni borreessinoonnihu Maganu Qaali giddo noo “jawaante” naandeemmoha ikkiro, ammanatenni Eeliyaasi faale haꞌra dandiineemmo.—Rom. 15:4.