Ille Ballitinore Yihoware Rossanno Gede Kaaꞌlensa
1. Yesuusi ille ballitinore mararannota leellishinohu hiittoonniiti?
1 Yesuusi reyara boodu barri gate no. Isi Iyyaarkote kataminni fulanni heeꞌreenna, lamu ille ballitinori: “Mooticha, maarinke!” yite huuccidhusi. Yesuusa iillannosi fatani cannaqamanno gede asse noosiha ikkirono, isi uurre insa woshshe hursinonsa. (Maatewoosi 20:29-34) Yesuusi gede ninkeno ille ballitinore mararreemmonsata leellisha dandiineemmohu hiittoonniiti?
2. Ille ballino manchinni xaandummoro hakko manchira farciꞌra dandiineemmohu hiittoonniiti?
2 Kaaꞌlitinannire Ikke: Ille ballino manchinni xaaddiniro keere haadhine egennamme, hattono kaaꞌlesi. Duucha wote togoo manna mannu dogannonsa daafira, xaaddinanni manchi umo kiꞌne ammaꞌna hoogara dandaanno. Ikkollana jaalisi gede ikkitine, addinta marartinannisita leellishanno garinni coyishiishshinanniha ikkiro, huluullama agurara dandaanno. Qoleno illete ballimma deerra deerra afidhinota wodanche; tenne afaꞌne iso kaaꞌlate mageeshshire asse hasiissannoꞌnero wossanate kaaꞌlitannoꞌne. Hasiisannore assitine kaaꞌlitinisihu gedensaanni, mannaho Qullaawu Maxaafire rosiisate fultinoonnita kultinasira dandiitinanni. Mite xiqisubba lawishshaho Faarso 146:8 woy Isayyaasi 35:5, 6 nabbabbesi. Qoleno isi Bireele nabbawa dandaannoha ikkiro, Qullaawu Maxaafire lede rosate Bireeletenni qixxeessinoonni borro abbitinasira hasiꞌrannotanna teꞌee xaꞌme. Hattono jw.org aaninni qoonqotenni qaddaꞌnoonni borro afiꞌranno gede kaaꞌlesi. Isira kompiyutere noosiha ikkironna kompiyuteresira iskiriini rideri yinanni pirogiraame nooha ikkiro, jw.org aaninni borronke attantine RTF (Richi Teksti Formaati) suudinni qixxeessinoonni borro ledo uyitinisiro hagiidhara dandaanno.—“Ille Ballino Mancho Kaaꞌlitinanni Wote” yitanno saaxine lai.
3. Songonke qoqqowi giddo ille ballitinore hasa dandiineemmohu hiittoonniiti?
3 Ille Ballino Manna Hasse: Ille ballino manni mininsara marannoha wosincho manna ammaꞌnannokki daafira, minunni mine haꞌne sabbankeemmo wote duucha wote insanni xaada hoongammora dandiineemmo. Konni daafira togoo mannira farciꞌrate insa haja assine “hasa” hasiissanno. (Maatewoosi 10:11) Ille ballinohu ledoꞌne rosannohu woy ledoꞌne loosannohu no? Nooha ikkiro hakko manchira farciꞌrate woꞌnaalle. Songoꞌne qoqqowi giddo ille ballitinori rossanno rosi mini nooha ikkiro, fajjo xaꞌmitine Bireeletenni qixxeessinoonni borronke rosu mini layibirerera worre. Ille ballinoha maatete miila afiꞌrinohu affinoonnihu no? Songoꞌne qoqqowi giddo ille ballino mannira kaaꞌlo uyitanno dirijjituwa woy hattoo manni heeꞌrannowi no? Hatto ikkiro, Yihowa Farciꞌraasine ille ballino manna rosiisa lowonta hasidhannota maatensara woy kaaꞌlitannonsa dirijjite halaafichira kultine, Bireeletenni qixxeessinoonnita woy qoonqotenni qaddaꞌnoonni borro uyitinanninsata kulle. Hattono Maganu muli barra ballimma horo hunannota Qullaawu Maxaafi giddonni kullensa. Qoleno, jw.org aaninni mitto ille ballino mancho Bireeletenni qixxeessinoonnihu Qullaawu Maxaafi kaaꞌlinosi gara kultannota “Qullaawu Maxaafi Hoogoommero, Tootayyaawe Hoogoommo” (Ingilizete Afoo) yitanno viidiyo leellishshinasira dandiitinanni. Martinoonni hajo xawissine kulaꞌne, ille ballitinorinni xaaddinanni faro fantaꞌnera dandiitanno.
4. Tenne temokkironni maa ronseemmo?
4 Mitte hige Jaaneti yinanniti ille baꞌino rodoo ille ballino manna kaaꞌlitanno uurrinsha martu. Ise hakko mitte aja mancho ledo hasaawa jammartu. Jaaneti tenne manchora Yesuusi ille ballitinorira illensa fane ballino mannira baalaho albillittete assannore leellishinota kultuse. Hakkiinnino lamenti Ajuuja 21:3, 4 kulloonni hexxore hasaawi; hattono Jaaneti Maganu Mangiste tini hexxo woꞌmitanno gede assitanno gara xawissuse. Tennera mancho taxxi yite kaꞌe togo yitu: “Mittu ille ballino manchi togo yee coyiꞌranna horo macciishshe diegennoomma. Rooru laꞌꞌa dandaanno manni, mannu ille ballannohu insa woy ayiddinsa loosino cubbinniiti yee hedanno.” Gedensaanni Jaaneti tenne manchora Qullaawu Maxaafi Roso yinanni maxaafa interneetete aanaanni sokkuse; xa ise Qullaawa Maxaafa lamalate giddo lame higge xiinxallissannose.
5. Yesuusi gede ille ballino manna hursa dandiineemmokkiha ikkirono, togoo manna mararreemmoha ikkiro mayi qoosso afiꞌneemmo?
5 Addaho, ninke Yesuusi gede balloota hursa didandiineemmo; ikkollana, ille ballitinorino ikko tenne busha alame magani surrensa ballisino manni baalu, Maganu Qaali giddo noo halaale huwatanno gede kaaꞌla dandiineemmo. (2 Qor. 4:4) Yesuusi Iyyaarkote katami mule lame ille ballitino mannoota hursinohu insa “mararino” daafiraati. (Maatewoosi 20:34) Ninkeno ille ballino manna mararreemmonsaha ikkiro, ballimma hegerera hunanno Magani Yihowa daafira insara rosiisate qoosso afiꞌneemmo.