Annanke Yihowa Lowo Geeshsha Banxeemmo

1-2. Yihowa maatesi miilla ikkineemmo doogo faninonkehu mayiraati? Isi hatto assinohu hiittoonniiti?

YIHOWA iso magansidhanno maate miilla ikkinammora koyisinonke. Kuni dhaggete koyishshaati! Tenne maate miilla insaneeto Maganoho sayisse uyitinoreetinna Beettisita wodote kakkalo ammantannota loosunni leellishshannoreeti. Maatenke hagiirru noote. Hakko daafira xaa yannara hagiirraame heeshsho heeꞌneemmo; qoleno, albillittete iima woy Ganate ikkitanno uullara hegerera heeꞌrate hexxo noonke daafira tashshi yaannonke.

² Yihowa baxillunni, hattono lowo waaga baate maatesi miilla ikkineemmo doogo faninonke. (Yoh. 3:16) Ninke ‘waagunni hidhinoonnireeti.’ (1 Qor. 6:20) Yihowa wodote kakkalo widoonni isi ledo dancha aante heedhannonke gede assino. Kalqete alame giddo baalunkura aliidiha Annanke yine woshsha dandiinoommo; tini lowo ayirrinyeeti. Sai birxichira laꞌnummonte gede Yihowa baalunkunni roorino Annaati.

3. Ninkeneeto mayine xaꞌmineemmoha ikkara dandaanno? (“Yihowa Isi Ane Afinoe?” yitanno saaxineno lai.)

³ Faarsaasinchu gede ninkeno “Assinoehura danchu coyi baalaho, Kaaliiqira hanni maꞌꞌasse qoleemmosi?” yine xaꞌmineemmoha ikkara dandaanno. (Far. 116:12) Iimi Anninkera qola dandiineemmori dino. Ikkirono, assinonkeri banxeemmosi gede assannonke. Soqqamaasinchu Yohaannisi “Maganu ninke balaxe baxinonke daafira ninkeno banxeemmosi” yee borreessino. (1 Yoh. 4:19) Iimi Annanke banxeemmota leellisha dandiineemmohu hiitte doogganniiti?

YIHOWAWA SHIQQINE HEEDHE

4. Yaiqoobi 4:8 kultanno garinni Yihowawa shiqate sharrama hasiissannonkehu mayiraati?

⁴ Yihowa jaallasi ikkinammoranna isi ledo hasaambammora hasiꞌranno. (Yaiqoobi 4:8 nabbawi.) Isi “jaattine huuccidhe” yee amaalinonke; hattono aye woyiteno huuccattonke macciishshanno. (Rom. 12:12) Isi huuccattonke macciishshate horo yanna dihooganno woy didaafuranno. Ninkeno, Qullaawa Maxaafanna Qaalesi huwatate kaaꞌlitanno borronke nabbambe isi yaannonkere macciishshineemmo. Kiristaanu gambooshshi widoonnino isi kulannonkere macciishshineemmo. Qaaqquullu annuwunna amuuwu ledo ganye hasaawiro mereeronsa dancha aante heedhannote gede, Yihowa ledo ganyine hasaawanke isiwa shinqe heeꞌneemmo gede kaaꞌlitannonke.

5. Huuccattonke woyyeessiꞌra dandiineemmohu hiittoonniiti?

⁵ Huuccattoꞌne woyyeessiꞌra dandiitinanni gara hedde. Yihowa huuccattotenni giddonketa hasaaphinammora hasiꞌranno. (Far. 62:8) Ninkeneeto togo yine xaꞌma hasiissannonke: ‘Huucciꞌreemmohu mulla goowi alitaatinso giddoꞌyanniiti?’ Yihowa lowo geeshsha baxattotinna isi ledo noohe jaaloomi kaajjado ikke heeꞌrara hasiꞌrattoti dihuluullissannote. Hatto assate ganyite isi ledo hasaawa hasiissannohe. Fojokki isira kuꞌli. Hagiirsiisinohereno ikko dadillisinohere isira hasaaphi. Ruxxi yiittokkinni kaaꞌlo hasiissannoe yannara kaaꞌlo xaꞌmiꞌri.

6. Iimi Anninkewa shinqe heeꞌrate maa assa hasiissannonke?

⁶ Iimi Anninkewa shinqe heeꞌrate galanteemmore ikka hasiissannonke. Ninkerano faarsaasinchu gede ikke macciishshamannonke; isi togo yee borreessino: “Kaaliiqa Maganoꞌya assootto dhagge lowote; ate gedeehu horontanni dino; ati ninkera maalaꞌlinanni coye hedoottonke; hasaawenna coyiꞌre gude diafeemmo!” (Far. 40:5) Yihowara noonke galata hedonkenni calla ikkikkinni coyiꞌneemmorinninna assineemmorinni leellisha hasiissannonke. Hatto assanke xaa yannara alamete noohu batinyu manninni baxxinoommore ikkineemmo gede assitannonke. Alamete noohu rooru manni Maganu assinonsahura batinyu coyiꞌra digalatannoho. Heeꞌnoommohu “goofimarchu barra” ikkinota leellishannori giddo mittu mannu galatannokkiha ikkansaati. (2 Xim. 3:1, 2) Ninke hattoore ikka horo dihasiꞌneemmo!

7. Yihowa maa assinammora hasiꞌranno? Mayira?

⁷ Annuwunna amuuwu oosonsa mimmitu ledo sumuu yite heedhara ikkinnina giwantara dihasidhanno. Hatteente gede Yihowa oososi baalanti mimmitinsa ledo sumuu yite heedhara hasiꞌranno. Qoleno, mimmitinkera noonke baxilli addu Kiristaana ikkinoommota leellishanno. (Yoh. 13:35) Faarsaasinchu “Maganu manni rodiimmate baxillinni mitteenni sumuu yee heeꞌriro lowo geeshsha danchahonna hagiirsiisannoho!” yee borreessasi garankolla. (Far. 133:1) Roduuwanke banxummoro, Yihowa banxeemmota leellinsheemmo. (1 Yoh. 4:20) ‘Mimmitinsara shaqqaddanna shooshaqoota ikkitino’ roduuwu noo maate miilla ikka lowo geeshsha hagiirsiissannote!—Efe. 4:32.

YIHOWARA HAJAJANTINE ISO BAXXINANNITA LEELLISHSHE

8. Umi Yohaannisi 5:3 kultanno garinni Yihowara hajajammeemmohu qaru korkaati maati?

⁸ Yihowa, ooso annuwinsaranna amuuwinsara hajajantara hasiꞌrannonte gede ninkeno isira hajajammammora hasiꞌranno. (Efe. 6:1) Yihowa kalaqaanchonke, heeshshote hasiisannonkere aannonkehanna baalunku anninna amanni roore hayyicha ikkino daafira isira hajajama hasiissannonke. Isira hajajammeemmohu qaru korkaati kayinni iso banxeemmo daafiraati. (1 Yohaannisi 5:3 nabbawi.) Yihowara hajajammeemmo gede assannonkehu batinyu korkaati nooha ikkirono, isi hajajammeꞌꞌe yee digiddeessannonke. Yihowa doodhate dandoo uyinonke; hakko daafira isi banxe hajajammummosiro hagiidhanno.

9-10. Maganu biddishsha afanna hajajama hasiissannonkehu mayiraati?

⁹ Annuwunna amuuwu oosonsa keere heedhara hasidhanno. Oosonsara agarooshshe ikkanno biddishsha fushshitannohu iseraati. Oosonsa konni biddishshira hajajanturo, annuwansanna amuuwansa addaxxitannotanna ayirrissannota leellishshanno. Iimi Anninke biddishsha afanna hajajama hakkiinni nafa roore hasiissannote. Hatto assinummoro, Yihowa banxeemmotanna ayirrinseemmota leellinsheemmo; qoleno, hajajamanke uminkera kaaꞌlitannonke. (Isa. 48:17, 18) Yihowanna biddishshasi lashshi assitannori kayinni insaneeto gawajjansa digattanno.—Gal. 6:7, 8.

¹⁰ Yihowa hagiidhanno garinni heeꞌnummoro, mannimmanke, hedonkenna ayyaanaamittenke gawajjannorinni ganteemmo. Ninkera woyyannore afinohu Yihowaati. Owurora yinanniti Ameerikaho heedhanno rodoo togo yitino: “Yihowara hajajammiro duuchanka woyite woyyitino heeshsho heeꞌnannita afoomma.” Tini garankolla. Yihowahu baxillu biddishshira hajajamakki kaaꞌlitinohehu hiittoonniiti?

11. Huuccatto kaaꞌlitannonkehu hiittoonniiti?

¹¹ Huuccatto hajajama qarra ikkitannonke woyite nafa hajajamate kaaꞌlitannonke. Mito woyite Yihowara hajajama qarra ikkitannonke; ikkirono cubbo loonseemmo gede xixxiibbannonke hedo gargadha hasiissannonke. Faarsaasinchu Magano “Maahoyyete ayyaaninni irkisie” yee huucciꞌrino. (Far. 51:12) Woꞌma yanna suwisaancho ikkite soqqantannoti Deniise yinanni rodoo togo yitino: “Yihowa hajajo giddonni mitte agadha qarra ikkituero gara ikkinore assa dandeemma gede jawaante aaera iso huucciꞌreemma.” Ninkeno togoo huuccattora Yihowa dawaro qolannota addaxxa dandiineemmo.—Luq. 11:9-13.

WOLOOTU ANNANKE YIHOWA BAXXANNO GEDE KAAꞌLENSA

12. Efesooni Sokka 5:1 kultanno garinni maa assa hasiissannonke?

¹² Efesooni Sokka 5:1 nabbawi. “Maganu baxanno ooso” ikkinoommohura isi lawishsha harunsate dandiinummore baala assineemmo. Banxeemmore, shaqqaddanna wolootaho gatona yineemmore ikkine Maganu lawishsha harunsa dandiineemmo. Magano affinokkiri danchu akati noonketa laꞌuro isi daafira ledde rosa hasidhara dandiitanno. (1 Phe. 2:12) Kiristaana ikkitino annuwinna amuuwi qaaqquullensa lossidhanno woyite Yihowa lawishsha harunsa hasiissannonsa. Insa hatto assitannoha ikkiro, qaaqquullinsa baxillaanchu Anninke ledo jaalooma kalaqidhara dandiitanno.

13. Worbuulle ikkate maa assa hasiissannonke?

¹³ Qaaqqu annasi addaxxanno, hattono isi daafira hasaawa baxanno. Ninkeno, iimi Annanke Yihowa addaxxineemmo; hattono isi daafira wolootaho kula hasiꞌneemmo. Ninkerano Moote Daawitira macciishshaminosiri macciishshamannonke; isi “Kaaliiqa woꞌmu wodaniꞌyanni galaxxeemmo” yee borreessino. (Far. 34:2) Ikkina Yihowa daafira farciꞌra waajjineemmohalla ikki? Worbuulle ikka dandiineemmohu hiittoonniiti? Yihowa daafira farciꞌnummoro iso hagiirsiinseemmotanna wolootu isi daafira rossuro lowo horo afidhannota hendummoro albinni roore worbuulle ikka dandiineemmo. Yihowa hasiissannonke worbimma aannonke. Isi umi xibbi diri Kiristaana worbuulle ikkitanno gede kaaꞌlinte gede ninkeno kaaꞌlannonke.—1 Tes. 2:2.

14. Manna rosaano assa hasiissannonkehu mayiraati?

¹⁴ Yihowa dimallaadanno; hakko daafira isi duuchunku gari mannira baxille leellinshanna laꞌꞌanno woyite hagiidhanno. (Soq. 10:34, 35) Woloota banxeemmota leellinsheemmoti qara doogo insara dancha duduwo kulate. (Mat. 28:19, 20) Tini kaaꞌlitannonsahu hiittoonniiti? Macciishshitannonkeri xaa yannara hagiirru noo heeshsho heedhanno; hattono albillitte hegerera heeꞌrate hexxo afidhanno.—1 Xim. 4:16.

ANNANKE BANXE HAGIIRRAAMMA IKKINO

15-16. Hagiidhineemmo gede assannonkeri maati?

¹⁵ Yihowa baxillaancho Anna ikkino daafira maatesino hagiirraamma ikkitara hasiꞌranno. (Isa. 65:14) Qarru iillanni noonkeha ikkiro nafa xaa yannara hagiidhineemmo gede assannonkehu batinyu korkaati no. Lawishshaho, iimi Anninke lowo geeshsha baxannonketa dihuluullammeemmo. Qoleno, Maganu Qaaliti gara ikkitino egenno noonke. (Erm. 15:16) Hattono, Yihowa, taalle nookkiha amanyootu seerasinna mimmitonsa baxanno manni maate miilla ikkinoommo.—Far. 106:4, 5.

¹⁶ Albillitte woyyitino heeshsho heeꞌneemmota anfoommo daafira, xaa yannara nafa hagiirraamma ikkine heeꞌra dandiineemmo. Yihowa muli yanna giddo bunshe baala hunannotanna Mangistesi widoonni uulla wirro Gannate assannota anfoommo. Qoleno, reyitinori kaꞌeenna insa ledo wirro xaandeemmooti kaajja hexxo noonke! (Yoh. 5:28, 29) Hatti yanna lowo geeshsha hagiirsiissannota ikkitanno! Hattono, muli yannara iimano ikko uullata aana heedhannori baxillaancho Annanke guwisidhannotanna iso calla magansidhannota dihuluullammeemmo.