“Ammaneemma”

1. Maarta xissonna xissiisidhanno gede assinosere xawisi.

MAARTARA wodanu rodoose madaarroonni godiwa no; hakko godira afooho jawa kincho tuꞌnoonni. Isera xisso hakkuyi jawu kinchi gede ayirritinose. Qoleno baxxanno rodiise Aliaazaari reyinota ammana qarra ikkitinose. Isi reyinku shoole barra ikkino. Maarta konni shoolu barri giddo qaensara noo dadillenna xisso baala hattono sheshifachishansara dayino manna heddanno woyite haaqee lawannose.

2, 3. (a) Maarta Yesuusinni xaadduti hiitto ikkitino? (b) Maarta coyidhinori ise daafira maa leellishanno?

² Aliaazaarira lubbote jaali Maarta mule uurre no. Maarta wonaatiro rodoose gatisara dandaannohu Yesuusa calla ikkinota affino daafira, isinni xaadduti roore xissiisidhinoha ikkara dandaanno. Ikkirono, ise shiimu Biitaaniyu katamira gobbaanni Yesuusi ledo xaaddu woyite mito geeshsha sheshifattino. Isi ledo xaaddinote hattee shiima yanna giddo, Yesuusi shaqqillenna mararro albisi aana laꞌe sheshifattino hattono jawaattino. Hakkiinni Yesuusi kaote hexxonna ammanase heddanno gede kaaꞌlitannose xaꞌmo xaꞌminose. Kuni hasaawi Maarta mitte dhagge ikkitanno hedo coyidhanno gede kakkayisinose; ise togo yitino: “Ati tenne gobba daanno yiniha Kiristoosa Maganu Beetto ikkoottota ammanoomma.”—Yoh. 11:27.

³ Maarta hatto yaase, jawaata ammana nooseta leellishshanno. Qullaawu Maxaafi Maarta daafira kulannori shiimare ikkirono, ise xaggenni ammananke jawaachishannore lowore ronseemmo. Hatto yineemmohu mayiraatiro afate, hanni Maarta daafira kultannota umita Qullaawu Maxaafi xagge laꞌno.

“Lowo Coyira Yaaddanni Qarramatta”

4. Maarta heedhannohu ayeoo ledooti? Maatensara Yesuusi ledo hiittoo aante noonsa?

⁴ Yanna Aliaazaari reyara boodu aganira albaanniiti. Isi hakkawote didhiwamino. Isi Biitaaniyaho minesi mitto ayirrado wosincho yaano Yesuusi Kiristoosi wosinsaraati. Aliaazaari, Maartanna Maariyaami roduuwaho; insa mitto mine heeꞌrannoha ikkikki digatino. Maarta qaete ama gede ikkite wosinsitino daafiranna ise suꞌma balanxe kulloonni woyiti noo daafira, mite xiinxallaano sasunku giddo bayira Maartaati yite heddanno. (Yoh. 11:5) Insa giddo adhaminohu nooronna teꞌee dianfoonni. Ikkihano ikkiro, insa Yesuusira lubbote jaallaati. Yesuusi Yihudu gobbara mannu lowo geeshsha giwannasi sabbaki yannara Maartaoo mine fooliishshiꞌranno. Isi hakko mare afiꞌranno harshammonna towaanyo lowo geeshsha naadannoti dihuluullissannote.

5, 6. (a) Maarta, Yesuusi insata dayi yannara wolootunni roore anga mitiiꞌmitinohu mayiraati? (b) Maariyaami Yesuusi mininsara dayita maa assitino?

⁵ Maarta wosincho seekkite wosinsate lowo looso loossaraati. Ise chaachaaranna qarooyye ikkitino daafira, wonanni loosu batiꞌrannosete. Ise xa Yesuusi insata dayitano iso wosinsiꞌrate kabbaanama hanaffu. Ise bayichonko konni ayirradu wosinchiseranna miteekkite ledosi martino miillasira baxxitinota addi addi sagale qixxeessate kaꞌu. Hakkawaro wosincho adha loworeeti. Hakkawaro mittu manchi wosinchu qaesi dayiro sunqanno, caammasi fushshe lekka hayishshanno, hattono umoho dancha shitto gananno. (Luqaasi 7:44-47 nabbawi.) Qoleno dancha sagale itise dancha maꞌnara goxanno gede assanno.

⁶ Maartanna Maariyaami wosinchonsa seekke wosinsiꞌrate lowore loosanni wiinamanni no. Mitu manni Maartanni roore xiinxallatenna miqichaamete yee hedannoti Maariyaami, umi qara rodoose kaaꞌlitinoti egennantinote. Yesuusi dayita kayinni coyi soorrami. Isi hattee yanna rosiisate maltinote yee hedino daafira, rosiisa hanafi. Hakkawaro noori ammaꞌnote murrooti meento diayirrissanno; Yesuusi kayinni meento ayirrisino, hattono soqqanshosita qara cuꞌmo ikkitinote Maganu Mangistere hagiirrunni rosiisinonsa. Maariyaami Yesuusi rosiisanna macciishshate lowo geeshsha quqquxantino daafira, lekkasi hunda ofolte isi coyiꞌrannoha mitto mittonka qaale macciishshate higgu.

7, 8. Maarta lowo geeshsha mitiiꞌmitinohu mayiraati? Ise cincite cincite hoogguti mayitino?

⁷ Hakkawote Maarta mageeshshi geeshsha mitiiꞌmite nooro heda dandiineemmo. Ise hattee baala sagale raisatenna wosina wosinsiꞌrate kabbaanamase, roore qarrantannonna yaaddanno gede assitinose. Ise loosu batiꞌreennase kabbi facci yitanni heedheenna rodoose ise kaaꞌla agurte ofolte noota laꞌu woyite, giirante alba bushshino ikka? Woy ise gilimaxxino ikka? Hatto ikkiro, mayira ikkitu diyinannise. Hige hakkoye baala looso callase hiitto assite loossanno!

⁸ Hakkiinni Maarta cincite cincite hoogguti, Yesuusi coyiꞌranni heeꞌreenna mereero eꞌe togo yitu: “Mooticha, rodooꞌya woꞌmanka looso ane callaꞌyara worte agurteenna sammi yite laꞌꞌatto? Dagge kaaꞌlitannoe gede kulise.” (Luq. 10:40) Ise kaajjishshe coyidhino. Hakkiinni ise Yesuusi Maariyaami hanqe loosoho higi yaanno gede kultino.

9, 10. (a) Yesuusi Maartara mayyee qolino? (b) Yesuusi coyiꞌrinori Maarta daafuro mishinota leellishannore diꞌꞌikkino yineemmohu mayiraati?

⁹ Qullaawa Maxaafa nabbawannohu batinyu manninte gede, Maartara Yesuusi qolino dawaro dhagge ikkitusekkinni digattino. Isi shaqqillunni togo yiinose: “Maarta, Maarta, ati lowo coyira yaaddanni qarramatta. Hasiisannohu mitto coye callaho. Maariyaami dancha coye doodhitino; konne coye isewiinni diadhinannise.” (Luq. 10:41, 42) Yesuusi hatto yaasi mayyaate? Isi Maarta ayyaanaamittete coyinni roore maalaamittete coye baxatta yaasiiti? Qoleno dancha sagale qishate daafurtanni noo daafuro dinaadino yaate?

¹⁰ Deeꞌni. Yesuusi Maarta togo daafurtanni noohu baxillunninna fayyo giddonni ikkinota afino. Qoleno Yesuusi wosina adhate lowo jila jila dihasiissanno yaanni noohano diꞌꞌikkino. Isi hakkuyira albaanni Maatewoosi “lowo jila” jile woshsheennasi haꞌrino. (Luq. 5:29) Maarta jila jilase qarra diafidhino; coyi noohu balaxisiissino coyi aanaati. Ise lowo sagale qishase calla heddino daafira, roore hasiisanno coye deꞌino. Hakku coyi maati?

11, 12. Yesuusi Maarta shaqqillunni amaalinohu hiittoonniiti?

¹¹ Maganu Yihowahu mittu Beetti Yesuusi Maartaoo minira dayinohu halaale rosiisaraati. Maarta qishshannoti coommitanno sagaleno ikko wolu aye coyino Yesuusi rosiisanni noo halaali geeshsha horo diꞌꞌikkanno. Maartara ammanase roore kaajjishidhannoti tini kaajja faro gatte baꞌanni noose daafira, Yesuusi dadillinoti dihuluullissannote; kayi macciishshitanno gede dimurrisinose.a Maarta maa assitannoro doodha dandiitannoha ikkirono, Maariyaamino Yesuusi rosiisannore macciishsha agurte loosoho higganno gede kuꞌlase kayinni digaraho.

¹² Konni daafira Yesuusi Maarta shaqqillunni amaalinose; isi hanqose qiissara yee suꞌmase lame hige woshshihu gedensaanni, “lowo coyira yaaddanni qarrama” hasiissannosekkita kulinose. Roorenkanni ayyaanaamittete sagale sagaꞌlinanni faro afiꞌnanni woyite, mitte woy lame sagale ikkitanno. Konnira, Yesuusi Maariyaami doodhitinoha “dancha coye” yaano isi rosiisanna macciishshitannota hoola dihasiꞌrino!

13. Yesuusi Maarta amaalino amaalenni maa ronseemmo?

¹³ Maartaoo mine ikkinore kultannote tenne harancho xaggenni Kiristaanu lowore rosanno. Aye coyino ayyaanaamittete hasattonke wonshiꞌneemmokki gede guficho ikkankera wodha dihasiissannonke. (Mat. 5:3) Maarta gede shaqqaddanna chaachaaroota ikka hasiꞌneemmoha ikkirono, wosina adhate yine ‘lowo coyira yaandanni qarrammanna’ roore hasiisanno coyi gate baꞌꞌankera dihasiꞌneemmo. Ammanate roduuwinkewa aanneemmohu qaru korkaati, itohonna agoho ikkikkinni mimmito jawaachishateetinna ayyaanaamo afansha beeqqateeti. (Roomu Sokka 1:11, 12 nabbawi.) Shiima sagale qixxeessine nafa roduuwinke ledo mimmito jawaachisha dandiineemmo.

Baxxanno Rodiise Reyotenni Kai

14. Maarta amaale macciishshite dancha lawishsha ikkitinonkehu hiittoonniiti?

¹⁴ Maarta Yesuusi shaqqillunni amaalinose amaale macciishshite adhitino ikka? Adhitinota dihuluullammeemmo. Soqqamaasinchu Yohaannisi hagiirsiissannota Maarta rodii xagge borreessi woyite togo yee hanafino: “Yesuusi Maartanna rodoose Maariyaamino, rodoonsa Aliaazaarino baxanno.” (Yoh. 11:5) Yesuusi Biitaaniyaho Maartaoo minira wosinimma mare higinku boodu agani saino. Maarta Yesuusi baxillunni amaalinose daafira muffi diyitino woy dikoꞌmitino. Hatteentenni, amaalinose amaale adhitino. Tennerano ise ammanatenni kaajja lawishsha ikkitinonke; hige ninke giddo mito woyite amaale hasiissannokkihu nooni?

15, 16. (a) Maarta rodiise dhiwami woyite ma assitinoha ikkara dandaanno? (b) Maartanna Maariyaami hexxo mulla gattinohu mayiraati?

¹⁵ Maarta rodiise dhiwamita, iso dhiwansiisiꞌrate higgu. Rodiise beya afiꞌranno gedenna woyyaawanno gede kaaꞌlate dandiiture baala assitino. Aliaazaarira kayinni dhiwanu lexxanni haꞌri. Lamenti roduuwisi iso barru barrunku mulisinni fafikki dhiwansiisiꞌrino. Maarta xawulushshi yiinoha rodiise alba laꞌu kiiro, mitteenni heeꞌrinoti hagiirrunna dadillu yanna qulli yitinoseha ikkara dandaanno.

¹⁶ Aliaazaari buuto dhiwame heercho hoolita, Maartanna Maariyaami Yesuusira sokka soqqi. Yesuusi hakkawote Biitaaniyunni kaꞌne lamu barri doogo haꞌne marranniwa sabbakanni no. Insa togo yee soqqino: “Mooticha, ati baxattohu dhiwamino.” (Yoh. 11:1, 3) Insa Yesuusi rodoonsa baxannota afino; qoleno isi jaalasi kaaꞌlate dandiire baala assannota addaxxino. Insa Yesuusi Aliaazaari reyikkinni daye iillanno yee hexxino ikka? Hatto ikkiro, hexxonsa mulla gattino. Aliaazaari reyino.

17. Maartara coyi hibbo ikkinosehu mayiraati? Ise Yesuusi katama iilla rahinota macciishshituti maa assitino?

¹⁷ Maartanna Maariyaami rodoonsa wiꞌle madaadhi; Biitaaniyahonna hakko qooxeessira heeꞌrannohu batinyu manni madaarsha dayino. Kayi xaano Yesuusi heleqqo dino. Barru lexxanni haꞌrita, Maartara coyi roore hibbo ikkinoseha ikkara dandaanno. Hakkiinni, Aliaazaari reyihunni shoolki barra, Yesuusi katama iilla rahino yinanna Maarta duduwo macciishshitu. Maarta chaachaara ikkitino daafira, lowo geeshsha xissiisidhe heedhe nafa Yesuusinni xaaddara Maariyaamira kultukki furduggi yite fulte rakke martu.—Yohaannisi 11:18-20 nabbawi.

18, 19. Maarta hiitti hexxo noota coyidhino? Ammanase dhagge ikkitannote yineemmohu mayiraati?

¹⁸ Maarta Mootichisenni xaadduti, iseranna Maariyaamira huluullanni keeshshino coye togo yite kultusi: “Mootichaꞌya, ati kawiicho heeꞌroottoha ikkoommero rodiiꞌya direyanno.” Maartara hexxosenna ammanase kayinni dibaꞌino. Ise ledde togo yitino: “Xaano ikkiro, huucciꞌrattore baala Maganu aannoheta afoomma.” Yesuusi bayichonko ammanase kaajjishate, “Rodiikki reyotenni kaꞌꞌanno” yiise.—Yoh. 11:21-23.

¹⁹ Maarta, Yesuusi albillittete kao daafira coyiꞌranni nooha laweennase togo yitu: “Goofimarchoho reyotenni kaꞌnanni barra kaꞌꞌannota afoomma.” (Yoh. 11:24) Kaote noose ammana dhagge ikkitannote. Qullaawa Borro kao noota xawisse kultannoha ikkirono, Seduqootaho yinanniri ammaꞌnote murrooti kao noota diammantanno. (Dan. 12:13; Maq. 12:18) Ikkollana, Maarta Yesuusi kaote daafira rosiisinotanna Aliaazaari reye keeshshi geeshsha keeshshitinore ikka hooggurono reyitinore kayisinota affino. Ise hakkiinni aane ikkannore kayinni diaffino.

20. Yesuusi Yohaannisi 11:25-27 coyiꞌrinoti dhagge ikkitanno hedonna Maarta qoltino dawaro mayi tiro afidhinoro xawisi.

²⁰ Hakkiinni Yesuusi “Kaonna heeshsho aneeti” yee dhagge ikkannore coyiꞌrino. Addanko Maganu Yihowa, albillitte uulla woꞌmate aana reyitinore kayisanno gede Beettisira silxaane uyinosi. Yesuusi aantete Maarta, “Konne coye ammanatta?” yiise. Hakkiinni Maarta tenne fooliishshora bitimaho kullire qoltino. Ise Yesuusi Kiristoosa woy Mesihicha ikkinota, Maganu Yihowa Beetto ikkinotanna masaalaano tenne alame daanno yite masaaltuha ikkinota ammantanno.—Yoh. 5:28, 29; Yohaannisi 11:25-27 nabbawi.

21, 22. (a) Yesuusi wiꞌlanni noo manna laiti hiitto ikkino? (b) Aliaazaari reyotenni kai woyite ikkino coye xawisi.

²¹ Maganu Yihowanna Beettisi Yesuusi Kiristoosi togoo ammana naaddanno? Maarta hakkiinni aanchite laꞌinohu addi addi coyi, tini xabbe leeltanno gede assannoho. Ise rodoose Maariyaami woshshitara rakke martu. Hakkiinni ise, Yesuusi Maariyaaminna ledose wiꞌlanni noo manna coyishiishi woyite lowo geeshsha xissiisiꞌranna laꞌino. Ise Yesuusi shiiꞌro lowo geeshsha xissiissinosi daafira saalfatikkinni wiꞌlanna laꞌino. Qoleno Yesuusi rodiise waammara afooho tuꞌnoonni kincho hoolle yee hajajanna macciishshitino.—Yoh. 11:28-39.

²² Nookkire ammana baxxannokkiti Maarta, rodiise reyinku shoole barra ikkino daafira foole abbanno yite gibbu. Hakkiinni Yesuusi “Ammanittaha ikkiro Maganu ayirrinye laꞌꞌatta diyoommohe?” yiise. Ise ammantino; hakko daafira Maganu ayirrinye laꞌꞌa dandiitino. Yihowa bayichonko Aliaazaari reyotenni kayisanno gede Beettisira wolqa uyinosi! Maarta hakkuyi gedensaanni heeshshose diro woꞌma qaagganni heedhinota aante noo coyibba hedate woꞌnaali: Yesuusi “Aliaazaari, amo fuli!” yee woshshi; hakkiinni waammate giddo qoro qoro yaannori macciishshami; hakkii Aliaazaari kafannoonni gedeenni godu giddonni fuli; Yesuusi “Tirtine agurre, haꞌrona!” yee hajaji; hakkiinni hagiidhe ikkaata hooginori Maartanna Maariyaami mare rodiinsara goowaho marmarami. (Yohaannisi 11:40-44 nabbawi.) Maarta xa kinchu gede ayirritinose xissonni gattino!

23. Yihowanna Yesuusi maa assitahera hasidhanno? Atina maa assa hasiissannohe?

²³ Tini xagge, kao mulla haaqeete halcho ikkitinokkita buuxissanno; kaote hexxo jawaachishannoho Qullaawu Maxaafi rosooti; qoleno taje nooreetinna ikke egenninoreeti. (Iyo. 14:14, 15) Yihowanna Beettisi Maartara, Maariyaamiranna Aliaazaarira assitunte gede, ammana noonsare kiisa baxxanno. Insa ammanakki jawaata ikkitanno gede sharramittoro, ateno kiissannohe.

“Maartano Soqqamatenni Kaaꞌlitunsa”

24. Qullaawu Maxaafi Maarta daafira kulannohu jeefote coyi maati?

²⁴ Qullaawu Maxaafi hakkuyi gedensaanni Maarta daafira mitte hige calla kulanno. Yanna Yesuusi uullate aana heeꞌrinote jeefote lamalara umooti. Yesuusi hatte lamalara jeefote buutote qarri amadannosita afino daafira, jaallasi minira Biitaaniya haꞌrino. Hakkiinni kae 3km lekkatenni haꞌre Yerusaalame iilla dandaanno. Yesuusinna Aliaazaari dhiigu dhibbi amadinohu Simiooni yinanni manchi mine sagalete ofolte no; jeefote Maarta daafira kulloonnihu hatte yannaraati; Qullaawu Maxaafi haranse “Maartano soqqamatenni kaaꞌlitunsa” yaanno.—Yoh. 12:2.

25. Xaa yannara Kiristaanu songo giddo Maarta gedeehu meya roduuwi noo daafira maassammoommoreeti yineemmohu mayiraati?

²⁵ Addanko Maarta chaachaara manchooti! Qullaawu Maxaafi umo Maartare kulinke woyite ise loossanni anga mitiiꞌmite no; ise daafira jeefote kulannonke woyiteno, ise woloota kaaꞌlate yite soqqantanni no. Yannankerano Kiristaanu songo giddo Maarta gedeehu meya roduuwi noonke daafira maassammoommoreeti; kuri roduuwi jawaatootaho, shaqqaddahonna wolootaho soqqame woꞌmanka woyite ammanansa loosunni leellishannoreeti. Maarta hatteesenni heedhino ikka? Heedhino yine hendeemmo. Hatto ikkiro, kuni akatise iillannoseha addi addi qarra dandiite saꞌanno gede kaaꞌlinoseti dihuluullissannote.

26. Maartara ammanase maaho kaaꞌlitinose?

²⁶ Shiimu barri gedensaanni, Maarta baxxanno Mootichase Yesuusa shetinse shineenna xissiisidhanno xisso cinca hasiissinose. Hakkiinni saeno, iso shiishiishshuri godowa kaajjaddu lawisiisaano Aliaazaarino shitara mixidhe kaꞌino; korkaatuno isi reyotenni kaino daafira lowo manni Yesuusa ammananni no. (Yohaannisi 12:9-11 nabbawi.) Qoleno kore baxamanno roduuwa gedensoonni reyo babbaddinonsati egennantinote. Maartanna roduuwase reyo babbaddinohu mamarootironna hiittoonniitiro anfoommokkiha ikkirono, Maartati kaajja ammana jeefote geeshsha cincitanno gede kaaꞌlitinoseta dihuluullammeemmo. Xaa yannara noo Kiristaani ammanatenni Maarta faale haꞌra hasiissannonsahu iseraati.