KIRISTAANU HEESHSHO

Ammaꞌno Noonsakki Manni Kalaqaanchonsa Afanno Gede Kaaꞌlensa

Coyiꞌreemmore dimacciishshitanno yitine heddine ammaꞌno noonsakki mannira farciꞌrate badhera higgine egentinoonni? Hatto ikkiro batinyu ammaꞌno noonsakki manninna Maganu dino yee ammananno manni Yihowa Farciꞌraasine ikkinota qaagge. Insa giddo batinyeho Maganu noota leellishshanno taje buuxate shiima kaaꞌlolla hasiissinonsa.—Ro 1:20; 10:14.

AMMANA NOONSAKKI MANNI AMMANA AFIꞌRA DANDAANNOTA QAAGGE!—AMMAꞌNO NOONSAKKI MANNA YITANNO VIIDIYO LAꞌINIHU GEDENSAANNI, AANTE NOO XAꞌMORA DAWARO QOLATE WOꞌNAALLE:

Tomaaso woꞌnaalshi ammaꞌno noonsakki mannira farciꞌrate daafira dancha lao heedhannoꞌne gede kaaꞌlannoꞌnehu hiittoonniiti?

Dawaro

Hatto assa dandiinanni gara

Mittu manchi Maganu noota diammaneemmo yiiꞌnero shaqqillunninna hayyotenni kaaꞌlate woꞌnaalle; qoleno tenne hedo daafira mayyee hedannoro seekkitine huwatate woꞌnaalle. (2Xi 2:24) Iso baxissara dandiitanno hajo kayissine hasaabbe. Isi batinyu manni Kalaqaanchu noota ammananno gede assitinonsa taje hasaawate maahoyye yaanno? Hatto ikkiro, tennera qixxeessinoonni borronna viidiyo horoonsidhe. Heeshsho Dagginohu Kalaqanteeti? hattono Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno biroshere qarrammikkinni afiꞌra dandiinanni gede Rosiisate Horoonsiꞌneemmo Borro giddo worroonni.

Magano ammanannokki mannira halaale farciꞌra umi qara waajjitinanniha ikkara dandaanno. Hatto ikkiro tennera kaaꞌlannoꞌne gede mitto worba halashshaancho kaaꞌlo xaꞌmiꞌra dandiitinanni. Yihowa suwashshu wodani noonsa mannira, wole agurina isi noota ammantannokki mannira nafa halaale kulate sharrammeemmo woyite kaaꞌlannonketa deꞌinoonte.—Soq 13:48.