Nabbawaano Xaꞌmitanno Xaꞌmo

Soqqamaanchu Phaawuloosi ‘sayikki gordonna’ “Gannate” hawulukaminohu ma garinniiti?—2 Qor. 12:2-4.

Phaawuloosi 2 Qorontoosi 12:2, 3te “sayikki gordi giddora” hawulukamino manchire coyiꞌrino. Kuni manchi ayeti? Phaawuloosi, Maganu iso soqqamaasincho asse horoonsiꞌranni noota Qorontoosi songora borreessino sokka aana luphi assino. (2 Qor. 11:5, 23) Hakkiinni isi ‘Mootichu uyinosi xawishshinna ajuujare’ coyiꞌrino. Phaawuloosi kowiicho wolu roduuwi daafira xawisanni nooha diꞌꞌikkino. Konnira Phaawuloosi “ajuuja” laino manchi daafira coyiꞌrinohu isonooto kulateeti yine heda garankolla.—2 Qor. 12:1, 5.

Konni daafira ‘sayikki gordonna’ “Gannate” hawulukamino manchi Phaawuloosiiti yaate. (2 Qor. 12:2-4) Isi “ajuuja” yaanno qaale horoonsiꞌrasi, laino coyibba woꞌmitannohu albillitte ikkinota leellishshanno.

Phaawuloosi kulinohu “sayikki gordi” maati?

Qullaawu Maxaafi giddo ‘gordo’ yaanno qaale illete leellanno gordo xawisate horoonsiꞌnoonni. (Kal. 11:4; 27:28; Mat. 6:26) Ikkollana ‘gordo’ yaanno qaale wolereno xawisate horoonsiꞌnoonni. Mito woyite kuni qaali mannu gashshoote xawisanno. (Dan. 4:20-22) Qoleno iimi gashshoote lawishshaho Maganu Mangiste xawisateno konne qaale horoonsiꞌnoonni.—Aju. 21:1.

Phaawuloosi ‘sayikki gordo’ lainota coyiꞌrino. Togo yaa mayyaate? Qullaawu Maxaafi mito woyite mitto coye sase hige kulannohu hakko coye luphi assate woy kaajjishateeti. (Isa. 6:3; Hiz. 21:27; Aju. 4:8) Phaawuloosi ‘sayikki gordo’ yee coyiꞌrinohu, baalanta roortannota, hattono Yesuusi Kiristoosinna 144,000 gashshitannota ayirrado Mesihichu Mangiste xawisate ikkikki digatino. [Qullaawa Borro Seekke Huwata (Ingilizete Afoo) yaanno maxaafa, Xiraaze 1, qoola 1059, 1062 lai.] Soqqamaasinchu Pheexiroosi Maganu qaale eino garinni “haaro gordo” agadhine heeꞌnoommota kuli woyite Mesihichu Mangiste daafira xawisanni no.—2 Phe. 3:13.

Phaawuloosi qummi assino “Gannate” maati?

“Gannate” yaanno qaalino babbaxxino coye xawisara dandaanno: (1) “Gannate” umo mannu ooso heedhino base ikkitino daafira, Gannate yaanno qaali albillitte Gannate ikkitanno uulla leellishshanno yee heda garankolla. (2) Gannate yaanno qaali haaro alamera Maganu manni afiꞌrannoha baxxinoha ayyaanaamittete atoote xawisara dandaanno. (3) Qoleno Ajuuja 2:7te xawinsoonnita “Maganu qixxeessino gannate” yaano iima nooha hagiirsiisanno coye xawisara dandaanno.—Maaja 15, 2015nnita Agarooshshu Shae qoola 12-13 gufo 8 lai.

Soqqamaanchu Phaawuloosi 2 Qorontoosi 12:4te aana ajuujatenni lainore kuli woyite kuri sasenta coyibba xawisanni nooha ikkara dandaanno.

Xaphi assate:

Layinki Qorontoosi 12:2te kulloonnihu “sayikki gordi,” Yesuusi Kiristoosinna 144,000 gashshitannota Mesihichu Mangiste yaano ‘haaro gordo’ ikkitukki digattino.—2 Phe. 3:13.

‘Sayikki gordo’ yinoonnihu tini Mangiste, wole baalantenni roortinota ikkitino daafiraati.

Phaawuloosi ajuujatenni ‘hawulukami Gannate,’ (1) Albillitte uullate aana ikkitanno Gannate, (2) xaa yannara noote ayyaanaamittete gannatenni roortannota hatte yannara heedhannota ayyaanaamittete gannate, hattono (3) iima noota “Maganu qixxeessino gannate” ikkitara dandiitanno; albillitte dagganno alamera tini sasenti gannate mitteenni heedhanno.

Konni daafira, haaro alameeti yaa, haaro gordootinna haaro uullaati. Tini haaro qixxaawo, iima nooha Maganu Mangiste gashshootenna Gannate ikkitanno uullara heeꞌrannoha Yihowara soqqamanno manna amaddinote.