Yihowa Ledokki Noo Daafira Callakki Diꞌꞌikkootto

1. Yihowa soqqamaanora mito woyite callimma macciishshantannonsahu mayira ikkara dandaanno?

NINKE giddo rooreho callimma macciishshantannonke woyiti no. Mitootaho togoo hedo macciishshantannonsahu shiima yanna geeshshaati. Woloota kayi togoo hedo lowo yanna waaddansara dandiitanno. Mannu ledonke heeꞌreenna nafa callimma macciishshantankera dandiitanno. Mitootaho haarote martino songo rosa qarra ikkitannonsa. Wolootu qolte maatensawiinni baxxitukki heedhinore ikkitino daafira, insawiinni xeertidhe hadhanno woyite callimma macciishshantannonsa. Wolootu kayi shiidhino manchi ledo heedhino heeshsho qaagge manchittanno. Qoleno mitu Kiristaani hakko iso haarote halaalu minira dagginori, Yihowa Farciꞌraasine ikkitinokki maatensa woy albi jaallansa gibbannonsa woy waaddannonsa woyite callimma macciishshantannonsa.

2. Konni birxichira hiikkuri xaꞌmuwara dawaro afiꞌneemmo?

² Yihowa ninke daafira mitto mittonka coye afino. Callimma macciishshantannonke woyiteno isi tenne afanno; hattono togoo hedo qeelle saꞌneemmo gede kaaꞌlankera hasiꞌranno. Yihowa kaaꞌlannonkehu hiittoonniiti? Togoo hedo qeeꞌlate ninke maa assa dandiineemmo? Songonke giddo noore callimma macciishshantannonsare kaaꞌla dandiineemmohu hiittoonniiti? Hanni xa kuri xaꞌmuwara dawaro afiꞌrate woꞌnaallo.

YIHOWA NINKE DAAFIRA HEDANNO

3. Yihowa Eeliyaasira hedannota leellishinohu hiittoonniiti?

³ Yihowa magansidhannosiri baalu hagiirraamma ikkitara hasiꞌranno. Isi mittu mittunkura mulenke no; hattono dadillineemmo woy hexxo mudhineemmo woyite afanno. (Far. 145:18, 19) Hanni Yihowa masaalaanchosi Eeliyaasi ille wore towaatinosi gara laꞌno. Kuni ammanamino manchi lowo geeshsha qarrissanno yannara heeꞌrino. Hatte yannara Yihowa magansidhannore lowo geeshsha shetinsoonni; roorenkanni silxaane noonsari Magano gibbannori Eeliyaasi shaa hasidhino. (1 Mot. 19:1, 2) Eeliyaasi Yihowa magansidhanno masaalaano giddo gatoommohu ane callaati yee hedasino lowo geya dadillanno gede assitinosiha ikkara dandaanno. (1 Mot. 19:10) Maganu kayi Eeliyaasira rahe iillinosi. Yihowa sokkaasinchosi soye, Eeliyaasi callichosi ikkinokkitanna Magano waajjannohu wolu batinyu Israeelete manni noota kule jawaachishinosi.—1 Mot. 19:5, 18.

4. Maarqoosi 10:29, 30 wolootu tugge agurtinore Yihowa kaaꞌlannonsata leellishshannohu hiittoonniiti?

⁴ Yihowa isira soqqama doodhinummo woyite ninke giddo mitu lowore agurroommota afino. Yihowa Farciꞌraasine ikkitinokki maatenkewiinninna albi jaallankewiinni afiꞌneemmo kaaꞌlo hoongoommoha ikkara dandaanno. Pheexiroosi Yesuusa “Kuneeti, ninke baalankare agurre ate hoode haꞌnanni heeꞌnoommo; afiꞌneemmori maatiyya?” yee xaꞌminohu tini huluullitinosihura ikkara dandaanno. (Mat. 19:27) Yesuusi rosaanosi halaꞌlado ayyaanaamittete maate afidhannota kule jawaachishinonsa. (Maarqoosi 10:29, 30 nabbawi.) Ayyaanaamittete maatenkera Umo ikkinohu Yihowa, isira soqqama hasidhannore kaaꞌlannota kule qaale eino. (Far. 9:10) Hanni callimma macciishshantannohe woyite Yihowa kaaꞌlo afiꞌrate assa dandaattoha mito coye laꞌno.

CALLIMMA MACCIISHSHANTUHERO MAA ASSA DANDAATTO?

5. Yihowa irkisanni noohe gara hedakki kaaꞌlitannohehu hiittoonniiti?

⁵ Yihowa irkisanni noohehu hiittoonniitiro hedi. (Far. 55:22) Tini callakki ikkoottokkita huwatatto gede kaaꞌlitannohe. Maatese Yihowa Farciꞌraasine ikkitinokkiti Kaaroolib yinanniti mine assidhinokki rodoo togo yitino: “Yihowa qarru yannara irkise sayisinoe gara hiincaꞌya, callaꞌya ikkoommakkita huwateemma gede kaaꞌlitinoe. Qoleno hatto assaꞌya Yihowa albillitteno rahe iillannoeta addaxxeemma gede assitinoe.”

6. Umi Pheexiroosi 5:9, 10 callimma macciishshantannonsare jawaachishshannonsahu hiittoonniiti?

⁶ Yihowa callimma macciishshantannonsare ammanate roduuwakki kaaꞌlanni noonsa gara hedi. (1 Pheexiroosi 5:9, 10 nabbawi.) Maatesi Yihowa Farciꞌraasine ikkitinokkihu lowo diro soqqaminohu Hirooshi yinanni rodii togo yiino: “Songote giddo qarru iillannosikkihu nookkiti egennantinote. Baalunku roduuwi Yihowara soqqamate dandaaminsare baala assitanni noota afanke, Yihowa Farciꞌraasine ikkitinokki maate noonkere jawaachishshannonke.”

7. Huuccatto kaaꞌlitannohehu hiittoonniiti?

⁷ Ayyaanaamittete coye assate rosichi heeꞌrohe. Giddokkita Yihowara fante hasaaphi. (1 Phe. 5:7) Maaseeli yinanni rodoo togo yitino: “Macciishshantannoe callimma qeele saꞌꞌate lowo geya kaaꞌlinoeri giddo mittu, Yihowara giddoꞌyata fane hasaaphaꞌyaati.” Tini wedellitte rodoo Yihowara soqqamate murcidhu yannara, maatese Yihowa Farciꞌraasine ikkitinokki daafira callimma macciishshantinose. Ise ledde togo yitino: “Isi anera Anna ikkinoe; barru giddo iso duucha hige huucciꞌreemma, hattono giddoꞌyata isira gudise kuꞌleemma.”

8. Maganu Qaale nabbawanna hiinca kaaꞌlitannohehu hiittoonniiti?

⁸ Maganu Qaale ganyite nabbawi; hattono Yihowa baxannoheta leellishshanno xagge hiinci. Hanni Biyaanka yinanni rodoo woꞌnaalsha laꞌno; ise maatese coyidhannoha hexxo mudhitanno gede assanno coye dandiite heedhanno; ise togo yitino: “Anera iillinoe gedee qarri iillinonsari Qullaawu Maxaafi giddo kulloonni manninna yannankera noote Yihowa soqqamaanota heeshshote xagge nabbawaꞌyanna hiincaꞌya lowo geeshsha kaaꞌlitinoe.” Mitu roduuwi lowo geeshsha jawaachishshanno qummeeshshuwa lawishshaho, Faarso 27:10 nna Isayaasi 41:10 wodanaho wodhitanno. Wolootu kayi webisayitenke aana noota qoonqotenni qaddaꞌnoonni borro macciishshansa callimma macciishshantannonsakki gede kaaꞌlitinonsata coyidhino.

9. Gambooshshe haꞌra kaaꞌlitannohehu hiittoonniiti?

⁹ Gambooshshe ganyite haꞌrate sharrami. Hatto assittoro gambooshshunni jawaachishanno roso rosatto, hattono ammanate roduuwakki roore egennatto. (Ibi. 10:24, 25) Aleenni kulliti Maaseeli togo yitino: “Waajjeemmata ikkummarono, baalanka gambooshshe haꞌratenna gambooshshunniwa dawaro qolate murciꞌroomma. Tini roduuwunniwa albinni roore shiqeemma gede kaaꞌlitinoe.”

10. Ammanamino roduuwi ledo jaalooꞌma hasiissannonkehu mayiraati?

¹⁰ Ammanamino roduuwi ledo jaalooꞌmi. Dirinsa woy lophitino gari ikkihano ikkiro, songote giddonni dancha lawishsha ikkitannohe jaalla hasiꞌri. Qullaawu Maxaafi “Egenno geerruwiinni afiꞌnanni” yaanno. (Iyo. 12:12) Jajjabbu roduuwino ammanantino wedelliwiinni lowore rosa dandiitanno. Yoonaataani Daawitira lowo diro bayiꞌrannoha ikkirono, tini insa mimmitoho lubbote jaala ikkitannokki gede diassitinonsa. (1 Sam. 18:1) Daawitinna Yoonaataani qarru yannara nafa mimmitoho kaaꞌlante Yihowara soqqantino. (1 Sam. 23:16-18) Maatese Yihowa Farciꞌraasine ikkitinokkiti Iriina yinanni rodoo togo yitino: “Ammanate roduuwinke, ayyaanaamittete annanna ama woy roduuwa ikkitannonke. Yihowa hasiisannonkere wonshate insa horoonsiꞌrara dandaanno.”

11. Dancha jaalooma kalaqiꞌrate maa assa hasiissannohe?

¹¹ Hakko iso waajjattoha ikkiro, roduuwu ledo jaalooma kalaqiꞌra shota ikka hooggahera dandiitanno. Hanni Retiina yinanni rodoo woꞌnaalsha laꞌno; ise halaale rossinohu mannu giwanni heeꞌreennaseeti; qoleno ise waajjitannote; togo yitino: “Ayyaanaamittete maateꞌya kaaꞌlonna irko hasiissannoeta ammane adha hasiissinoe.” Wolu manchira giddokkita fushshite hasaapha qarra ikkitahera dandiitanno; ikkirono, dancha jaalooma kalaqiꞌrate hatto assa hasiissannote. Jaallakki ate jawaachishanna kaaꞌla baxxanno; kayinni kaaꞌlitannohehu hiittoonniitiro atewiinni afa hasidhanno.

12. Soqqansho dancha jaalooma kalaqiꞌratto gede kaaꞌlitannohehu hiittoonniiti?

¹² Ammanate roduuwinke ledo jaalooma kalaqiꞌra dandiineemmo doogga giddo mitte insa ledo soqqansho fulate. Aleenni qummi assiniti Kaarooli togo yitino: “Roduuwu ledo soqqansho fulaꞌyanna insa ledo wole Yihowa looso loosaꞌya lowo jaalla afiꞌreemma gede kaaꞌlitinoe. Lowo diro Yihowa kuri jaallaꞌya widoonni kaaꞌlinoe.” Ammanantino roduuwi ledo jaalooma kalaqiꞌrate sharrama gaabbissannota diꞌꞌikkitino. Yihowa callimmano ikko wole yaachishannohe coye qeelte saꞌꞌatto gede ate kaaꞌlate kuri jaallakki horoonsiꞌranno.—Law. 17:17.

WOLOOTU AYYAANAAMITTETE MAATENKE MIILLA IKKITINOTA HUWATTANNO GEDE KAAꞌLENSA

13. Mittu mittunku songote miili maa assa hasiissannosi?

¹³ Mittu mittunku songote miili songo baxillunna keeru woꞌminota ikkitanno gede kaaꞌla hasiissannosi; hatto ikkiro songote giddo callatinohu gede asse hedannohu diheeꞌranno. (Yoh. 13:35) Coyiꞌneemmorinna assineemmori woloota lowo geya jawaachishara dandaanno! Mitte rodoo togo yitino: “Halaale rosummata songo maateꞌya gede ikkitinoe. Insa kaaꞌla hooggoommeꞌꞌero Yihowa Farciꞌraasincho ikka didandeemma.” Maatensa Yihowa Farciꞌraasine ikkitinokki roduuwi, songote miilla ikkitinota huwattanno gede kaaꞌlate maa assa dandaatto?

14. Haaruuddu ledo jaalooma kalaqiꞌrate maa assa dandaatto?

¹⁴ Wolootaho jaala ikkate sharrami. Haaruuddu songo dagganno woyite anga fanne haaꞌne jaalooma hanafa dandiineemmo. (Rom. 15:7) Ikkirono faasiinqe keere haaꞌratenni sainore assa hasiissannonke. Yannate gedensaanni insa ledo lubbora jaalooꞌma dandiineemmo. Hakko daafira haaruuddeho danchumma assi, hattono insara hedattonsata leellishi. Saaltanno gede assitanno xaꞌmo xaꞌmittokki, iillanni noonsare afate woꞌnaali. Mitootaho giddonsata fushshite coyiꞌra qarra ikkitansara dandiitanno daafira, kultannohe gede xixxiiwattokki gede qorophi. Hatteentenni giddonsata coyidhanno gede assitanno xaꞌmo shaqqillunninna wodanchatenni xaꞌmi, hattono dawaro qoltanno woyite cincite macciishshi. Lawishshaho, halaale macciishshitinohu hiittoonniitiro xaꞌma dandaatto.

15. Gikki yitino roduuwi songote giddo noore woloota kaaꞌla dandiitannohu hiittoonniiti?

¹⁵ Gikki yitino roduuwi roorenkanni songote cimeeyye wolootaho heddannota leellishshannoha ikkiro, songote giddo noori baalu ayyaanaamittetenni lophitanno. Amase halaalu mine lossitinoseti Meliisa yinanni rodoo togo yitino: “Lowo diro ayyaanaamittete annuwa ikkite kaaꞌlitinoe roduuwa lowo geya galaxxeemmansa. Giddoꞌyata hasaapha hasiꞌrummaro hasaapheemmaha hooge diegennoomma.” Marisiyo yinanni wedellichi, Qullaawa Maxaafa xiinxallisinosi rodii halaale agurita lowo geya dadillino; isi togo yiino: “Cimeeyye ane daafira heddannota leellishansa lowo geya kaaꞌlitinoe. Insa ganyite hasaawissannoe. Soqqansho ledoꞌya fultanno, Qullaawa Maxaafa nabbabbanni afidhinota muxxe jiro kultannoe, hattono ledoꞌya godoꞌlitanno.” Meliisano Marisiyono woꞌma yanna soqqansho soqqama hanafino.

16-17. Woloota kaaꞌlate maa maa assa dandiineemmo?

¹⁶ Mitore assite kaaꞌlinsa. (Gal. 6:10) Maatesiwiinni xeertiꞌre misiyoone ikke soqqamannohu Liyo yinanni rodii togo yiino: “Roore woyite hasiisannonkehu maltino yannara shaqqillunni kaꞌne assinanninkeho shiima coyeeti. Mitto barra makeenu dano iillitinoeta qaageemmo. Minira iillummo yannara lowo geya dadille noommo. Hakkiinni mittu minaanninna minaama mininsara sagalete koyisie. Hakko barra maa itoommoro qaageemmokkiha ikkirono, insa shaqqillunni macciishshitinoe gara kayi dihaweemmo. Hakkuyi gedensaa woyyimma afiꞌrummo.”

¹⁷ Ayyaanaamittete gambooshshuwa lawishshaho woradunna qoqqowu gambooshshuwa lowo geya banxeemmo; mayira yiniro, gambooshshunniwa ronsoommore roduuwinke ledo hasaambanni insa ledo yanna sayisate faro afiꞌneemmo. Aleenni qummi assiniti Kaarooli “Roorenkanni woradunna qoqqowu gambooshshiwa callimma macciishshantannoe” yitino. Mayira? Ise ledde togo yitino: “Noommahu lowo xibbe woy lowo kume ikkitanno roduuwi ledo ikkirono, duucha woyite insa ofoltannohunna noohu maatensa ledooti. Tenne laeemma woyite roore callatoommahu gede asse hedeemma.” Wolootu kayi minaanna woy minaama shiidhuhu gedensaanni, umi qara qoqqowu woy woradu gambooshshe haꞌra qarra ikkitannonsa. Ati togoo coyi iillinosihu afoottohu no? Hatto ikkiro, aananno gambooshshiwa maatekki ledo hagiidhanno gede koyisattosira dandaatto.

18. Manna wosinsiꞌneemmo woyite 2 Qorontoosi 6:11-13 noo amaale harunsa dandiineemmohu hiittoonniiti?

¹⁸ Mitteenni yanna sayisi. Boohaarate gamba yitinanni woyite addi addi roduuwa roorenkanni callimma macciishshantannonsare koyisi. Hakko iso togoo roduuwira ‘wodana halaꞌla’ hasiissannonke. (2 Qorontoosi 6:11-13 nabbawi.) Aleenni qummi assiniti Meliisa togo yitino: “Roduuwu insanna maatensa ledo yanna sayinseemmo gede hattono ledonsa wole qooxeessa haꞌne boohaarreemmo gede koyissannonke woyite tashshi yaannonke.” Songoꞌne giddo wosinsiꞌra dandaattohu no?

19. Ammanate roduuwinke ledonke yanna sayissuro roore hagiidhitannohu hiittoo woyite ikkara dandaanno?

¹⁹ Ammanate roduuwinke ledonsa yanna sayinsummoro roore hagiidhitanno yanna heedhara dandiitanno. Mitu roduuwinkera ayyaanu barra Yihowa Farciꞌraasine ikkinokki fiixinsa ledo hosa qarra ikkitansara dandiitanno. Mitootu shiidhino barri iillanno woyite lowo geya dadillitannoha ikkara dandaanno. Togoori iillinonsa roduuwi ledonke yanna sayissanno gede koyinseemmo woyite, insa daafira godowinta hendeemmota leellinsheemmo.—Fil. 2:20.

20. Yesuusi Maatewoosi 12:48-50te coyiꞌrino hedo callimma macciishshantannonke woyite kaaꞌlitannonkehu hiittoonniiti?

²⁰ Mittu Kiristaanchira callimma macciishshantannosi gede assannohu lowo coyi no. Ikkirono Yihowa togoo hedo macciishshantannonsa woyite tenne afannota mittoreno dihuluullammeemmo. Isi duucha woyite ammanate roduuwinke widoonni hasiisannonkere aannonke. (Maatewoosi 12:48-50 nabbawi.) Ninkeno dandaaminke deerrinni ayyaanaamittete maatenke kaaꞌlate sharrammeemmoha ikkiro, Yihowa assinonkerira galatu noonketa leellinsheemmo. Mito woyite macciishshantannonke hedo ikkitutano ikkituro, Yihowa ledonke noo daafira callootanke diꞌꞌikkinoommo!