Lafovily amy Fiangona eo Nareo Be Tao

Mihantitsy koa va iha henanizao ka fa tsy mahavita raha maro sasy? Ndre fa nahavita nanompo an’i Jehovah tanatin’ny tao maro aza iha, le mety ho kivikivy satria mahatsapa hoe kelikely ty raha vitanao. Mety hampitovizinao amy ty raha nivitanao taloha, ohatsy, ty raha vitanao henanizao. Ino ty azonao atao mba tsy hieritsereta raha mahakivy manahaky ani-zay?

INO TY TEAN’I JEHOVAH HATAONAO?

Eritsereto hoe: ‘Ino moa ty tean’i Jehovah hataoko?’ Azo antoky fa hampahery anao ty raha resahy amy Deoteronomia 6:5 ao. Zao ty volaniny ao: “Tiavo Jehovah Ndranaharinao amy ty fonao iaby noho ty vatanao iaby noho ty herinao iaby.”

Mivola andinin-teny io hoe tean’i Jehovah hanompo azy amy ty fonao, ty vatanao, noho ty herinao iaby iha. Hanampy anao raha zay mba tsy hampitaha ty vatanao amin’olo hafa, na hampitaha ty raha nivitanao taloha amy ty raha vitanao henanizao.

Mba diniho tse moa hoe: Ino ty nameanao an’i Jehovah tamy iha mbo nitanora? Hivola ho zao ty ankamaroan’ny mpanompon’i Jehovah hoe nanome ze farany soa ho an’i Jehovah ie. Ze farany soa koa ro nameanao tamy iha mbo nitanora. Ka ino ty ameanao an’i Jehovah henanizao? Azo antoky hoe manome ze farany soa vitanao iha henanizao. Laha ho zay ty fomba fanenteanao raha, le ho tsapanao hoe mbo mitovy amy ty raha nameanao an’i Jehovah taloha avao ty raha ameanao azy henanizao. Nanome ze farany soa iha tamy zay, le manome ze farany soa koa iha henanizao.

AFAKY MAMPAHERY OLO TY RAHA NIAINANAO

Soa ho tiarovy koa hevitsy raiky toy: Ka mifantoky amy raha fa tsy vitanao, fa eritsereto ty raha azonao atao. Misy raha sisany aza tsy nivitanao tamy iha mbo nitanora, fa amy iha be tao henanizao vo mahavita azy. Toy misy ohatsy:

Zarao amin’olo ty raha nihitanao tamy fiainanao. Henteo moa raha nivolanin’olo amy Baiboly ao retoa:

Davida Mpanjaka: “Mba fa nitanora avao aho, le fa antitsy aho henanizao, fe mbo tsy nahita olo marina nafoy tanteraky, na nahita ty anany nangataky hany.”​—Sal. 37:25.

Josoa: “Fa handeha amy lala fomban’ny tany iaby aho henanizao. Le hainareo soa amy fonareo iaby noho ty vatanareo iaby, fa tsy nisy tsy nitanteraky ndre raiky aza ty fampitamàna iaby nivolanin’i Jehovah Ndranaharinareo taminareo. Fa nitanteraky taminareo iaby rozy iaby. Tsy nisy tsy nitanteraky ndre raiky aza.”​—Jos. 23:14.

Mety fa nivola raha manahaky ani-reo koa iha. Samby niresaky ty raha niainan-drozy Davida noho Josoa. Niresaky ty raha nihitan-drozy noho niren-drozy tanatin’ny tao maro mpanompon’i Jehovah tsy nivaliky reo, ka tena misy lanjany ty safàn-drozy.

Laha fa nanompo an’i Jehovah tanatin’ny tao maro iha, le azonao atao koa ty mitantara ty raha niainanao noho ty fitahia niazonao. Nahita fomba raiky nitahian’i Jehovah ty mpanompony va iha, ka tsy ho halinonao mihintsy? Manino laha mba zarànao amin’olo raha zay? Mety fa nitsapanao vasa hoe nampahery ty hafa iha lafa nanao ani-zay. Tena lafovily amin’olo zany iha, satria mampahery noho mamelombelo an-drozy ty raha niainanao tamy fanompoa an’i Jehovah.​—Rom. 1:11, 12.

Laha mbo azonao atao, le manatreha fivoria mivanta satria mampahery ty hafa koa raha zay. Hahasoa ty hafa raha zay sady hahasoa anao koa. Nivola Connie, azy niresahy taloha teo iny, hoe: “Manampy ahy tsy ho kivy ty fanatreha fivoria. Mampiseho fitiava amiko iaby ty olo amy Efitrano ao, ka tsy hitako hoe ino ty mbo hahakivy ahy! Mankasitraky an-drozy koa aho ka manome fanomeza kelikely ho an-drozy. Miezaky manao raha ara-panahy miaraky amy anadahy noho rahavaviko reo avao aho.”

LAFOVILY AMY JEHOVAH TY FANOMPOANAO

Tea antsika avao Jehovah ndre tsy manenga antsika hahavita raha maro aza ty raha iainantsika. Maro ty tantaran’olo mampiseho ani-zay amy Baiboly ao. Diniho moa ty tantaran’i Simeona, lahilahy israelita tamy andron’i Jesosy. Fa antitsy ie tamy fotoa nahaterahan’i Jesosy. Azo antoky hoe saky nandalo amy tempoly ao ie, le nahita lahilahy mbo tanora nanao andraikitsy bevata tao. Ka nanao akory Simeona? Mety ho nieritseritsy ie hoe tsy tena ilàn’i Jehovah satria tsy mahavita raha maro manahaky an’ny tanora reo. Fe tsy mitovy amy zay ty hevitsin’i Jehovah. “Olo marina noho mpivavaky be” ty fahitan’i Jehovah azy, ka nameany tombontsoa ie mba hahita an’i Jesosy mbo nikely. “Nitarihin’ny fanahy masy” koa ie. Nampiasan’i Jehovah mihintsy aza ie, mba haminany mikasiky an’ny ajà ho lasa Mesia io! (Lioka 2:25-35) Tsy ty fahanteran’i Simeona zany ro nifantohan’i Jehovah, fa ty finoa mantanjaky nananany.

Afaky matoky koa iha fa lafovily amy Jehovah ty fanompoanao azy ndre fa tsy mahavita raha maro sasy aza iha. “Ekè-Ndranahary” ty soro ataonao lafa ‘mifanaraky amy ze raha anananao, fa tsy hoe ze tsy anananao.’​—2 Kor. 8:12.

Ze azonao atao zany ro ifantoho. Ohatsy hoe: Misy karazam-panompoa azonao atao va, ndre anatin’ny fotoa kelikely avao aza? Afaky mikaiky va iha na manoratsy taratasy kelikely mba hampehereza mpiara-manompo? Ndre raha kelikely manahaky ani-zay avao, le fa misy vokany bevata, sirtò laha olo fa nanompo an’i Jehovah fa ela ro manao azy.

Ndre fa tsy mahavita raha maro aza iha, le mbo afaky manome ze farany soa ho an’i Jehovah avao. Henteo moa ty efajoro hoe “Nanavotsy Ain’Olo Ie”, fa misy tantaran’ny ranabavy raiky baka an’Afriky Antinana any zay.

Ka halino fa tena mampahery olo iha satria nanam-pinoa noho tsy nivaliky bakanibakany zay. Nanome modely soa amy fiareta iha, ka afaky matoky hoe ‘Ndranahary tsy manao raha tsy rariny, ka hoe hohalinony ty raha nataonao noho ty fitiava nasehonao ho ahi-ty anarany, tamy iha nikarakara ty olo masy sady mbo mikarakara an-drozy zisiky henanizao.’​—Heb. 6:10.

ANOVO AVAO ZE VITANAO MBA HANAMPEA TY HAFA

Hita tamy fandiniha nataon’ny manam-pahaiza hoe mihasalama noho mahay mandiniky soa, sady lava velo ty olo be tao lafa mazoto manampy ty hafa.

Mazava ho azy fa tsy manafaky tanteraky ty vokatsin’ny fahantera ty fanaova raha soa. Ty Fanjakà-Ndranahary avao ro hahavita handrava ty vokatsin’ny ota, anatini-zay ty fahantera noho ty fahafatesa.​—Rom. 5:12.

Fe lafa manompo an’i Jehovah iha, ka manampy olo hahay azy, le tsy ho rava ty raha tamaninao sady mety hihasalama mihintsy iha. Ka mba tiarovonareo be tao lahy, fa lafovily amy Jehovah ty fanompoanareo, sady modely soa ho an’olo amy fiangona eo ty finoanareo.