“Halaalikkinni Qaafeemmo”

1-3. (a) Qullaawu Maxaafi halaale ma garinni laꞌꞌa hasiissannonke? Lawishsha kuli. (Hanafote noo misilla lai.) (b) Konni birxichira hiikkuri xaꞌmuwa xiinxallineemmo?

YANNANKERA hidhinoonni uduunne qola rosaminore ikkitino. Mite gobbara xibbunni 9 anga ikkanno manni hidhino uduunne qolanno yine hendanni. Uduunne interneete widoonni hidhanno manni giddo xibbunni 30 anga ale ikkannohu qolanno. Kunni manni uduunne qolannohu uduunnu hedino geeshsha ikka hooginohura, xeꞌne afiꞌrinohura woy baxisinonsakki daafira ikkara dandaanno. Konni daafira insa hakko uduunne soorriꞌranno woy hirinsa manchi woxe qolannonsa gede xaꞌmiꞌranno.

² Hidhinoommo uduunne qolle woxe adha dandiineemmoha ikkirono, ‘afiꞌnoommoha’ Qullaawu Maxaafi “halaale” qola woy ‘huꞌna’ dihasiꞌneemmo. (Lawishsha 23:23 nabbawi; 1 Xim. 2:4) Sai birxichira, halaale rosate yine facci assine agurroommo coyibba laꞌnoommo. Qoleno halaale afiꞌrate yine, lowo woxe abbanno looso, mitu manni ledo aanate, mite hedonkenna amanyoote, hattono Qullaawu Maxaafi ledo sumuu yaannokki bude agurroommoha ikkara dandaanno. Ikkollana afiꞌnoommo atoote hendiro agurroommo coyibba garita diꞌꞌikkitino.

³ Yesuusi Maganu Mangiste halaali mageeshshi geeshsha muxxe ikkinoro xawisate, dancha inqu hidha hasiꞌrino daddalaanchi lawishsha kulino. Kuni daddalaanchi hasiꞌrino inqu afiꞌrino. Tini inqu lowo waaga afidhino daafira, kuni daddalaanchi “noosire baala hire” hatte inqu hidhino. (Mat. 13:45, 46) Ninkeno Maganu Mangiste halaalenna Maganu Qaali giddo nooha muxxe halaale baala ronsummo woyite konne halaale afiꞌrate yine bayichonko uminke fajjonni lowo coyibba facci assine agurroommo. Konne halaale lowori gede assine laꞌneemmoha ikkiro, ‘dihuꞌnineemmo’ woy dihirreemmo. Ikkollana mitu Kiristaani rosino halaali mageeshsha muxxe ikkinoro deino daafira, konne halaale huꞌnino; tini dadillissannote. Ninke kayinni hatto assa dihasiꞌneemmo! Halaale naandeemmotanna hirreemmokkita leellishate, ‘halaalunni heeꞌneemmo.’ (3 Yohaannisi 2-4 nabbawi.) Halaalunni heeꞌrate yaa, heeshshonke giddo halaale balaxisiisatenna halaalunni qaafate. Konni birxichira aante noo xaꞌmuwa xiinxallineemmo: ‘Mitootu halaale huꞌnitinohu woy hirtinohu mayiraati? Togo assitinohu hiittoonniiti? Ninke togoo soꞌro loonseemmokki gede qoropha dandiineemmohu ma garinniiti? Albinni roore ‘halaalunni heeꞌrate’ murciꞌra dandiineemmohu hiittoonniiti?’

MITOOTU HALAALE ‘HUꞌNITANNOHU’ MAYIRAATI? HIITTOONNI?

4. Umi xibbi diro mitootu halaale ‘huꞌnitinohu’ mayiraati?

⁴ Umi xibbi diro Yesuusi rosiisino halaale macciishshe adhino manni giddo mitu halaalu giddo heeꞌra didandiino. Lawishshaho, Yesuusi maalaletenni lowo manna itisi gedensaanni mannu isi ledo Galiilu Baara tayise saino. Yesuusi kayinni insara masisannore kulinonsa; togo yiinonsa: “Manchi Beetti maala ita hoogginiro, mundeesino aga hoogginiro heeshsho dinoꞌne.” Insa Yesuusi konne coye xawisannonsa gede xaꞌma agurte togo yitino: “Kuni coyi kaajjadoho; ayi dandee macciishshanno?” Konni daafira, “Rosaanosi giddo batinyu badhera higgu. Hatte yannanni kayisse Yesuusi hoode dihadhino.”—Yoh. 6:53-66.

5, 6. (a) Yannankera mitootu halaalu mininni xeertidhannohu mayiraati? (b) Mittu manchi sunu sununni halaalu mininni fongogara dandaannohu hiittoonniiti?

⁵ Yannankerano mitootu halaale cuꞌmidhe heeꞌra hooggino; tini dadillissannote. Insa giddo mitu biddi assinoonnihu Qullaawu Maxaafi rosinni woy egennamino rodii coyiꞌrinorinni woy assinorinni gufidhino. Mitootu qolte Qullaawu Maxaafi amaale uyinoonninsa daafira woy ammanate rodiinsa ledo coyi kawa kaꞌaa higinonsahura halaalu mininni fultino. Wolootu kayinni kaadaasinenna ammananke gibbannore harunsitino. Konninni kainohunni insa Yihowawiinninna dirijjitesiwiinni ‘badantino.’ (Ibi. 3:12-14) Insa soqqamaasinchu Pheexiroosi gede Yesuusa addaxxite ammanansa huꞌnitukki heedhoommero ma danchi baino! Wolu manni Yesuusa agure haꞌri yannara Yesuusi soqqamaanosino haꞌra hasidhannoro xaꞌminsata Pheexiroosi bayichonko togo yiino: “Mootichaꞌya, ayenkewa haꞌneemmo? Atera hegere heeshsho qaali noohe.”—Yoh. 6:67-69.

⁶ Mitootu halaalu mininni fultinohu sunu sununniiti; tini insa uminsara leeltinonsakkiha ikkara dandaanno. Halaalu mininni sunu sununni badheeganno manchi lagu qaccenni sunu sununni xeertidhanno yowolo gedeeti. Qullaawu Maxaafi togoo ikkito ‘shalaqate’ yaanno. (Ibi. 2:1) Halaalu mininni afanni heeꞌre xeertiꞌranna hendikkinni shalaqa babbaxxinoreeti. Ikkollana hedikkinni halaalu mininni fongogino manchirano Yihowa ledo noosi jaaloomi baꞌꞌara dandaanno. Ninkera togoori iillannonkekki gede qoropha dandiineemmohu hiittoonniiti?

HALAALE HUꞌNINEEMMOKKI GEDE QOROPHA DANDIINEEMMOHU HIITTOONNIITI?

7. Halaale huꞌnineemmokki gede mayi kaaꞌlannonke?

⁷ Halaalu giddo millisate, Yihowa kulannonkere baala macciishshanna hajajama hasiissannonke. Heeshshonke giddo balaxisiisa hasiissannonkere balaxisiisanna Qullaawu Maxaafihu xintu seeri garinni heeꞌra hasiissannonke. Moote Daawiti Yihowa huucciꞌranni “halaalikkinni qaafeemmo” yiino. (Far. 86:11) Daawiti halaalunni heeꞌrate murciꞌrino. Ninkeno isinte gede Maganu halaali giddo millisate murciꞌra hasiissannonke. Hatto assa hoongummoro, halaaleho yine facci assine agurroommo coyibba heda hananfammoranna kuri coyibba wirro afiꞌrate woꞌnaallammora dandiineemmo. Ikkollana woꞌmanka halaale seekkine cuꞌmira hasiissannonke. Mito halaale harunsinanni mito agura didandiineemmo. Qoleno ‘halaalu baalunku’ garinni millisa hasiissannonke. (Yoh. 16:13) Konninni aanchine halaaleho yine agurroommota onte coyibba hiincineemmo. Hatto assanke agurre dangoommo coyiwa higa hoogate murciꞌnoommo gedeenni heeꞌrate kaaꞌlitannonke.—Mat. 6:19.

8. Yanna hayyotenni horoonsiꞌra hooga mittu Kiristaanchi halaaluwiinni xeertiꞌranno gede assitara dandiitannohu hiittoonniiti? Lawishsha kuli.

⁸ Yanna. Halaalu mininni xeertiꞌneemmokki gede, yannanke garunni horoonsiꞌra hasiissannonke. Qoropha hoongummoro boohaarshunni, interneete fanfannanni woy televizhiine laꞌnanni lowo yanna guxxinammora dandiineemmo. Kuri coyibba assa soꞌro ikka hooggurono, hojju xiinxallo assiꞌratenna wole ayyaanaamittete coye assate gaaꞌminoommo yanna moorantara dandiitanno. Hanni Eemaa yinanni rodoora iillinosere laꞌno. Eema anjesenni kayisse farado baxxanno. Ise tunceenya afidhanno yanna baalantera farado guluffanno. Ikkollana ise gedensoonni konne assitanni lowo yanna guddanno daafira gaabba hanaffino. Konnira ise boohaarsha balaxisiisa agurtino. Qoleno alba faradu qolchansho qolchantannote Koorii Welsi yinanni rodoo woꞌnaalshino kaaꞌlinose.b Eema xa roore yanna sayissannohu Yihowara soqqantanniiti; hattono ammanate roduuwisenna jaallase ledo yanna sayissanno. Ise xa albinni roore Yihowawa shiqqino; hattono yannase hayyotenni horoonsidhanni noota affino daafira hagiirraamete.

9. Mittu manchira maalaamittete coyira noosi baxilli, ayyaanaamittete coye dulli assanno gede assasira dandaannohu hiittoonniiti?

⁹ Maalaamittete coye. Halaalu mine heeꞌra hasiꞌnummoro, maalaamittete coye balaxisiisa dihasiissannonke. Halaale ronsummo yannara, Yihowara soqqama maalaamittete coye roortannota huwantoommo. Qoleno halaalu giddo millisate maalaamittete coye hagiirrunni facci assine agurroommo. Ikkollana galle honse wolootu yannate dayino uduunnicho hidhitanna woy wole maalaamittete qiniite afidhinota laꞌnammora dandiineemmo. Hatte yannara gate bainori noonkeha lawankera dandaanno. Noonkerinni kassi yaa agurre, ayyaanaamittete coye dulli assine maalaamittete coye gamba assiꞌrate kabbi facci yaa hananfammora dandiineemmo. Deemaasi yinanni rosaanchino hatto assino. Isi “tenne gobba baxe” soqqamaasinchu Phaawuloosi ledo soqqama agurino. (2 Xim. 4:10) Deemaasi Phaawuloosi agure haꞌrinohu mayiraati? Isi hatto assinohu ayyaanamittete coyinni roorse maalaamitte qiniite hasiꞌrino daafiraati ikka? Woy Phaawuloosi ledo soqqamate yee malaamittete injo agura hasiꞌrinokkihuraati ikka? Qullaawu Maxaafi tenne daafira kulannori dino. Ninkeno qoropha hoongummoro maalaamittete coyira noonke baxilli lexxe halaaleho noonke baxille hunara dandaanno.

10. Halaalu giddo heeꞌrate, maa qoropha hasiissannonke?

¹⁰ Mannu ledo aante. Halaalu giddo qaanfanni heeꞌrate, Yihowara soqqamannokki manni hunannonkekki gede qoropha hasiissannonke. Umo halaale ronsummo yannara, Yihowa Farciꞌraasine ikkitinokki jaallankenna maatenke ledo noonke aante biddi assiꞌnoommo. Insa giddo mitootu ammananke ayirrissannoha, wolootu kayinni gibbannoha ikkara dandaanno. (1 Phe. 4:4) Maatenke miilla ayirrinseemmohanna shaqqille leellinsheemmonsaha ikkirono, insa hagiirsiisate yine Yihowa seera diingeemmokki gede qoropha hasiissannonke. Umi Qorontoosi 15:33te noo qorowishshi leellishanno garinni, muli jaalooma kalaqiꞌra hasiissannonkehu Yihowa baxanno manni ledo callaati.

11. Qullaawu Maxaafi ledo sumuu yaannokki assootiwiinni xeertiꞌra dandiineemmohu hiittoonniiti?

¹¹ Maganu giwanno assootenna hedo. Halaalunni qaaffannori baalu qullaawoota ikka hasiissannonsa. (Isa. 35:8; 1 Pheexiroosi 1:14-16 nabbawi.) Halaalu minira dangummo woyite, Qullaawu Maxaafiha xalala seera harunsate yine heeshshonke giddo mito coye biddi assiꞌnoommo. Ninke giddo mitootu isinni lowo coye biddi assiꞌra hasiissinonsa. Ikkihano ikkiro, qullaawa heeshsho heeꞌra agurre, maaeela heeshshowa hingeemmokki gede qoropha hasiissannonke. Togoori iillannonkekki gede qoropha dandiineemmohu hiittoonniiti? Yihowa qullaawa heeshsho heeꞌneemmo gede maa uyinonkero hedi. Isi muxxe Beettosi Yesuusa kakkalo asse uyinonke. (1 Phe. 1:18, 19) Yihowa albaanni qullaawoota ikkine heeꞌrate, Yesuusiti wodote kakkalo mageeshshi geeshsha muxxe ikkitinoro woꞌmante yannara heda hasiissannonke.

12, 13. (a) Ayyaanna Yihowa laꞌꞌanno garinni laꞌꞌa hasiissannonkehu mayiraati? (b) Konninni aanchine maa xiinxallineemmo?

¹² Magano hagiirsiisannokki rosichonna assoote. Maatenke miilla, ledonke loossannori woy rossannori ayyaanna ledonsa ayirrinseemmo gede koyissankera dandiitanno. Yihowa hagiirsiisannokki rosichonna ayyaanna ayirrinseemmo gede xixxiimbanninke yannara qeelammeemmokki gede mayi kaaꞌlannonke? Kuri ayyaanna Yihowa hagiirsiissannokkihu mayiraatiro woꞌmante yannara heda tennera kaaꞌlitannonke. Mite ayyaanna ayirrisa hananfoonni gara borronke giddo xiinxalla dandaatto. Kuri ayyaanna ayirrisa hasiissannonkekkihu mayiraatiro Qullaawu Maxaafinni buunxummoro, “Mooticha hagiirsiisanno” garinni heeꞌra dandiineemmo. (Efe. 5:10) Yihowanna Qaalesi addaxxanke, ‘manna waajjineemmokki’ gede kaaꞌlitannonke.—Law. 29:25.

¹³ Halaalunni heeꞌra hegere geeshsha assineemmoreeti. Halaalu giddo millisate murciꞌnoommo gedeenni heeꞌra dandiineemmohu hiittoonniiti? Hanni tennera kaaꞌlannonkeha sase coye laꞌno.

HALAALUNNI QAAFATE MURCIꞌRI

14. (a) Agurrummokkinni halaale hasiꞌranke, halaale huꞌnineemmokki gede kaaꞌlitannonkehu hiittoonniiti? (b) Hayyo, seejjonna wodancha kaaꞌlitannonkehu hiittoonniiti?

¹⁴ Umihunni, Maganu Qaali giddo nooha muxxe halaale xiinxallanna hiinca agurtooti. Qullaawu Maxaafi halaale ganyite sagaꞌlakki halaale hirte hunattokki gede kaaꞌlitannohe. Hatto assakki halaale albinni roore naadattonna huꞌnattokki gede qorophate kaaꞌlitannohe. Lawishsha 23:23, halaale calla ikkikkinni “egenno [woy, hayyo] afanna wodanchano” hidhineemmo woy afiꞌneemmo gede kultannonke. Egenno afiꞌra calla tirtannori dino. Tenne egenno heeshshonke giddo loosunni leellisha hasiissannonke. Wodancha, ronsoommore konni albaanni anfoommori ledo xaadinse hedate kaaꞌlitannonke. Hayyo ronsoommore loosunni leellinsheemmo gede kakkayissannonke. Mito woyite halaalu heeshshonke giddo biddi assiꞌra hasiissannonkere kule seejjannonke. Konnira tenne seejjo bayichonko harunsa hasiissannonke. Qullaawu Maxaafi seejjannonke seejjo birra roorete.—Law. 8:10.

15. Halaalu qawatto agarooshshe ikkitannonkehu hiittoonniiti?

¹⁵ Layinkihunni, barru baala rosootto halaali ledo sumuu yite heeꞌrate murciꞌri. Hallikkira halaale sinnaaru woy qawattote gede assite qodhi. (Efe. 6:14) Hunda olamaasine qodhitanno qawatto diinu hallonsanna wole giddoyidita bisinsa kifilla gawajjannokki gede kaaꞌlitannonsa. Ikkollana mittu olamaanchi qawatto agarooshshe ikkitasira hasiꞌriro duure usudha hasiissannosi. Shabbi calla assinoonni qawatto kaaꞌlitannori dino. Halaalu qawattote gede agarooshshe ikkannonkehu hiittoonniiti? Qullaawu Maxaafi halaale woꞌmante yannara mulinkenni fafisiꞌneemmokkiha ikkiro, gara ikkitinokki hedowiinni xeertiꞌneemmonna dancha doorsha doodhineemmo gede kaaꞌlannonke. Fonqolu iillannonke woyite, Qullaawu Maxaafi halaali gara ikkinore assineemmo gede xixxiiwannonke. Mittu olamaanchi qawatto qodhikki olaho haꞌrannokkinte gede, ninkeno woꞌmante yannara Qullaawu Maxaafi halaale heeshshonke giddo harunsa hasiissannonke. Qawatto olamaasine bise suxxitanno gedeno kaaꞌlitannonsa. Hanni ninkeno hatto assa dandiineemmo gara laꞌno.

16. Wolootaho halaale rosiisa halaalu giddo millinsanni heeꞌrate kaaꞌlitannonkehu hiittoonniiti?

¹⁶ Sayikkihunni, dandiitto deerrinni wolootaho Qullaawu Maxaafi halaale rosiisi. Hatto assakki ayyaanaamittete bise ikkinoha “Maganu qaale” seekkite cuꞌmirate kaaꞌlitannohe. (Efe. 6:17) Ninke baalunku “halaalu qaale taashshine coyiꞌrate” yaano rosiisate dandoonke woyyeessiꞌrate sharrama dandiineemmo. (2 Xim. 2:15) Qullaawa Maxaafa horoonsiꞌne wolootaho halaale rosiinseemmo woyite halaale albinni roore huwanteemmo hattono banxeemmo. Konni garinni halaalu giddo qaanfanni heeꞌra dandiineemmo.

17. Halaale muxxe jiro gede assite laꞌꞌattohu mayiraati?

¹⁷ Halaalu Yihowa uyinonkete muxxe eltooti. Kuni halaali, iimi Anninke ledo jaalooma kalaqiꞌneemmo gede assinonke. Heeshshonke giddo kawiinni saꞌino jiro dino! Yihowa konni kaꞌa rosiisannonkehu lowo coyi no! Isi hegere geeshsha rosiiseemmoꞌne yee qaale eino. Konni daafira halaale fila culkanni roorsite lai. Halaale “afiꞌri ikkinnina huꞌnitooti.” Hatto ikkiro Daawiti gede Yihowara “Halaalikkinni qaafeemmo” yaa dandaatto.—Far. 86:11.