Soqqanshonke Isilanchimma Woyyeessiꞌra—Qullaawu Maxaafi Roso Yaanno Maxaafa Ela

Hasiissannohu Mayiraati? Qullaawu Maxaafi Roso yaanno maxaafi rosiisate horoonsiꞌneemmoho qara uduunnichooti. Konne maxaafa horoonsiꞌne mitto mancho xiinxxallinsammora albaanni, maxaafa isira ela hasiissannonke. Konni daafira soqqammeemmo wote Qullaawu Maxaafi Roso yaanno maxaafa elate fullankoommore ikkate sharrama hasiissannonke. (Law. 22:29) Konne maxaafa ela dandiinanniti duucha doogga no; halashshaano insara woyyitanno doogo horoonsiꞌra hasiissannonsa.

Tenne Assa Dandiinanni Gara:

Maxaafunnite mitte fooliishshowa massitannota qaete anni afate quqquxamanno gede assitanno xaꞌmo xaꞌmi. Mitte mittente fooliishshora bitimaho noo xaꞌmuwa giddonni nafa mitte doorte xaꞌma dandaatto. Qaete anni qolanno dawaro macciishshitto gedensaanni hatte xaꞌmora dawaro qolanno qumeeshsha nabbawi; hakkiinnino hatte hajore xawissanno gufo leellishisi; qoleno haransitine mitteenni hasaawa dandiitinanni.
Wole doogo kayinni maxaafaho eote qoolira noo hedo horoonsiꞌne qaete anni afate quqquxamanno gede assatenna maxaafu giddo Qullaawu Maxaafi qolanno dawaro hiikko nooro leellishate. Lawishshaho, odoote kulloonniha dadillisanno coye kultine, lowo manni dawaro afa hasiꞌrannota qoola 3te noo xaꞌmuwa leellisha dandiitinanni. Woy qachiꞌne mannira albillitte ikkannoha dancha coye kultinanni heedhinoonnita kula dandiitinanni. Hakkiinnino qoola 4-5 aana noo misilla leellishshine, “Koye kulloonni coyibba giddo hiikku woꞌmanna laꞌꞌa hasiꞌratto?” yitine xaꞌme. Wole doogo kayinni, lowo geeshsha hasiissanno xaꞌmora dawaro afiꞌra dandiinanni gara haransine mannaho kulanni heeꞌnoommo yaa dandiitinanni. Hakkiinnino qaete annira qoola 6 hundaho noo xaꞌmuwa leellishshine roore afa hasiꞌrannoti hiitteetiro xaꞌma dandiitinanni.
Xaaddote Qullaawu Maxaafi xiinxallora koyisse. Togo yaa dandiitinanni: “Qooxeessinke mannira konne Qullaawa Maxaafa xiinxallate kaaꞌlanno maxaafa leellinshanni heeꞌnoommo. Konne maxaafa laꞌe egennootto? [Dawaro qola geeshsha agari.] Shiimu daqiiqi nooheha ikkiro, kuni maxaafi umikkiha Qullaawa Maxaafa xiinxallate kaaꞌlannohe gara leellishohe?”

Konni Aganira Togo Assate Woꞌnaalle:

Maatete magansiꞌraꞌne yannara togo assa dandiitinanni gara rosiisidhe.
Soqqantinanni wote hasaawa mayitine hanaffinara qixxaabbinoonniro soqqanshote miiliꞌnera kulle. (Law. 27:17) Qixxaabbinoonnihu hasaawu bitimi dancha guma abba hoogiro wolu garinni hasaawisse.