Yihowa Guwisiꞌrate Kaaꞌlitannonketa Wole Faro
1. Yihowa ‘lowo geeshsha guwisiꞌrate’ kaaꞌlitannonketi haaro qixxaawo hiittenneeti?
1 Saihu Badheessu aganinni jammarre, halashshaano diru tuqa Badheessunna Dotteessu aganira, hattono woradu aliidi laꞌꞌaanchi songo towaatanno aganira 30 saate soqqante kaaꞌlaano suwisaano ikka dandiitanno gede haaro qixxaawo assinoonni. Woradu aliidi laꞌꞌaanchi songo towaatanno yanna lamu agani mereero ikkitannoha ikkiro, 30 saate soqqante kaaꞌlaano suwisaano ikka hasidhanno halashshaano lamunku agani giddo mitto doodha dandiitanno. Baalanti kaaꞌlaano suwisaano woꞌma yanna suwisaanonna baxxitino suwisaano ledo heeꞌranno gambooshshe gudisse beeqqa dandiitanno. Tenne qixxaawo garinni, 50 saate soqqamme kaaꞌlaano suwisaano ikka dandiineemmokkiha ikkiro, diru giddo shoole hinge 30 saate soqqamme kaaꞌlaano suwisaano ikkine Yihowa ‘lowo geeshsha guwisiꞌra’ dandiineemmo!—Far. 109:30; 119:171.
2. Woradu aliidi laꞌꞌaanchi towaanyo yannara kaaꞌlaano suwisaano ikkitannori hagiidhitanno gede assannonsari maati?
2 Woradu Aliidi Laꞌꞌaanchi Towaanyo Yannara: Xaa wote batinye halashshaano woradu aliidi laꞌꞌaanchi songo towaatanno yannara kaaꞌlaano suwisaano ikkanna isi ledo soqqantenna mimmito jawaachishshe lowo geeshsha hagiidha dandiitanno. (Rom. 1:11, 12) Batinye kaaꞌlaano suwisaano loosu barruwa giddo fajjo xaꞌmidhe woradu aliidi laꞌꞌaanchi ledo soqqantara dandiitanno. Saamminte woꞌma loossannori kayinni woradu aliidi laꞌꞌaanchi ledo Qidaame woy Sambata soqqamate qaxaro amada dandiitanno. Qoleno, kaaꞌlaano suwisaano woꞌma yanna suwisaanonna baxxitino suwisaano ledo heeꞌranno gambooshshe beeqqansa lowo geeshsha hagiirsiissannote!
3. Qaagooshshu Ayyaani wogga kaaꞌlaancho suwisaancho ikkate dancha yannaati yineemmohu mayiraati?
3 Badheessunna Dotteessu Aganira: Konni albaanni noo qixxaawo garinni, Qaagooshshu Ayyaani woggara mitto agana calla 30 saate soqqante kaaꞌlaano suwisaano ikkitanno halashshaano xa konni garinni lame agana soqqante Yihowara ‘galatu kakkalo’ shiqishiꞌra dandiitanno! (Ibi. 13:15) Badheessunna Dotteessu agani kaaꞌlaano suwisaano ikkine albinni roore soqqamate dancha faro afiꞌneemmo agannaati. Diru kiiro tenne agannara manna Qaagooshshu Ayyaanira koyinseemmohu hagiirsiisanno zamachi heeꞌrannonke. Qoleno, Qaagooshshu Ayyaani woggara lowo halashshaano albinni roore soqqantanno daafira, addi addi halashshaano ledo soqqama dandiineemmo. Qaagooshshu Ayyaana ayirrinsihu gedensaanni hakko barra dayinoha hasatto noonsa manna faana ganne baxxitino nigiggireno daye macciishshanno gede jawaachinsheemmo. Aleenni laꞌnummota kaaꞌlaancho suwisaancho ikkate kaaꞌlitannohe qixxaawo horoonsiꞌratto gede wodanikki kakkayisahekka?—Luq. 6:45.