Ampolio Dinihy Ndraiky Ze Hevitsy Bevata Nianaranao

Sarotsy aminao va kindraiky ty mahatiaro ty raha nianaranao? Fa mpahazo antsika iaby raha zay matetiky. Ino ty hanampy anao? Ampolio dinihy ndraiky ze hevitsy bevata nianaranao.

Lafa mianatsy iha, le mijanona kelikely kindraiky mba handinihanao hoe ino ty hevitsy bevata amy raha iny. Zay mihintsy ty nampirisihin’ny apostoly Paoly hataon’ny rahalahiny noho anabaviny rey, lafa rozy mianatsy an’ny taratasy nalefany iny. Hoy ty asany: “Zao ty hevitsy bevata.” (Heb. 8:1) Nanampy an-drozy hahazo ty raha teany hovolany ie lafa nanao ani-zay, sady nanampy an-drozy handiniky hoe mifandramby ty raha iaby niresahiny.

Mety azonao atao vasa ty manoka folo minity lafa vita ty fianaranao, mba handinihanao ndraiky ty hevitsy bevata vo nianaranao. Laha tsy de tiaronao raha rey, le henteo ndraiky ty lohatenikely, na vakio ty fehezanteny voalohany amy fehintsoratsy kiraidraiky. Hanampy anao raha zay. Laha nianatsy raha vaovao iha, le iezaho hazavany amy fomba fivolananao raha iny. Laha ampolinao dinihy ndraiky ty hevitsy bevata, le tsy hoe hahatiaro azy avao iha fa ho mora aminao koa ty hahita ty fomba hampiharanao azy amy fiainanao.