Qullaawu Maxaafi Roore Kaaꞌlannohe Gede Maa Assa Dandaatto?

Mitto jawa looso loosate hedde waajjite egennootto? Loosu wolqakkira aleenni ikkannokki gede, miteekkite beekke shiima shiima loosoottoha ikkara dandaanno. Qullaawa Maxaafa nabbawano hattooti. ‘Qullaawa Maxaafa nabbawa hiikkii hanafeemmokka?’ yite hedattoha ikkara dandaanno. Konni rosira, Qullaawa Maxaafa nabbawanna xiinxalla baxatto gede kaaꞌlannoheha mito mito coye laꞌneemmo.

1. Qullaawa Maxaafa ganyine nabbawa hasiissannonkehu mayiraati?

Qullaawa Maxaafa woy ‘Kaaliiqi Seera’ ganye nabbawanno manchi hagiirraamo ikkanno; assiꞌrannori baaluno qinaannosi. (Faarso 1:1-3 nabbawi.) Umi qara, barru baala shiima daqiiqa nabbawate woꞌnaali. Maganu Qaale affanni haꞌritto kiiro, Qullaawa Maxaafa nabbawa roore baxatto.

2. Qullaawu Maxaafi kaaꞌlannohe gede, nabbawatto woyite maa assa hasiissannohe?

Qullaawu Maxaafi giddo nabbambeemmori roore kaaꞌlannonke gede, mereeroho taxxi yine nabbambanni heeꞌnoommore heda hasiissannonke. Nabbawa calla ikkikkinni ‘hiincano’ hasiissannonke yaate. (Faarso 119:15) Nabbawatto woyite aante noo xaꞌmuwa ateneeto xaꞌmi: ‘Tennenni Maganu Yihowa daafira maa roseemmo? Tenne heeshshoꞌya giddo loosu aana hosiisa dandeemmohu hiittoonniiti? Konne qummeeshsha wole manna kaaꞌlate ma garinni horoonsiꞌra dandeemmo?’

3. Qullaawa Maxaafa nabbawate yanna afiꞌra dandaattohu hiittoonniiti?

Qullaawa Maxaafa nabbawate yanna afiꞌra qarra ikkitinohe? Ninke giddo duuchaho tini qarra ikkitannonke. ‘Afiꞌrootto yanna’ seekkite horoonsiꞌrate woꞌnaali. (Efesooni Sokka 5:16) Barru barrunku Qullaawa Maxaafa nabbawatto yanna gaaꞌmite tenne assa dandaatto. Mitu manni Qullaawa Maxaafa soodo gute kae nabbawanno. Mitu kayinni barri widoonni lawishshaho barri sagale yannara nabbawa doodhanno. Wolootu kayinni Qullaawa Maxaafa hashsha goxxara albaanni nabbabbanno. Qullaawa Maxaafa nabbawate atera injiitannohe yanna hiitteeti?

LEDDE XIINXALLI

4. Qullaawa Maxaafa nabbawa baxa dandaatto gara rosi

Qullaawa Maxaafa nabbawa hanafa shota coye ikka hooggara dandiitanno. Ikkollana, inte egenninoommokki sagale duucha hinge qamansummohu gedensaanni banxammora dandiineemmonte gede, Qullaawa Maxaafa nabbawano ‘halcha’ woy quqquxama dandiineemmo. Umi Pheexiroosi 2:2 nabbabbe; hakkiinni tenne xaꞌmo hasaabbe:

• Qullaawa Maxaafa barru baala nabbawittoro, nabbawa baxattoranna ledde nabbawa halchattora dandaattoha lawannohe?

Mitu manni Qullaawa Maxaafa nabbawa baxannoha ikkinohu hiittoonniitiro afate, VIIDIYO laꞌe. Hakkiinni, aante noo xaꞌmuwa hasaabbe.

VIIDIYO: Wedellootu Maganu Qaale Baxxannore Ikkitino (5:33)

• Viidiyote giddo kulli wedellooti qeelte saꞌino qarri maa maati?

• Qullaawa Maxaafa agurtukkinni ganyite nabbabbanno gede kaaꞌlinonsari maati?

• Qullaawa Maxaafa nabbawa roore baxisannonsa gede maa assitino?

Nabbawa hanafate kaaꞌlitanno amaale:

• Taalo sokka sayissannotanna huwatate qarrissannokkita Qullaawu Maxaafi tiro doodhi. Ati coyiꞌratto qaalinni woy wolu seekkite afootto qaalinni nooha ikkiro, Haaro Alame Tiro nabbawi.

• Umo, roore baxisannohe gafa nabbabbe hanafi. “Qullaawa Maxaafa Nabbawa Hanafi” yitanno saaxine giddo mite kaaꞌlitanno hedo afiꞌratto.

• Nabbawootto gafa qaagate borreessite amaxxi. Tenne borro giddo noota, “Qullaawu Maxaafi Niwaawekki Borreessite Amaxxi” yitanno saaxine horoonsiꞌri.

• JW Layibirere horoonsiꞌri. Mobayile woy wole hattoo uduunnicho horoonsidhe, ayewano heedhe tenne layibirere aana Qullaawa Maxaafa nabbawa woy addi addi qaalinni qaddaꞌnoonniha macciishsha dandaatto.

• Maganu Qaale Xiinxalli yitanno borro horoonsiꞌri. Tenne borro giddo, Qullaawa Maxaafa nabbawa roore baxatto gede kaaꞌlitannohe kaartuwanna sanxarazhe afiꞌratto.

5. Qullaawu Maxaafi xiinxallokkira qixxaawi

Faarso 119:34 nabbabbe; hakkiinni aante noo xaꞌmo hasaabbe:

• Qullaawa Maxaafa nabbawattora woy Qullaawu Maxaafi xiinxallokkira qixxaawattora albaanni huuccatto assiꞌra dancha ikkitinohu mayiraati?

Qullaawu Maxaafi xiinxallokki roore kaaꞌlitannohe gede maa assa dandaatto? Konni maxaafira noo roso qixxaawatto woyite, aante noo hayyo horoonsiꞌrate woꞌnaali:

1. Rosoho hanafote noo guffa nabbawi.

2. Qummeeshshuwa faꞌnite nabbawi; qoleno qummeeshshu yaannori gufote hedo ledo mayi xaadooshshe afiꞌrinoro huwatate woꞌnaali.

3. Mitte mittente xaꞌmora dawaro ikkitannota boode qaalla malaatisiꞌri; hatto assakki xiinxallisannohe manchi ledo hasaawatto woyitira kaaꞌlitannohe.

Ati tenne afootto?

Yihowa Farciꞌraasine addi addita Qullaawu Maxaafi tiro horoonsidhanni keeshshitino. Ikkollana, Haaro Alame Tiro horoonsiꞌra roore baxxanno; mayira yiniro, tini tiro taalo sokka kultannote, huwatate qarrissannokkitenna Maganu suꞌmi noote.—“Yihowa Farciꞌraasinera Qullaawu Maxaafi Uminsahu Noonsa?” yitannota Webisayitenkera fultino borro nabbawi.

XAPHISHSHA

Qullaawu Maxaafi roore kaaꞌlannohe gede, yanna gaaꞌmite nabbawi, nabbawattore huwatate huuccatto assiꞌri, hattono Qullaawu Maxaafi xiinxallokkira balaxxe qixxaawi.

Kageeshsha Rosoottore

• Qullaawu Maxaafi roore kaaꞌlannohe gede maa assa dandaatto?

• Qullaawa Maxaafa nabbawatenna xiinxallate yanna afiꞌrattohu hiittee saateraati?

• Qullaawu Maxaafi xiinxallokkira balaxxe qixxaawakki dancha ikkitinohu mayiraati?

EGENNO LEXXI

Qullaawu Maxaafi roore kaaꞌlannohe gede, nabbawatto woyite maa assa dandaattoro huwati.

“Qullaawu Maxaafinni Kaaꞌlo Afiꞌra Dandiinanni Gara” (Agarooshshu Shae Kiiro 1 2017)

Qullaawa Maxaafa nabbawa dandiinannita sase doogga wodanchi.

“Qullaawu Maxaafi Kaaꞌlannoehu Hiittoonniiti?—Gafa 1: Qullaawa Maxaafa Seekke Xiinxalla” (Webisayitenkera fultino borro)

Qullaawu Maxaafi niwaawe hagiirsiissannota assiꞌra dandiinanni gara rosi.

“Qullaawu Maxaafi Kaaꞌlannoehu Hiittoonniiti?—Gafa 2: Qullaawu Maxaafi Niwaawe Hagiirsiissannota Assiꞌra” (Webisayitenkera fultino borro)

Qullaawa Maxaafa lowo diro nabbabbinori coyidhinota kaaꞌlitanno amaale macciishshi.

Isilancho Hojju Xiinxallo (2:06)