Temokkiruwa

◼ Awustiraaliya: Jooni yinannihu mittu tamaarino manchi anje noo waro beetekiristaane haꞌrannoha ikkirono gedensaanni “horo Maganiweelo” ikki. Mitte hige mittu suwisaanchi Heeshsho Dagginohu Kalaqanteeti? yitanno biroshere uyisi; qoleno wole wote Heeshshote Kaima yinanni biroshere massisi. Kuni suwisaanchi muli yannara fultino metseetta massanni manchu hasatto lexxitanno gede assa jammari; borro massannosi wote borrote giddonni kalaqamunnirenna Qullaawu Maxaafi masaalore kultanno birxichuwa xawisanno. Hasattosi laiti suwisaanchu Joonira Qullaawu Maxaafi Maganu Qaaleetinso Mannunniho? yaanno maxaafa uyisi. Jooni konne maxaafa nabbawe gudihu gedensaanni bashsho hedosi soorre, ‘Maganu nootanna teꞌee afa didandiinanni’ yaanno deerra dayi. Hakkiinnino, suwisaanchu Qullaawu Maxaafi Roso yinanni maxaafira qoola 20 fane gufo 8 nna qoola 23-24 aana gufo 13-16 noo assaawe horoonsiꞌre hasaawisisi. Jooni hakko noo xiqisubba dhagge assiꞌrino daafira, “Isi Qullaawu Maxaafi yaannore haaro ikke galagale laoommoro danchaho lawinoe” yiino.

◼ Meksiko: Mittu manchi Qullaawu Maxaafi Maganu ayyaaninni borreessaminoho yee ammanannokkita mittu halashshaanchira kuli. Halashshaanchu, Qullaawu Maxaafi Maganu ayyaaninni borreessaminoha ikkinota leellishohe yiisi. Shiima geeshsha hasaabbanni keeshshitu gedensaanni, manchoho Qullaawu Maxaafi giddonni rosanni noori adhama jammarisi. Roore hagiirsiisinosihunna dhagge ikkinosihu Maganu seera lainohunni rosino rosooti. Gedensaanni isi halashshaanchoho togo yiino: “Umo Qullaawa Maxaafa mitteenni nabbambummo wote wole maxaaffara noote gedee amaalella amadino yee hedoommo, hakko daafira dhagge diassiꞌroommo. Xa kayinni konne Maxaafa, roorenkanni amanyoote lainohunni aanno amaale nabbawummota tiiꞌꞌiꞌya woqasanni nooe.”

◼ Yunayitidi Isteete: Mittu minaanninna minaama, gudumaaleho baxxino garinni soqqammanni soqqansho soqqamanni heeꞌre Tayiwaanetenni daggino manchonni xaadi; tini mancho Magano ammantannoha ikkirono Qullaawa Maxaafa Awuroppu gobba mannihu gede assite laꞌannote. Dancha heeshsho heedhannota ikkiturono heeshshose giddo xeinoseri noohu gede ikke macciishshaminose daafira minaanninna minaama borro worinowa shiqqe daggu. Qullaawu Maxaafi kaaꞌlannoe yitanno hedo noose. Minaanninna minaama Qullaawu Maxaafi Roso yinanni maxaafanna Geeddanno Salaamenna Hagiirre Afiꞌra Dandaattohu Hiittoonniiti? yinanni biroshere horoonsiꞌre ise xiinxallisa jammari. Maxaafunnite layinki fooliishshonni jammara agure birosherennita “Mannu Ooso Baalate Biddishsha Amadino Maxaafa” yaanno gafa horoonsiꞌre hasaawisise. Konni gafite umi gufonni kayisse leete geeshsha hasaawe kaita, mancho Qullaawu Maxaafi wole ammaꞌnote maxaaffanni lowo geeshsha baxxinoha ikkinota dhagge assidhe coyidhino. Qoleno Qullaawu Maxaafi giddo masaalleenna woꞌmino coyire hasaabbuta, “Qullaawu Maxaafi geeshsha gara ikkinore kulannohu wolu maxaafi nooha dilawannoe!” yitino.

◼ Jaappaane: Mittu halashshaanchi qaete anni Maganu no yee ammanannokkita kulinosiha ikkirono, duuchaage mare Baqqi Yiiyye! yinanni metseetera fulannoha “Kalaqinohu No?” yaanno birxicho horoonsiꞌre haranse hasaawisanni keeshshino. Kuni manchi gale hosanni hedosi soorriꞌre Kalaqaanchu heeꞌrikki digatanno yee heda jammari. Xa kuni manchi Maganu noota ammananno, qoleno halashshaanchu ledo Maganuwiinni Dayinoha Dancha Duduwo! yinanni biroshere xiinxallanni no.

◼ Kanaada: Mitte mancho doogo hadhara fulte makeenisewa martanni heedheenna mitte rodoo haarote fultino metseete uyituse. Gedensaanni rodoo tenne mancho qae wirri yite dagguta, mancho togoore afa hasidhannokkitanna Maganu no yite ammantannokkita kaajjishshe kultuse. Rodoo hexxo mudha agurte Hagiirraame Heeshsho Afiꞌra Dandaattohu Hiittoonniiti? yitanno biroshere masseemmase yite heddu. Rodoo manchote qae galagalte marte, ‘Maganu no yite ammanattakkita kuloottaeha ikkirono, annu nookkiha qaaqqo lossidhanni noottata afoomma daafira atere heda diaguroomma’ yituse. Rodoo birosherete qoola 4 gufo 6⁠te noota, dancha amaale mamiinni afiꞌra dandiinanniro kultanno assaawe leellishshuse. Hakkiinni rodoo roso 2⁠ho noota ooso lossiꞌra dandiinanni gara kultanno amaale nabbabbanno gede kultuse. Hakkiinnino mancho tenne biroshere lowo geeshsha hagiidhite adhitino.