Nabbawa Qarrissannonsare Kaaꞌla Dandiineemmo Gara
1. Nabbawa qarrissannonsa mannira Qullaawa Maxaafa rosiisa mitiinsitannohu mayiraati?
1 Soqqanshonke yannara xaandeemmohu nabbawa qarrissannonsa manni ayyaanaamittete coye baxe heeꞌrenni, Qullaawa Maxaafa woy wole maxaaffa nabbawa waajjara dandaanno. Togoo mannira Qullaawu Maxaafi Roso yaanno maxaafa umonni aa hakkeeshshi geeshsha kaaꞌla hooggara dandiitanno. Insa ayyaanaamittetenni kaaꞌla dandiineemmohu hiittoonniiti? Temokkiro noonsare 20 saꞌanno gobbara heedhanno halashshaano tennera ma assitannoro xaꞌminoommo. Insa uyitino assaawe aanchine shiqinshoonni.
2. Nabbawa qarrissanno manna xiinxallisate lowo geeshsha kaaꞌlitanno borruwa hiikkuriiti?
2 Mittu manchi gari geeshsha woy horonta nabbawa dandaannokkiha ikkiro, Maganu Yaannore Macciishshi woy Maganu Yaannore Macciishshite Hegerera Heeꞌri yitanno biroshere horoonsiꞌra dandiinanni. Yunayitidi Isteetete heeꞌrannohu mittu suwisaanchi, hasaawisanno manchira lamenta biroshere leellishe doodhanno gede assanno. Keeniyunniti sinu biiro tini birosherubba hatte gobbara lowo geeshsha kaaꞌlitanni noota kultino; korkaatuno, xaꞌmotenninna dawarotenni hasaawantenni xagge odeessinanna rosa Afiriku mannira rosaminoreeti. Roso rosino manchi borro nabbambe xaꞌminanna hasaawa giwa hoogara dandaannoha ikkirono, tini hayyo rosinokki manchi huxuxxi yaanno gede assitara dandiitanno. Duucha halashshaano rosaanchu nabbawa mito geeshsha dandaannoha ikkiro, Maganuwiinni Dayinoha Dancha Duduwo! woy Maganu Jaala Ikka Dandaatto! yitanno biroshere woy Qullaawu Maxaafi Xagge Roseemmo Maxaafaꞌya yaanno maxaafa jammarsiissanno.
3. Nabbawa dandiitannokkire rosiisate fullankoommore ikkineemmo gede insa daafira maa wodancha hasiissannonke?
3 Galattensa: Nabbawe afannokki manni saalfatara dandaanno; qoleno togoo manni insaneeto ajishe laꞌꞌanno. Roore wote insara halaale rosiinsammora albaanni, nabbawa hoogansara huxuxxi yitannokki gede kaaꞌla hasiissannonke. Nabbawa dandaannokkihu rooru manni busulehonna rosate dandoo nooho. Insa ayirrissensa ikkinnina woffi assitine laꞌinoontensa. (1 Phe. 3:15) Sharronsa xiqime afidhinotanna ayyanaamittetenni lophitanni noota huwattanno gede assa xiinxallo baxxanno gede assitanno. Konni daafira galattensa.
Nabbawe afannokki manni saalfatara dandaanno; qoleno togoo manni insaneeto ajishe laꞌꞌanno. Roore wote insara halaale rosiinsammora albaanni, nabbawa hoogansara huxuxxi yitannokki gede kaaꞌla hasiissannonke.
4. Gari geeshsha nabbawe afannokki manni xiinxallote qixxaawanno gede jawaachisha dandiineemmohu hiittoonniiti?
4 Rosaanchu gari geeshsha nabbawe afannokkiha ikkiro nafa, xiinxallote qixxaawanno gede jawaachishshesi. Wodiidi Afirikira mite halashshaano, rosaanchinsa dancha gede nabbawa dandaanno fiixasi woy jaalasi kaaꞌlo xaꞌmiꞌranno gede kultanno. Biritaaniyaho heeꞌrannohu mittu halashshaanchi rosaanosi xiinxallote qixxaabbanno gede jawaachishate, boode guffa isi maxaafa horoonsidheenna xiinxallisanno; hatto assasi dawaro malaatisiꞌne qixxeessiꞌra dawaro qolate roore kaaꞌlitannota huwattanno gede assitannonsa. Hindete gobbara mittu rodii rosaanosi aantanno dinye barri iilla geeshsha balaxxe misilla laꞌanni hiincitanno gede kulanno.
5. Xiinxallinseemmo wote cincanke leellisha dandiineemmohu ma garinniiti?
5 Cincitinannire Ikke: Xiinxallote horoonsidhinanni borro baxxutano ikkituro, qara qara assaawe aana calla illachishshe, hattono rosaanchu tenne assaawe huwatanno gede kaaꞌlesi. Hanaffinanni wote, 10 woy 15 daqiiqi geeshsha calla hasaawa baqe ikkitara dandiitanno. Mitte higgine lowore rosiisate woꞌnaaltinoonte; boode guffa calla hasaawa baqe ikkitara dandiitanno. Rosaanchu rahe nabbawa hoogiro cince ikkinnina caaccaabbinoonte. Yihowa baxanni haꞌranno wote nabbawate dandoosi woyyeessiꞌrate kaꞌꞌara dandaanno. Rosaanchoho togoo baxilli heeꞌrannosi gede kaaꞌlate, umonni jammare songote gambooshshe daanno gede koyisa danchate.
6. Mannaho nabbambanni gara rosiisa dandiineemmohu hiittoonniiti?
6 Qullaawu Maxaafi rosaano nabbawa rossuro, ayyaanaamittetenni rakke lophitanno. (Far. 1:1-3) Batinyu roduuwi xiinxallisse kaꞌu kiiro shiimu daqiiqi giddo, Nabbawanna Borreessa Rosate Murcidhe Kai yitanno biroshere horoonsidhe rosaanonsa kaaꞌlitino. Rosaanchu didandeemmo yee hexxo mudhiro, rosiisiꞌre kae assa dandiinoha mito coye kultine dandeemmo yitanno hedo heedhannosi gede jawaachisha dandiitinanniha ikkanno. Sharramanno sharro Yihowa maassiꞌrannota addaxxanno gede kullesi, hattono kaaꞌlo afiꞌrate huuccatto assiꞌranno gede jawaachishshesi. (Law. 16:3; 1 Yoh. 5:14, 15) Biritaaniyaho mite halashshaano rosaanonsa quwa saꞌinokki mixo fushshidhanno gede lawishshaho umo fidale affe gudate, hakkiinnino doorantino xiqisubba faꞌne nabbawa dandaate, jeefote qole shotinse qixxeessinoonni borro nabbawa dandaate mixo fushshidhanno gede jawaachishshanno. Mannu nabbawa rosanno gede kaaꞌlate, nabbambanni gara rosiisa calla ikkikkinni tenne assate hasatto heedhannonsa gedeno kaaꞌla hasiissanno.
7. Nabbawa qarrissanno mannira halaale badhera qoꞌla hasiissannonkekkihu mayiraati?
7 Yihowa roso gari geeshsha rosinokki manna ajishe dilaꞌꞌanno. (Iyo. 34:19) Yihowa seekke laꞌꞌannohu mannu wodanaati. (1 Zee. 28:9) Hakko daafira nabbawa qarrissanno mannira halaale badhera qoꞌlitinoonte. Togoo manna xiinxallo jammarsiisate kaaꞌlitannoti lowoti kaajja borro noonke. Yannate gedensaanni, Qullaawu Maxaafi Roso yaanno maxaafira higanna rosaanchu Qullaawa Borrota roore egenno afiꞌranno gede kaaꞌla dandiitinanni.