Yesuusi Kiristoosi Qaale Eꞌnoonni Mesihichchaati

MAGANU YIHOWA Mesihichcha bande anfeemmo gede kaaꞌlate, batinynye Qullaawu Maxaafi masaalaano qaale eꞌnoonni Gatisaanchi ilamanno gara, soqqanshosirenna reyosi gara qullaawu ayyaaninni xawisse borreessitanno gede assino. Tini Qullaawu Maxaafi masaalo baala Yesuusi Kiristoosi aana woꞌmitino. Tini masaalo mittore mommodditukki mitte mittenti woꞌmitino. Lawishshaho, hanni Mesihichchu ilamarenna anjesi yannare masaalloonni masaalo laꞌno.

Masaalaanchu Isayyaasi Mesihichchu Nugusu Daawiti gaꞌrenni daannota masaalino. (Isayyaasi 9:7) Masaalloonninte gede Yesuusi ilaminohu Daawiti gaꞌrenniiti.—Maatewoosi 1:1, 6-17.

Mikiyaasi yinannihu wolu masaalaanchi, kuni qaaqqi “Beeteleemete Efiraataho” ilamannotanna yannate gedensaanni gashshaancho ikkannota ilamannota masaalino. (Mikiyaasi 5:2) Yesuusi ilami yannara Isiraeelete Beeteleemete yinannihu lamu katami no. Mittu katami aliyyeenni hige Naazireetete mule, wolu kayinni Yihudaho Yerusaalamete mule no. Yerusaalamete mule nooha Beeteleemete katama hunda Efiraataho yinanni. Masaalloonninte gede, Yesuusi ilaminohu hakko katamira Efiraatahooti!—Maatewoosi 2:1.

Wole Qullaawu Maxaafi masaalo, Maganu Beetto “Gibitsetenni” woshshinannita umo assite kultino. Yesuusa anje heeꞌreenna Gibitse massinoonni. Heroodiisi reyihu gedensaanni Yesuusa Gibitsetenni abbinoonni daafira tini masaalono woꞌmitino.—Hosei 11:1; Maatewoosi 2:15.

Qoola 200 aana noo sanxarazhera “Masaalo” yaanno qaali hunda noo xiqissa Mesihichchunnire kultanno masaalo amaddino. Tenne masaalo, “Gumulo” yaanno qaali hunda noo xiqissa ledo heewisiisse lai. Tenne assakki Maganu Qaali halaale ikkinota roore ammanatto gede assitannohe.

Tenne xiqissa xiinxallatto wote tini masaalo borreessantinohu Yesuusi ilamara seedu diri albaanni ikkinota huwati. Yesuusi togo yiino: ‘Muse seeri giddo, Himanaanotenna Faarsote [maxaaffara] anere borreessinoonnihu baalu woꞌma noosi.’ (Luqaasi 24:44) Qullaawu Maxaafi xawisannonte gede masaalloonnihu mittu mittunku coyi woꞌmino!