Ino ty Azontsika Ianara Baka amy Fahagagà Nataoni-Jesosy Rey?

1. Tantarao hoe ino ty raha niseho tamy fahagagà voalohany nataoni-Jesosy iny.

ALAO sary an’eritseritsy ty raha niseho tamy faramparani-tao 29. Vo nanomboky ty fanompoany Jesosy tamy zay. Nandeha namonjy mariazy ta Kana any Jesosy noho Maria reniny, noho ty sisany amy mpianatsiny rey. Avaratsini-Nazareta, tanà niaviani-Jesosy ty nisy ani-tanà io. Atao raha nikarakara ani-vahiny maro niavy tao rey Maria satria namani-fianakaviani-mpivaly vao rey. Fe lafa nandeha fety iny, le nisy raha niseho mety ho nanafa-baraka ani-fianakavia iny noho mpivaly tanora rey. Nilany ty divain-drozy.b Mety nimaro marè vasa ty vahiny niavy tao. Farany namonjy ani-anakilahiny iny malaky Maria le nivola hoe: “Tsy mana divay sasy rozy.” (Jaona 2:1-3) Ino ty nataoni-Jesosy? Nanao fahagagà ie ka nanova rano ho lasa “divay soa.”​—Jaona 2:9, 10.

2-3. a) Ino, ohatsy, ty fahagagà nataoni-Jesosy? b) Ino ty soa ho azontsika lafa tsika mandiniky ani-fahagagà nataoni-Jesosy rey?

² Maro ty fahagagà nataoni-Jesosy tamy ie nanao ty fanompoany tan-tany etoy.c Nampiasa ty heriny ie mba hanampea olo an’aliny. Tamy fahagagà roe nataony rey, ohatsy, le nanome hany ho ani-lahilahy 5 000 ie, le tafara atoy nanome hany ho ani-lahilahy 4 000. Mety ho nandilatsini-27 000 ty olo nameany hany, laha ampiliry ty isakini-ampela noho ajà nanatriky teo. (Mat. 14:15-21; 15:32-38) Nitaha olo narary koa Jesosy tamy fotoa reo. (Mat. 14:14; 15:30, 31) Mba eritsereto ty hatserehani-vahoaky rey lafa nahita ani-Jesosy nanao fahagagà mba hitahà noho hanomeza hany an-drozy!

³ Maro ty raha azontsika ianara baka amy fahagagà nataoni-Jesosy rey. Amy lahatsoratsy toy ato tsika handiniky raha sisany azontsika ianara baka amy fahagagà rey. Hampatanjaky ty finoantsika raha zay. Bakeo hodinihintsika hoe akory ty azontsika anahafa ani-Jesosy satria niambany noho niferinay olo ie lafa nanao ani-fahagagà rey.

MAMPIANATSY ANTSIKA MIKASIKY ANI-JEHOVAH NOHO JESOSY

4. Mampianatsy antsika mikasiky an’ia fahagagà nataoni-Jesosy rey?

⁴ Mahavy antsika hana finoa matanjaky fahagagà nataoni-Jesosy rey, satria mampianatsy antsika raha bevata mikasiky azy noho Babany. Tsy mahatseriky raha zay satria Jehovah mihintsy ro nanome hery ani-Jesosy mba hahavitàny ani-fahagagà rey. Mivola ty Asan’ny Apostoly 10:38 hoe: “Nihosora-Ndranahary tamy fanahy masy noho nameany hery [Jesosy] ka nandeha nitety ani-faritsy iny. Le nanao soa noho nitaha ani-ze olo iaby nampijalini-Devoly ie, satria nanampy azy Ndranahary.” Tiarovo koa fa nitovy tanteraky tamy Babany ty fomba fisainani-Jesosy noho ty fihetseham-pony tamy raha iaby nivolaniny noho nataony, anatini-zay fahagagà nataony rey. (Jaona 14:9) Ndao tsika handiniky raha telo azontsika ianara baka amy fahagagà nataoni-Jesosy rey.

5. Ino ty nandrisiky ani-Jesosy hanao fahagagà? (Matio 20:30-34)

⁵ Voalohany: Tena tea antsika Jesosy noho Babany. Tamy Jesosy tan-tany etoy, le nasehony hoe tena tea olo ie ka nampiasa ty heriny mba hanampea ani-ze nijaly. Nangataky fanampea taminy, ohatsy, lahilahy roe jiky rezay ndraiky zay. (Vakio Matio 20:30-34.) Henteo fa “niferinay” an-drozy Jesosy ka nitaha an-drozy. Hita amy safà grika nadika hoe “niferinay” nampiasà eto toy fa tena nalahelo Jesosy lafa nahita ani-lahilahy reo nijaly. Tena niferinay olo Jesosy ka hita baka amy zay hoe tea olo ie. Le fitiava zay ro nanosiky azy hanome hany ani-olo mosarè rey noho hitaha ani-lahilahy boka iny. (Mat. 15:32; Mar. 1:41) Afaky matoky tsika fa tena tea antsika Jehovah, azy Ndranahary “tena miferinay” iny noho Anakilahiny iny. Malahelo mihintsy rozy lafa mahita antsika mijaly. (Lioka 1:78; 1 Pet. 5:7) Tena fa tsy linin-drozy ty hangalaky ty raha iaby mampijaly ty olombelo!

6. Namea-Ndranahary hery hanaova ino Jesosy?

⁶ Faharoe: Namea-Ndranahary hery Jesosy mba hamahà ty raha sarotsy mahazo ty olombelo. Nasehoni-Jesosy tamy fahagagà nataony rey fa vitany ty mamaha ty raha sarotsy tsy voavahantsika olombelo mihintsy. Vitany, ohatsy, ty manafaky antsika amy ota, azy fototsini-raha manahira antsika olombelo iny. Vitany koa ty manafaky ty vokatsini-raha io, anisani-zay ty arety noho ty fahafatesa. (Mat. 9:1-6; Rom. 5:12, 18, 19) Hita baka amy fahagagà nataony rey fa mahavita mitaha ty “karazan’arety iaby” ie sady mahavita mamelo ty maty. (Mat. 4:23; Jaona 11:43, 44) Mahavita mifehy ty tsioky mahery koa ie sady mahavita mandroaky fanahy raty. (Mar. 4:37-39; Lioka 8:2) Tena mampahery ty mahay hoe nameani-Jehovah hery manahaky ani-zay Anakilahiny iny!

7-8. a) Ino ty toky ananantsika baka amy fahagagà nataoni-Jesosy rey? b) Ino ty fahagagà tena fa tsy lininao amy tontolo vaovao ao?

⁷ Fahatelo: Afaky matoky tanteraky tsika fa ho tanteraky iaby ty raha soa handesini-Fanjakà-Ndranahary. Nanao fahagagà Jesosy tamy ie mbo tan-tany etoy. Hitantsika baka amy raha rey ty raha hataony amy tany toy iaby satria ie ro Mpanjakani-Fanjakà-Ndranahary. Mba eritsereto ty raha ho azontsika tsy ho ela lafa hanjaka amy tany toy iaby Jesosy. Ho salama soa tsika satria hafahiny ty arety iaby noho ty raha mampijaly ty olombelo. (Isaia 33:24; 35:5, 6; Apok. 21:3, 4) Tsy ho kerè sasy tsika na hijaly vokatsini-loza baka amy natiora. (Isaia 25:6; Mar. 4:41) Ho falifaly biby tsika hitsena ani-longontsika nimaty rey hiboaky baka “an-dolo” ao, le ho velo ndraiky. (Jaona 5:28, 29) Ino ty fahagagà tena fa tsy lininao lafa amy tontolo vaovao ao?

⁸ Lafa nanao fahagagà Jesosy, le tena niambany noho niferinay olo. Tokony hananantsika toetsy reo. Ndao tsika handiniky ohatsy roe mampiseho ani-zay, manomboky amy fitantarà mikasiky mariazy ta Kana any iny.

MAMPIANATSY ANTSIKA HIAMBANY

9. Nanino Jesosy ro nanao fahagagà tamy mariazy ta Kana tao iny? (Jaona 2:6-10)

⁹ Vakio Jaona 2:6-10. Tsy maintsy nanao raha va Jesosy lafa nilany divay tamy mariazy tao iny? Aha. Tsy misy faminania nivola hoe hanao fahagagà ty Mesia le hamboatsy divay. Fe mba eritsereto moa hoe manao mariazy iha le lany ty raha inomy ao. Mety hanao akory iha? Mety niferinay ani-fianakavia iny Jesosy, sirtò azy mpivaly vao rey ka tsy teany ho afa-baraka rozy. Zay nahavy azy nanao ani-fahagagà niresahintsika tanabo eroy iny. Nanova rano tokotokony ho 390 litra ho lasa divay tena soa ie. Nataony maro divay iny amy zay mba hisy tavela na mba ho azoni-mpivaly rey avily mba hahazoan-drozy drala. Azo antoky fa nifalifaly biby mpivaly vao rey!

10. Ino ty tsipiriany sisany mahakinto amy tantara resahini-​Jaona toko faha-​2 io? (Henteo koa sary io.)

¹⁰ Mba diniho moa ty tsipiriany sisany mahakinto amy tantara resahini-​Jaona toko faha-​2 io. Voamarikinao va fa tsy Jesosy ro nameno rano ani-sinibe vato rey? Tsy nataony ze hahavy ty olo hifantoky amy ty vatany, fa mpanompo rey ro nirahiny hameno ani-sinibe iny. (Andininy 6, 7) Lafa baka nanova ani-rano iny ho divay koa Jesosy, le tsy ie ro nangalaky tamy divay iny, le nanday azy tamy mpiandraikitsini-fanasà iny eny. Tsy zay ty nataony fa mpanompo rey ro nampanaoviny ani-zay. (Andininy 8) Tsy nangalaky tamy divay iny mihintsy Jesosy, le nitanjaky vera tamasoni-vahiny rey teo sady nirengirengy hoe: ‘Mba somary andramanonareo moa divay namboariko io!’

11. Ino ty azontsika ianara baka amy fahagagà nataoni-Jesosy iny?

¹¹ Nanao fahagagà Jesosy mba hanovà rano ho divay. Ino ty azontsika ianara baka amy fahagagà iny? Mampianatsy antsika hiambany raha iny. Tsy nizesta Jesosy lafa nanao ani-fahagagà iny. Tsy nampizesta azy mihintsy ty raha nivitany. Tsy zay ty nataony fa niambany ie ka Babany raiky avao ro nameany voninahitsy. (Jaona 5:19, 30; 8:28) Laha manahaky ani-Jesosy tsika ka miambany avao, le tsy hirengirengy lafa misy raha vitantsika. Tombontsoa bevata ty hoe manompo a Ndranahary, ka mirengirengy tsika lafa mahavita raha ho azy. Fe tsy tokony handrengy vata tsika. (Jer. 9:23, 24) Ie raiky avao ro tokony hameantsika voninahitsy sady maeva azy raha zay. Sady ho nahavita ino moa tsika laha tsy nampeani-Jehovah!​—1 Kor. 1:26-31.

12. Akory koa ty azontsika ampisehoa hoe miambany manahaky ani-Jesosy tsika? Manomeza ohatsy.

¹² Akory koa ty azontsika ampisehoa hoe miambany manahaky ani-Jesosy tsika? Toy misy ohatsy: Misy tanora raiky mpikarakara fiangona vo sambany hanao lahateny, le misy anti-panahy raiky amy zay manoka fotoa maro mba hanampea azy hanoma ani-lahateniny iny. Ino ty vokany? Nisoa biby lahatenini-rahalahy iny ka nampahery ty fiangona. Lafa nivita fivoria iny le nisy olo namonjy ani-anti-panahy iny sady nivola hoe: ‘Nisoa biby aloha lahatenini-rahalahy Iano teo iny.’ Ino ty hovolanini-anti-panahy iny? Tokony hivola va ie hoe: ‘Eee, fe tsy ho nivita soa iny laha tsy nanoka fotoa maro hanampea azy aho?’ Sa tokony hiambany ie ka hanao ho zao hoe: ‘Eee, nisoa biby aloha iny. Ndre zaho koa nivaha.’ Laha miambany tsika, le tsy tokony hizesta mihintsy lafa misy raha soa nataontsika ho ahi-ty hafa. Falifaly tsika satria haintsika hoe hitani-Jehovah ty raha ataontsika sady tena lafovily aminy. (Ampitovizo amy Matio 6:2-4; Heb. 13:16) Azo antoky fa ho falifaly Jehovah laha miambany manahaky ani-Jesosy tsika.​—1 Pet. 5:6.

MAMPIANATSY ANTSIKA HIFERINAY OLO

13. Ino ty raha nihitani-Jesosy lafa ie narìny ani-Naina, le ino ty nataony? (Lioka 7:11-15)

¹³ Vakio Lioka 7:11-15. Alao sary an’eritseritsy moa raha niseho io. Vo nisasaky ty fanompoani-Jesosy tan-tany etoy tamy zay. Nandeha ta Naina amy faritsini-Galilia any Jesosy. Tsy lavitsy ani-Sonema, azy tanà namelomani-Elisa ani-anakilahini-ampela raiky zay tanà io. (2 Mpanj. 4:32-37) Lafa narìny ani-vavahadini-tanà iny Jesosy le nahita olo handeha handevy niboaky baka amy tanà io tao. Anani-ampela raiky maty valy zay nimaty io. Tena mampalahelo raha niseho io satria io avao ty anani-ampela io. Fe tsy nandeha raiky ampela io fa nisy fokonolo niaraky taminy. Nisakanani-Jesosy olo handevy rey, le nisy raha nahatseriky nataony ho ani-ampela iny. Nivelominy mpamaraky iny! Resahini-Filazantsara fa telo ty olo nivelomini-Jesosy amy maty, fe io ty voalohany.

14. Ino ty tsipiriany sisany mahakinto amy tantara resahini-​Lioka toko faha-​7 io? (Henteo koa sary io.)

¹⁴ Mba diniho moa ty tsipiriany sisany mahakinto amy tantara resahini-​Lioka toko faha-​7 io. Vasa niambinao fa “laha vo nahita” ani-ampela iny Jesosy, le “niferinay azy.” (Andininy 13) Mety nihitani-Jesosy ie mitany sady mandeha anilani-fatini-anany iny eo, ka niferinesany. Tsy hoe nahatsapa ty raha nahazo ani-ampela iny avao Jesosy, fa nasehony mihintsy hoe niferinesany ie. Nivola safà mampahery ani-ampela iny ie, le hoy ty asany: “Ka mitany sasy.” Bakeo nanao raha ie mba hanampea azy. Nivelomini-Jesosy mpamaraky iny, bakeo ‘nameany an-dreniny.’​—Andininy 14, 15.

15. Ino ty azontsika ianara baka amy fahagagà nataoni-Jesosy iny?

¹⁵ Nanao fahagagà Jesosy mba hameloma ani-anakilahini-ampela maty valy iny. Ino ty azontsika ianara baka amy fahagagà iny? Mampianatsy antsika raha iny fa mila miferinay ani-ze olo nimaty longo tsika. Mazava ho azy fa tsy afaky hamelo ty olo maty manahaky ty nataoni-Jesosy tsika. Fe afaky asehontsika hoe miferinay ani-olo rey tsika, laha miezaky mandiniky soa ty raha ilàn-drozy. Manahaky ani-Jesosy tsika laha manao ani-zay. Afaky manao raha amy zay tsika mba hampisehoa hoe ferinesantsika rozy. Afaky asehontsika amy ty raha ataontsika noho volanintsika ty raha azontsika atao mba hanampea noho hampionona an-drozy.d (Ohab. 17:17; 2 Kor. 1:3, 4; 1 Pet. 3:8) Ndre raha kelikely avao ro volanintsika noho ataontsika, le fa mampahery noho mampionona an-drozy.

16. Laha hentea sary io, ino ty ianaranao baka amy renim-pianakavia vo nimaty anaky io?

¹⁶ Diniho tantara raiky toy. Tao maro lasa zay, le nivoamarikini-ranabavy raiky zay hoe nitany renim-pianakavia tanilany teo zay, amy rozy anatini-mihira am-pivoria any iny. Miresaky mikasiky fameloma ty maty hira iny, sady vo tsiela ty nahafaty ani-anakampelany kelikely zay. Farany namonjy azy ranabavy iny, bakeo nandrakoky azy, sady niaraky nihira taminy ty tohini-hira iny. Ho zao ty raha nivolanini-renim-pianakavia iny tafara atoy: “Tsapako hoe tena tea ahy ranadahy noho rahavavy reo.” Soa avao hoasany ie fa nandeha nivory. Nivola ie hoe: “Tena manampy ty fandehana mivory amy Efitrano Fanjakà any.” Ferinesantsika olo maty longo rey satria “kivy.” (Sal. 34:18) Afaky matoky tsika fa hitani-Jehovah sady lafovily aminy ty raha ataontsika ho an’olo rey ndre kelikely aza.

MAHASOA TY MIANATSY ANI-FAHAGAGÀ REY

17. Ino ty ianarantsika baka amy fahagagà nataoni-Jesosy rey?

¹⁷ Hahay raha maro tsika laha mianatsy ani-fahagagà nataoni-Jesosy amy Baiboly ao rey. Hitantsika amy fahagagà rey fa tena tea antsika Jehovah noho Jesosy. Lasa haintsika fa mahavita mamaha ty raha manahira ty olombelo Jesosy, sady afaky matoky tsika fa kely sisa le ho tanteraky ty raha soasoa tamanintsika amy hoavy lafa manjaka amy tany toy ty Fanjakà-Ndranahary. Lafa mianatsy soa ani-tantara rey tsika le azontsika dinihy koa hoe akory ty hanahafantsika ty toetsini-Jesosy. Mbo misy fahagagà hafa koa nataoni-Jesosy. Manino laha mba manoka fotoa hianara ani-raha rey iha lafa manao fianara am-bata na Fotoam-pivavahani-Fianakavia? Henteo hoe ino ty fianara nihitanao, bakeo resaho amin’olo hafa raha zay. Azo antoky fa hahita raha maro horesahy iha laha manao ani-zay sady tena hampahery ty resadresakinareo!​—Rom. 1:11, 12.

18. Ino ty hodinihintsika amy lahatsoratsy manaraky ao?

¹⁸ Mbo namelo olo nimaty ndraiky Jesosy lafa narìny ho tampitsy ty fanompoany. Io ty fahatelo sady farany amy fahagagà nataony mikasiky fameloma ty maty. Fe tena miavaky raiky farany toy satria tena namany olo nivelominy io sady fa nimaty efatsy andro. Ino ty azontsika ianara baka amy fahagagà io? Le ino ty azontsika atao mba hahavy antsika hatòky hoe tena hovelomy vatany ty maty? Hamaly ani-fanontanea reo ty lahatsoratsy manaraky.