Ka Mandiny Ela, fa Miezaha Hatao Batisa

1. Ino ty antony manosiky anao hatao batisa?

TEANAO va Jehovah Ndranahary, azy nanome fiaina noho raha soasoa maro anao iny? Akory ty ampisehoanao hoe tea azy iha? Ty fomba tena soa hanaovanao ani-zay, le ty fanokananao ty vatanao ho azy bakeo atao batisa. Ho lasa fianakavian’i Jehovah iha laha manao ani-zay. Hikarakara noho hitariky anao Babanao noho Namanao iny amy zay, satria ho lasa fananany iha. (Sal. 73:24; Isa. 43:1, 2) Afaky mitamà hiay mandrakizay koa iha laha manokam-bata noho atao batisa.​—1 Pet. 3:21.

2. Ino ty hodinihintsika amy lahatsoratsy toy ato?

² Misy raha misaka anao tsy hatao batisa va? Laha misy, le tsy iha raiky avao ro tratsini-zay. Fa maro ty olo nandalo amy raha mahazo anao zao, fe tsy maintsy nanova ty fandaisam-batany noho ty toe-tsainy rozy mba hahafeno fepetra hatao batisa. Falifaly rozy henanizao sady mazoto manompo an’i Jehovah. Ino ty ianaranao baka amin’olo natao batisa tamy taonjato voalohany rey? Ndao hodinihintsika ty raha sarotsy natrehin-drozy noho ty raha ianarantsika baka amy modely nengàn-drozy.

NATAO BATISA TY SAMARITANINA

3. Ino ty raha mety ho nisaka ty Samaritanina tsy hatao batisa?

³ Antokon’olo nanaraky fivavaha raiky ty Samaritanina tamy andron’i Jesosy. Nipetraky marìny an’i Sekema noho Samaria tavaratsin’i Jodia tany rozy. Nila nianatsy noho naneky ty raha volanin’ny Safà-Ndranahary ty Samaritanina zay vo natao batisa. Nino ty Samaritanina hoe ty boky limy voalohany amy Baiboly avao ro baka amy Ndranahary, zany hoe ty Genesisy zisiky amy Deoteronomia, le mety ho anisani-zay koa ty bokin’ i Josoa. Fe ndre zay, le nitamà ty Samaritanina hoe ho avy ty Mesia, araky ty nivolani-Ndranahary amy Deoteronomia 18:18, 19 ao. (Jaona 4:25) Fe tsy maintsy nino rozy hoe Jesosy ro Mesia nampitamany, zay rozy vo natao batisa. “Maro ty Samaritanina” nanao ani-zay. (Jaona 4:39) Nifankalay ty Jiosy noho ty Samaritanina tamy fotoa zay, ka tsy maintsy niala tamy toe-tsay raty zay koa ty Samaritanina sisany.​—Lioka 9:52-54.

4. Laha hentea ty Asan’ny Apostoly 8:5, 6, 14, ino ty nataon’ny Samaritanina lafa nitory tamin-drozy Filipo?

⁴ Ino ty nanampy ty Samaritanina hatao batisa? “Naneky ty safà-Ndranahary” ty Samaritanina sisany lafa nitory “mikasiky an’i Kristy tamin-drozy” Filipo mpitory ty vaovao soa. (Vakio Asan’ny Apostoly 8:5, 6, 14.) Marina fa Jiosy Filipo, fe nijanjinin-drozy avao. Mety nitiaron-drozy vasa raha resahin’ny Soratsy Masy iny hoe tsy manavakavaky Ndranahary. (Deot. 10:17-19) “Nijanjy soa ty raha nivolanin’i Filipo” mikasiky an’i Jesosy rozy sady nahita porofo koa fa Jehovah ro naniraky azy. Nanao fahagagà maro koa ie, ka nitaha marary noho nandroaky demonia.​—Asa 8:7.

5. Ino ty ianaranao baka amy Samaritanina?

⁵ Afaky nandà ty raha nivolanin’i Filipo Samaritanina rey na tsy nijanjy ty raha nampianariny laha tsy ta handroso. Fe tsy nanao ani-zay rozy. Lafa niresy lahatsy rozy hoe marina ty raha nampianarin’i Filipo an-drozy, le tsy nandiny ela rozy fa avy le natao batisa. Mivola ty Baiboly hoe: “Nino ty raha nivolanin’i Filipo olo rey lafa nitory ty vaovao soa mikasiky ty Fanjakà-Ndranahary noho mikasiky ty anaran’i Jesosy Kristy ie. Le natao batisa rozy, ndre lahilahy zay ndre ampela.” (Asa 8:12) Resy lahatsy va iha hoe marina ty Safà-Ndranahary? Resy lahatsy koa va iha fa mampiseho an’ny toetsy amantara ty tena Kristiana iny ty Vavolombelon’i Jehovah, tsy ino zay fa ty fitiava? ( Jaona 13:35) Ka misalasala zany hatao batisa, le matokisa fa hitahy anao Jehovah.

6. Manino ro mahasoa anao ty modelin’i Ruben?

⁶ Mipetraky an’Alemaigny any Ruben, le nitezà tanatin’ny fianakavia Vavolombelo ie. Fe lafa nihabe ie, le nisalasala laha misy vatany Ndranahary. Fe ino ty nanampy azy hatòky hoe misy Ndranahary? Tsapany hoe mbo misy raha tsy hainy, farany ie nanapa-kevitsy hianatsy soa mikasiky an’ny raha nampisalasala azy iny. Zao ty nivolaniny: “Nanao fianaram-bata aho mba hahaizako hoe ino ty tena marina, le ino ty diso. Tsy maintsy nianatsy matetiky mikasiky evolision aho.” Nivakìny ty boky hoe Misy Mpamorona Iray Miahy Anao ve? Tena nanampy an’i Ruben hino a-Ndranahary boky io. Hoy ty asany: ‘Tena misy vatany Jehovah!’ Vomaiky koa ie nitea ty rahalahy noho anabavy amy tany toy iaby, lafa ie nitsidiky ty foiben’ny Vavolombelon’i Jehovah satria hitany hoe miharo raiky tsika. Lafa nimpoly an’Alemaigny any Ruben, le natao batisa. 17 tao ie tamy zay. Laha misy raha mampisalasala anao ty raha ianaranao, le manaova fikaroha amy boky noho gazetintsika rey. Satria lafa mana “fahaiza marina soa” iha le tsy hisalasala.” (Efes. 4:13, 14) Vomaiky hitombo koa ty fitiavanao ty rahalahy noho anabavy amy tany toy iaby, lafa hitanao hoe mifankatea noho miharo raiky ty vahoakin’i Jehovah amy tany hafa any sady hitanao amy fiangona misy anao eo koa raha zay.

NATAO BATISA SAOLY BAKA TARSOSY ANY

7. Ino ty fomba fihevitsy tsy maintsy nahitin’i Saoly?

⁷ Ndao hodinihintsika ty modelin’i Saoly baka tarsosy any. Nampianary soa ty fivavaha Jiosy ie sady lasa nalaza tamy Jiosy teo. (Gal. 1:13, 14; Fil. 3:5) Maro ty Jiosy nieritseritsy tamy fotoa zay hoe nivadi-pinoa ty Kristiana, farany nanenjiky an-drozy mbaombao Saoly. Nieritseritsy ie hoe nanao ty sitrapo-Ndranahary, fe diso hevitsy ie laha ty marina. (Asa 8:3; 9:1, 2; 26:9-11) Ka lafa nino an’i Jesosy, Saoly, noho lasa Kristiana vita batisa, le tsy maintsy niparè hiatriky fanenjeha.

8. a) Ino ty nanampy an’i Saoly hatao batisa? b) Laha hentea ty Asan’ny Apostoly 22:12-16, akory ty nanampean’i Ananiasy an’i Saoly? (Henteo koa sary io.)

⁸ Ino ty nanampy an’i Saoly hatao batisa? Lafa niseho taminy Jesosy Tompo, le nijiky ie. (Asa 9:3-9) Tsy nihinan-kany mihintsy ie tanatin’ny telo andro sady nandiniky soa an’ny raha nahazo azy iny. Niresy lahatsy Saoly hoe Jesosy ro Mesia sady nanaraky ty fivavaha marina ty mpanori-dia azy. Azo antoky fa tena naneñy ie, satria ie ro nampamono an’i Stefana! (Asa 22:20) Lafa nitampitsy telo andro iny, le namonjy azy moramora mpianatsy mana anara Ananiasy zay ka nitaha azy, mba hampahita azy ndraiky. Bakeo nampirisihiny ie mba hatao batisa malaky. (Vakio Asan’ny Apostoly 22:12-16.) Niambany Saoly ka nanaraky ty raha nivolanin’i Ananiasy, le natao batisa.​—Asa 9:17, 18.

9. Ino ty ianaranao baka amy Saoly?

⁹ Ino ty ianarantsika baka amy Saoly? Laha nanambony tena ie na natahotsy olo, le tsy ho natao batisa. Fe tsy nanao ani-zay ie. Niambany Saoly ka parè hanova ty fomba fiainany lafa naneky ty fahamarina mikasiky an’i Kristy. (Asa 26:14, 19) Parè ho lasa Kristiana ie, ndre fa nihainy aza hoe ho enjehy. (Asa 9:15, 16; 20:22, 23) Lafa nivita batisa ie, le niantehitsy tamy Jehovah avao mba hanampy azy hiaritsy raha sarotsy sankarazany. (2 Kor. 4:7-10) Lafa vita batisa koa iha ka lasa Vavolombelon’i Jehovah, le mety hiatriky fitsapà na raha sarotsy sankarazany. Fe matokisa fa hanampy anao avao Ndranahary noho Kristy, ka hahavita hiaritsy iha noho tsy hivaliky mihintsy.​—Fil. 4:13.

10. Manino ro mahasoa anao ty modelin’i Anna?

¹⁰ Mipetraky amy faritsy an’Eropy Antinana any Anna. Lafa nivita batisa reniny, le nanomboky nianatsy Baiboly Anna tamy ie ni-9 tao lafa nahazo alala tamy babany. Fe lafa nihain’ny longon-drozy niaraky nipetraky amin-drozy rey hoe mianatsy Baiboly amy Vavolombelon’i Jehovah ie, le nanomboky nanohitsy azy rozy. Nieritseritsy longony rey hoe fahafaham-baraka ho an’ny fianakavia olo raiky miala amy fivavahan-drazany zao. Lafa nifeno 12 tao Anna, le nangataky tamy babany ie mba hatao batisa. Fe nanontany azy babany hoe: “Fanapahan-kevitsinao manoka va raha zay sa nisy olo nanery anao?” Namaly Anna hoe: “Ty fitiavako an’i Jehovah ro manosiky ahy hanao ani-zay.” Naneky babany, le natao batisa ie. Fe nikizakizahin’ny longony rey noho nampijalin-drozy ie tafarani-zay. Nivola taminy mihintsy aza ty raiky amin-drozy hoe: “Aleo mahita anao raty fandaisam-bata na mitroky sigara, tozay mahita anao lasa Vavolombelon’i Jehovah.” Akory ty niatrehan’i Anna an’ny raha zay? Zao ty nivolaniny: “Nanome hery ahy Jehovah, sady tena nanoha ahy koa babako noho neniko.” Tsy halinon’i Anna mihintsy ty mitantara ty fomba nanampean’i Jehovah azy tamy fiainany. Resahiny matetitetiky raha zay, amy zay tsy halinony ty raha nanampean’i Jehovah azy. Laha matahotsy fanenjeha iha, le tiarovo fa hanampy anao koa Jehovah.​—Heb. 13:6.

NATAO BATISA KORNELIO

11. Ino ty raha sarotsy natrehin’i Kornelio?

¹¹ Afaky mandramby fianara bevata baka amy modelin’i Kornelio koa tsika. “Sefon’ny maramila” tamy tafiky Romanina ie, le 100 eo ho eo ty maramila nitarihiny. (Asa 10:1, f.a.p.) Vokatsini-zay, le mety ho nalaza tamy fiaraha-monina noho tamy tafiky teo ie. “Nanome raha maro mba hanampea ty mahantra ie.” (Asa 10:2) Naniraky an’ny apostoly Petera, Jehovah mba hitory ty vaovao soa taminy. Fe nisaka an’i Kornelio tsy hatao batisa va ty pilasy anabo nananany?

12. Ino ty nanampy an’i Kornelio hatao batisa?

¹² Ino ty nanampy an’i Kornelio hatao batisa? Resahin’ny Baiboly hoe “natahotsy a-Ndranahary ie noho ty olo iaby trano raiky aminy.” Nivavaky tsy tampaky tamy Ndranahary koa ie. (Asa 10:2) Lafa nitory ty vaovao soa tamy Kornelio Petera, le nino an’i Kristy ie noho ty fianakaviany, ka avy le natao batisa. (Asa 10:47, 48) Azo antoky fa parè hanao ze fanovà nitakỳ taminy Kornelio, mba hahafahany hanompo an’i Jehovah miaraky amy fianakaviany.​—Jos. 24:15; Asa 10:24, 33.

13. Ino ty ianaranao baka amy Kornelio?

¹³ Afaky nataon’i Saoly noho Kornelio fialan-tsiny mba tsy hahalasa Kristiana an-drozy ty pilasy anabo nananan-drozy. Fe tsy nanao ani-zay rozy. Mila manao fanovà bevata va iha mba hahavy anao hatao batisa? Laha zay ie, le matokisa fa hanampy anao Jehovah. Hitahy anao ie laha tapa-kevitsy hanompo azy iha ka manoriky ty torolalan’ny Baiboly.

14. Manino ro mahasoa anao ty modelin’i Tsuyoshi?

¹⁴ Mipetraky a Japon any Tsuyoshi. Tsy maintsy nanao fanovà tamy asany ie, mba hahavy azy hahafeno fepetra hatao batisa. Adjoint direktera tamy lakilasy kaihy hoe Ikenobo zay ie. Fianara mandamy folera lakilasy io. Lafa direktera iny tsy afaky manatriky fandevena, le Tsuyoshi matetiky ro misolo azy, kanefa aminio fandevena io misy fombafomban’ny Bodista. Fe lafa nahay ty marina mikasiky ty maty Tsuyoshi, le nanjary fitsapà ho azy raha zay lafa ta ho nanokam-bata ho an’i Jehovah ie. Farany nanapa-kevitsy ie, fa tsy handramby anjara amy fombafomba rey. (2 Kor. 6:15, 16) Nivolaniny tamy direktera iny koa raha zay. Ino ty vokany? Nivoatanjaky tamy asany iny avao ie, fe tsy nandramby anjara tamy fombafomba rey. Natao batisa koa ie, tao raiky tafaran’ny nianarany Baiboly.a Laha mila manao fanovà amy asanao koa iha mba hampifalifalea a-Ndranahary, le matokisa fa hanome ze raha ilànao noho ty fianakavianao ie.​—Sal. 127:2; Mat. 6:33.

NATAO BATISA TY KORINTIANINA

15. Ino ty raha sarotsy natrehin’ny Korintianina, ka mety ho nisaka an-drozy tsy hatao batisa?

¹⁵ Nalaza ho tea hanana noho naloto fandaisam-bata ty olo ta Korinto tany taloha. Nanao raha hala-Ndranahary ty ankamaroan’olo nipetraky tany. Mazava ho azy fa tena tsy mora ho ani-ze naneky ty vaovao soa raha zay. Fe lafa niavy tamy tanà io ao apostoly Paoly, ka nitory ty vaovao soa mikasiky an’i Kristy, le nilasa mpino ty ankamaroan’ny Korintianina naharè ty vaovao soa, ka natao batisa.” (Asa 18:7-11) Niseho tamy Paoly tamy alalan’ny fahità koa Kristy Tompo, ka nivola hoe: “Mana olo maro biby amy tanà toy ato aho.” Farany nijano tao Paoly, ka nitory tao avao tanatin’ny tao raiky noho tampany.

16. Ino ty nanampy ty Korintianina handresy raha sarotsy mety ho nisaka an-drozy tsy hatao batisa? (2 Korintianina 10:4, 5)

¹⁶ Ino ty nanampy ty Korintianina hatao batisa? (Vakio 2 Korintianina 10:4, 5.) Nanampy an-drozy hanao fanovà bevata ty Safà-Ndranahary noho ty fanahiny masy. (Heb. 4:12) Afaky niala tamy fandaisam-bata raty, ohatsy, hoe hamamoa, halatsy, firaisan’ny lahilahy samby lahilahy na ampela samby ampela, ze olo naneky ty vaovao soa mikasiky an’i Kristy ta Korinto tao.​—1 Kor. 6:9-11.b

17. Ino ty ianaranao baka amy Korintianina?

¹⁷ Mariho fa ndre nana fahazaran-draty sarotsy nialà aza ty olo sisany ta Korinto tany, le tsy nieritseritsy rozy hoe tsy ho vitan-drozy mihintsy ty ho lasa Kristiana. Niezaky mafy rozy mba handeha amy lala tery mandeha amy fiaina mandrakizay any. (Mat. 7:13, 14) Ka iha, misy fahazaran-draty misaka anao tsy hatao batisa va? Sarotsy aminao va ty miala azy? Ka kivy mihintsy, fa miezaha hiova avao! Angataho Jehovah hanome ty fanahiny masy ho anao mba hanampy anao halay raha raty.

18. Manino ro mahasoa anao ty modelin’i Monika?

¹⁸ Diniho moa ty tantaran’i Monika mipetraky a Géorgie any. Niezaky mafy ie mba tsy hanao resaky maloto noho tsy hanenty fialam-boly raty mba hahavy azy hatao batisa. Hoy ty asany: “Nivavaky aho tamy zaho mbo nitanora mba hamean’i Jehovah hery hahavitako hiova. Hain’i Jehovah hoe ta hanao raha soa aho, ka nanampy ahy ie sady nitari-dala ahy avao.” Natao batisa Monika lafa ni-16 tao. Misy fahazaran-draty tsy maintsy hialanao koa va mba hahafahanao manompo an’i Jehovah? Ka kivy, fa angataho avao ie mba hanome hery anao hahavitanao hiova. Hanome ty fanahiny masy ho anao Jehovah satria matariky ie.​—Jaona 3:34.

TSY MISY RAHA TSY HO VITAN’NY FINOA

19. Ino ty hanampy anao handresy problemo bevata manahaky vohitsy io? (Henteo koa sary io.)

¹⁹ Matokisa fa tea anao Jehovah sady teany ho anisan’ny fianakaviany iha. Afaky matoky tanteraky ani-zay iha, ndre ino ndre ino ty raha sarotsy misaka anao tsy hatao batisa. Nivola tamy mpianatsiny tamy taonjato voalohany rey Jesosy hoe: “Laha manam-pinoa nareo, ndre kelikely manahaky voan-tsinapy io avao aza, ka mivola amy vohitsy roy hoe ‘mifindrà eroy, le hifindra ie.’ Le tsy hisy raha tsy ho vitanareo.” (Mat. 17:20) Vo niaraky tamy Jesosy an-taon’ny vitsivitsy avao ty mpianatsy sisany nanatriky teo tamy fotoa zay, ka mbo nila nampitombo ty finoan-drozy. Fe nanome toky an-drozy Jesosy fa laha ampy finoa rozy, le hanampy an-drozy hahavita handresy problemo bevata manahaky vohitsy io Jehovah. Hanampy anao manahaky ani-zay koa Jehovah!

20. Manino ro mandrisiky anao hatao batisa ty modelin’ny Kristiana tamy taonjato voalohany noho ty Kristiana amy androntsika henanizao?

²⁰ Laha hitanao hoe misy raha misaka anao tsy hatao batisa, le ka engà amy zao avao fa manaova raha malaky. Hanampy anao sady hanatanjaky anao ty modely nengàn’ny Kristiana tamy taonjato voalohany rey noho amy androntsika zao. Enganè mba hampahery anao ty modelin-drozy, ka handrisiky anao hanokam-bata ho an’i Jehovah noho hatao batisa. Io ty fanapahan-kevitsy farani-ze soa azonao atao!