Nabbawaano Xaꞌmitanno Xaꞌmo

Yihowa Farciꞌraasine galte hasiꞌnanni webisayite horoonsiꞌra hasiissannonsa?

Yihowa adhantinori hagiirraamma ikkitaranna mimmitu ledo geedanno jaalooma kalaqidhe heedhara hasiꞌranno. (Mat. 19:4-6) Mine kalaqiꞌrate heddinoonniha ikkiro, dancha galte afiꞌra dandiitinannihu hiittoonniiti? Yihowa Kalaqaanchonke ikkino daafira, adhamanke hagiirru noota ikkitanno gede maa assa hasiissannonkero afino. Hakko daafira, isi uyinoha xintu seera harunsitinanniha ikkiro, baalunkuri seyannoꞌne. Hanni konni xintu seeri giddo mito laꞌno.

Umihunni, wodaninke daafira huwata hasiissannonkeri no; Qullaawu Maxaafi, “Mannu wodani baalunkurinni roore xagaraamoho; diinofayyannoho” yaanno. (Erm. 17:9) Mittu labbaahunna meyati adhama hasiꞌre yanna sayisanno woyite muddame mimmito lubbora baxara dandaanno; tini qolte gura qiniite layidhanni qaafa qarra ikkitannonsa gede assitara dandiitanno. Labbaahunna meyati baxillu amadinonsa daafira calla muddame adhamansa, duucha woyite qarru giddo tuggannonsa. (Law. 28:26) Hakko daafira, labbaahunna meyati mimmito seekke egennikkinni kuꞌu koꞌiira baxille leellisha woy mimmitoho qaale ea hayyo diꞌꞌikkitino.

Lawishsha 22:3 togo yitanno: “Egennaamu manchi bushare afiro maaxamanno; hawanyu kayinni eꞌꞌe qarramanno.” Galte hasiꞌnanni webisayite horoonsiꞌra mayi qarra abbitara dandiitanno? Mitootu egentinokki manchi ledo interneetete widoonni xaadde yanna sayissuhu gedensaanni, hakku manchi doginonsata affe lowo geya xissiisidhino. Qoleno yawaawulu manni tenne webisayitera kaphu akkaawunte faꞌne beebbaataammu manniwiinni woxe adhanno. Togoo coye assannohu mitu manni Yihowa Farciꞌraasine ikkinohu gede asse coyiꞌrino.

Galte hasiꞌnanni webisayite horoonsiꞌra afidhinoha wole qarrano hanni laꞌno. Mite galte hasiꞌnanni webisayite, hiikku hiikkonni ledo yanna sayisa hasiissannonsaro doorate kompiyuterete pirogiraame horoonsidhanno. Ikkollana tini hayyo kaaꞌlitannota leellishshanno taje dino. Adhama dishaaꞌꞌa coyeeti; ikkina konne shaaꞌꞌa ikkinokki coye doodhinanni woyite kompiyuterete pirogiraame ammana hayyoteni? Kompiyuterete pirogiraame Qullaawu Maxaafihu xintu seeri ledo taalantannota diꞌꞌikkitino.—Law. 1:7; 3:5-7.

Lawishsha 14:15te togo yaannohu xintu seeri no: “Gowwu manchi yinire baala adda assiꞌranno; egennaamu kayinni layiꞌranni qaafanno.” Adhamate heddannori mimmito seekke egenna hasiissannonsa. Ikkollana interneetete widoonni xaandoonni mancho seekke egenna qarra ikkitara dandiitanno. Interneetete widoonni kuꞌu koꞌii daafira affinoonniha woy mimmitu ledo lowo yanna hasaabbinoonniha ikkiro nafa, hakko mancho seekkitine egentinoonni yaa dandiinanni? Mitootu interneetete widoonni dancha baxillaancho afidhinoha lawinsarono, xaaddanno woyite kayi heddinohu gedeeha ikkinokki daafira lowo geya massino.

Faarsaasinchu togo yiino: “Kaphaanote songo disongeemmo; lawisiisaanote ledo dihoseemmo.” (Far. 26:4) Mitootu mannu baxansara yite, interneetete aana insaneeti daafira kapho ikkinore borreessitanno; insa togoore assa rosaminoreeti yite heddanno. Insa busha akatansa maaxxara woy interneetete widoonni hasaabbanno woyite tenne anfanninsakki gede assate woꞌnaaltara dandiitanno. Mitu manni ninke Yihowa Farciꞌraasineeti yaara dandaanno; kayi insa cuuante addanka Yihowa Farciꞌraasine ikkitinoreeti? Insa Yihowa baxxannoreeti? Isi ledo muli jaaloomi noonsareeti? Songote giddo danchu suꞌmi noonsa? Insa dancha lawishsha ikkitannokkireeti? Woy ‘busha jaalla’ gede assine laꞌnannireeti? (1 Qor. 15:33; 2 Xim. 2:20, 21) Insa Qullaawu Maxaafihu xintu seeri garinni adhama dandiitannoreeti? Kuri coyibba buuxa hasiissanno; kayinni, adhamate hendoonni mancho seekke egenninohu wolu Yihowa Farciꞌraasinchi kaaꞌlinkekkinni hakko manchi daafira afa qarra ikkitara dandiitanno. (Law. 15:22) Mittu ammanaminohu Yihowa soqqamaanchi Yihowa Farciꞌraasincho ikkinokkihu ledo ‘maxxagamate’ heda nafa hasiissannosikkiti egennantinote.—2 Qor. 6:14; 1 Qor. 7:39.

Galte hasiꞌnanni webisayite horoonsiꞌra qarra afidhino daafira, ayirrinye afiꞌrino garinni galte hasiꞌnanniti wole addi addi doogga no. Ikkina dancha galte hasiꞌra dandiinannihu hiittoonniiti? Mitteenni xaande gamba yaa dandiinanni yannara, songote gambooshshiwa, woradu gambooshshiwa, qoqqowu gambooshshiwa, woy wole gambooshshuwawa Yihowa Farciꞌraasine mimmitu ledo egennama dandiitanno.

Mitteenni xaande gamba yaa dandiinannikki yannara lawishshaho Koroonu vayirese yannara songote gambooshshe assiꞌrate elektirooniksete uduunnicho horoonsiꞌneemmo; tenne yannara adhantinokki roduuwi ledo egennammeemmo faro afiꞌneemmo. Insa gambooshshunniwa dawaro qoltanno gara hattono ammanansa xawissanno gara laꞌꞌa dandiitinanni. (1 Xim. 6:11, 12) Qoleno songoꞌne gambooshshe assidhannohu interneetete widoonni ikkiro, gambooshshu gedensaanni Birekiawuti ruumi yinanni hayyo horoonsidhine hasaawa dandiitinanni. Interneetete widoonni roduuwu ledo gaamo gaamo ikkitine hasaabbinanni yannara, baxxinoonni rodoo woy rodii wolootu ledo hasaawanno gara laꞌꞌa dandiitinanni; tini ise woy isi hiittoohoro afate kaaꞌlitannoꞌne. (1 Phe. 3:4) Mimmito egentinanni hadhinanni woyite, mixoꞌnenna balaxisiissinanni coyi mittu garihoronna teꞌee affinanni; hattono dancha minaannanna minaama ikka dandiitinannironna teꞌee huwattinanni.

Adhantinokki roduuwi galte hasidhannohu Qullaawu Maxaafihu xintu seeri ledo sumuu yaanno garinni ikkiro, Lawishshu maxaafira noo hedo halaale ikkase huwattanno; qummeeshshu togo yaanno: “[“Dancha,” NW] galte afiꞌrinohu maasso afiꞌrino; Kaaliiqiwiinnino ayirrinye adhino.”—Law. 18:22.