‘Cimeeyye Woshshiꞌri’

1. Yihowa geꞌreewisi isira muxxe ikkinota leellishinohu hiittoonniiti?

YIHOWA geꞌreewi isira muxxete. Isi insa Yesuusi mundeenni woxxino hattono hoshshasi towaattanno gede songote cimeeyye shoomino. (Soq. 20:28) Maganu geꞌreewosi shaqqillunni amandara hasiꞌranno. Songote cimeeyye Kiristoosi massagannansa Maganu geꞌreewo fooliishshiishshanno hattono ayyaanaamittensa gawajjannoriwiinni agartannonsa.—Isa. 32:1, 2.

2. Yihowa roorenkanni ayeoo kaaꞌla baxanno? (Hiziqeeli 34:15, 16)

² Yihowa baalunku geꞌreewisira lowo geya hedannoha ikkirono, roorenkanni qarru amadinonsare kaaꞌla baxanno. Isi songote cimeeyye widoonni ayyaanaamittete qarri amadinonsare kaaꞌlannonsa. (Hiziqeeli 34:15, 16 nabbawi.) Ikkirono isi hasiissannonke yannara kaaꞌlo xaꞌmiꞌnammora hasiꞌranno. Togoo woyite Maganu kaaꞌlannonke gede eeggifante huucciꞌneemmotano agurranna songote giddo noo “allaalaasinenna rosiisaano” kaaꞌlo xaꞌmiꞌneemmo.—Efe. 4:11, 12.

3. Cimeeyye loossanno looso afanke ninke baalanka kaaꞌlitannonkehu hiittoonniiti?

³ Konni birxichira, Maganu songote cimeeyye widoonni ayyaanaamittete kaaꞌlo afiꞌneemmo gede qixxeessinonke qixxaawo laꞌneemmo. Aante noo xaꞌmuwara dawaro afiꞌneemmo: Cimeeyye kaaꞌlo xaꞌmiꞌra hasiissannonkehu mamooteeti? Insa kaaꞌlo xaꞌmiꞌra hasiissannonkehu mayiraati? Insa kaaꞌlitannonkehu hiittoonniiti? Xaa yannara qarru iillanni noonkekkiha ikkiro nafa, kuri xaꞌmuwara qollanni dawaro Maganu qixxaawo albinni roore naandeemmo gede assitannonke hattono barrunni mitto barra heeshshonke gatissara dandiitanno.

‘CIMEEYYE WOSHSHIꞌRA’ HASIISSANNONKEHU MAMOOTEETI?

4. Yaaqoobi 5:14-16, 19, 20 kulloonnihu ayyaanaamittete dhibbaati yineemmohu mayiraati? (Misillano lai.)

⁴ Rosaanchu Yaaqoobi Maganu ayyaanaamittete kaaꞌlo afiꞌneemmo gede qixxeessinonke qixxaawo daafira kulanni togo yiino: “Kiꞌne giddo dhiwaminohu no? Songote cimeeyye isiwa woshshiꞌro.” (Yaaqoobi 5:14-16, 19, 20 nabbawi.) Qooxeessaho noo hedo leellishshannonte gede, Yaaqoobi kulanni noohu ayyaanaamittete dhibbaati. Lawishshaho, dhiwamino manchi akimicha ikkikkinni songote cimeeyye woshshiꞌranno gede kulloonni. Qoleno Yaaqoobi dhiwamino manchi cubbosi gatona yinisiro hurannota coyiꞌrino. Ayyaanaamittete dhibba xagisate assinannihu mitu coyi bisu dhibba xagisate assinanniri ledo mitto garaati. Dhiwammummoro akimete minira haꞌne akimichaho assinonketa kulleemmo; hattono isi kulannonkere assineemmo. Hatteente gede ayyaanaamittetenni dhiwammummoro, cimeeyyenniwa haꞌne qarranke kuꞌlanna insa uyitannonketa Qullaawa Borro amaale haꞌrunsa hasiissannonke.

5. Ayyaanaamittetenni dhiwammoommota mayinni anfeemmo?

⁵ Yaaqoobi fooliishsho 5 kulloonni qixxaawo ayyaanaamittetenni dhiwammoommota huwantummoro, cimeeyye woshshiꞌneemmo gede jawaachishshannonke. Maganu ledo noonke jaaloomi baikkinni kaaꞌlo xaꞌmiꞌra hayyote! Ninkeneeto doga dihasiissannonke. Qullaawa Borro ayyaanaamittenke lainohunni ninkeneeto dongammora dandiineemmota kulte qorophisiissannonke. (Yaq. 1:22) Umi xibbi diro, Serdeesi songora heeꞌrinohu mitu Kiristaani togoo soꞌro loosino; qoleno Yesuusi insa ayyaanaamittetenni jawaattinokkita kule qorophisiisinonsa. (Aju. 3:1, 2) Ayyaanaamittenke noo gara afa dandiineemmoti mitte doogo, Yihowa magansiꞌrate albi gede laalaantanni heeꞌnoommoronna teꞌee layiꞌrate. (Aju. 2:4, 5) Ninkeneeto togo yine xaꞌma dandiineemmo: ‘Qullaawa Maxaafa nabbawanna hiinca albi gede baxissannoe? Gambooshsheho qixxaaweemmohunna haꞌreemmohu mulla yinoomme yaate geeshshiraati? Albi gede laalaate soqqama aguroommo? Xa roore hedeemmohunna yannaꞌya guxxeemmohu maalu hagiirre woy jiro shorranniiti?’ Kuri xaꞌmuwa giddo mittete nafa ee yine qolleemmoha ikkiro, Yihowa ledo noonke jaaloomi baꞌꞌanni no yaate; tennera mala hasiꞌra hoongummoro coyi roore bushannilla haꞌranno. Laanfenke ninke uminkenni biddi assiꞌra dandiineemmokkiha ikkiro woy Yihowa biddishsha diingoommoha ikkiro, songote cimeeyye kaaꞌlo xaꞌmiꞌra hasiissannonke.

6. Jawa cubbo loossinori maa assa hasiissannonsa?

⁶ Hige songotenni fushshinanni gede assannonsaha jawa cubbo loossinori cimeeyyete kula hasiissannonsa. (1 Qo. 5:11-13) Qeelame jawa cubbo loosinohu aye manchino Yihowa ledo noosi jaalooma haaroonsiꞌrate kaaꞌlo hasiissannosi. Wodote widoonni Yihowa maaro afiꞌrate, ‘maaro eꞌnoommota leellishanno looso loosa’ hasiissannonke. (Soq. 26:20) Tenne assa dandiineemmoti mitte doogo jawa cubbo loonsummoro cimeeyyete kulate.

7. Cimeeyyete kaaꞌlo hasiissannonsari wolootu ayeooti?

⁷ Songote cimeeyye jawa cubbo loossinore calla ikkikkinni ayyaanaamittetenni shoshshoggitinoreno kaaꞌlitanno. (Soq. 20:35) Lawishshaho, busha yorto qeeꞌla didandoommo yite hedattoha ikkara dandaanno. Halaale rosattora albaanni jingilli assitanno xagga adhattoha, teeda baꞌino misilla laꞌꞌattoha woy amanyoote baꞌino heeshsho heeꞌroottoha ikkiro, busha yorto qeeꞌla roore qarra ikkitahera dandiitanno. Togoo fonqolo qeeꞌlate callikki sharrama dihasiissannohe. Yaachishinohere kuꞌlitanna seekke macciishshannohehura, kaaꞌlitanno amaale amaalannohehuranna busha yorto qeeꞌlite Yihowa hagiirsiisa dandaattota buuxisannohe cimeessira hasaapha dandaatto. (Ros. 4:12) Fonqolo qeela didandoommo yite hexxo mudhoottoha ikkiro, cimeeyye insa kaaꞌlo xaꞌmiꞌrakki Yihowa ledo noohe jaalooma mulluri gede assite laꞌꞌattokkitanna quwa saꞌe ateneeto addaxxattokkita leellishshannota ikkase qaagiissitahera dandiitanno.—1 Qo. 10:12.

8. Songote cimeeyyera kula hasiissannohekki soꞌro hiittoote?

⁸ Loonsoommo soꞌro baala songote cimeeyyera kula hasiissannonke yaa diꞌꞌikkino. Hanni mitto rodoo woy mitte rodoo xissiisannore coyiꞌrootto woy insara lowo geeshsha hanqootto yine hendo. Togoo woyite cimeeyye hasaawisantenni Yesuusi rodiinke ledo keere kalaqate daafira kulino amaale haꞌrunsa dandaatto. (Mat. 5:23, 24) Albinni roore jooga, cincattohanna ateneeto eemadhattoha ikkate, kuri akatta daafira kultanno borruwa seekkite xiinxalla dandaatto. Hige kalaqamino qarra ati umikkinni tira dandaattokkiha ikkiro, songote cimeeyye kaaꞌlo xaꞌmiꞌra dandaatto. Soqqamaasinchu Phaawuloosi Filiphisiyuusi Kiristaanira borreessino sokkara suꞌmasi kulloonnikkihu mittu rodii Ewoodiyanna Sinxeeki mereeronsa kawa kaꞌaanni higino coye tiranno gede kaaꞌlansara kulino; aterano togoori tuncu yaannohe woyite songokkira noo cimeessi kaaꞌlahera dandaanno.—Fil. 4:2, 3.

CIMEEYYE WOSHSHIꞌRA HASIISSANNONKEHU MAYIRAATI?

9. Songote cimeeyye woshshiꞌra saala hasiissannonkekkihu mayiraati? (Lawishsha 28:13)

⁹ Jawa cubbo loonsummoro woy laanfenke qeeꞌla qarra ikkitunkero, kaaꞌlo xaꞌmiꞌrate ammananna worbimma hasiissannonke. Songote cimeeyye woshshiꞌra saala dihasiissannonke. Mayira? Yihowa qixxeessino qixxaawo horoonsiꞌne, isonna isi ayyaanaamittetenni fayyuulle ikkinenna ammanatenni kaajjine heeꞌneemmo gede kaaꞌlate uyinonke biddishsha addaxxineemmota leellinsheemmo. Umbammora ranke heeꞌnoommoha ikkiro, isi kaaꞌlo hasiissannonketa ammanne adhineemmo. (Fa. 94:18) Qoleno cubbo loonsoommoha ikkiro, cubbonke kulleemmohanna gara ikkinokkire assa agurreemmoha ikkiro Maganu maarannonke.—Lawishsha 28:13 nabbawi.

10. Cubbonke maaxate woꞌnaalleemmoha ikkiro mayi kalaqamara dandaanno?

¹⁰ Kaaꞌlo hasiissannonke woyite songote cimeeyye hasaawinseemmoha ikkiro, atoote afiꞌneemmo; cubbonke maaxate woꞌnaalleemmoha ikkiro kayinni coyi roore bushanni haꞌranno. Moote Daawiti loosino cubbo maaxate woꞌnaali yannara Yihowa ledo noosi jaaloomi baino hattono yaadino. (Fa. 32:3-5) Dhiwamme woy madiꞌne xagisiꞌra hoongummoro xisso lexxitanni hadhannonte gede, ayyaanaamittete xissonke xagisiꞌra hoongummoro Yihowa ledo noonke jaaloomi baꞌꞌanno. Yihowa tenne afino daafira, ayyaanaamittetenni hurreemmo gede qixxeessinonke qixxaawo widoonni isi ledo ‘mala hanseemmo’ gede koyisinonke.—Isa. 1:5, 6, 18.

11. Loonsoommoha jawa cubbo maaxa woloota gawajjitara dandiitannohu hiittoonniiti?

¹¹ Loonsoommoha jawa cubbo maaxa woloota gawajjitara dandiitanno. Songo woꞌma Maganu ayyaana hoogganno gedenna roduuwinke keeri baꞌꞌanno gede assinammora dandiineemmo. (Efe. 4:30) Qoleno, mittu rodii jawa cubbo loosinota anfummoro songote cimeeyyera kulanno gede jawaachisha hasiissannonke.a Wolu manchi loosinoha jawa cubbo maanxummoro, ninkeno xaꞌmammeemmo. (Lew. 5:1) Yihowara noonke baxilli mittu rodii loosinoha jawa cubbo songote cimeeyyera kulleemmo gede kakkayisannonke. Konni garinni songo xuru nookkita ikkite heedhanno gedenna cubbo loosino manchi Yihowa ledo noosi jaalooma haaroonsiꞌranno gede kaaꞌlineemmo.

SONGOTE CIMEEYYE KAAꞌLITANNONKEHU HIITTOONNIITI?

12. Cimeeyye ayyaanaamittetenni shoshshoggitinore kaaꞌlitannohu hiittoonniiti?

¹² Cimeeyye ayyaanaamittetenni shoshshoggitinore kaaꞌlitanno gede amaalloonninsa. (1 Te. 5:14) Cubbo loosoottoha ikkiro, insa wodanikkira noo hedo fushshite hasaaphatto gede kaaꞌlitannohe xaꞌmuwa xaꞌmitara dandiitanno. (Law. 20:5) Budikki, akatikki woy iillinohe qarri giddokkita insara xawisse hasaapha qarra ikkitannohe gede assihero nafa, giddokkita fushshite hasaaphite insa kaaꞌlattonsara dandaatto. “Qasanno coye” coyiꞌreemmo yite yaaddooti. (Iyo. 6:3) Cimeeyye muddante yoo yaantenni hasaaphattore seekkite macciishshatenna amaaltara albaanni woꞌma taje afiꞌrate sharrantanno. (Law. 18:13) Insa hoshsha towaatate yanna hasiissannota affino daafira, shota ikkinokki qarra mitte hinge calla hasaambe tira dandiinanni yite diheddanno.

13. Cimeeyye huuccatto assitenna Qullaawu Maxaafi amaale uyite kaaꞌlitannonkehu hiittoonniiti? (Misillano lai.)

¹³ Cimeeyye woshshiꞌrittoro insa ateneeto roore bushiishatto gede assa hoogate sharrantanno. Hatteentenni insa ate daafira huuccitanno. Insa huuccitanno huuccatto “lowo wolqa” afidhino daafira kaaꞌlitannohe gara afakki dhagge ikkahera dandaanno. Qoleno insa “Yihowa suꞌminni zayite buurte kaaꞌlitannohe.” (Yaq. 5:14-16) Koye kulloonni “zayite” Maganu qaali giddo noo halaaleeti. Cimeeyye Qullaawa Maxaafa dancha gede horoonsidhe, jawaachishshannohe, sheshifachishshannohe hattono Yihowa ledo noohe jaalooma haaroonsiꞌratto gede kaaꞌlitannohe. (Isa. 57:18) Insa amaaltannoheti Qullaawu Maxaafi amaale gara ikkinore assate albinni roore murciꞌratto gede kaaꞌlitannohe. Yihowa cimeeyyete widoonni, “Doogo tenneetina ise higgine hadhe” yaanna macciishsha dandaatto.—Isa. 30:21.

14. Galaatiya 6:1 kultanno garinni cimeeyye ‘gara ikkitinokki doogo haꞌrino’ mancho kaaꞌlitannohu hiittoonniiti? (Misillano lai.)

¹⁴ Galaatiya 6:1 nabbawi. “Gara ikkitinokki doogo” haꞌranni noo Kiristaanchi Maganunnihu keeraanchu biddishshi ledo sumuu yee haꞌranni nooha diꞌꞌikkino. Kowiicho kulloonniti gara ikkitinokki doogo, shiima soꞌro woy Maganu seera diinge loonsannita jawa soꞌro leellishshannota ikkitara dandiitanno. Cimeeyye baxillunni kaꞌe togoo mancho ‘shaqqillunni raga qolate woꞌnaaltanno.’ Raga qola yine tirroonnihu Giriikete afii qaali hiiqqamino miqichi huranno gede bayichosi qola yitanno tirono afiꞌrino. Dandoo noosi akimichi hiiqqamino miqicho xissiisikkinni sissate sharramannonte gede, songote cimeeyyeno ayyaanaamittetenni dhiwamino manchi roore xissiisiꞌranno gede assitukkinni hursate sharrantanno. Qoleno songote cimeeyye insa uminsa ‘jifantannokki gede qorophitara’ kulloonninsa. Doogonke biddi assiꞌneemmo gede kaaꞌlitannonke woyite insa uminsa guuntete xeꞌne noonsare ikkitinotanna gara ikkitinokki doogo hadhara dandiitannota dideꞌanno. Songote cimeeyye amaaltanni noo mancho roortannohu gede assite woy insa keeraano ikkitinohu gede assite diheddanno; hatteentenni wolootu qarra uminsahu gede assite hedate sharrantanno.—1 Ph. 3:8.

15. Qarru amadinkero maa assa dandiineemmo?

¹⁵ Songonke cimeeyye addaxxa dandiineemmo. Insa fojonke maaxxanno gede, uminsanni ikkikkinni Qullaawu Maxaafinni amaaltannonke gedenna duhanke shaashshiꞌneemmo gede kaaꞌlitankera qajeelsinoonninsa. (Law. 11:13; Gal. 6:2) Mittu mittunku cimeessi akatinna woꞌnaalshi babbaxxannoha ikkirono, aye cimeessirano huxuxxi yinummokkinni qarranke hasaapha dandiineemmo. Hige macciishsha hasiꞌneemmo amaale kulannonkeha hasiꞌnanni mittu mittunku cimeessiwa dihaꞌneemmo. Hatto assineemmoha ikkiro Maganu Qaaliha “halaalaancho roso” rosantenni ‘maccansa kurkurrara’ hasidhannori gedeere ikkineemmo. (2 Xi. 4:3) Qarranke mittu cimeessira kulleemmo woyite isi tenne daafira wole cimeeyyera kulloommoronna insa mayite amaaltinonkero xaꞌmankera dandaanno. Isi dhukasi afinoha ikkasi wole cimeessa amaaꞌlanno gede assitasira dandiitanno.—Law. 13:10.

NINKE QEECHA

16. Hiikku qeechi noonke?

¹⁶ Maganu geꞌreewo ikkinoommo daafira, songote cimeeyye agartannonkeha ikkirono, konne asse konne assitinoonte kayinni diyitannonke. Maganoho galloommore ikkine heeꞌra ninke qeechaati. Coyiꞌneemmonna assineemmorira Maganu albaanni dawaro qolleemmo. Isi kaaꞌlannonke daafira minshe nookkire ikkine heeꞌnummoro iillannonke fonqolo qeela dandiineemmo. (Rom. 14:12) Hakko daafira cimeeyye mitto coye assineemmo gede kulantenni, Qaalisi giddo noota Maganu hedo illachinsheemmo gede assitannonke. Insa uyitannonketa Qullaawu Maxaafi amaale haꞌrunsine dancha doorsha doodhate ‘wodanchate dandoonke’ qajeelsiꞌra dandiineemmo.—Ibi. 5:14.

17. Maa assate murciꞌra hasiissannonke?

¹⁷ Yihowa geꞌreewo ikka ninkera lowo ayirrinyeeti! Yihowa ninke hegere heeshsho afiꞌneemmo gede ‘dancha allaalaancho’ Yesuusa wodo asse uyinonke. (Yoh. 10:11) Qoleno songote cimeeyye widoonni Yihowa eino qaale wonshino; isi “Ani egennaamma gashshaano dooreemmoꞌne; insano danchu allaalaanchi gede assite massaggannoꞌne” yiino. (Erm. 3:15) Ayyaanaamittetenni shoshshoggineemmo woyite woy dhiwammeemmo woyite cimeeyye woshshiꞌrate hobbi ruxxi yaa dihasiissannonke. Yihowa songote cimeeyye oye qixxeessinonke qixxaawo woꞌmunni woꞌma horoonsiꞌrate murciꞌno.