Yesuusi Aliaazaari Reyotenni Kayisi

Yesuusira Biitaaniyaho sasu lubbote jaalla noosi. Insano Aliaazaari, Maariyaaminna Maartaati; Maariyaaminna Maarta Aliaazaari roduuwaati. Mitto barra Yesuusi Yordaanoosi Lagira widoonni heeꞌreenna, Maariyaaminna Maarta ‘Aliaazaari lowo geeshsha xiwaminona rakke amo ballo!’ yee sokka soyi. Yesuusi kayinni rahe dimarino. Isi lame barra keeshshi gedensaanni rosaanosira togo yii: ‘Kaꞌe Biitaaniya haꞌnona. Aliaazaari goxino; anino mare kayiseemmosi.’ Soqqamaasinesi, ‘Aliaazaari goxinoha ikkiro higannosi’ yitusi. Konni daafira Yesuusi “Aliaazaari reyino” yee xawise kulinsa.

Yesuusi Biitaaniya iilli woyite, Aliaazaari madaarrinku shoole barra ikkino. Lowo manni Maartanna Maariyaami sheshifachishara daye no. Maarta Yesuusi dayinota macciishshituti, isiwa doddanni marte togo yitu: “Mootichaꞌya, ati kawiicho heeꞌroottoha ikkoommero rodiiꞌya direyanno.” Yesuusi qole, ‘Rodiikki reyotenni kaꞌꞌanno. Maarta, ati tenne ammanatta?’ yiise. Maarta ‘Konni kaꞌa reyotenni kaꞌꞌannota afoomma’ yitu. Yesuusi “Kaonna heeshsho aneeti” yiise.

Hakkiinni Maarta Maariyaamiwa marte ‘Yesuusi dayino’ yite kultuse. Maariyaami Yesuusiwa doddanni martu; lowo manni ise ledo Yesuusiwa mari. Maariyaami Yesuusira lekkate ubbe hururante wiꞌlitu. Ise “Mootichaꞌya ati kawiicho heeꞌroottoha ikkoommero rodiiꞌya direyanno” yitu. Yesuusi ise lowo geeshsha dadillitinota lae isino wiꞌli. Mannu Yesuusi wiꞌlanna lae, ‘Aliaazaari hiitto baxannoro laꞌe’ yii. Gamu manni kayinni ‘Isi jaalisi reyannokki gede assa mayira hoogino?’ yii. Yesuusi hakkunni gedensaanni maa assinoro afootto?

Yesuusi waammanniwa mari; waammate afoo jawu kinchinni cunfoonni. Isi “Kincho hoolle” yee hajaji. Maarta, ‘Reyinkunni shoole barra ikkino daafira xa foole abbanno’ yitu. Ikkollana, mannu waammate afiinni kincho hooli. Hakkiinni Yesuusi togo yee huuccatto assiꞌri: ‘Annaꞌya macciishshoottoe daafira galaxxeemmohe. Woꞌmanka woyite macciishshattoeta afoommo; togo yoommohu kayinni kuni manni ati soottoeta ammanara yeeti.’ Hakkiinni Yesuusi qoonqosi naggi asse, “Aliaazaari, amo fuli!” yii. Hakka woyite, mittu maalaꞌlinanni coyi ikki: Aliaazaari uddanotenni kafannoonni gedeenni heeꞌre waammate giddonni fuli. Hakkiinni Yesuusi ‘Tirresi haꞌrona’ yii.

Tenne maalale lainohu lowo manni Yesuusa ammanino. Ikkollana mitu manni mare tenne Farisootaho kuli. Hatte yannanni kayise Farisootu Aliaazaarino Yesuusano shaate heddino. Yesuusite 12 soqqamaasine giddo Asqorootu Yihuda yinannihu maaxame mare Farisootaho togo yii: ‘Yesuusa amaddinanni gede assummoꞌnero mageeshshi woxe uyitinannie?’ Farisootu 30 birra uyineemmohe yitu; hatte yannanni kayise Yihuda Yesuusa insara sayise aanno faro hasiꞌra hanafi.