Callattenna Waajjite Egennootto?

Hanni koye misilete aana noo qaaqqo lai. Isi callatinohanna waajjinoha lawanno; dihattooti? Ati callattenna waajjite egennootto?— Baalunku manni callatanno woy waajjanno woti no. Qullaawu Maxaafi Yihowa jaalla giddo callattenna waajjite egentinori noota kulanno. Kuri giddo mittu Eeliyaasiiti. Hanni isi xagge ronso.

Eeliyaasi lowo diri albaanni, Yesuusi nafa ilamikki Isiraeelete gobbara heeꞌrino. Hakkawaro Akiaabi yinannihu Isiraeelete nugusi no; kuni nugusi halaalaancho Magano Yihowa diammanannoho. Akiaabinna galtesi Elzaabeeli, Baꞌꞌaali yinanniha kaphu magano ammantino. Hakko daafira rooru Isiraeelete manni Baꞌꞌaali magansiꞌra jammari. Mootitte Elzaabeeli busha manchooti; ise Yihowa ammananno manna baala, Eeliyaasino gatikki, shite guddara kaꞌu! Hakkawote Eeliyaasi ma assinoro afootto?—

Eeliyaasi xooqe bai! Mannu nookkiwa baraha xooqe godu giddo maaxami. Isi togo ikkinohu mayiraatiro afootto?— Ee, waajjino daafiraati. Waajjasi kayinni digaraho. Mayira yiniro, Yihowa kaaꞌlannosita afino. Yihowa wolqaataamo ikkinota Eeliyaasira hakkuyira albaanni leellishino. Mitte hige Yihowa isi huuccatto macciishshe iiminni giira dirrisino. Hakko daafira xaano Yihowa iso kaaꞌlasira dandaanno!

Eeliyaasi godaho maaxame heeꞌreenna Yihowa iso, ‘Koye ma assitanni nootto?’ yee xaꞌmi. Eeliyaasi qole togo yii: ‘Ate ammaꞌnoommohu ane callaati. Ani callatoommo, qoleno shinannie yee waajjoommo.’ Eeliyaasira Yihowa ammananno manna baala shine gundoonniha lawinosi. Yihowa kayinni Eeliyaasi togo yii: ‘Deeꞌni, hatto yaakki digaraho. Ane ammaninohu wolu 7,000 ikkanno manni no. Hakko daafira waajjitooti. Loosattora eemmohehu lowo loosiwe gate no!’ Eeliyaasi tenne macciishshiti hagiidhinoha lawannohe?—

Eeliyaasi xagge maa rosiissannohe?— Waajjanna callatoommo yaa dihasiissannohe. Korkaatuno Yihowano ateno baxxanno jaalla noohe. Qoleno, Yihowara lowo wolqa noosi, isi ayewoteno ate kaaꞌlannohe! Horonta callatattokkita afootto daafira dihagiidhootto?—