Ati Wolootu Ledo Loosatto Woyite Hiittooho?

“HATTE yannara, iso ogimmaꞌyanni kaaꞌloomma; . . . barru barrunkunni tashshi yaannae heeꞌroomma.” (Law. 8:30) Kuni qummeeshshi Maganu Beetti iima Annisi ledo lowo diro loosinohu hiittoonniitiro kulanno. Qoleno kuni qummeeshshi, Yesuusi Maganu ledo loosi yannara Isi albaanni ‘tashshi yiinosita’ leellishanno.

Yesuusi Annisi Yihowa gordonna baatto kalaqi woyite ledosi no.

Yesuusi gordoho noo yannara, wolootu ledo loosanno woyitira kaaꞌlannosiha dancha akata rosino. Hakkiinni uullara dayiti, ledosi loossannorira dancha loosu jaala ikke kaajja lawishsha ikkino. Yesuusi lawishshi kaaꞌlannonkehu hiittoonniiti? Isi lawishsha seekkine xiinxalline, wolootaho dancha loosu jaalla ikkate kaaꞌlannonkeha sase xintu seera rosa dandiineemmo. Tini xintu seerubba roduuwinke ledo noonke mittimma kaajjitanno gede kaaꞌlitannonke.

Yesuusi lame rosaanosi sabbakkara soyanni no. — Yihowanna Yesuusi lawishsha harunsite, egennokkinna woꞌnaalshakki woleho iillishiꞌrate qixxaawoottoha ikki

UMIHA XINTU SEERA: “MIMMITOꞌNE AYIRRISATE QOLCHAMME”

Danchu loosu jaali umosi heeshshi assannoho. Togoo manchi ledosi loossannore ayirrisanno, hattono isonooto dibokkeessanno. Yesuusi konni garinni umo heeshshi assa Annisiwiinni rosino. Kalaqaanchoho yinannihu Yihowa calla ikkirono, isi Beettisi loosino loosono wolootu affara hasiꞌrino. Maganu coyiꞌrinorinni tenne huwata dandiinanni; isi togo yiino: “Manna daninkenninna suudinkenni kalanqo.” (Kal. 1:26) Yihowa tenne coyiꞌri woyite, Yesuusi Annisi lowo geeshsha umosi heeshshi assannoha ikkinota huwatino.—Far. 18:35.

Cimeessu wedellicha rodoo songote loosira qajeelsanni no.

Yesuusino uullate aana noo waro konni garinni umosi heeshshi assannoha ikkinota leellishino. Isi loosino loosira mannu galatisi woyite, galata Maganoho uyinanni gede assino. (Maq. 10:17, 18; Yoh. 7:15, 16) Yesuusi rosaanosi ledo dancha aante heedhannosi gede sharramino; hattono insa borojju gede asse ikkikkinni jaallasi gede asse hedino. (Yoh. 15:15) Insara umo heeshshi assa rosiisara yee lekkansa nafa hayishshino. (Yoh. 13:5, 12-14) Ninkeno uminke hasatto balaxisiisantenni, ledonke loossanno roduuwanke ayirrisa hasiissannonke. ‘Mimmito ayirrinseemmohanna’ ayirrinye afiꞌrate yaandeemmokkiha ikkiro, lowore loosa dandiineemmo.—Rom. 12:10.

Qoleno, umosi heeshshi assanno manchi ‘malu seyiro halchinoonniri woꞌmannota’ huwatanno. (Law. 15:22) Noonke woꞌnaalshinna dandoonke ikkitu geeshshitano ikkituro, baalankare afino manchi nookkita qaaga hasiissannonke. Yesuusi nafa afinokki coyi noota xawise coyiꞌrino. (Mat. 24:36) Qoleno, isi guuta ikkitinokki rosaanosi maa heddannoro afa hasiꞌranno. (Mat. 16:13-16) Ledosi loossannori isi ledo noo woyite huxuxxi yitannokkihu iseraati! Hatteente gede, ninkeno umonke heeshshi assineemmoha, baalankare gunde anfoommokkita qaangeemmohanna wolootu yitannore macciishshineemmoha ikkiro, mereeronke keeru heeꞌranno; hattono ‘halchinoonniri woꞌmanno.’

Hakko iso songote cimeeyye mitteenni loossanno woyite Yesuusi gede umonsa heeshshi assitannore ikka hasiissannonsa. Gambooshshinsa yannara, qullaawu ayyaani aye cimeessano kaaꞌlannore coyiꞌranno gede kakkayisasira dandaannota qaaga hasiissannonsa. Cimeeyye mereeronsa noohu baalunku huxuxxi yiikki hedosi coyiꞌranno gede injo kalaqquro, songo woꞌmate kaaꞌlannore mura dandiitanno.

LAYINKIHA XINTU SEERA: ‘ARSHOOTA WOY QUWA SAꞌINANNIKKIRE IKKE’

Danchu loosu jaali wolootu ledo loosanno woyite yiinota calla cuꞌmiꞌre digiwanno woy quwa disaꞌꞌanno. Hasiisanno woyite hedosi aguranno hattono maahoyye yaanno. Yesuusi Annisi quwa saꞌꞌannokkiha ikkinota laꞌꞌannota duucha faro afiꞌrino. Lawishshaho, Yihowa iso reyo hasiissannore mannu ooso gatisara uullara soyinosi.—Yoh. 3:16.

Yesuusi, hasiisanno woyite hedinore agure maahoyye yaanno. Lawishshaho, isi soqqame dayinohu Israeelete mannira ikkirono, Kanaꞌꞌaanitte mancho kaaꞌlino. (Mat. 15:22-28) Qoleno rosaanosiwiinni quwa sainore diagadhino. Muli jaalisi Pheexiroosi mannu albaanni kaadisihu gedensaanni, Yesuusi isira gatona yiinosi. Gedensoonni isi Pheexiroosira ayirrado looso uyinosi. (Luq. 22:32; Yoh. 21:17; Soq. 2:14; 8:14-17; 10:44, 45) Yesuusi lawishshi, ninkeno maahoyye yineemmore ikkine ‘arshoota woy quwa saꞌneemmokkire’ ikka hasiissannonketa leellishanno.—Tit. 3:2.

Mitte rodoo wole rodoora tuubbo qaaffinsanni gara rosiissanni no.

Quwa saꞌneemmokkire ikkanke, duuchunku gari manni ledo sumuu yine loonseemmo gedeno kaaꞌlitannonke. Yesuusi xaadanno manna shaqqillunni amadanno daafira, hinaassino diinnasi “qaraxaasinetenna cubbaataammu jaalaati” yitinosi; insa hatto yitu manni kayinni Yesuusi duduwino sokka macciishshannoho. (Mat. 11:19) Ninkeno Yesuusi gede ninkewiinni baxxino manni ledo sumuu yine loosa dandiineemmo? Woradu aliidi laꞌꞌaancho ikkenna Beeteelete duuchu gari roduuwi ledo soqqaminohu Luwisi yinanni rodii togo yiino: “Anente gede guuta ikkinokki manni ledo loosa, addi addi suude afidhino kinnanni mine minate gedeeti. Kinna addi addi garita ikkase looso leddannoha ikkirono, girgidda gurgurto nookkiha taalashsho assa dandiinanni. Wolootu ledo sumuu yee loosatenna loosono umo fushshate, biddi assiꞌra hasiissannoere biddi assiꞌrate woꞌnaaleemmo.” Tini dancha laooti!

Danchu loosu jaali silxaaneꞌya hoogeemmo yee, afinore dimaaxiꞌranno

Quwa saꞌneemmokkire ikkinoommota songonke giddo leellisha dandiineemmohu hiittoo woyiteeti? Soqqanshote gaamonke ledo soqqammeemmo woyite tenne assa dandiineemmo faro afiꞌneemmo. Ninkehunni baxxinohu maatete qeechi noonsari ledo woy darawonke ikkitinokkiri ledo soqqama dandiineemmo. Qoleno insa soqqanshotenni hagiidhite higganno gede, soqqanshonke gara woy soqqammanni sayinseemmo yanna insara injaanno garinni biddi assiꞌra dandiineemmo.

SAYIKKIHA XINTU SEERA: ‘AATENNA AFIDHINOONNIRE WOLEHO IILLISHIꞌRATE QIXXAABBE’

Danchu loosu jaali ‘afiꞌrinore woleho iillishiꞌrate qixxaawinoho.’ (1 Xim. 6:18) Yesuusi Annisi ledo loosi yannara, Yihowa baalare kofe maaxiꞌrannoha ikkinokkita huwatikki digatino. Yihowa ‘gordo diriirsi yannara’ Yesuusi “ledosi noo” daafira, lae rosa dandaannori no. (Law. 8:27) Gedensoonni, Yesuusi umisi Annisiwiinni ‘macciishshinore’ rosaanosira hagiirrunni kulinonsa. (Yoh. 15:15) Ninkeno Yihowa lawishsha harunsine, egennonkenna woꞌnaalshanke roduuwinkera beeha hasiissannonke. Danchu loosu jaali bayichoꞌya woy silxaaneꞌya hoogeemmo yee, wolootu afa hasiissannonsare woy kaaꞌlannonsare dimaaxiꞌranno. Hatteentenni rosinoha dancha coye wolootaho kula hagiirsiissannosi.

Cimeessu mittu rodii lallawo rosiisiˈranna macciishshanni no. Isi “Nabbawanna Rosiisa” yitanno biroshere anga adhe harunsanni no.

Qoleno ledonke loossanno roduuwanke jawaachisha dandiineemmo. Mittu manchi assinoommore wodanche godowinta galatinkero, tashshi diyaannonke? Yesuusi ledosi loossannori assitinoha dancha coye wodanche kulinonsa. (Maatewoosi 25:19-23 nna Luqaasi 10:17-20 ledo heewisiisi.) Isinni isi loosino loosinni “saino looso nafa” loossannota kulinonsa. (Yoh. 14:12) Yesuusi gaꞌa gede reyara hashsha ammanantino soqqamaasinesi togo yee galatinonsa: “Kiꞌne qarriꞌya yannara ane ledo kaajjitine uurritinoonni.” (Luq. 22:28) Yesuusi hatto yaasi insa mageeshshi geeshsha jawaachishshinonsaronna loosoho kakkayissinonsaro heda dandaatto! Ninkeno ledonke loossanno roduuwanke galanteemmoha ikkiro, albinni roore hagiirraamma ikkitanno, hattono roore looso loossara dandiitanno.

DANCHA LOOSU JAALA IKKA DANDAATTO

Keyodi yinanni rodii togo yiino: “Dancha loosu jaalaati yinannihu guuta manchooti yaa diꞌꞌikkino; hatteentenni ledosi loossannori hagiirraamma ikkitanno gedenna loosu duha ikkannonsakki gede assannoho.” Ati ledokki loossannorira hattooho? Wolootu ate tennera hiittooho yite heddannoro afate, mito roduuwa mayira dixaꞌmatto? Ledokki loossanno roduuwi Yesuusi rosaano isi ledo loosse hagiidhitu gede hagiidhitannoha ikkiro, atino soqqamaasinchu Phaawuloosi yiinore yaa dandaatto; isi togo yiino: ‘[Ninke] hagiidhitinanni gede ledoꞌne loonseemmoreeti.’—2 Qor. 1:24.