“Maganu Sammi Yee Laꞌꞌannohu Mayiraati?”

ATINO DADILLISANNO COYE LAꞌꞌATTO WOYITE, ‘MAGANU SAMMI YEE LAꞌꞌANNOHU MAYIRAATI?’ YITE HEDDE EGENNOOTTO? WOY ATE UMIKKIRA IILLINOHEHU BUUTOTE QARRI ‘ISI MAGANU ANE DAAFIRA HEDANNO?’ YITE XAꞌMATTO GEDE ASSINOHE?

Aterano Ameerikaho heedhannote Sheela gede ikke macciishshamannoheha ikkara dandaanno. Sheela ammaꞌnote laalaattanno maate giddo ilantinote. Ise togo yitino: “Maganu Kalaqaanchonke ikkino daafira, anjeꞌyanni kayise isiwa shiqqi yaa hasiꞌreemma. Ikkirono isiwa shiqqi yoommaha dilawinoe. Isi ane laꞌꞌannoeha lawannoe; ikkirono laꞌꞌannoehu xeertote heeꞌreeti. Maganu giwannoe yee dihedeemma; ikkollana isi ane daafira hedannoha dilawannoe.” Sheela Maganu baxannoseta huluullantinohu mayiraati? Ise togo yitino: “Maateꞌyara hoode hoodete buutote qarri iillinonsa; hatte yannara Maganu hoꞌro kaaꞌlinonkeha dilawinoe.”

Sheela gede atino Woꞌmanka Dandaanno Magani noota ammanattoha ikkirono, isi baxannoheta huluullamattoha ikkara dandaanno. Maganu wolqaataamonna hayyicha ikkinota ammanannohu keeraanchu manchi Iyyoobino huluullamino woyiti no. (Iyyoobi 2:3; 9:4) Iyyoobira qarru biitete gede ikke dirrisi gedensaanni isi hexxo mudhe Maganoho togo yiino: “Albakki anewiinni shawwu assitooti; diinu gede assite mayira laꞌꞌattoe?”—Iyyoobi 13:24.

Tenne haja daafira Qullaawu Maxaafi mayyaanno? Iillannonke qarrira xaꞌmamannohu Maganohoni? Maganu mannu ooso woꞌmatenna mittu mittunku manchira hedannota leellishshanno taje no? Maganu ninke mitto mittonka afinota, isira qarrinke leellannosita, hattono isi mararannonketanna qarrinke yannara kaaꞌlannonketa afa dandiineemmohu hiittoonniiti?

Konninni aante noo birxichuwara Maganu kalaqinori Isi ninkera hedannota leellishannohu hiittoonniitiro ronseemmo. (Roomu Sokka 1:20) Hakkiinni Qullaawu Maxaafi Maganu mannu oosora hedannota buuxisannonke gara laꞌneemmo. Maganu kalaqinore laꞌenna Qaalesi nabbabbe Iso ‘egennitanni’ haꞌrittoro, isi ate daafira hedannota albinni roore buuxatto.—1 Yohaannisi 2:3; 1 Pheexiroosi 5:7.