Wodote Kakkalora Galatu Nooꞌneta Woꞌmanka Woyite Leellishshe

1-2. Wodo maati? Hasiissannonkehu mayiraati?

GUUTU manchi Addaami cubbo loosi woyite hegerera heeꞌrate hexxo huꞌnino; isi sirchisino hegere heeshsho hooganno gede assino. Addaami loosino cubbira kuꞌle gatannori dino. Isi cubbo loosinohu afanni heeꞌrenniiti. Isi sirchina? Sirchisi hakka woyite ilama nafa diꞌꞌilamino. (Rom. 5:12, 14) Addaami loosino cubbira reyo hasiissinosi; ikkina sirchosi tenne reyonni gatisa dandiinanni gari nooyya? Ee no! Addaami cubbo loosanni heeꞌreennanni, Yihowa Addaami sircho cubbunna reyote rumonni gatisanno gara deerru deerrunni xawisino. (Kal. 3:15) “Lowo manna wode gatisate lubbosi sayise” aanno gede, Yihowa yannasira Beettosi iiminni soyanno.—Maq. 10:45; Yoh. 6:51.

² Wodo maati? Giriikete Afiite Qullaawa Borro giddo wodo yaanno qaale horoonsiꞌnoonnihu, Yesuusi Addaami huninore qolate baatino waaga kulateeti. (1 Qor. 15:22) Wodo hasiissannonkehu mayiraati? Muse Seeri giddo kulloonninte gede, Yihowahu taashshote seeri garinni lubbote bayicho lubbo qola hasiissanno daafiraati. (Ful. 21:23, 24) Addaami guuta ikkitino heeshsho huꞌnino. Maganu taashsho wonshate guutu manchi Yesuusi heeshshosi kakkalo asse uyino. (Rom. 5:17) Konni garinni Yesuusi, wodo ammantannota leellishshannorira baalaho “Hegere Anna” ikkino.—Isa. 9:6; Rom. 3:23, 24.

3. Yohaannisi 14:31 nna 15:13 kultanno garinni, Yesuusi guuta heeshshosi mannu oosora sayise aate maahoyye yiinohu mayiraati?

³ Yesuusi iimi Annasinna ninke lowo geeshsha baxanno daafira heeshshosi sayise aate maahoyye yiino. (Yohaannisi 14:31; 15:13 nabbawi.) Kuni baxilli jeefote geeshsha ammanaminoha ikkatenna Annisi fajjo wonshate murciꞌranno gede assinosi. Isi reyote geeshsha ammaname tenne wonshino. Tini, Yihowa umo mannu oosoranna uullate hedinori woꞌmanno gede assitanno. Konni birxichira Yihowa, Yesuusi reyara albaanni lowo geeshsha qarramara fajjinohu mayiraatiro ronseemmo. Qoleno wodote kakkalora lowo galati noosihu mittu soqqamaasinchi lawishsha haransine laꞌneemmo. Jeefote, wodote kakkalora galatu noonketa leellisha dandiineemmo garanna Yihowanna Yesuusi qixxeessitinonke kakkalora noonke galati lexxanno gede assiꞌra dandiineemmo gara ronseemmo.

YESUUSI LOWO GEESHSHA QARRAMINOHU MAYIRAATI?

4. Yesuusi reyinohu hiittoonniiti?

⁴ Hanni Yesuusi reyi barra mayi ikkinoro hendo. Isi hasiꞌroommore, agartannosi gede lowo sokkaano woshshiꞌra dandaanno; ikkirono, Roomu olanto amadde gantanni beebba assidhannasi laꞌꞌanni heeꞌrenni sammi yiino. (Mat. 26:52-54; Yoh. 18:3; 19:1) Insa biso madiissitanno lichenni gantusi. Gedensoonni qole wonaa wonayi madidhino badhera dawe duhisiissusi. Yesuusi tenne dawe suntannisiwa duhe boode geya haꞌrihu gedensaanni, olanto dawe mittu doogaanchi duhanno gede hajajju. (Mat. 27:32) Yesuusi sunte shinannisiwa iillita, sutate qixxaabbe noori angasinna lekkasi dawete qolte misimaaretenni gantu. Dawe gotti assinanni woyite mannimmasi gudisante rarraꞌinohu gannoonni misimaare aanaati. Jaallasi lowo geya dadillitino, amasi wiꞌlitanni qurtitanni no; Yihudu gashshaasine kayinni Yesuusa buseessitanni no. (Luq. 23:32-38; Yoh. 19:25) Isi shete heeꞌreenna haammata saate saꞌu. Sutaminowa wodanunna shombu gawajjamino daafira, foola qarra ikkitusi. Foolu fulara kae heeꞌreenna jeefote huuccatto assiꞌri. Hakkiinni umo qulcu yee heeshshosi sayise uyi. (Maq. 15:37; Luq. 23:46; Yoh. 10:17, 18; 19:30) Konni garinni Yesuusi qarramenna sholle reyino!

5. Sholle reyasinni roore Yesuusa yaachishinosiri maati?

⁵ Yesuusa roore yaachishshinositi sholle reyasi diꞌꞌikkitino. Kassansoonnisi kisse roore yaachishshinosi. Iso ‘Magano xonino’ yine yaano ‘Maganono suꞌmasino diayirrisannoho’ yine kassansoonnisi. (Mat. 26:64-66) Tini Yesuusa lowo geeshsha yaachishshinosi daafira, Annisi konni shollinyinni gatisasira hasiꞌrino. (Mat. 26:38, 39, 42) Ikkina Yihowa Beettisi qarramannonna reyanno gede fajjinohu mayiraati? Hanni sase korkaata laꞌno.

6. Yesuusi qarru haqqira sutama hasiissinosihu mayiraati?

⁶ Umihunni, Yihudu manna rumote giddonni fushshate Yesuusi haqqaho sutama hasiissinosi. (Gal. 3:10, 13) Tini rumo, insa Maganoho hajajammeemmo yite qaale eꞌinoha ikkirono hajajama gibbino daafira iillitinonsate. Konnira Addaamiwiinni ragidhino cubbono agurranna tinino wole barshe abbitinonsa. (Rom. 5:12) Maganu Israeelete uyino Seeri, reyote iillishanno cubbo loosino mancho shaa hasiissannota kulanno. Shinihu gedensaanni reeshshasi haqqu aana suntara dandiinanni.b (Mar. 21:22, 23; 27:26) Konnira Yesuusi haqqu aana sutame, iso gibbannori nafa wodote kakkalonni horo afidhanno faro faninonsa.

7. Maganu Beettisi qarrame reyara fajjinohu layinki korkaati maati?

⁷ Yihowa Beettisi qarrame reyanno gede fajjinoha layinki korkaata laꞌno. Hatto assinohu, Yesuusi Kakkalaanote Biilo ikkanno woyitira qajeelsateeti. Yesuusi lowo qarri giddo heeꞌne Maganoho hajajama shota ikkitinokkita laino. Isi lowo geeshsha shetino daafira, kaaꞌlo afiꞌrate “qoonqosi naggi asse wiꞌle lowo hindiiddonni [huucciꞌrino].” Yesuusira hinciicammanni gede assanno qarri iillinosi daafira, qarrinke leellannosi, hattono ‘qarru jifannonke woyite kaaꞌlankera dandaanno.’ Yihowa shoominonkehu Kakkalaanote Biili maarannoho; qoleno “wolqanke anjera kaaꞌle afannokkiha diꞌꞌikkino”; konnira Yihowa galaxxineemmosi.—Ibi. 2:17, 18; 4:14-16; 5:7-10.

8. Yihowa Beettisira buutote fonqoli iillanno gede fajjinohu sayikki korkaati maati?

⁸ Yihowa, Yesuusi qarrame reyanno gede fajjinohu sayikki korkaati, mitte lowo geeshsha hasiissanno xaꞌmora dawaro qolateeti; tini xaꞌmo, ‘Mannu ooso buutote fonqoli iillinsaro nafa Maganoho ammanantanno?’ yitannote. Sheexaanu ‘Diammanantanno!’ yiino. Isi ‘Mannu Maganoho soqqamannohu mitore afiꞌrate yee callaati’ yaanno. Qoleno Sheexaanu mannu ooso anninsa Addaami gede Yihowa dibaxxanno yee hedanno. (Iyo. 1:9-11; 2:4, 5) Yihowa Beettisi ammanamannota addaxxino daafira, Yesuusi reyote geeshsha fonqolamanno gede fajjino. Yesuusi jeefote geeshsha ammanaminoha ikke, Sheexaanu kaphaancho ikkinoti leeltanno gede assino.

SOQQAMAASINCHU YOHAANNISIRA WODOTE LOWO GALATI NOOSI

9. Soqqamaasinchu Yohaannisi dancha lawishsha ikkinonkehu hiittoonniiti?

⁹ Wodote kakkalo daafira kulanno rosi, lowo Kiristaani ammana kaajjishino. Insa gimbinsarono sabbaka diagurtino; hattono heeshshonsa diro woꞌma iillinonsa qarra baala dandiite saꞌino. Hanni soqqamaasinchu Yohaannisi lawishsha laꞌno. Isi Kiristoosinna wodote daafira kulanno halaale ammaname sabbakino; isi sabbakinohu 60 saꞌꞌanno diro ikkikki digatino. Yohaannisira 100 diri balla ikke heeꞌreennasi, Roomu Gashshooti qarra qalanno yee huluullamino daafira Fiximo yinanni giddichora usurinosi. Isi usuraminohu mayiraati? ‘Maganu Qaalinna Yesuusi daafira’ farciꞌrinohuraati. (Aju. 1:9) Yohaannisi ammanatenni kaajje dancha lawishsha ikkino!

10. Yohaannisi borreessino maxaaffa wodote kakkalora galatu noosita leellishshannohu hiittoonniiti?

¹⁰ Yohaannisi qullaawu ayyaaninni borreessino maxaaffa giddo, Yesuusa lubbora baxannotanna wodote kakkalora galatu noosita xawisino. Isi borreessino maxaaffa giddo wodote woy tenne wodonni afiꞌra dandiinannihu danchu coyi daafira xibbe saꞌꞌanno bayicho qummi assino. Lawishshaho Yohaannisi togo yee borreessino: “Ayino cubbo loosiro . . . Maganu Annunniwa ninkera sae coyiꞌramannohu noonke; isino keeraanchu Yesuusa Kiristoosaati.” (1 Yoh. 2:1, 2) Qoleno Yohaannisi borreessino maxaaffa giddo “Yesuusi daafira farciꞌra” hasiissannota luphi asse xawisino. (Aju. 19:10, NW) Addanko, wodote kakkalora Yohaannisira lowo galati noosi! Ninkeno isi lawishsha harunsa dandiineemmohu hiittoonniiti?

WODOTE KAKKALORA GALATU NOOHETA LEELLISHA DANDAATTOHU HIITTOONNIITI?

11. Fonqolo qeelleemmo gede kaaꞌlankera dandaannori maati?

¹¹ Cubbo loosatto gede assannori iillihero giwi. Wodote kakkalora galatu noonkeha ikkiro, ‘Fonqolu iillannoe woyite qeelate shelleggama dihasiissannoe. Cubbo loose kae maaro ea dandeemmo’ yine dihendeemmo. Hatteentenni cubbo loonseemmo gede assannori tuncu yaannonke woyite, ‘Dihasiꞌreemmo! Yihowanna Yesuusi kageeshshi coye assite heedheennae konne coye mayyee asseemmo!’ yineemmo. Tennera Yihowa jawaante aannonke gede, ‘Jifameemmo gede assitootie’ yine huucciꞌra dandiineemmo.—Mat. 6:13.

12. Umi Yohaannisi 3:16-18 noo amaale harunsa dandiineemmohu hiittoonniiti?

¹² Ammanate roduuwaꞌne baxxe. Roduuwanke banxeemmoha ikkiro, wodote kakkalora galatu noonketa leellinshanni heeꞌnoommo. Mayira yiniro, Yesuusi heeshshosi ninkera calla ikkikkinni wolu roduuwinkerano sayise uyino. Yesuusi insara reyate maahoyye yiino daafira, lowo geeshsha baxannonsati dihuluullissannote. (1 Yohaannisi 3:16-18 nabbawi.) Roduuwinke ledo noonke aante insa banxeemmota leellishshanno. (Efe. 4:29, 31–5:2) Lawishshaho dhiwanturo woy buutote qarri iillinsaro, coyi gedera kalaqamu dano iillitunsaro kaaꞌlineemmonsa. Kayinni ammanate rodiinke hanqisannore assiro woy coyiꞌriro maa assa hasiissannonke?

13. Woloota gatona yaa hasiissannonkehu mayiraati?

¹³ Ammanate rodiikkira koma amada rakkannohe? (Lew. 19:18) Hatto ikkiro togo yitanno amaale harunsi: “Kiꞌne kiꞌneneewa koffi yitinoonni coye baala cincatenni agurre. Kiristoosi [“Yihowa,” NW] agurinoꞌnente gede, kiꞌneno mimmitiꞌnera agurre.” (Qol. 3:13) Roduuwanke gatona yinummo kiiro, wodote kakkalo naandeemmota iimi Anninkera leellinshanni heeꞌnoommo. Ikkina Maganu qixxeessinote wodote kakkalora noonke galati lexxanno gede assiꞌra dandiineemmohu hiittoonniiti?

WODOTE KAKKALORA NOONKE GALATI LEXXANNO GEDE ASSIꞌRA DANDIINEEMMOHU HIITTOONNIITI?

14. Wodote kakkalora galatu noonketa leellinsheemmo doogga giddo mitte hiitteeti?

¹⁴ Wodote kakkalora Yihowa galaxxi. Mitte Hindete heedhannoti 83 diriti Johaana yinanni rodoo togo yitino: “Huuccatto assiꞌreemma woyite barru baala wodote kakkalo qummi asse Yihowa galaxxa hasiissannoeta huwatoomma.” Huuccatto assiꞌratto woyite barru giddo loosootto soꞌro hedde Yihowa gatona yaannohe gede huucciꞌri. Jawa cubbo loosittoro kayi, cimeeyyete kaaꞌlo afiꞌra hasiissannoheti egennantinote. Insa kulattonsare macciishshitanno, hattono Maganu Qaale horoonsidhe shaqqillunni amaaltannohe. Qoleno Yesuusi kakkalonni horo afidhe ayyaanaamittetenni ‘huratto’ gede kaaꞌlahera Yihowa huuccitanno.—Yai. 5:14-16.

15. Wodote daafira nabbawatenna hiincate yanna gaaꞌma hasiissannonkehu mayiraati?

¹⁵ Wodote kakkalo daafira hiinci. Raajimaani yinanniti 73 diro ikkannose rodoo, “Yesuusi qarramino gara kultanno xagge nabbaweemma woyite hindiiddo qalxitannoe” yitino. Atino Maganu Beetti shetino gara hedatto woyite xissiisiꞌrattoha ikkara dandaanno. Kayinni Yesuusi baatino kakkalo daafira hiincitto kiiro, isiranna Annisira noohe baxilli lexxanni haꞌranno. Wodote kakkalo daafira hiincate, tenne hajore seekkite xiinxalla dandaatto.

16. Mannaho wodote daafira rosiisa kaaꞌlitannonkehu hiittoonniiti? (Aaniidi qoolira noo misile lai.)

¹⁶ Wolootaho wodote daafira rosiisi. Wolootaho wodote daafira kullummo kiiro, ninkerano wodote kakkalora noonke galati lexxanni haꞌranno. Yesuusi reyinohu mayiraatiro mannaho xawisate horoonsiꞌra dandiineemmohu kaajju uduunni noonke. Lawishshaho, Maganuwiinni Dayinoha Dancha Duduwo! yitanno biroshereha roso 4 horoonsiꞌra dandiineemmo. Konni rosira “Yesuusi Kiristoosi Ayeti?” yaanno birxichi no. Woy Qullaawu Maxaafinni Maa Ronseemmo? yaanno maxaafa fooliishsho 5 horoonsiꞌra dandiineemmo. Tini fooliishsho “Wodo Elto Baala Roortannote Maganu Eltooti” yaanno birxicho afidhino. Qoleno diru kiiro Yesuusi Reyo Qaagooshshe ayirrinseemmonna manna konni ayyaanira diinaggaambe koyinseemmo woyite wodote kakkalora noonke galati lexxanno. Yihowa mannaho Beettisi daafira rosiinseemmo gede asse ayirrisinonke!

17. Wodote kakkalo Maganu mannu oosora uyino elto baala roore eltooti yineemmohu mayiraati?

¹⁷ Addanko, wodote kakkalora noonke galati lexxanno gede assiꞌranke garankolla! Wodote kakkalo, guuntete xeꞌne noonkere ikkinummorono Yihowa ledo danchu jaaloomi heeꞌrannonke gede kaaꞌlitannonke. Qoleno wodote kakkalo Daawuloosi loosi woꞌmunni woꞌma diigamanno gede assitanno. (1 Yoh. 3:8) Hattono Yihowa umo mannahonna uullate hedinori woꞌmanno gede assitanno. Uulla woꞌma gannate ikkitanno. Hatte yannara xaandeemmo manni baalu Yihowa baxannohonna isira soqqamannoho. Konnira, barru baala Maganu mannu oosora uyino elto baalanta roortanno elto yaano wodote kakkalora galatu noonketa leellinsho!