Qaagatto?

Muli yannara fultinota Agarooshshu Shae metseetta seekkite nabbawootto? Hanni aante noo xaꞌmuwara dawaro qolate woꞌnaali:

Yesuusi Maatewoosi 18:15-17 aana noo amaale amaalinohu hiittoo sao ledo xaado afiꞌrinoriraati?

Tini sao coyi kawa kaꞌaa higinonsa mannooti tira dandiitanno saooti. Tira hoongiro kayinni bohamate geeshsha iillishshara dandiitanno. Tini mannu suꞌma huna woy woxe looxa ikkitara dandiitanno.—w16.05, qool. 12.

Qullaawu Maxaafi niwaawekkinni roore horo afiꞌrate maa assa dandaatto?

Aane noore assa dandaatto: Nabbawatto wote atera borreessinoonnihu gede assite hedi; ateneeto ‘Nabbawanni noommore wole manna kaaꞌlate horoonsiꞌra dandeemmohu ma garinniiti?’ yite xaꞌmi; qixxaawinohe uduunne horoonsidhe seekkite xiinxalli.—w16.05, qool. 29-31.

Kiristaanu reyino manni kaꞌꞌannota ammanannoha ikkirono, xissiisiransa soꞌroteni?

Kaote hexxo Kiristaanu shiiꞌranno wote xissiisiꞌrannokki gede diassitannonsa. Abirihaami Saara reyitinohura manchitino. (Kal. 23:2) Ikkollana, galle honse sheshifata dandiinanni.—wp16.05 qool. 4.

Hiziqeeli maxaafa fooliishsho 9te aana kulloonnihu borreessinanniricho amadino manchinna olu uduunne amadinohu lewu manni maa riqiwanno?

Kuni manni hunda Yerusaalamete katama huntutanna albillitte Armagedooni olinni Sheexaanunnita busha alame huntannota iimi olanto riqiwannota huwantoommo. Yannankera, borreessinanniricho angasira adhino manchi gato afiꞌranno manna malaatisannoha Yesuusi Kiristoosi riqiwanno.—w16.06, qool. 16-17.

Qullaawu Maxaafi baikkinni gate sainohu hiittoonniiti?

Qullaawa Maxaafa (1) borreessinoonnihu paappireesinna biraanna yinanni uduunnichi aana ikkirono, gate saino; (2) poletikunna ammaꞌnote sooreeyye hunate woꞌnaaltinoha ikkirono gate saino; (3) Qullaawu Maxaafi sokka soorrate woꞌnaallirono gate saino.—w16.07 qool. 4-7.

Heeshshonke bikkunnita assiꞌra dandiineemmohu hiittoonniiti?

Hasiisannonkere bade afa, woxe afimalsa hooga, baajeette fushshiꞌra, hasiisannokki coye mine wodha hooga, asalu noonkero baaxxa, loonseemmo yanna ajisha dandiineemmo gara hedanna albinni roore soqqamate mixo fushshiꞌra hasiissannonke.—w16.07, qool. 12.

Qullaawu Maxaafi culka woy birra roorinori maa ikkinota kulanno?

Iyyoobi 28:12, 15 Maganu hayyo culka woy birra roore ikkitinota kultanno. Hayyo hasiꞌratto yannara shooshanqenna kaajjado ammana hasiissannohe.—w16.08, qool. 18-19.

Mittu rodii ereeda lossiꞌra hasiissannosi?

Mitu budi garinni mannu dancha gede assiꞌne lossiꞌnanni ereeda digiwanno; hattono ereedu mannu dancha duduwo macciishshannokki gede diassanno. Ikkollana mitu roduuwi ereeda lossiꞌra hoogara dandaanno. (1 Qor. 8:9) Mitu budira woy qooxeessira Kiristaanu ereeda lossiꞌra ayirrinye diꞌꞌikkitino.—w16.09, qool. 21.

Shesho afiꞌra dandiinannihu hiikkiinniiti?

Soqqamaasinchu Phaawuloosi Yihowa ‘jawaante baalate Maganonna qarrinke baalu giddo jawaachishannonkeha’ ikkinota coyiꞌrino. (2 Qor. 1:3, 4) Konnira Qullaawu Maxaafi iimi Anninke sheshifachishannonkekki gede wolqasira aleenni higanno qarri nookkita buuxisannonke. Yihowa shoole qara qara doogganni sheshifachishannonke. Insano, Qaalisi Qullaawu Maxaafi, qullaawu ayyaanisi, huuccattotenna ammanate roduuwinke widoonniiti.—wp16.09, qool. 3,4.

Egenno, wodanchanna hayyo babbaxxinore ikkinota mayinni anfeemmo?

Egenno noosi manchi mittu coyi daafira afinoho, woy mashalaqqe noosiho. Wodancha noosi manchi mittu coyi wolu coyi ledo xaado afiꞌrino gara hedanno. Hayyo noosi manchi kayinni egennosinna wodanchasi horoonsiꞌranno; togoo manchi hayyo noosita leellishannore assanno.—w16.10, qool. 18.