Miezaha Hifampahery Lafa Am-pivoria Any

1. Ino ty antony mahavy antsika mamaly teny lafa mivory?

MANINO tsika ro mivory? Ty antony bevata, satria midera ani-Jehovah tsika lafa any. (Sal. 26:12; 111:1) Mivory koa tsika amy zay afaky mifampahery amy andro sarotsy iainantsika zao. (1 Tes. 5:11) Manao ani-raha roe resahintsika reo tsika laha manome valin-teny lafa am-pivoria any.

2. Ombia tsika ro afaky mamaly teny?

² Sankerinandro, le mana tombontsoa hamaly teny tsika lafa mivory. Afaky mamaly teny, ohatsy, tsika lafa mianatsy Tilikambo Fiambena saky farani-herinandro rey. Mety hamaly teny koa tsika lafa amy fivoria andavanandro rey, ohatsy hoe amy Hanana Lafovily, Fianara Baiboly, noho amy anjara misy fiaraha-midiniky rey.

3. Manino ro mety ho sarotsy amintsika ty hamaly teny, le manino ty Hebreo 10:24, 25 ro afaky manampy antsika?

³ Samby ta hidera ani-Jehovah noho hampahery ani-mpiara-manompo amintsika reo tsika iaby. Fe mety ho sarotsy amintsika ty hamaly teny. Fa manino? Mety hatahotsy tsika na hisalasala. Mety ta hamaly teny matetiky koa tsika, fe tsy tondroani-rahalahy mitariky rey kindraiky. Akory ty hiatrehantsika ani-reo? Afaky manampy antsika hahita ty valini-zay taratasy nisoratini-apostoly Paoly ho ani-Hebreo rey. Nasongadiny fa tena vatan-draha ty hoe miaraky mivory, le nivola ie fa tokony “hifampahery” tsika. (Vakio Hebreo 10:24, 25.) Tsy de hatahotsy hamaly teny tsika laha tiarovintsika hoe afaky mampahery ty hafa tsika ndre manome valin-teny tsotra ampisehoantsika ty finoantsika. Ka manao akory laha tsy voatondro matetiky tsika? Afaky ho falifaly avao tsika satria hahazo tombontsoa hamaly teny ty olo hafa amy fiangona eo.​—1 Pet. 3:8.

4. Ino ty hevitsy bevata telo hodinihintsika amy lahatsoratsy toy ato?

⁴ Akory ty ahafahantsika mifampahery laha mivory amy fiangona kelikely tsika, ka tsy ampy ty olo mamaly teny? Ka manao akory laha mivory amy fiangona bevata tsika, ka maro biby ty mpandramby anjara amy valin-teny, akory ty ahafahantsika mifampahery? Ino ty azontsika atao mba hampahery olo ty raha volanintsika lafa tsika mamaly teny? Hodinihintsika kiraidraiky hevitsy bevata telo reo amy lahatsoratsy toy ato.

MIEZAHA HIFAMPAHERY NDRE MIVORY AMY FIANGONA KELIKELY

5. Ino ty azontsika atao mba hifampahery laha vitsivitsy avao tsika ro miaraky mivory?

⁵ Somary sahira ty rahalahy mitariky amy fiangona kelikely na antoko-mpitory rey satria tsy ampy ty olo mamaly teny. Mety voatery mandiny ie kindraiky zisiky hisian’olo hamaly teny. Mety hahakamo fivoria iny fa tsy hampahery. Ino ty azonao atao? Miezaha hananga tana matetitetiky. Laha manao ani-zay iha, le mety handrisiky ty olo hafa hazoto hamaly teny koa.

6-7. Ino ty azontsika atao mba hahavy antsika tsy hatahotahotsy lafa hamaly teny?

⁶ Ino ty azonao atao laha matahotsy na misalasala hamaly teny iha? Tsy iha raiky avao ro tratsini-zay. Fe mba hampahereza ani-rahalahy noho anabavinao reo, manino laha mba miezaky mangalaky tsikelikely ani-tahotsinao zay? Akory ty hanaovanao ani-zay?

⁷ Mety hanampy anao ty mandiniky ndraiky ani-soso-kevitsy amy Tilikambo Fiambena taloha tany rey.b Omano soa, ohatsy, raha hianara iny. (Ohab. 21:5) Ho mora aminao ty hamaly teny laha hainao soa raha ianara iny. Anovo boribory koa ty valin-teninao. (Ohab. 15:23; 17:27) Tsy hatahotahotsy iha laha manome valin-teny boribory. Laha ataonao boribory ty valin-teninao, zany hoe miresaky fehezan-teny raiky na roe avao iha, le ho mora amy rahalahinao noho anabavinao reo ty hahazo azy. Fe mifanohitsy amy zay laha lava ty valin-teninao. Laha boribory koa ty valin-teninao sady ataonao amy fivolananao, le hita hoe nanoma soa iha sady azonao soa raha ianara iny.

8. Manao akory ty fahitani-Jehovah ty ezaky mafy ataonao?

⁸ Fe manao akory laha fa norihinao ty sisany amy soso-kevitsy reo fe mbo matahotahotsy hanome valin-teny maromaro iha? Matokisa fa tena hankasitrahani-Jehovah ty ezaky mafy ataonao. (Lioka 21:1-4) Tsy mitaky raha maro amintsika Jehovah. (Fil. 4:5) Henteo hoe ino ty azonao atao, anovo raha kendrè raha iny, le mivavaha mba ho kalma avao. Azonao atao tse, ohatsy, ty manome valin-teny boribory amy voalohany.

MIEZAHA HIFAMPAHERY LAHA MIVORY AMY FIANGONA BEVATA

9. Manino ro mety ho sarotsy ty hanome valin-teny amy fiangona bevata rey?

⁹ Mety hisy raha sarotsy hafa hatrehinao laha maro mpitory amy fiangona misy anao. Mety mazoto mamaly teny, ohatsy, ty ankamaroani-rahalahy noho anabavy aminareo ao, ka mety tsy voatondro iha saky mananga tana. Manahaky ani-zay mihintsy ranabavy Danielle toy.c Tena mazoto mamaly teny ie saky mivory. Rambesiny ho fanompoa ani-Jehovah ty fanomeza valin-teny. Hitany koa hoe io ro fomba azony ampahereza ty olo hafa noho anatanjahany ty finoany mikasiky ty raha ampianarini-Baiboly. Fe lafa nifindra tamy fiangona bevata raiky zay ie, le tsy nivoatondro matetiky. Kindraiky aza le tampitsy avao fivoria iny fa tsy voatondro mihintsy ie. Hoy ty asany: “Nikivy aho. Very tombontsoa mihintsy ty fahitako ty vatako. Lafa miseho matetiky raha zay, le manomboky mieritseritsy tena hoe kinahin’olo iny ty tsy manondro an-tena.”

10. Ino ty azontsika atao mba ahafahantsika hamaly teny avao?

¹⁰ Fa nahatsapa manahaky ani-Danielle koa va iha? Laha zay ie le mety fa nanao ho zao iha hoe aleo mijanjy avao fa tsy mamaly teny. Fe ka mieny zao fa miezaha avao. Ino ty azonao atao? Mety mahasoa anao vasa ty manoma valin-teny maromaro saky mivory. Ka laha tsy voatondro iha amy voalohany, le mbo ho afaky hamaly teny avao lafa mandeha fivoria iny. Lafa manoma Tilikambo, le eritsereto hoe ino ty ifandrambesani-fehintsoratsy kiraidraiky amy lohatenini-fianara iny. Mety ho afaky hamaly teny avao iha laha manao ani-zay. Ankoatsini-zay, azonao atao koa ty manoma valin-teny amy fehintsoratsy miresaky fahamarina laliky amy Baiboly ao rey. (1 Kor. 2:10) Fa manino? Satria mety ho vitsivitsy avao ty olo hamaly teny amin’iny. Ka manao akory laha fa nanoriky ani-soso-kevitsy reo iha fe mbo tsy voatondro avao saky mivory? Afaky miresaky amy mpitariky iny iha alohani-fivoria iny, le volano ie hoe lafa tandrify aia iha ro hamaly.

11. Mampirisiky antsika hanao ino ty Filipianina 2:4?

¹¹ Vakio Filipianina 2:4. Nampirisiky ty Kristiana apostoly Paoly mba hila ze hahasoa ty olo hafa. Akory ty azontsika anoriha ani-torohevitsy zay lafa mivory? Manao ani-zay tsika laha tiarovintsika hoe ta hanome valin-teny koa ty olo hafa, manahaky antsika avao.

12. Ino ty fomba soa azontsika ampahereza ty olo hafa lafa am-pivoria any? (Henteo koa sary io.)

¹² Mba eritsereto tse zao. Laha mifampiresaky amy namanao iha, ho be resaky va iha ka tsy engànao hiresaky rozy? Azo antoky fa tsy hanao ani-zay iha! Teanao laha mba mandramby anjara amy resaky iny rozy. Manahaky ani-zay koa lafa tsika mivory. Teantsika laha mba afaky manome valin-teny koa ty olo hafa. Engàntsika rahalahy noho anabavintsika reo hampiseho ty finoany. Anisani-fomba raiky tena soa ampaherezantsika an-drozy zay. (1 Kor. 10:24) Ndao hodinihintsika hoe akory ty azontsika anaova ani-zay.

13. Ino ty azontsika atao mba ho maro ty olo hanome valin-teny?

¹³ Toy misy fomba raiky: Afaky ataontsika boribory avao ty valin-tenintsika, amy zay mba afaky mamaly koa ty olo hafa. Afaky manome modely amy zay ty anti-panahy noho ty mpitory fa ela. Fe ndre boribory aza ty valin-teninao, le miezaha mba tsy hiresaky ty hevitsy iaby amy fehintsoratsy iny. Laha resahinao iaby ty raha anatini-fehintsoratsy iny ao, le tsy ho afaky hamaly ty olo hafa. Niresaky ani-soso-kevitsy roe retoa, ohatsy, tsika tamy fehintsoratsy toy ato: Voalohany, anovo boribory ty valin-teninao. Le faharoe, ka resahy iaby ty hevitsy anatini-fehintsoratsy iny ao. Laha iha zany ro voatondro hamaly voalohany amy fehintsoratsy toy, le miezaha hiresaky hevitsy raiky avao.

14. Ino ty hanampy antsika hahay hanapa-kevitsy hoe impiry tsika ro hananga tana? (Henteo koa sary io.)

¹⁴ Mahaiza mandiniky lafa hanapa-kevitsy hoe impiry iha ro hamaly teny. Laha mananga tana matetiky loatsy tsika, le mety hahatsapa mpitariky iny hoe forosevantsika hanondro antsika ie ndre mbo tsy namaly aza ty olo hafa. Mety hahakivy ty olo hafa raha zay ka tsy hananga tana rozy.​—Mpito. 3:7.

15. a) Tokony hanao akory tsika laha tsy voatondro? b) Akory ty ampisehoani-ze rahalahy mitariky hoe midary ty olo kiraidraiky ie? (Henteo ty efajoro hoe “Laha Mitariky Anjara Misy Fiaraha-midiniky Iha.”)

¹⁵ Mety ta hanome valin-teny maromaro tsika, fe tsy afaky hanao ani-zay tsika laha maro ty mpitory mananga tana. Mety tsy hanondro antsika mihintsy aza mpitariky iny kindraiky. Mety hahakivy raha zay. Fe tokony hiezaky tsika mba tsy ho meloky laha tsy voatondro.​—Mpito. 7:9.

16. Akory ty azontsika ampahereza ani-olo namaly teny rey?

¹⁶ Laha tsy afaky manome valin-teny maro araky ty itiavanao azy iha, manino laha mijanjy soa lafa mamaly teny ty olo hafa, le bakeo midera an-drozy amy valin-tenin-drozy rey lafa tampitsy fivoria iny? Mety hampahery ani-rahalahy noho anabavinao reo safà fiderà ataonao zay, manahaky valin-teny ho nameanao rey avao. (Ohab. 10:21) Anisani-fomba ampaherezantsika ty olo hafa koa ty safà fiderà.

RAHA HAFA AZONTSIKA ATAO MBA HAHAVY ANTSIKA HIFAMPAHERY

17. a) Ino ty azoni-ray aman-dreny atao mba hanampea ty anan-drozy hanoma valin-teny mifanaraky amy ty taon-drozy? b) Laha hentea video iny, ino ty raha efatsy azo atao lafa manoma valin-teny? (Henteo koa ty fanamariha ambany pejy.)

¹⁷ Ino koa ty azontsika atao mba hahavy antsika hifampahery lafa am-pivoria any? Laha ray aman-dreny iha, ampeo ty ananao hanoma valin-teny mifanaraky amy ty taon-drozy. (Mat. 21:16) Kindraiky, misy raha bevata sisany dinihy amy fianara iny, ohatsy hoe problemo amy resaky fanambalea na resaky mikasiky fandaisam-bata. Fe azo antoky hoe hisy fehintsoratsy raiky na roe azon’ajà anomeza valin-teny amy fianara iny. Ampeo koa ty ananao mba hahay hoe manino rozy ro tsy voatery ho voatondro saky mananga tana. Tsy halahelo rozy amy zay laha olo hafa ro voatondro fa tsy rozy.​—1 Tim. 6:18.d

18. Ino ty azontsika atao mba tsy hampifantoky ty sain’olo amintsika lafa tsika mamaly teny? (Ohabolana 27:2)

¹⁸ Samby afaky manoma valin-teny manome voninahitsy ani-Jehovah noho mampahery ani-mpiara-manompo amintsika reo tsika iaby. (Ohab. 25:11) Mety hisy fotoa tsika hiresaky ty raha mikasiky antsika manoka, fe tsy tokony hiresaky raha maro marè mikasiky antsika tsika. (Vakio Ohabolana 27:2; 2 Kor. 10:18) Aleo tsika miezaky mampifantoky ty saintsika amy Jehovah, ty Safàny, noho ty vahoakiny amy fitambarany. (Apok. 4:11). Mazava ho azy fa laha manasa antsika hiresaky ty hevitsintsika manoka fanontanea iny, le tokony hanao ani-zay tsika. Ahità ani-zay fehintsoratsy ambany eo io.

19. a) Ino ty ho vokany laha midary ty olo iaby am-pivoria any tsika? (Romanina 1:11, 12) b) Aminao manoka, ino ty tena itiavanao ty hoe mamaly teny?

¹⁹ Marina aloha fa tsy misy fitsipiky mikasiky ty fomba anomeza valin-teny, fe samby afaky miezaky tsika iaby mba hanome valin-teny mampahery. Mety hoe manome valin-teny boribory tsika sady matetitetiky. Na mety hoe falifaly tsika fa mba nana tombontsoa namaly teny koa ty olo hafa. Laha mila ze hahasoa ty hafa avao tsika lafa am-pivoria any, le ho falifaly iaby tsika ka afaky “hifampahery.”​—Vakio Romanina 1:11, 12.