Maganu Mangiste Gashshitanni No!

1. Huluullammeemmokki coyi maati? Mayira?

ALAMETE aana ikkanni noore laꞌꞌatto woyite albillitte dancha yanna daggannota ammana qarra ikkitannohe? Maatete giddo noo baxilli baꞌꞌanni haꞌrino. Mannu albinni roore finqila, umosi calla baxannohanna hanqaaleessa ikkino. Batinyu mannira silxaane noonsare addaxxa qarra ikkitinonsa. Ikkollana tini ikkito dancha yanna daggannota addaxxatto gede assitannohe. Mayira? Korkaatuno mannu ikkito, “goofimarchu barra” ikkanno yine masaalotenni kulloonniri woꞌmanni noota leellishshanno. (2 Xim. 3:1-5) Tini masaalo woꞌmase Kiristoosi Yesuusi Maganu Mangiste Moote ikke gashsha hanafinota leellishshanno tajeeti; suwashshu wodani noosihu aye manchino tenne kaada didandaanno. Kayinni Maganu Mangiste daafira kultannote batinye masaalo giddo tini mittetella. Muli yanna giddo woꞌmitinota wole masaalono xiinxallanke ammananke kaajjishshanno.

2. Konni birxichira maa xiinxallineemmo? Mayira?

² Konni birxichira aane noore xiinxallineemmo: (1) Maganu Mangiste xintantinohu mamooteetiro afate kaaꞌlitannonke masaalo, (2) Yesuusi iima Maganu Mangiste Moote ikke gashshanni noota huwatate kaaꞌlitannonke masaalonna (3) Maganu diinna baꞌannohu hiittoonniitiro kultanno masaalo. Uduunne gowanno manchi addi addi hocco gamba asse mitte uddano gowannonte gede, aanchine xiinxallineemmoti addi addi masaalono gamba yite Yihowa yiinori woꞌmanni noo yanna giddo heeꞌnoommota leellishshannonke.

MAGANU MANGISTE XINTANTINOHU MAMOOTEETIRO ANFEEMMOHU HIITTOONNIITI?

3. Daanieeli 7:13, 14 noo masaalo Maganu Mangiste Moote daafira maa buuxissannonke?

³ Daanieeli 7:13, 14 noo masaalo Kiristoosi Yesuusi Maganu Mangiste Gashshaancho ikkate malinoha ikkinota buuxissannonke. Isira addi addi gobba manni hagiirrunni “soqqamannosi” hattono iso riqiwannohu wolu Gashshaanchi diheeꞌranno. Daanieeli maxaafi giddo nooti wole masaalo Yesuusi moohannohu masaalotenni kulloonnihu lamalu diri jeefora ikkinota kultanno. Yesuusi moote ikkinohu mamooteetiro afa dandiinanni?

4. Daanieeli 4:10-17 noo masaalo Kiristoosi Moote ikkino diro afate kaaꞌlitannonkehu hiittoonniitiro xawisi. (Lekkaalliidi qaagiishshano lai.)

⁴ Daanieeli 4:10-17 nabbawi. “Lamalu diri” 2,520 dirooti. Kuni diri hanafinohu 607 K.A. Baabiloonootu Yerusaalamete Yihowa zuufaanera ofolle nooha jeefote moote qeeltu woyiteeti. Kuni diri goofinohu 1914 M.D. Yihowa ‘doorinohu’ Yesuusi Maganu Mangiste Moote ikki woyiteeti.b—Hiz. 21:25-27.

5. “Lamalu diri” daafira kultanno masaalo huwatanke kaaꞌlitannonkehu hiittoonniiti?

⁵ Tini masaalo kaaꞌlitannonkehu hiittoonniiti? “Lamalu diri” daafira kultanno masaalo huwatanke Yihowa eino qaale hirqino yannara wonshannota addaxxineemmo gede assitannonke. Yihowa hirqino yannara Mangistesi xintantanno gede assinte gede, wole baala masaalono hirqino yannara woꞌmitanno gede assanno. Ee, Yihowa barri ‘dikeeshshanno.’—Imb. 2:3.

KIRISTOOSI MAGANU MANGISTE MOOTE IKKE GASHSHANNI NOOTA HUWANTEEMMOHU HIITTOONNIITI?

6. (a) Kiristoosi iima gashshe noota leellishshanno taje maati? (b) Yohaannisi Ajuuja 6:2-8 noo masaalo tenne taje buuxissannohu hiittoonniiti?

⁶ Yesuusi uullate aani soqqansho jeefisara kae heeꞌre, harunsaanosi isi iima gashsha hanafinota affanno gede kaaꞌlannonsaha mito alamete aana ikkanno coye kulinonsa. Isi kulino coyi giddo gamu olaho, hudetenna baattote huxanooti. Qoleno isi, “addi addi darga” taraabbe guddanno fayya woy dhibbi daannota masaalino; lawishshaho muli yanna giddo ubbinoti Koroonu fayya tenne leellishshanno. Kuni ikkanni noo coyi Qullaawu Maxaafi kulannonte gede, Kiristoosi gashshanni noota leellishanno ‘malaati’ widooti. (Mat. 24:3, 7; Luq. 21:7, 10, 11) Yesuusi reye reyotenni kae iimira haꞌrihunni 60 diro saꞌanno yanna gedensaanni, soqqamaasinchu Yohaannisira kuni coyi ikkannota lede ajuujatenni buuxisinosi. (Yohaannisi Ajuuja 6:2-8 nabbawi.) Yesuusi 1914nni iima moohi yannanni kayise kuni coyi baalu woꞌma hanafino.

7. Yesuusi gashsha hanafi kawa uullate qarru batiꞌrinohu mayiraati?

⁷ Yesuusi gashsha hanafita alamete ikkito bushshanni hadhinohu mayiraati? Yohaannisi Ajuuja 6:2 Yesuusi Moote ikkanni heeꞌrenni olama hanafinota kultanno. Isi olama hanafinohu ayeoo ledooti? Daawuloosinna agaanintesi ledooti. Yohaannisi Ajuuja 12 kultannonte gede, Sheexaanu olaho qeelamino; hattono isonna agaaninte uullara tungoonni. Hakko daafira Sheexaanu lowo geeshsha hanqe mannu ooso siꞌꞌino daafira ‘baattote aanneꞌe’ yinanni gede assino.—Aju. 12:7-12.

8. Maganu Mangiste daafira kulloonni masaalo woꞌmitanni noota laꞌꞌanke kaaꞌlitannonkehu hiittoonniiti?

⁸ Tini masaalo kaaꞌlitannonkehu hiittoonniiti? Alamete ikkitonna mannu akati soorrama Yesuusi Moote ikkinota huwanteemmo gede assitannonke. Hakko daafira mannu umonsa calla baxannohanna mararro nookkiha ikkinota laꞌneemmo woyite hexxo mudhantenni, insa ikkito Qullaawu Maxaafi masaalo woꞌmitanno gede assitanni noota qaangeemmo. Maganu Mangiste gashshitanni no! (Far. 37:1) Armagedooni gambisi kiiro alamete qarri lexxanni haꞌrannota anfoommo. (Maq. 13:8; 2 Xim. 3:13) Baxillaanchu iimi Anninke alamete aana qarru batiꞌrinohu mayiraatiro huwanteemmo gede kaaꞌlinonkehura galanteemmosi.

MAGANU MANGISTE DIINNA BAꞌANNOHU HIITTOONNIITI?

9. Daanieeli 2:28, 31-35 noo masaalo jeefonniha alamenniha wolqaataamo gashshoote xawissannohu hiittoonniiti? Kuni gashshooti gashsha hanafinohu mamooteeti?

⁹ Daanieeli 2:28, 31-35 nabbawi. Tini masaalo woꞌmitanna laꞌnanni heeꞌnoommo. Naabukadanatsoori haaqiiꞌrino haaqee ‘kunni kaꞌa’ ikkannore yaano Kiristoosi gashsha hanafihu gedensaanni ikkannore leellishshanno. Yesuusite uulla diinna giddo mittu jeefonniho wolqaataamo alamete gashshooteeti; konne gashshoote Qullaawu Maxaafi giddo ‘siwiilunninna dorunni seekkinoonni misile lekkanni’ lawinsoonni. Kuni alamennihu wolqaataamu gashshooti xa gashshe no. Kuni gashshooti xintaminohu umihu alamete oli yannara Biritaaniyunna Yunayitidi Isteetise buusante Angilo Ameerika ikkitu yannaraati. Naabukadanatsoori haaqeetenni laino misile leellishshannonte gede, kuni alamennihu wolqaataamu gashshooti hakkuyira albaanni noo gashshootinni baxxannota leellishannohu ajayi ajeenna lamu coyi no.

10. (a) Xaa yannara laꞌnanni heeꞌnoommonte gede Daanieeli masaalo Angilo Ameeriku daafira balaxxe kultinori maati? (b) Maa assineemmokki gede qoropha hasiissannonke? (“Gawajjannore Wodanchitinoonni?” yitanno saaxine lai.)

¹⁰ Umihunni, ajuujatenni kulloonniha hakkuyira albaanni gashshinoha alamenniha wolqaataamo gashshoote culkunninna birrunni lawinsoonni; Angilo Ameerika kayinni siwiilunninna dorunni lawinsoonni. Doru “mannu sircho” riqiwanno. (Dan. 2:43, NW lekkaalliidi qaagiishsha.) Xaa yannara laꞌnanni heeꞌnoommonte gede, gashshaasine doorranni woyite tunganni mirci, dagoomu qoosso agarsiisate assinanni zamachi, mannu salfe fulanna loosaasinete qoosso agarsiissanno dirijjitta assitannori, alamennihu wolqaataamu gashshooti hedinore assate wolqa hooganno gede assitino.

11. Xaa yannara gashshe noohu alamennihu wolqaataamu gashshooti Angilo Ameerika ikkasi, heeꞌnoommoti goofimarchu yanna ikkase albinni roore ammanneemmo gede assitannonkehu hiittoonniiti?

¹¹ Layinkihunni, Qullaawu Maxaafi giddo jawa misile lekkanni lawinsoonnihu Angilo Ameeriku jeefonniha wolqaataamo alamete gashshoote ikkinota kulloonni. Konne gashshoote riqiwannohu wolu mannu gashshooti diheeꞌranno. Hatteentenni Maganu Mangiste Armagedooni oli yannara konne gashshooteno ikko wole gashshoote baala huntanno.c—Aju. 16:13, 14, 16; 19:19, 20.

12. Daanieeli masaalo sheshonna hexxo afiꞌneemmo gede assitannota hiittee taje ledde kultannonke?

¹² Tini masaalo kaaꞌlitannonkehu hiittoonniiti? Daanieeli masaalo heeꞌnoommohu goofimarchu yanna giddo ikkinota leellishshannota wole tajeno kultannonke. Daanieeli 2,500 diro saꞌanno yannara albaanni, Baabiloonete gashshooti gedensaanni heeꞌrannohu shoolu alamennihu wolqaataamu gashshooti Maganu manni heeꞌrannowa gashshannotanna insa xiiwannota masaalino. Hakkiino sae isi, insa giddo Angilo Ameeriku jeefonniha wolqaataamo alamete gashshoote ikkannota xawisino. Tini sheshifanteemmo gedenna Maganu Mangiste muli yanna giddo mannu gashshoote baala hunte uulla woꞌma gashshitannota hexxineemmo gede assitannonke.—Dan. 2:44.

13. Yohaannisi Ajuuja 17:9-12 kulloonnihu ‘settikki mootenna’ ‘tonne mootoolla’ marichi lawishshaati? Tini masaalo woꞌmitinohu hiittoonniiti?

¹³ Yohaannisi Ajuuja 17:9-12 nabbawi. Umihu Alamete Oli daafinori goofimarchu barri daafira kultannoti wole Qullaawu Maxaafi giddo kulloonni masaalo woꞌmitanno gede assino. Alamenniti poletiku massagaano alamete keeru heeꞌranno gede assa hasidhino. Hakko daafira insa Arfaasa 1920nni Qaalu Gondoori Maamara yinanni dirijjite xintitino; tenne dirijjite gedensoonni, Birra 1945nni Buusantino Mangistubba dirijjittanni riqimboonni. Tenne dirijjite ‘settikki moote’ yinoonni. Kayinni tini dirijjite alamenniha wolqaataamo gashshoote diꞌꞌikkitino. Tini dirijjite wolqa afidhannohu addi addihu poletiku gashshooti kaaꞌlannose daafira callaati. Qullaawu Maxaafi konne poletiku gashshoote ‘tonne mootoolla’ yaanno.

14-15. (a) Yohaannisi Ajuuja 17:3-5 Bayira Baabiloone daafira kultannori maati? (b) Bayira Baabiloonera kaaꞌlamanno manni hiikkanni no?

¹⁴ Yohaannisi Ajuuja 17:3-5 nabbawi. Soqqamaasinchu Yohaannisi Qullaawu ayyaani massageennasi ajuujatenni foora mancho yaano Bayira Baabiloone laino; ise alamete doyichota kaphu ammaꞌno baala riqibbannote. Isi laino coyi woꞌminohu hiittoonniiti? Kaphu ammaꞌno dirijjitta lowo diro poletiku gashshaano ledo buusante loossanni keeshshitino; hattono insara kaaꞌlantino. Kayinni mulenni Yihowa poletiku gashshaano ‘hedosi wonshitanno gede’ hedosi wodaninsa giddo woranno. Hakkiinni mayi ikkannoyya? Kuri poletiku gashshaano yaano ‘tonne mootoolla’ kaphu ammaꞌno dirijjitta siꞌanno, hattono huntanno.—Aju. 17:1, 2, 16, 17.

¹⁵ Bayira Baabiloone bao gambissinota afa dandiineemmohu hiittoonniiti? Tenne xaꞌmora dawaro afiꞌrate, hundihu Baabiloonete katamira gamu ragira bayiriidihu Efiraaxisi Lagi agarooshshe ikkinota qaaga kaaꞌlitannonke. Ajuujate maxaafi Bayira Baabiloonera kaaꞌlamannoha lowo miliyoone ikkanno manna agarooshshu gede ikkanno ‘wayi’ ledo hewisiisanno. (Aju. 17:15) Ikkirono Ajuujate maxaafi, wayi ‘xoe baꞌꞌannota’ kulanno; tini alamete doyichora nooti kaphu ammaꞌno kaaꞌlamannoseha batinye manna hooggannota leellishshanno. (Aju. 16:12) Xaa yannara tini masaalo woꞌmitanni no; batinyu manni kaphu ammaꞌno agure xaꞌmuwansara dawaro woluwiinni hasiꞌra hanafino.

16. Buusantino Mangistubba xintantannotanna Bayira Baabiloone baꞌannota kultanno masaalo huwatanke kaaꞌlitannonkehu hiittoonniiti?

¹⁶ Tini masaalo kaaꞌlitannonkehu hiittoonniiti? Buusantino mangistubba xintamasenna kaphu ammaꞌnora kaaꞌlamanno manni ajanni haꞌrasi heeꞌnoommohu goofimarchu barruwa giddo ikkinota leellishshannote wole tajeeti. Kaphu ammaꞌno dirijjitta baꞌannohu wayinni lawinsoonnihu Bayira Baabiloonera kaaꞌlamanno manni ajanni haꞌrino daafiraati yaa diꞌꞌikkino. Aleenni laꞌnummonte gede Yihowa ‘hedosi wonshitanno gede’ ‘tonne mootoollara’ yaano Buusantino Mangistubbara kaaꞌlantannori poletiku gashshaano wodanira, hedosi woranno. Buusantino Mangistubba kaphu ammaꞌno hedeweelcho huntanno daafira alamete noo manni dhagge assiꞌranno.d (Aju. 18:8-10) Bayira Baabiloone bao alame hembeelantanno gedenna lowo qarri heeꞌranno gede assitara dandiitanno; kayinni Maganu manni hagiidhanno gede assannohu ajayi ajeenna lamu korkaati no. Lowo diro Maganu Yihowa diina ikkite keeshshitinoti Bayira Baabiloone hegerera baꞌanno; hattono tini busha alame baꞌeenna mulenni fooliishshiꞌnammoraati!—Luq. 21:28.

ALBILLITTE YIHOWA MANNASI AGARANNOTA ADDAXXE

17-18. (a) Woꞌmanka woyite ammananke kaajjishiꞌra dandiineemmohu hiittoonniiti? (b) Aananno birxichira maa xiinxallineemmo?

¹⁷ Daanieeli halaalu “egenno” batidhannota masaalino. Addanko batidhino! Yannanke daafira kultanno masaalo seekkine huwantoommo. (Dan. 12:4, 9, 10) Tini masaalo woꞌmase Yihowanna Qaalesi albinni roore ayirrinseemmo gede assitannonke. (Isa. 46:10; 55:11) Hakko daafira woꞌmanka woyite Qullaawa Borro diinaggaabbine xiinxallitinenna wolootu Yihowa ledo jaalooma kalaqidhanno gede kaaꞌlitine ammanaꞌne kaajjishidhe. Yihowa woꞌmunni woꞌma iso hexxitannore agarannonsa hattono “woꞌma keere [aannonsa].”—Isa. 26:3.

¹⁸ Aananno birxichira goofimarchu yannara heedhannote Kiristaanu songo daafira kultanno masaalo xiinxallineemmo. Aanchine xiinxallineemmonte gede, tini masaalono heeꞌnoommohu goofimarchu barri giddo ikkinota leellishshanno. Qoleno xa Mootenke ikke gashshanni noohu Yesuusi ammanantino harunsaanosi massaganni noota leellishshannota wole taje laꞌneemmo.