Anninke Yihowa Lowo Geeshsha Baxannonke

1. Mittu manchi Faarsi mootewa marara albaanni maa assa hasiissannosi?

HANNI mitu 2,500 diri albaanni Faarsi gashshooti giddo noottohu gede assite hedi. Faarsi mootera hasaaphatto hajo noohe daafira isi heeꞌrannowa Suusa yinanni katama haꞌritto. Ikkollana, moote fajjihekkinni iso shiqqe hasaawisa didandaatto. Hatto assittoro shinahera dandiinanni.—Ast. 4:11.

2. Yihowa isiwa ma garinni shinqammora hasiꞌranno?

² Yihowa kayinni Faarsi moote gedeeha ikkinokki daafira galanteemmosi. Yihowa baalanta mannu gashshaasine roore ikkirono, woꞌmanka woyite hasaaphinammora koyisinonke. Qoleno, isi ruxxi yinummokkinni isiwa shinqammora hasiꞌranno. Lawishshaho, isira Bayira Kalaqaancho, Woꞌmanka Dandaannohanna Aliidi Mooticha yinanniti ayirrado maaragete suꞌmuwa noosiha ikkirono, “Annanke” yine woshshiꞌnammora koyinsoonninke. (Mat. 6:9) Yihowa iso Anninke gede assine laꞌnammora hasiꞌrasi lowo geeshsha tashshi assitannonke.

3. Yihowa “Annanke” yine woshsha dandiineemmohu mayiraati? Konni birxichira maa ronseemmo?

³ Yihowa kalaqaanchonke ikkino daafira “Annanke” yine woshshanke garankolla. (Far. 36:9) Qoleno, Annanke ikkinohura isira hajajama hasiissannonke. Isi asse yaannonkere assinummoro lowo atoote afiꞌneemmo. (Ibi. 12:9) Hexxonke iimira haꞌra woy uullate aana heeꞌra ikkiturono hegere heeshsho afiꞌneemmo. Xaa yannara nafa lowo atoote afiꞌneemmo. Konni birxichira Yihowa xaa yannara baxillaancho Annanke ikkinota leellishinohu hiittoonniitironna albillitteno horo tuge agurannonkekkita ammanneemmohu mayiraatiro laꞌneemmo. Hanni balanxe iimi Anninke lowo geeshsha baxannonketanna towaatannonketa huluullammeemmokkihu mayiraatiro laꞌno.

YIHOWA BAXANNONKENNA TOWAATANNONKE ANNAATI

4. Mitootaho Yihowa Anninsa gede assite laꞌꞌa qarra ikkitannonsahu mayiraati?

⁴ Magano Annikki gede assite laꞌꞌa qarrissannohe? Mitootu Yihowa lowoha ikkino daafira ninke isi albanni digarireeti yite heddara dandiitanno. Insa Woꞌmanka Dandaanno Magani mittu mittunku manchira hedannota huluullantanno. Ikkollana baxillaanchu Anninke hatto yine hendammora dihasiꞌranno. Isi heeshsho uyinonke; qoleno, Anninke gede assine laꞌnammosira hasiꞌranno. Soqqamaasinchu Phaawuloosi tenne daafira xawisihu gedensaanni Ateensi heeꞌranno mannira Yihowa ‘ninkewiinni dixeertiꞌrinoho’ yiino. (Soq. 17:24-29) Qaaqqu baxannosinna towaatannosi anninna ama ledo hasaawannonte gede Maganuno ninke mitti mittinke isi ledo hasaambammora hasiꞌranno.

5. Mitte rodoo lawishshinni maa ronseemmo?

⁵ Wolootaho kayinni ilino anninsa baxillunni lossinonsakki daafira, Yihowa Anninsa gede assite laꞌꞌa qarra ikkitansara dandiitanno. Mitte rodoo togo yitino: “Anniꞌya xonanni waadannoe. Qullaawa Maxaafa xiinxalla hanafumma woyite Magano iimi Anni gede asse laꞌꞌa qarra ikkitinoe. Yihowa afummahu gedensaanni kayinni hedoꞌya biddi assiꞌroomma.” Aterano hatto macciishshamannohe? Hatto ikkiro hexxo mudhitooti; atino galte hossanni Yihowa baalunkunni roorino Anni gede assite laꞌꞌa dandaatto.

6. Maatewoosi 11:27 kultanno garinni Yihowa iso baxillaanchu Anni gede assiꞌne laꞌnammora kaaꞌlinonke doogga giddo mitte hiitteeti?

⁶ Yihowa baxillaanchu Anni gede assine laꞌneemmosi gede kaaꞌlinonke; hatto assino doogga giddo mitte Yesuusi coyiꞌrinorenna assinore Qullaawu Maxaafi giddo borreessiiseeti. (Maatewoosi 11:27 nabbawi.) Yesuusi Annisi akatta guutu garinni leellishino daafira “Ane afinohu annaꞌyano afino” yiino. (Yoh. 14:9) Yesuusi duucha hige Yihowa Anna ikkinota coyiꞌrino. Isi shoolunku Wongeeli giddo calla duucha hige Yihowa ‘Anna’ yiino. Yesuusi duucha hige Yihowa Anna yiinohu mayiraati? Mittu korkaati mannu Yihowa baxillaancho Anna ikkinota ammananno gedeeti.—Yoh. 17:25, 26.

7. Yihowa Beettisi Yesuusira assinori Isi daafira maa rosiisannonke?

⁷ Hanni Yihowa Beettisi Yesuusira assinori Isi daafira maa rosiisannonkero laꞌno. Yihowa woꞌmanka woyite Yesuusi huuccatto macciishshino. Hattono macciishshe dawaro qolinosi. (Yoh. 11:41, 42) Yesuusira aye geeshshi fonqoli iillisirono Annisi baxannositanna kaaꞌlannosita woꞌmanka woyite huwatino.—Luq. 22:42, 43.

8. Yihowa Yesuusa towaatinosihu hiittoonniiti?

⁸ Yesuusi “Isinni heeshshonniha ikkoommo” yee coyiꞌre kalaqinosihunna heeshshotenni worinosihu Annasi ikkinota ammanino. (Yoh. 6:57) Yesuusi woꞌmunni woꞌma Annasi addaxxino; Yihowano heeshshote hasiisannosire uyinosi. Yihowa roorenkanni Yesuusi isira ammaname heeꞌranno gede kaaꞌlinosi.—Mat. 4:4.

9. Yihowa Yesuusira baxillaanchonna towaatannosi Anna ikkinota leellishinohu hiittoonniiti?

⁹ Yihowa baxillaancho Anna ikkinohura Yesuusi isi kaaꞌlanni noosita buuxanno gede assinosi. (Mat. 26:53; Yoh. 8:16) Yihowa Yesuusira qarru iillannosita hoolinosikkiha ikkirono, iillinosi fonqolo cince saꞌꞌanno gede kaaꞌlinosi. Yesuusi iillannosi qarri baalunku yannate geeshshiha ikkinota afino. (Ibi. 12:2) Yihowa, Yesuusi huuccatto macciishshe, hasiisannosire wonshe, hattono qajeelsesinna kaaꞌlesi baxannosita leellishino. (Yoh. 5:20; 8:28) Hanni iimi Anninke ninkeno konni garinni kaaꞌlannonke gara laꞌno.

BAXILLAANCHU ANNINKE TOWAATANNONKEHU HIITTOONNIITI?

10. Faarso 66:19, 20 kultanno garinni Yihowa baxannonketa leellishinohu hiittoonniiti?

¹⁰ Yihowa huuccattonke macciishshanno. (Faarso 66:19, 20 nabbawi.) Isi huuccattonkera danna diworino; hatteentenni woꞌmante yannara huucciꞌnammora jawaachishinonke. (1 Tes. 5:17) Heeꞌnummowano heeꞌnummoro woꞌmante yannara ayirrinyunni Maganunniwa shiqa dandiineemmo. Isi huuccattonke macciishshate horo yanna dihooganno; qoleno aye yannarano huucciꞌnummoro macciishshanno. Yihowa huuccattonke macciishshinota huwantummoro, iso albinni roore banxeemmo. Faarsaasinchu “Huuccattoꞌya macciishshinoe daafira, Kaaliiqa baxeemmosi” yiino.—Far. 116:1.

11. Yihowa huuccattonkera dawaro qolannohu hiittoonniiti?

¹¹ Anninke huuccattonke macciishshannoha calla ikkikkinni dawarono qolannonke. Soqqamaasinchu Yohaannisi togo yiino: “Isi [Maganu] hedino garinni huucciꞌneemmore baala macciishshannonke.” (1 Yoh. 5:14, 15) Yihowa huuccattonkera dawaro ninke hendoommo garinni qola hoogara dandaanno. Ninkera woyyannore afinohu isooti; hakko daafira mito woyite deeꞌni yee qolara woy cincine agadhinammora hasiꞌrara dandaanno.—2 Qor. 12:7-9.

12-13. Iimi Anninke hasiisannonkere wonshannonkehu hiitte doogganniiti?

¹² Yihowa hasiisannonkere wonshanno. Isi baalunku annuwi assitara hasiꞌrannore assannonke. (1 Xim. 5:8) Yihowa oososira heeshshote hasiisannonsare wonshanno. Isi sagalete, uddanotenna mineho yaandammora dihasiꞌranno. (Mat. 6:32, 33; 7:11) Yihowa baxillaancho Anna ikkino daafira albillittete heeshshonkera hasiisannonkere nafa qixxeessinonke.

¹³ Yihowa baalunkunni roore ayyaanaamittete hasiisannonkere wonshannonke. Qoleno, Yihowa Qaalisi widoonni, ayimmasinna hedosi kulinonke, hattono hagiirru noo heeshsho heeꞌra dandiineemmo garanna albillittete daafira rosiisinonke. Isi annankenna amanke woy wole roduuwa horoonsiꞌre halaale ronse iso anfeemmo gede kaaꞌle ninke mittu mittunkura hedannota leellishino. Xaano isi baxillaano songote cimeeyyenna wolu gikki yino roduuwi widoonni shaqqillunni kaaꞌlanni noonke. Qoleno, Yihowa songote gambooshshi widoonni roduuwinke ledo mitteenni rosiisannonke. Tennenna wole doogganni Yihowa baxillaanchu anni gede towaatannonketa leellishino.—Far. 32:8.

14. Yihowa qajeelsannonkehu mayiraati? Isi qajeelsannonkehu hiittoonniiti?

¹⁴ Yihowa qajeelsannonke. Ninke Yesuusi gede guuta diꞌꞌikkinoommo. Hakko daafira baxillaanchu Anninke qajeelsankera yee seejjo hasiissannonke woyite seejjannonke. Qullaawu Maxaafi “Kaaliiqi baxannoha seejjanno” yaanno. (Ibi. 12:6, 7) Yihowa duucha doogganni seejjannonke. Lawishshaho, Qaalisi giddo nabbamboommori woy gambooshshunniwa macciishshinoommori biddi assiꞌra hasiissannonkere biddi assineemmo gede kaaꞌlankera dandaanno. Qoleno, kaaꞌlo hasiissannonke woyite songote cimeeyye kaaꞌlitankera dandiitanno. Yihowa seejjannonke doogga ikkitutano ikkituro isi woꞌmante yannara seejjannonkehu baxannonke daafiraati.—Erm. 30:11.

15. Yihowa agarannonkehu hiitte doogganniiti?

¹⁵ Yihowa qarru iillannonke woyite dandiine saꞌneemmo gede kaaꞌlannonke. Baxillaanchu anni qarru yannara oososi kaaꞌlannonte gede iimi Anninke qarru iillannonke woyite irkisannonke. Isi qullaawu ayyaanisinni ayyaanaamittenke gawajjantannokki gede agarannonke. (Luq. 11:13) Qoleno, isi yaaddo amaddannonke woyite kaaꞌlannonke. Lawishshaho, isi dhagge ikkitanno hexxo uyinonke. Tini hexxo qarru iillannonke woyite cincine saꞌneemmo gede kaaꞌlitannonke. Iillinonke qarri aye geeshshiha ikkirono, baxillaanchu Anninke xissonke baala hursanno. Iillannonke qarri baalu yannate geeshshiholla; Yihowa aannonke atooti kayinni hegereho.—2 Qor. 4:16-18.

ANNINKE HORO TUGE DIAGURANNONKE

16. Addaami baxillaanchu Annisira hajajama giwi woyite mayi ikkino?

¹⁶ Yihowa umo mannu ooso finqiltu woyite assinori isi baxannonketa leellishanno. Addaami iimi Annisira finqili woyite isono ikko sirchosi Yihowate hagiirraame maate giddonni fushshine hoolloonninsa. (Rom. 5:12; 7:14) Ikkirono, Yihowa Addaami sircho kaaꞌlino.

17. Addaami finqilihu gedensaanni Yihowa bayichonko maa assino?

¹⁷ Yihowa Addaami qorichishinoha ikkirono, sirchisira hexxo uyinonsa. Isi hajajantannota mannu ooso wirro maatesi miilla assiꞌrannota kule bayichonko qaale eino. (Kal. 3:15; Rom. 8:20, 21) Yihowa hedinore wonshate baxanno Beettosi wodote kakkalo asse uyino. Yihowa Beettosi ninkera sayise oye lowo geeshsha baxannonketa leellishino.—Yoh. 3:16.

18. Yihowa isiwiinni xeertiꞌnummoro nafa wirro oososi ikkinammora hasiꞌrannota huluullammeemmokkihu mayiraati?

¹⁸ Guuntete xeꞌne noonkere ikkinummorono Yihowa maatesi miilla ikkinammora hasiꞌranno; hattono duha ikkinoommosihu gede asse horo dihedanno. Mito woyite dadillinsammosira woy isiwiinni xeertiꞌnammora dandiineemmo; ikkirono isi hexxo mudhe ninke kaaꞌla diaguranno. Yesuusi annisiwinni fule ballehino beetti lawishsha coyiꞌri woyite, Yihowa oososi mageeshshi geeshsha baxannoro leellishino. (Luq. 15:11-32) Lawishshu giddo kulli anni beettiꞌya higanno yee hexxa diagurino. Beettu qaera higi woyite annu anga fane haaꞌrinosi. Yihowawiinni xeertiꞌnummoro nafa maaro adhine hingummoro baxillaanchu Anninke anga fane haaꞌrannonketa addaxxa dandiineemmo.

19. Yihowa Addaami galaaffatinore baala biddi assannohu hiittoonniiti?

¹⁹ Yihowa Addaami galaaffatinore baala biddi assanno. Addaami finqilihu gedensaanni Yihowa mannu ooso giddonni 144,000 manna oososi asse adhate hedino; insa Beettisi Yesuusi ledo iima kakkalaasinenna mootoolla ikkite soqqantanno. Haaro alame giddo Yesuusinna ledosi gashshitannori, hajajantannoti mannu ooso guuta ikkitanno gede kaaꞌlitanno. Insa jeefote fonqolo saꞌuhu gedensaanni Maganu hegere heeshsho aannonsa. Hakkiinni iimi Anninke uullate aana guuta ikkitino oososi woꞌmitinota lae hagiidhanno. Hatti yanna lowo geeshsha hagiirsiissannota ikkitanno!

20. Yihowa lowo geeshsha baxannonketa leellishinohu hiitte doogganniiti? Aananno birxichira maa ronseemmo?

²⁰ Yihowa lowo geeshsha baxannonketa leellishino. Isi gedee Anni horo dino. Isi huuccattonke macciishshanno, hattono maalaamitteteno ikko ayyaanaamittete hasiisannonkere wonshannonke. Yihowa qajeelsannonke hattono kaaꞌlannonke. Isi albillittete bae atoote qixxeessinonke. Anninke baxannonketanna towaatannonketa afanke hagiirsiissannonke. Aananno birxichira Maganu ooso ikkankenni isi baxillira galatanke leellisha dandiineemmo doogga ronseemmo.