Zamachinke Mulla Daafuro Diꞌꞌikkino
Songuwa awuraajju gambooshshensa jammartara sase saamminte gatte heedheenna, hasatto noonsa manna gambooshsheho koyisate zamacha jammartanno. Diru dirunku togoo zamacha fulleemmohu mulla beebba diꞌꞌikkino. Duucha wote woshshattonke ayirrise daanno manni, shiqqannota Qullaawa Borro aana xintantino nigiggirubba macciishshe, woxe kaffallinsakki soqqamate feeffattino roduuwanke lae, hattono amanyootenkenna mereeronke noo mittimma lae dhagge assiꞌranno. (Far. 110:3; 133:1; Isa. 65:13, 14) Ikkina, isi zamachinke guma abbanno? Hakko iso koyinseemmo manni haꞌre daanno doogo xeerto ikkituro gambooshshenke daanno?
Lamu kuminna tonaamittunnihu awuraajju gambooshshiha koyishshu woraqata minise xullora worreenna adhitinoti mitte mancho mitte sinu biirora dabdaabbe sokkino. Tini mancho duucha wote Yihowa Farciꞌraasine qaese marturo maaxantannote. Togo yite borreessitino: “Biifado qaenna danchu minaanni nooe daafira, hagiidheemma gede assannoe coyi baalunku nooeha lawinoe. Ikkollana hagiirru dinoe, qoleno heeshshoꞌya mittu alaamino nookkite. Konnira Qidaamete barri pirogiraame macciishshate 320 kiilomeetire makeenunni haꞌrate kaumma.” Gambooshshu lowo geeshsha hagiirsiisinose daafira, hashshano hakko galte Sambatu barri pirogiraameno beeqqa hasidhinota minaannisera silke dowwolte kultu. Togo yitino: “Baalanta nigiggirubba macciishshoomma, hattono batinye Yihowa Farciꞌraasinenni xaadoomma; pirogiraame gooffannota horonta dibaxoomma.” Qaese higgu gedensaanni, xiinxallo jammartino; hakkiinnino shoolu agani gedensaanni cuuantinokki halashshaancho ikkitino. “Hakkawaro koyishshu woraqata xulloꞌyara afiꞌraꞌya lowo geeshsha hagiirsiissannote; korkaatuno xa heeshshoꞌya alaamu noota ikkitino!”
Koyinseemmo manni giddo daannohu no. Konni daafira, konni hasiisanno zamachi yannara manna diinaggaabbine koyisse. Gatannoꞌneha koyishshu woraqata gambooshshu heeꞌranno katamira manna koyissinanni gede adhitine amme.
[Qoola 5 noo saaxine]
Mayine Koyisa Dandiineemmo?
Soqqanshote killilenke zamachunni guda dandiineemmo gede haranchore coyiꞌra hasiissannonke. Keere haaꞌnummo gedensaanni togo yaa dandiineemmo: “Alame woꞌmate konne koyishshu woraqata tuqinsanni heeꞌnoommo. Kuni atera abbinoommoho. Roore coye woraqatu aana borreessinoonni.” Koyissinanni wote faasiiqqine coyidhe. Manna Qidaamenna Sambata koyinseemmo wote, hasiissannoha ikkiro metseettano ela dandiineemmo.