GAFA SHOOLE
Meessaneeto Bushiisha—“Cubbiꞌyanni Keereensie”
“Haaru loosiꞌya maatenke heeshsho woyyeessinoha ikkirono, duuchunku danihu gariweelu coyi giddora eꞌꞌeemma gede assinoe. Ayyaanna ayirrisa, poletiku coyi giddora ea, hakkiinnino sae beetekiristaane nafa haꞌra hanafumma. Shoyilloo diro woꞌma halaalu giddonni bae keeshshoomma. Yanna saꞌanni hadhu kiiro, Yihowa cubboꞌya horo gatona yaannokkiha lawie. Maaro dihasiissannoete yee hedumma. Korkaatuno, gara ikkitinokki doogo haꞌra hanafumma wote halaale afoommate.”—Maarta.
MEESSANEETO bushiisha duhu gede ayirritara dandiitanno. Nugusu Daawiti togo yee borreessino: “Loosoommo soꞌro umiꞌyara aleenni doyitanni qarrisinoe. Qoleno lowo duhi gede ikkite baasa ayirritinoe.” (Faarso 38:4) Mitu Kiristaani Yihowa cubbonsa gatona yaannonsakkiha lawannonsa daafira quwa sae dadillanno. (2 Qorontoosi 2:7) Ikkina, hatto yee heda garaho? Loosootto cubbi kabbaade ikkiro, Yihowawiinni xeertidhe isi cubbokki horonta gatona yaannokki deerra marootto yaateni? Deeꞌni!
“Mereeronke Kalaqamino Qarra Hasaambe Tirro”
Yihowa maaro eꞌannore facci asse diaguranno. Isinni, insa kaaꞌlate kaꞌꞌanno! Yesuusi, qaetenni bae maafude baꞌino heeshsho heeꞌrino beettire kulanno lawishsha coyiꞌri wote Yihowa shaqqadu anni gedeeha ikkinota coyiꞌrino. Yannate gedensaanni hakku beetti qaera higate murciꞌri. “Isi gana xeertiꞌre heeꞌreenna, annisi iso lae lowo geeshsha mararisi; hakkiinni dodanni mare hanqafe sunqisi.” (Luqaasi 15:11-20) Yihowawa higa hasidhe heedheennanni isiwiinni ‘lowo geeshsha xeertiꞌroottohu’ gede ikke macciishshamannohe? Yesuusi lawishshu giddo kuli anninte gede, Yihowano ate kaaꞌlate shaqqillunni shootti yaanno. Yihowa ati galagalte isiwa higatto yanna quqquxame agadhe no.
Ikkollana loosootto cubbi lowo geeshsha kabbaade woy batinye ikkeenna Yihowa dimaarannoe yite hedattohalla ikki? Hanni Isayyaasi 1:18 aana Yihowa mayyee koyisinoro wodanchi: “‘Amme, mereeronke kalaqamino qarra hasaambe tirrona’ yaanno Yihowa. ‘Cubbiꞌne mundeete gede duumo silo ikkirono kaadete gede ikke waajjiꞌranno.’” Ee, cubbinke waajjo uddanora naqqino mundee gede hoꞌlannokkiha lawiro nafa Yihowa maarannonke.
Yihowa ateneeto bushiishshanni heeꞌrattora dihasiꞌranno. Ikkina Maganu maaro afiꞌratenna keeraanchu tiiꞌꞌi heeꞌrannohe gede maa assa dandaatto? Hanni Nugusu Daawiti assinoha lame coye lai. Umihunni, isi togo yiino: “Loosoommo soꞌro Yihowara kuleemmo.” (Faarso 32:5) Yihowa iso huuccidhe ‘kalaqamino qarra’ ledosi ‘tirattora’ koyisinoheta qaagi. Konne koyishsha maahoyye yite adhi. Loosootto cubbo Yihowara kuli; qoleno macciishshamannohere isira hasaaphi. Daawiti umisi heeshshonni lainori noo daafira huluullamikki togo yee huucciꞌrino: “Cubbiꞌyanni keereensie. . . . Magano, ati hiiqqaminohanna dadillino wodana lashshi assite diaguratto.”—Faarso 51:2, 17.
Layinkihunni, Daawiti Maganu shoominohu masaalaanchu Naataani uyinosi kaaꞌlo adhino. (2 Saamueeli 12:13) Yannankerano Yihowa, cubbo loosse maaro eꞌannori Isi ledo noonsa fiixooma haaroonsidhanno gede kaaꞌlate qajeeltinore songote cimeeyye qixxeessino. Cimeeyyenniwa shiqittoro, insa Qullaawa Borro horoonsidhe hattono huuccatto assite wodanakki dhaabbanno; qoleno qarrissannoheti busha hedo ajjanno woy horo baꞌanno gede, hattono ayyaanaamittetenni hurre afiꞌratto gede kaaꞌlitannohe.—Yaaqoobi 5:14-16.
Yihowa keeraancho tiia afidhe fooliishshiꞌrattora hasiꞌranno
“Soꞌrosi Gatona Yinoonnisihu . . . Hagiirraamoho”
Cubbokki Yihowara kulanna kaaꞌlitannohe gede cimeeyyenniwa shiqa lowo geeshsha kabbaade labbe leeltahera dandiitanno. Daawitirano hattoo hedo macciishshantinositi dihuluullissannote. Isi mite yanna geeshsha cubbosi kulikkinni “sammi yee” keeshshino. (Faarso 32:3) Gedensaanni kayinni, cubbosi kulasinna doogosi biddi assiꞌrasi horo afidhinota huwatino.
Daawiti hatto assasinni afiꞌrinohu qaru atooti giddo mittu albi hagiirresi galagale afiꞌrasiiti. Isi togo yee borreessino: “Soꞌrosi gatona yinoonnisihu, cubbosi maarroonnisihu hagiirraamoho.” (Faarso 32:1, lekkaalliidi qaagiishsha) Qoleno isi togo yee huucciꞌrino: “Yihowa, afiiꞌya guweenyakki duduwanno gede, suumeꞌya fani.” (Faarso 51:15) Daawiti isonooto bushiishanno gede assitannosi hedonni fooliishshiꞌrino daafiranna Yihowa cubbosi maarino daafira wolootaho isire kulate kaino.
Yihowa keeraancho tiia afidhe fooliishshiꞌrattora hasiꞌranno. Qoleno wodanikkira guuqannori nookkiha, fayyo giddonni hattono hagiirrunni isirenna alaamisire mannaho kulattora hasiꞌranno. (Faarso 65:1-4) Yihowa ‘cubbikki coꞌo yee baꞌꞌanno’ gedenna ‘isiwiinni haarooꞌmate diri daannohe’ gede assahera koyisinoheta qaagi.—Hawaariyaatete Looso 3:19.
Maartano konne koyishsha adhite horo afidhino. Ise togo yitino: “Beettiꞌya Agarooshshu Shaenna Baqqi Yiiyye! yinanni metseetta ganye soyannoe. Gale hosanni Yihowa haaro ikke egennumma. Galagale higate gooddo ikkinoehu qaru coyi, loosoomma cubbira baalaho maaro xaꞌmiꞌrate. Ikkirono ikkummata ikke huuccatto assiꞌre Maganu cubboꞌya maarannoe gede xaꞌmiꞌrumma. Yihowawa higummakki 40 diro keeshshaꞌya dhagge ikkitannoe. Ane xagge, mittu manchi Yihowawiinni baxxe lowo diro keeshshiro nafa galagale isira soqqamaranna baxillisiwa higara dandaannota leellishshanno.”