“Gannatete Xaandeemmona!”

1, 2. Batinyu manni gannatete daafira mayyaanno?

BATINYU roduuwi babbaxxitino gobbanni Kooriyaho Sooli yinanni katama jawu gambooshshira daggino. Gambooshshu goofihu gedensaanni hatte gobbara heedhannori Yihowa Farciꞌraasine wole gobbanni daggino roduuwa dukkissino. Insa giddonni batinyu “Gannatete xaandeemmona!” yitanni babbaxxitino. Insa coyidhanni noohu hiittenne gannate daafiraati?

² Batinyu manni gannatete daafira babbaxxino coye coyiꞌranno. Mitu manni gannate haaqete halchooti yee coyiꞌranno. Wolootu qolte hagiirrenna harshammo afidhanno base gannatete yitanno. Gattaawino manchi jilu minira haꞌriro gannate einoha lawasira dandaanno. Mitu manni lowo geeshsha biifado bayicho laꞌꞌanno woyite hakku bayichi gannatete yee hedanno. Atera Gannate maa labbannohe? Ati hakko heeꞌrate halchatto?

3. Qullaawu Maxaafi gannatete daafira kulannonkehu hiittoonniiti?

³ Qullaawu Maxaafi hundi gannatenna albillitte dagganno gannate daafira kulanno. Qullaawu Maxaafihu umi maxaafi gannatete daafira kulanno. Laatinetenni tirroonnite Kaatoliki Duweyi Vershiini yinannite Qullaawu Maxaafi tirora Kalaqama 2:8 togo yitanno: “Mootichu Maganu hanafote hagiirru gannate qixxeessi; kalaqino manchono [Adaami] hakkiicho wori.” (Haawiissine borreessinoommori ninkeeti.) Ibiraawootu Afiiti Qullaawu Maxaafi tiro ‘Edenennita kaashshu base’ yitanno. Edeni yaanno qaali “Hagiirre” yitanno tiro afiꞌrino daafira kaashshu base addinta hagiirsiissannote. Hakko bayichi lowo geeshsha biifadoho, sagale batidhinoho hattono mannunna saadate mereero salaame nooho.—Kal. 1:29-31.

4. Edenenniti kaashshu base gannatete gedeete yaa dandiineemmohu mayiraati?

⁴ Ibiraawootu Afiiha “kaashshu base” yaanno qaale Giriikete Afiinni paradiisosi yinanni. Maakilintokinna Istirongisi yinanni mannooti qixxeessitino Sayikilopiidiyi paradiisosi yaanno qaali daafira togo yee xawisino: “Mittu Giriikete manchi paradiisosi yaanno qaale macciishshanno woyite biifado, mitturino gawajjannori nookki bayicho, maalaꞌlissannoti babbaxxino gumma laaltanno haqqe woꞌmitinowa, xalalu wayi noowanna geꞌreewunna geedimu hoshsha mitteenni hayisso ittannowa halaꞌlado bayicho hedanno.”—Kalaqama 2:15, 16te ledo heewisiisi.

5, 6. Gannate baꞌinohu mayiraati? Tini mayine hendeemmo gede assitannonke?

⁵ Maganu Addaaminna Heewani hattoo gannatera worinonsa; ikkollana insa hakko dikeeshshitino. Mayira? Korkaatuno Maganoho hajajama gibbino. Konnira insano ikko sirchinsa hatte gannatera heeꞌrate qoosso hooggino. (Kal. 3:23, 24) Hakko bayicho mannu keeshsha hoogirono hatti Gannate Nohi warihu Baote Wayi geeshsha heedhukki digattino.

⁶ Mitu manni ‘Uulla wirro gannate ikkita ikka?’ yee hedannoha ikkara dandaanno. Kuni ikkannota leellishshanno taje hiikkuriiti? Baxatto manni ledo Gannatete heeꞌrate hexxattoha ikkiro, togo yite hexxatto gede assinoheri maati? Albillitte uulla Gannate ikkitannota ammanattohu mayiraatiro xawisa dandaatto?

UULLA GANNATE IKKITANNOTA LEELLISHSHANNO TAJE

7, 8. (a) Maganu Abirahaamira mayyee qaale eino? (b) Maganu eino qaali Abirahaami mayyee hedanno gede assinosiha ikkara dandaanno?

⁷ Gannatete daafira kaꞌanno xaꞌmora dawaro afiꞌra dandiineemmohu, umi Gannate Kalaqaanchi ayyaanunni borreessiisino maxaafinniiti. Hanni Maganu jaalisi Abirahaamira mayyiinoro hedi. Maganu Abirahaamira sirchosi “baaru shaafi gede asse” batisannota coyiꞌrino. Yihowa isira togo yee qaale eino: “Anera hajajamoottohura baattote aana noo manni baalunku sirchikkinni maassamanno.” (Kal. 22:17, 18) Maganu Abirahaami beettiranna beettisi beettira konne qaale lede eino.—Kalaqama 26:4; 28:14 nabbawi.

⁸ Qullaawu Maxaafi, Abirahaami mannu ooso jeefote baraarsha afidhannohu iimi gannateraati yee hedinota dikulanno. Konnira Abirahaami, Maganu “baattote aana noo manni baalunku” maassamanno yee coyiꞌri woyite kuni atooti ikkannohu uullate aanaati yee hedasi garankolla. Konne qaale einohu Magano ikkino daafira, “baattote aana noo manni” baalunkura woyyino coyi ikkanno. Qullaawu Maxaafi giddo uulla gannate ikkitannota leellishshannoti wole taje no?

9, 10. Yihowa albillitte uulla gannate ikkitanno yine agadhineemmo gede assannonkeha mayi qaale eino?

⁹ Abirahaami sircho ikkinohu Daawiti ‘bushu manninna bunshe assitannori’ albillitte baꞌannota qullaawu ayyaaninni coyiꞌrino. Konnira “bushuullu” diheedhanno. (Far. 37:1, 2, 10) “Shaqqaddu kayinni baatto ragidhanno; atootenna keere afidhe hagiidhitanno.” Daawiti lede togo yee masaalino: “Keeraano baatto ragidhanno; ise aanano hegerera heedhanno.” (Far. 37:11, 29; 2 Sam. 23:2) Maganu fajjo assa hasiꞌranno mannira kuni qaali mayi hexxo amadino? Maganu soqqamaano, barrunni mitto barra uullate aana keeraano calla heedhannotinna uullate aana Gannatete gedeeti kaashshu base heedhannota hexxa dandiitanno.

¹⁰ Batinyu Isiraeelete manni Yihowa magansiꞌnanni heeꞌnoommo yaanni heeꞌre, Isiranna halaalu magansiꞌrara badhe wodhino. Konnira Maganu dagasi Baabiloonete manni qeelannonna gobbansa horranno gede hattono insa giddonni batinye qafadanno gede fajjino. (2 Dud. 36:15-21; Erm. 4:22-27) Ikkollana Maganu masaalaano dagasi 70 diri gedensaanni gobbansa higgannota coyidhino. Tini masaalo woꞌmitino. Ikkollana tini masaalo ninkerano lowo tiro afidhino. Kuri giddo mite masaalo xiinxallineemmo woyite, tini albillitte uulla gannate ikkitanno yine agadhineemmo gede taje ikkitannonkehu hiittoonniitiro hedi.

11. Isayaasi 11:6-9 noo masaalo woꞌmitinohu hiittoonniiti? Hiittee xaꞌmo xaꞌminammora dandiineemmo?

¹¹ Isayaasi 11:6-9 nabbawi. Maganu Isayaasi widoonni Isi daga gobbansa higgu gedensaanni gawajjannonsanna miicannonsari heeꞌrannokkita, hattono saada woy kaajjadda manna waajja hasiissannonsakkita coyiꞌrino. Ajuno akkaluno agarooshshe afiꞌranno. Kuni coyi Maganu qixxeessinote Edenete kaashshu basera noo keere qaagatto gede diassannohe? (Isa. 51:3) Isayaasi, Israeele calla ikkikkinni “wayi baaraho woꞌmannonte gede, Kaaliiqa egennino mannino baatto woꞌmanno” yee masaalino. Kuni ikkannohu mamooteeti?

12. (a) Baabiloonete qafadonni higginori mayi atoote afidhino? (b) Isayaasi 35:5-10te noo masaalo albillitteno woꞌmitannota leellishannori maati?

¹² Isayaasi 35:5-10 nabbawi. Isayaasi Israeele gobbansa higganno woyite saadano ikko mannu gawajjannonsakkita luphi asse xawisino. Gobbansara Edenete kaashshi base gede lowo wayi heeꞌranno daafira batinye guma laaltanno. (Kal. 2:10-14; Erm. 31:12) Tini masaalo Israeele gobbansa higganno woyite calla woꞌmitannote? Qullaawu Maxaafi Gobbansa higguri maalaletenni hurtinota dikulanno. Lawishshaho hatte yannara ballootu ille difaꞌnitino. Konnira Maganu tenne masaalo widoonni albillitte hurre heedhannota kulanni no.

13, 14. Hunda Baabiloonete qafadonni higino manni Isayaasi 65:21-23te noo masaalo woꞌmitanna lainohu hiittoonniiti? Ikkollana tenne masaalo giddo albillitte woꞌmitannoti hiittenneeti? (Hanafote noo misile lai.)

¹³ Isayaasi 65:21-23 nabbawi. Yihudu manni gobbansa higi woyite injiino mine, loosantino baatto woy woyinete base diafiꞌrino. Ikkollana Maganu maassiꞌrinonsa daafira yannate gedensaanni heeshshonsa gari soorramino. Insa mine miꞌnite hakko heeꞌranna loosidhinota coommado sagale ittanni heeꞌra mageeshsha hagiirsiissinonsaro heda dandaatto!

¹⁴ Tenne masaalo garinni dirinke “haqqu gede seeda diro” ikkannota wodanchi. Mite haqqe kumunni kiirranni diro heedhanno. Mannu ooso kageeshshi diro heeꞌrate fayyimma afiꞌra hasiissannonsa. Isayaasi masaalo garinni mannu togoo heeshsho heeꞌrannoha ikkiro, tini dhagge ikkitanno gannateeti! Qoleno tini masaalo woꞌmase digattanno!

15. Isayaasi maxaafira kulloonni atooti giddo mitu hiikkonneeti?

¹⁵ Hanni aleenni laꞌnummo masaalo albillitte woꞌmitanno gara hedi: Uullate aana Maganu maassiꞌrino manni woꞌmanno. Mittu manchino saada woy kaajjadu manni gawajjannoe yee diwaajjanno. Illiweelootu, macciweelootunna kottootu hurtanno. Mannu uminsa mine miꞌnanno, hattono itannore hagiirruni loosiꞌranno. Insa haqqetenni roore seeda diro heedhanno. Qullaawu Maxaafi giddo albillitte togoo heeshsho heeꞌneemmota leellishshanno taje no. Ikkollana mitu manni ‘Tini masaalo albillitte uulla gannate ikkitannota leellishshannota diꞌꞌikkitino’ yaara dandaanno. Tennera mayite qolatto? Albillitte uulla gannate ikkitannota leellishshannoti kaajja taje hiittenneeti? Uullate aana heeꞌrino manni baalunkura bayiriidi manchi yaano Yesuusi, uulla gannate ikkitannota leellishshannota kaajja taje kulinonke.

GANNATE EATTO!

16, 17. Yesuusi Gannatete daafira coyiꞌrinohu hiitte yannaraati?

¹⁶ Yesuusi mitte bunshe nafa loosinokkiha ikkirono, reyote yoo yineennasi jaddo loossinori lamu Ayihudete manni ledo haqqaho sutamino. Yesuusi reyara albaanni lamunku manchi giddo mittu isi moote ikkinota huwate togo yee xaꞌmiꞌrino: “Mootichaꞌya! Gashshootikkinni daatto woyite qaagie.” (Luq. 23:39-42) Yesuusi Luqaasi 23:43te qolino dawaro albillittete heeshshonke ledo xaadooshshe afidhinote. Mitu egennaammi konne qummeeshsha noo gedeenni togo yite tirtanno: “Halaale kuleemmohena, techo ane ledo Gannate eatto.” Tenne hedo daafira mannu babbaxxinore coyiꞌranno. Ikkina Yesuusi techo yaasi mayyaate?

¹⁷ Batinyu yannanke afiira, mitte yaatto xawisate borrote malaatta lawishshaho taxxeessu malaate horoonsiꞌra woy qaallate orte soorra dandiinanni. Angate galchinoonnite hundite Giriikete borrora kayinni duucha woyite borrote malaatta dihoroonsiꞌnanni. Konnira Yesuusi “Halaale kuleemmohena, techo ane ledo Gannate eatto” yiinonso, “Halaale kuleemmohena techo, ane ledo Gannate eatto” yiino? yine hendammora dandiineemmo. Tirote looso loossannori tironsa insa hedo ledo sumuu yitanno gede assiꞌrate, tini yaatto ofoltino gara soorritara dandiitanno.

18, 19. Yesuusi coyiꞌrinore huwatate mayi kaaꞌlannonke?

¹⁸ Ikkollana Yesuusi hakkuyira albaanni rosaanosira “Manchi beetti waammate giddo sase barranna sase hashsha keeshshanno” yiinota qaagi. Isi lede togo yiino: “Manchi beetto mannu angara sayinse uyinanni; insano shitannosi; isi kayinni sayikki barra reyotenni kaꞌꞌanno.” (Mat. 12:40; 16:21; 17:22, 23; Maq. 10:34) Soqqamaanchu Pheexiroosi kuni ikkinota coyiꞌrino. (Soq. 10:39, 40) Konni daafira Yesuusi reyi barranni Gannate dieino. Yesuusi Maganu kayisasi geeshsha boode barra “Waammate” giddo keeshshino.—Soq. 2:31, 32, NW.a

¹⁹ Konni daafira Yesuusi jaddo loose sutamino manchira “Halaale kuleemmohena techo, ane ledo Gannate eatto” yiinosita wodancha dandiineemmo. Konni garinni coyiꞌra Muse yannara nafa rosantinote. Muse togo yiino: “Techo eemmoꞌneta tenne hajajo wodaniꞌnera wodhe.”—Mar. 6:6; 7:11; 8:1, 19; 30:15.

20. Yesuusi coyiꞌrinore garunni huwantoommota leellishshannoti mayi taje no?

²⁰ Yesuusi ilamino qooxeessira heeꞌrinohu mittu Qullaawa Maxaafa tiranno manchi Yesuusi qolino dawaro daafira togo yiino: “Kuni qummeeshshi illachishannohu ‘techo’ yaanno qaali aanaati; qoleno tenne hedo ‘Halaale kuleemmohena techo, ane ledo Gannate eatto’ yine nabbawa hasiissanno. Yesuusi qaale einohu hakko barra ikkirono, hakku qaali woꞌmannohu kayinni yannate gedensaanniiti.” Kuni manchi xawisino garinni, hakkawaro Soojjaatoonni heeꞌranno manni coyiꞌrinore wonshannota leellishate togoo yaatto horoonsiꞌra rosantinote. Konni daafira ontikki sanira borreessinoonniti Siyriyaaki yinanni tirora Yesuusi qolino dawaro togo yite tirtino: “Ee, halaale yeemmohena techo ane ledo Edenete Kaashshu Base eatto.” Tini hexxo ninke baalanka jawaachishshannonke.

21. Jaddo loosino manchi maa diꞌꞌikkino? Mayira?

²¹ Yesuusi ledo sutaminohu jaddo loosino manchi, Yesuusi ammanantino soqqamaasine isi ledo iima gashshitannota kule qaale einota diafino. (Luq. 22:29) Qoleno hakku manchi dicuuamino, woy qullaawu ayyaaninni dibuuramino. (Yoh. 3:3-6, 12) Konni daafira Yesuusi jaddo loosino manchira qaale ei woyite coyiꞌrinohu uulla gannate daafiraati. Yannate gedensaanni soqqamaasinchu Phaawuloosi ‘gannate hawulukamino’ manchi daafira kultanno ajuujare coyiꞌrino. (2 Qor. 12:1-4) Phaawuloosinna wole ammanantino soqqamaasine Yesuusi ledo Maganu Mangiste gashshaano ikkate iimira harate doorantinoreeti. Ikkirono, Phaawuloosi coyiꞌranni noohu albillitte dagganno “gannate” daafiraati.b Tini gannate uullate aana ikkitanno? Ati hatte gannatera heeꞌra dandaatto?

MAA HEXXA DANDAATTO?

22, 23. Maa hexxa dandaatto?

²² Daawiti “Keeraano baatto ragidhanno” yanna daafira coyiꞌrinota qaagi. (Far. 37:29; 2 Phe. 3:13) Daawiti kowiicho mannu ooso Maganu seeri garinni heedhanno yanna daafira coyiꞌranni no. Isayaasi 65:22te “Manniꞌya haqqu gede seeda diro heeꞌranno” yine masaalloonni. Tini, albillitte mannu lowo kume diro heeꞌrannota leellishshanno. Ati kuni ikkannota agadha dandaatto? Ee, korkaatuno Yohaannisi Ajuuja 21:1-4te garinni, Maganu mannu ooso maassiꞌranno; isi eino qaali giddo mittu ‘reyo diheedhanno’ yaannoho.

²³ Qullaawu Maxaafi gannatete daafira rosiisanno rosi gurchaawannoha diꞌꞌikkino. Addaaminna Heewani Gannatete heeꞌrate qoossonsa huꞌnitinoha ikkirono, Gannate hegerera baꞌe digattanno. Maganu qaale eino garinni isi uullate aana heeꞌranno manna maassiꞌranno. Daawiti qullaawu ayyaaninni, keeraanonna shaqqaddu uulla ragidhannotanna hegerera heedhannota coyiꞌrino. Isayaasi maxaafi giddo noo masaalo gannate ikkitino uullara heeꞌneemmo heeshsho quqquxamme agadhineemmo gede assitannonke. Kuni ikkannohu mamarooti? Yesuusi jaddo loosino manchira eino qaali woꞌmanno woyiteeti. Ee, atino Gannatete heeꞌra dandaatto! Hatte yannara, Kooriyaho assinoonni gambooshshe daggino roduuwi “Gannatete xaandeemmona!” yite coyidhinori woꞌmanno.