Qullaawu Maxaafi Roso Yinanni Maxaafa Adha Hasiꞌrannokki Manna Kaaꞌla
1. Qullaawu Maxaafi Roso yinanni maxaafa umonni egensiisa baalunku mannira kaaꞌlitanno? Xawisi.
1 Mittu manchi Yihowa magansiꞌrate, balaxe Qullaawu Maxaafi yaannore afa hasiissannosi. Ikkollana, mitu manni Kiristaanunnitenni baxxitino ammaꞌno harunsanno, hattono Qullaawa Maxaafa Maganu Qaali gede asse dilaꞌꞌanno. Wolootu kayinni Maganu noonta ammantannokkireeti woy Qullaawa Maxaafa naaddannokkireeti. Umonni Qullaawu Maxaafi Roso yinanni maxaafa egensiinseenna adha hasiꞌrannokki manna kaaꞌlate hiittee borruwa horoonsiꞌra dandiineemmo? Aantete 20 gobbanni gamba assinoonnita tennera kaaꞌlitanno assaawe worroonni.
2. Mittu manchi Maganu noota ammanannokkita kulinkero maa xaꞌma hasiissannonke? Mayira?
2 Maganu Noota Ammantannokkire: Mittu manchi Maganu no yee ammanannokkita kulinkero, ammanannokki gede assinosi korkaata xaꞌma danchate. Hatto yiinohu suutu soorro ammananno daafiraatikka? Maganu dino yaanno gede assitinositi alamete noote taashshote xeꞌne woy ninke ammanaanote yitannori assitanno bunsheetikka? Woy kuni manchi Maganu noota hakkeya ammannannikki gobbanni dayinohokka? Miteekke isi Maganu horo dino yee karakkarama hoogara dandaanno; ikkollana Magano ammana hasiissannoe yee hede egenninokkiha ikkara dandaanno. Lowo halashshaano togoo hedo noosi mancho, “Bashshonni togo yite hedatto?” yee xaꞌma, manchu hedosi xawisanno gede assitannota buuxxino. Xaꞌmitine kaꞌine macciishshe, hattono coyiꞌre gudikkinni mereero eꞌinoonte. Coyishiinsheemmo manchi Maganu noota ammanannokkihu mayiraatiro buunxummoro, hakko mancho ma garinni kaaꞌlineemmoronna hiittee borro elleemmoro anfeemmo.—Law. 18:13.
3. Coyishiinsheemmo mancho ayirrinseemmotanna hedosi minsheemmokkita leellisha dandiineemmohu hiittoonniiti?
3 Hasaawisatto wote, kuni manchi ammanino coye okkitanni noottohu gede ikke macciishshamannosi gede assa qorophi. Yunayitidi Isteetete nooti sinu biiro togo yitino: “Mannu baxire yee ammana dandaannota afanna tenne qoossonsa ayirrisa lowo geeshsha danchate. Karakkarame qeelate woꞌnaalantenni, mannu heeshshi gotti asse hedanno gede assitanno xaꞌmo xaꞌmanna uminsa kuni konneeti yitanno gede agura woyyate.” Mittu awuraajju aliidi laꞌꞌaanchi minu anni hedosi coyiꞌranna macciishshihu gedensaanni duucha wote, “Togo yite hedde egennoottoyya?” yee xaꞌme jammarannota coyiꞌrino.
4. Budistete ammaꞌno harunsanno manna kaaꞌla dandiineemmohu hiittoonniiti?
4 Budistete ammaꞌno harunsanno mannira Maganunniri wosiꞌnannonsa. Biritaaniyaho heedhannoti mite halashshaano togoo mannira farcidhanno wote Geeddanno Salaamenna Hagiirre Afiꞌra Dandaattohu Hiittoonniiti? yitanno biroshere horoonsiꞌra baxxannota coyidhino. Tenne biroshereta bitimu assaawe hasaabbuhu gedensaanni, “Isi Baalunkura Aliidi Kalaqaanchi No?” yaanno gafa hasaabbanno; hakkiinnino, “Mannu Ooso Baalate Biddishsha Amadino Maxaafa” yaanno birxichiwa saꞌanno. Hakkuyi gedensaanni Qullaawu Maxaafi Roso yinanni maxaafa horoonsiꞌra dandiitanno; hakkiinni qaete annira togo yitanno: “Magano ammana hoogittorono, Qullaawu Maxaafi lowo geeshsha kaaꞌlanno biddishsha amadinohura konne Maxaafa xiinxalla xaqqantannohe.” Yunayitidi Isteetete heeꞌrannohu Chayinu manni noo qooxeessira soqqamanno suwisaanchi togo yiino: “Killilenkera lowo manni nabbawa baxanno. Konni daafira galagalle hasaawisate marrammo geeshsha uyinoommonsa borro nabbabbe guddanno. Ikkollana Qullaawa Maxaafa xiinxallate yinanniri leella hoogansara dandaanno. Konni daafira manna umo hasaawiseemmo wote, Dancha Duduwo! yitanno biroshere mannu ledo hasaawate injaanno garinni qixxaabbino daafira ise eemmonsa.” Yunayitidi Isteetete Chayinu afii woradira soqqamannohu mittu woradu aliidi laꞌꞌaanchi, manna umo hasaawinsanni wote Qullaawu Maxaafi Roso yinanni maxaafa egensiisa dandiinannita coyiꞌrino. Ikkollana, Maganunnire kultannote umi fooliishshonni jammarantenni Qullaawu Maxaafire xawissannote layinki fooliishshonni jammara woyyitannoha ikkara dandaanno.
5. Cinca hasiissannohu mayiraati?
5 Mitto mancho Magano ammananno gede assate lowo yanna hasiissanno daafira, cinca lowo geeshsha hasiissanno. Umi barri hasaawi callu mittu manchi Kalaqaanchu no yee ammananno gede assa hoogara dandaanno. Kuni manchi miteekke yannate gedensaanni, Maganu no yine ammannanni gede assannori heeꞌrara dandaanno yee ammanara woy mittu manchi hatto yee ammanara dandaannohu mayiraatiro huwatara dandaanno.
6. Mitu mannira Qullaawu Maxaafira hasatto hooggannonsahu mayira ikkara dandaanno?
6 Qullaawa Maxaafa Naaddannokkire Woy Ammantannokkire: Mito wote kayinni mittu manchi Maganu noota ammanannoha ikkirono, Qullaawa Maxaafa Maganu Qaaleeti yee ammanannokki daafira kuni Maxaafi rosiisannore afa hasiꞌrannokkiha ikkara dandaanno. Kuni manchi Kiristinnu ammaꞌno nookki gobbara heeꞌrannoha ikkaranna Qullaawa Maxaafa Suꞌmu Kiristinni ledo xaadise hedara dandaanno. Woy kuni manchi ninke Kiristaanaho yaanno manni woꞌmino gobbara heeꞌrirono mannu ammaꞌnote coye lashshi assannota laino daafira Qullaawu Maxaafi kaaꞌlannoeri dino yitanno hedo noosiha ikkara dandaanno. Togoo manna Qullaawu Maxaafira hasatto heedhannonsa gede assine Qullaawu Maxaafi Roso yinanni maxaafinni xiinxallate maahoyye yaate deerra maranno gede kaaꞌla dandiineemmohu hiittoonniiti?
7. Mannu Qullaawu Maxaafire afate kakkaꞌꞌanno gede assate woyyitanno doogo hiitteeti?
7 Girikete gobbara nooti sinu biiro togo yite borreessitino: “Qullaawu Maxaafira hasatto noonsakki manna kaaꞌlinanniti woletenni woyyitino doogo, Qullaawa Maxaafa fanne giddosi amadinore leellishate. Lowo halashshaano insa coyidhannohunni aye coyinni roore Qullaawu Maxaafi sokka mannu wodana kakkayisate wolqa afidhinota wodanchitino. (Ibi. 4:12) Lowo manni Qullaawu Maxaafi giddo Maganu suꞌma laꞌꞌansa Qullaawa Maxaafa roore afate kakkaꞌꞌanno gede assitinonsa.” Hindete gobbati sinu biiro togo yite borreessitino: “Hinduuzimete ammaꞌno harunsannohu lowo manni heeshshonna reyo lainohunni rosiinsanni halaale afa hasiꞌranno. Qoleno, Qullaawu Maxaafita babbadooshshu nookki alame daggannota kultanno hexxo afa lowo geeshsha hasiꞌranno.” Qooxeessinkera mannaho xiwannore kayinse hasaawisanke, Maganu Mangiste xa noo qarra biddi assitannota Qullaawa Maxaafa fanne kulate faro fantannonke.
8. Suꞌmu Kiristinna harunsanno manni assannori Qullaawa Maxaafa giwanno gede assinosi manchinni xaandummoro mayyaa dandiineemmo?
8 Suꞌmu Kiristinna harunsanno manni assannori Qullaawa Maxaafa giwanno gede assinosi manchinni xaaddiniro, Suꞌmu Kiristinni Qullaawu Maxaafi yaannore assanni nookkita afanno gede asse. Hindete nooti sunu biiro togo yitino: “Mito wote, beetekiristaanna Qullaawu Maxaafira agare worroonnire ikkitinokkita mannu afanno gede assa hasiissanno.” Tini biiro yitino garinni, Hinduuzimete ammaꞌno harunsanno manni Heeshshote Alaami Maati? Afiꞌra Dandaattohuna Hiittoonniiti? yinanni birosherera fooliishsho 4 noota beetekiristaanna Maganu Qaale mannu hedo ledo karsiisatenna hunate addi addire assitinota kultanno assaawere hasaawa baxanno. Biraazilete gobbara heeꞌrannohu mittu suwisaanchi manna togo yaanno: “Qullaawu Maxaafi yaannore mayira ledde afate diwoꞌnaalatto? Lowo manni mitte ammaꞌnono harunsate giddaawikki tenne assanni no. Atino hatto assittoro dhagge ikkannore rosattora dandaatto.”
9. Mittu manchi umi qara Qullaawu Maxaafi rosiisannore afate hasatto hooggusiro hexxo mudha hasiissannonkekkihu mayiraati?
9 Yihowa mittu mittunku manchi wodana laꞌꞌanno. (1 Sam. 16:7; Law. 21:2) Suwashsho wodana afiꞌrino manna halaalu magansiꞌrawa goshooshanni no. (Yoh. 6:44) Kuri giddo lowo manni albaanni Maganunnire horonta rosinokkiho woy Qullaawa Maxaafa afinokkiho. Soqqanshonke mannu ‘gatannonna halaalunnita gara ikkitino egenno afiꞌranno’ gede faro fantanno. (1 Xim. 2:4) Konni daafira, coyishiishshinanni manchira umi qara Qullaawu Maxaafi rosiisannore afate hasatto hooggusiro hexxo mudhitinoonte! Hasatto heedhannonsa gede assate kiꞌne coyidhinanni afiinni qixxaabbino borro horoonsidhe. Konni garinni hasaabbinanni keeshshitini gedensaanni, hasaawaꞌne xiinxallisate horoonsiꞌneemmohu Qullaawu Maxaafi Addinta Mayyee Rosiisanno? yaanno maxaafiwa qola dandiitinanniha ikkara dandaanno.
[Qoola 4 noo misile]
Qaete anni Maganu no yee diammaneemmo yiiro, togo assite lai:
• Hatto yaanno gede assinosi korkaata afate, “Bashshonni konni garinni hedatto?” yite xaꞌmi.
• Budistete ammaꞌno harunsannoha ikkiro, Geeddanno Salaamenna Hagiirre Afiꞌra Dandaattohu Hiittoonniiti? yinanni birosherera qoola 9-12 aana noo assaawe horoonsiꞌri.
• Kuni manchi heeshsho suutu soorronni daggino yee ammanannoha ikkiro, aante noo borruwa kaaꞌlitara dandiitanno:
Baqqi Yiiyye! yitanno metseetenkera ganye fulannoha “Kalaqinohu No?” yaanno birxicho
Maganunniti Dhaggete Kalaqo Ayirrinyesi Leellishshanno yitanno viidiyo
Hagiirraame Heeshsho Afiꞌra Dandaattohu Hiittoonniiti?, gafa 4; Heeshsho Dagginohu Kalaqanteeti?; nna Heeshshote Kaima—Dawaronsa Afa Hasiissannota Onte Xaꞌmuwa yitanno birosherubba
• Taashshote xeꞌnenna qarru Magano ammanannokki gede assinosiha ikkiro aante noo borruwa kaaꞌlitara dandiitanno:
Isi Atera Assaawanno Kalaqaanchi No? yaanno maxaafa, fooliishsho 10
Addinta Maganu Ninkera Assaawanno? yitanno biroshere, gafa 6; nna Heeshshote Alaami Maati? yitanno biroshere gafa 6
• Maganu heeꞌrara dandaanno yitanno hedo giddosi kalaqantanno wote, hasaawaꞌne Qullaawu Maxaafi Roso yinanni maxaafiwa sayisi. Hakkawote fooliishsho 2ni woy qaete annira sumuu yaannoha wole birxicho doore jammara dancha ikkitara dandiitanno.
[Qoola 5 noo misile]
Qaete anni Qullaawa Maxaafa ammanannokkiha ikkiro, togo assite lai:
• Heeshsho Hiitto Ikkite Jammartu?—Suutu Soorronninso Kalaqamunni? yinanni maxaafira fooliishsho 17 nna 18 noo assaawe horoonsiꞌri.
• Hinduuzimete ammaꞌno harunsanno mannira, Magano Baxillunninna Halaalunni Magansiꞌra Hasiissannonkehu Mayiraati? yinanni biroshere horoonsiꞌri.
• Yihudootu ammaꞌno harunsanno mannira, Olu Heeꞌrannokki Alame Dagga Ikka? yinanni birosherera qoola 3-11 noo assaawe horoonsiꞌri.
• Qullaawu Maxaafiha xintu seera harunsiniro afiꞌnanni xiqimere kayisse hasaawisi. Qullaawu Maxaafi kaaꞌlitanno amaale amadinota leellishate aante noo borro horoonsiꞌri:
Baqqi Yiiyye! yinanni metseetera aante aantete fulannoha “Maatete Kaaꞌlannore” yaanno birxicho
Qullaawu Maxaafi Heeshshokki Woyyeessate Wolqa Afiꞌrino yinanni viidiyo
Maganuwiinni Dayinoha Dancha Duduwo! yinanni biroshere, roso 9 nna 11; Duuchunku Mannira Horo Aanno Maxaafa yinanni biroshere qoola 22-26, nna Qinaabbino Heeshsho Heeꞌra Dandaattohu Hiittoonniiti? yinanni biroshere gafa 2
Budistete ammaꞌno harunsanno mannira, Salaamenna Hagiirru Woꞌmino Heeshshowa Massitanno Doogo yitanno biroshere qoola 3-7 noo assaawe horoonsiꞌri.
Isilaamaho, Addu Ammana—Hagiirraame Heeshshora Qara Coyeeti yinanni biroshere gafa 3 horoonsiꞌri.
Qullaawa Maxaafa gimbanni qooxeessira sabbakattoha ikkiro, hasaawisatto manchira kulattota horoontanno assaawe hiikkiinni afiꞌroottotero duuchaagge marte hasaawisatto geeshsha kula hoogittoro woyyate.
• Qullaawu Maxaafi masaalo woꞌmitino gara xawisse kulisi. Tennera aante noo borro horoonsiꞌra dandaatto:
Qullaawu Maxaafi Gara Ikkitino Xaggenna Ammaꞌninanni Masaalo Amadino yitanno viidiyo
Duuchunku Mannira Horo Aanno Maxaafa yitanno biroshere qoola 27-29
• Hasaawisatto manchi mito coye kayise Qullaawu Maxaafi tennera mayyaanno? yee xaꞌma jammaranno wote hakkawotenni Qullaawu Maxaafi Roso yinanni maxaafa horoonsiꞌri.
[Qoola 6 noo misile]
Qaete anni, “Ani Maganu no yee diammaneemmo” yiiro togo yaa dandaatto:
• “Ane Kalaqaanchu no yee ammaneemmo gede assinoere haranse kulohe?” Hakkiinnino Korkaata Xawisa yinanni maxaafira, qoola 84-86 noo assaawe horoonsidhe hasaawisisi; woy tenne hajore kultannota nabbabbeenna hagiirsiissinohe borro massattosi gede qaxaro amadi.
• “Kayinni Maganu nooha ikkiro, hiittooha ikkara hasiꞌratto?” Roore qaete annuwa Maganu baxillaancho, taashshonniha, maarannohanna godowa hosannokkiha ikkara hasidhannota kultanno. Maganu hattoo akatta noosiha ikkinota Qullaawu Maxaafi giddonni leellishi. (Qullaawu Maxaafi Roso yinanni maxaafira fooliishsho 1, gufo 6 jammarte noo assaawe horoonsiꞌra dandaatto.)
Qaete anni, “Ani Qullaawa Maxaafa diammaneemmo” yiiro, togo yaa dandaatto:
• “Lowo manni hatto yee hedanno. Togoo manni giddo mitu, Qullaawu Maxaafi sayinse yitannori ledo dixaadanno woy assine anfannikkire asse yaanno yee hedanno. Ikkina ati Qullaawa Maxaafa seekkite nabbabbe egennootto? [Dawaro qola geeshsha agari. Hakkiinni Duuchunku Mannira Horo Aanno Maxaafa yitanno birosherera qoola 3 noota bitimu assaawe leellishshe, biroshere uyisi.] Lowo manni Qullaawu Maxaafi waaga diafiꞌrino yee hedannohu, suꞌmu ammaꞌno harunsanno manni assannore laeeti. Tenne dayeemmo wote qoola 4 nna 5 aana noo lawishsha laꞌneemmo.”
• “Lowo mannira atete gedee hedo noonsa. Ane Qullaawa Maxaafa xagge assiꞌreemmo gede assinoere leellishohe? [Qullaawu Maxaafi sayinsete ledo xaado afiꞌrinota leellishshanno xiqise, lawishshaho Iyyoobi 26:7 woy Isayyaasi 40:22 nabbawi.] Qullaawu Maxaafi maatete lowo geeshsha kaaꞌlitanno assaaweno amadino. Tenne dayeemmo wote tennera mite assaawe kuleemmohe.”
• “Hedokki xawisse kuloottoe daafira galateemmohe. Kayinni Maganu mannaho mitto maxaafa oommero, maa maa amadino maxaafa aannoha lawannohe?” Hakkiinnino coyishiishootto manchi yaannori ledo sumuu yaannore Qullaawu Maxaafi giddonni fante leellishisi.