Ino ty Azonareo Atao mba Hanome Voninahitsy an’i Jehovah ty Mariazinareo?

1-2. Tean’i Jehovah hanao akory ty olo roe hifanambaly amy andron’ny mariazin-drozy?

FA MARÌNY va ty mariazinareo? Laha zay ie, le miarahaba anareo zahay! Azo antoky hoe maro ty raha ataonareo mba hanomana an’ny mariazy zay. Tean’i Jehovah hofalifaly nareo amy andron’ny mariazinareoa io sady tean’ny ho sambatsy zisiky farany.​—Ohab. 5:18; Tonon. 3:11.

² Tokony hanome voninahitsy an’i Jehovah ty mariazinareo. Manino tsika ro mivola ani-zay? Le ino ty hanampy anareo hahavita ani-zay? Natao ho an’olo roe manoma mariazy lahatsoratsy toy, fe afaky manampy antsika koa ty torolala voaresaky ato mba hanome voninahitsy an’i Jehovah lafa tsika manatriky mariazy na manampy olo hanoma ty mariaziny.

MANINO NAREO RO TOKONY HAMOME VONINAHITSY AN’I JEHOVAH?

3. Ino ty tokony ho vatan-draha marè amin’olo roe hanao mariazy, le ino ty antony?

³ Soa laha manoriky ty torolalan’i Jehovah amy Baiboly ao ty olo hifanambaly lafa manoma ty mariazin-drozy. Ino ty antony? Satria Jehovah ro Namoro ty fanambalea. Ie ro nandamy an’ny mariazy voalohany iny, zany hoe ty fanambalean’i Adama noho Eva. (Gen. 1:28; 2:24) Ka soa laha ty hanome voninahitsy an’i Jehovah ro vatan-draha marè aminareo lafa manoma ty mariazinareo nareo.

4. Manino koa ty olo hifanambaly ro tokony hanome voninahitsy an’i Jehovah amy mariazin-drozy?

⁴ Manino koa ro tokony hodinihinareo ty ho fahitan’i Jehovah ty mariazinareo? Satria ie ro Babanareo an-danitsy any sady tena Namanareo. (Heb. 12:9) Azo antoky fa tsy teanareo hiova mihintsy fifandrambesanareo aminy zay. Tsy teanareo hisy raha mampalahelo an’ny Namanareo iny mihintsy amy mariazinareo io na amy fotoa hafa. (Sal. 25:14) Lafa mandiniky ty raha nataon’i Jehovah noho mbo hataony ho anareo nareo, tsy mieky va nareo hoe tokony hanome voninahitsy azy ty mariazinareo?​—Sal. 116:12.

AKORY TY ANOMEZANAREO VONINAHITSY AN’I JEHOVAH?

5. Manino ty Baiboly ro afaky manampy ty olo roe manoma mariazy?

⁵ Tsy resahin’ny Baiboly hoe ino iaby ty raha tsy maintsy atao amy andron’ny mariazy na amy fety mifandramby amy zay. Afaky mifily ze raha eritseretinareo hatao nareo arakaraky ty raha misy, ty fomban-tany, na ty raha teanareo. Mila manoriky ty raha takin’ny lalàna koa ty mpanompo-Ndranahary. (Mat. 22:21) Fe ndre ino ndre ino ty fanapaha-kevitsinareo, le hanome voninahitsy an’i Jehovah ty mariazinareo sady hampifalifaly azy, lafa manoriky ty torolalan’ny Baiboly nareo. Ka ino zany ty torolala mila tiarovinareo?

6. Manino ro mila manoriky ty lalàna apetrakin’ny fanjakà ty olo hifanambaly?

⁶ Oriho ty lalàna apetrakin’ny fanjakà. (Rom. 13:1, 2) Amy tany maro, le misy raha takin’ny fanjakà mila orihin’olo maniry hifanambaly. Tokony hohenteanareo hoe ino iaby lalàna reo amy tany misy anareo eo. Laha misy fanontaneanareo mikasiky ani-zay, le ka misalasala mangataky fanampea amy anti-panahy.b

7. Tokony hanao akory ty raha atao amy fotoan’ny mariazy, le akory ty hahavità ani-zay?

⁷ Anovo manome voninahitsy an’i Jehovah ty raha hatao amy fotoa io. (1 Kor. 10:31, 32) Miezaha mba ho hita amy ty raha hataonareo amy fotoa io hoe mana ty vokatsin’ny fanahi-Ndranahary nareo fa tsy ty toe-tsaini-zao tontolo zao. (Gal. 5:19-26) Mivola ty Baiboly hoe ty lahilahy ro lohan’ny fianakavia. Ie zany ro tompon’andraikitsy voalohany mba hahavy ty mariazin-drozy hahafalifaly noho hanome voninahitsy a-Ndranahary. Akory ty hahavità ani-zay? Manome voninahitsy a-Ndranahary ty lahatenim-panambalea lafa atao amim-panajà noho amim-pitiava. Hita amy lahateny io hoe tena ankasitrahantsika fanomeza baka amy Ndranahary iny, zany hoe ty fanambalea. Hanampy ani-ze manatriky eo koa raha zay mba hahita hoe tena bevata fotoa io. Zay mahavy ty ankamaroan’ny Vavolombelon’i Jehovah mifily hoe hatao amy Efitrano Fanjakà any ty lahatenim-panambalean-drozy, laha azo atao. Laha ta hampiasa Efitrano nareo amy mariazinareo, le manorata taratasy fangataha amy anti-panahy amy fiangonanareo eo. Anovo aloha biby raha zay.

8. Ino ty azo atao mba hanome voninahitsy an’i Jehovah ty fety na fiaraha misakafo atao amy mariazy? (Romanina 13:13)

⁸ Vakio Romanina 13:13. Misy fety na fiaraha misakafo matetiky amy fotoan’ny mariazy rey. Laha manapa-kevitsy hanao ani-zay nareo, ino ty azonareo atao mba tsy hahità toe-tsaini-zao tontola zao raha zay? Ty safà Grika nadika hoe “fety tsy voafehy”, le manondro fety misy finoman-toaky tafahoatsy noho moziky zisiky haly marè. Laha ta hanisy toaky nareo, le alamino sandrany mba tsy hisy olo hino maro marè.c Ataovo ambanimbany koa ty moziky alefanareo, amy zay ho afaky hifampiresaky soa ty olo nasànareo. Filio soa koa ty karaza moziky noho tonon’ny hira halefanareo tsy no haminga olo.

9. Ino ty tokony ho tiarovini-azy hifanambaly rey mikasiky ty resaky na raha hafa hatao amy fetin’ny mariazin-drozy?

⁹ Hisy olo handramby fivolana va amy fety iny ao, sa hisy sary na video halefa, na raha hafa manahaky ani-zay? Mety hahavy an’ny andro iny hiavaky raha reo. Fe anovo azo antoky hoe hampahery avao ty raha hatao ao. (Fil. 4:8) Eritsereto sandrany hoe: ‘Manaja olo va raha toy? Ho hita amy raha toy va hoe tena vatan-draha ty fanambalea?’ Fa ty tena bevata le hoe: ‘Hanome voninahitsy an’i Jehovah va raha toy?’ Mety ho soa aloha laha misy raha mampihehy ty ao, fe ambeno soa tsy no hisy raha mahamenatsy na manafa-baraka, ohatsy hoe resaky mety hahavy olo hieritseritsy firaisa. (Efes. 5:3) Hazavao soa amy nama na fianakavianareo handramby fivolana ty resaky tsy mety aminareo, le anovo azo antoky hoe hanaja an’ny raha zay rozy.

10. Manino ty olo manoma mariazy ro tsy tokony hieritseritsy hanao raha tafahoatsy? (1 Jaona 2:15-17)

¹⁰ Ka manao raha tafahoatsy. (Vakio 1 Jaona 2:15-17.) Tean’i Jehovah laha manome voninahitsy azy ty mpanompony, fa tsy manao raha hifantohan’olo amy ty vatan-drozy. Tokony hiamby soa zany ty Kristiana mba tsy handany drala maro marè na ‘hampizelazela hanana.’ Ino ty tombony ho anareo laha tsotra ty mariazinareo? Mety hahatsapa manahaky an’i Mika, rahalahy baka a Norvezy any toy nareo. Nivola ie hoe: “Tsy voatery nilitsy trosa zahay, sady afaky nanohy nanao mpisava lala avao. Tsotra aloha mariazinay iny, fe nisoasoa sady tsy ho halinonay mihintsy.” Nivola ho zao koa Tabitha, ranabavy baka an’Inde any zay: “Tsy niasa loha amy raha maro zahay lafa nataonay tsotra mariazinay iny. Vitsivitsy, ohatsy, ty raha nila nalamy noho nialia hevitsy.”

11. Akory ty ampisehoani-azy hifanambaly rey hoe mahay mandanjalanja rozy amy resaky akanjo? (Henteo koa sary reo.)

¹¹ Fa hainareo va ty akanjo handesinareo? Azo antoky fa teanareo ho soa biby ty pozinareo. Resahin’ny Baiboly aza fa ndre ty olo taloha tany le nifily soa ty akanjo hanaovan-drozy amy andron’ny mariazin-drozy. (Isaia 61:10) Tsy hitovy amy akanjo handesinao amy fotoa hafa aloha ty akanjo handesinao amy mariazinao. Fe tokony ho maotina avao raha zay fa tsy ho tafahoatsy na hitserehan’olo. (1 Tim. 2:9) Tsy tokony ho resaky fisikina na resaky hanana ro hampiavaky marè ty mariazinareo.​—1 Pet. 3:3, 4.

12. Manino ro tsy tokony hasia fombafomba tsy mifanaraky amy Soratsy Masy ty mariazy?

¹² Ialao ty fombafomba tsy mifanaraky amy Soratsy Masy. (Apok. 18:4) Amy tontolon’i Satana toy eto, le matetiky ro misy fombafomba mifandramby amy fanahy raty, fanompoa sampy, noho finoanoam-poana ty raha ataon’olo amy mariazy. Mampirisiky antsika Jehovah mba hanalavitsy an’ny raha maloto reo. (2 Kor. 6:14-17) Laha misy fombafomba mampisalasala aminareo any, le diniho hoe baka aia raha io, le ino iaby ty torolalan’ny Baiboly mikasiky ani-zay. Afaky manapa-kevitsy nareo afarani-zay.

13. Akory ty azoni-azy hifanambaly rey anahafa an’i Jehovah amy resaky fanomeza?

¹³ Fa mahazatsy ty olo aminareo any va ty manome fanomeza ho an’ny mpivaly vao rey? Mianky amy ze ananan’olo kiraidraiky nasànareo ty fanomeza amean-drozy. Marina hoe mampirisiky antsika hatariky ty Baiboly, sady mahafalifaly antsika ty manao ani-zay. (Ohab. 11:25; Asa. 20:35) Fe tsy tokony hahatsapa ty olo nasànareo hoe tsy maintsy manome rozy, na hoe tsy ho afa-po nareo laha tsotsotra ty fanomeza amean-drozy. Miezaha hanahaky an’i Jehovah ka engao ty olo hanome arakaraky ze ananany noho baka amy fony.​—2 Kor. 9:7.

FOMBA ANALAVIRA NOHO ANDAMINA PROBLEMO

14. Ino ty raha sarotsy atrehin’olo sisany manoma mariazy?

¹⁴ Mety ho tojiky raha sarotsy maro nareo, lafa miezaky manoma mariazy manome voninahitsy an’i Jehovah. Mety tsy ho mora aminareo, ohatsy, ty manoma mariazy tsotsotra. Nivola ho zao Charlie, lahilahy raiky baka amy Nosy Solomon any zay: “Tena nisarotsy taminay ty nanapa-kevitsy hoe ia iaby ty olo hasà. Mana nama maro zahay, le mitamà iaby rozy hoe hasà satria zay ty fomban’olo aminay atoy!” Nivola koa Tabitha, azy niresahy taloha teo iny hoe: “Fa zatsy manasa olo maro ty olo aminay atoy, ka elaela vo niresinay lahatsy ray aman-dreninay rey hoe olo 100 avao ty hasànay.” Hoy koa Sarah, ampela raiky baka an’Inde any: “Mifantoky marè amy hanana noho laza ty olo sisany. Nisy amy fianakavianay reo nanao mariazy mangotrakotraky, ka lasa nahatsapa aho hoe niforoseva hanao mandilatsy ani-zay.” Ino ty hanampy anareo handresy an’ny raha sarotsy reo noho ty problemo hafa?

15. Manino ro tena ilà ty mivavaky lafa manoma mariazy?

¹⁵ Mivavaha matetiky lafa manoma mariazy. Azonareo ambara an’i Jehovah iaby ty raha sarotsy atrehinareo noho ty raha tsapanareo. (Fil. 4:6, 7) Angataho ie mba hanampy anareo handramby fanapaha-kevitsy soa, ho kalma avao ndre miasa loha aza, le hana herim-po lafa ilà raha zay. (1 Pet. 5:7) Vomaiky hatòky an’i Jehovah nareo lafa hitanareo mamaly ty vavaky ataonareo ie. Hoy ty asan’i Tabitha, azy niresahy taloha teo iny: “Natahotsy zahay roe tsy no hisy raha hampialy hevitsy anay na hampifamaly anay amy fianakavianay reo. Ka saky hiresaky mikasiky an’ny mariazy iny zahay, le nivavaky tse. Tena tsapanay hoe nanampy anay Jehovah sady nilamy soa avao zahay.”

16-17. Manino ro ilà ty mifampiresaky soa lafa manoma mariazy?

¹⁶ Miresaha mazava soa noho amim-panajà. (Ohab. 15:22) Tsy maintsy hiaraky handramby fanapaha-kevitsy maro mikasiky ty mariazinareo nareo. Tafilitsy amy zay zao ty daty, ty drala holanỳ, ty olo hasà noho ty raha maro hafa. Alohan’ny hanapahanareo hevitsy, le henteo hoe ino iaby ty safidy anananareo, le iaraho midiniky ty torolalan’ny Baiboly mikasiky ani-zay. Diniho koa ty torohevitsy baka amy Kristiana matotsy. Lafa miresaky mikasiky ty raha teanao manoka iha, le miezaha ho soa fanahy, hahay mandanjalanja, noho handefitsy. Laha misy raha angatahin’ny ray aman-dreninareo na ty longonareo marìny, le ekeo ty soso-kevitsin-drozy laha hitanareo hoe azo tanterahy. Andro manoka ho an-drozy koa mariazinareo io. Laha tsy afaky hanantanteraky ty fangatahan-drozy nareo, le hazavao amim-panajà amin-drozy ty antony. (Kol. 4:6) Hazavao soa amy ty fianakavianareo hoe ty hanome voninahitsy an’i Jehovah ro vatan-draha marè aminareo.

¹⁷ Mety ho sarotsy aminareo ty hanazava ty hevitsinareo amy ty ray aman-dreninareo, sirtò laha tsy manompo an’i Jehovah rozy. Fe ho vitanareo raha zay. Hoy Santhosh, rahalahy raiky an’Inde any: “Tean’ny fianakavianay rey hasia fombafomban’ny fivavaha Hindò mariazinay iny. Tsy maintsy nihazavaninay amin-drozy tanatin’ny fotoa lava ty fanapaha-kevitsinay. Nekenay ze raha nangatahin-drozy laha mbo tsy halan’i Jehovah. Novànay hifanaraky amy ze tean-drozy, ohatsy, ty sakafo haroso amy fotoa io. Tsy nasianay olo mihira na mitsinjaky koa tamy fety iny satria tsy nahazatsy an-drozy raha zay.”

18. Ino ty azonareo atao mba hilamy soa ty raha iaby amy andron’ny mariazinareo? (1 Korintianina 14:40) (Henteo koa sary io.)

¹⁸ Mahaiza mandamin-draha. Tsy hiasa loha marè nareo amy andron’ny mariazy iny laha voalamy soa sandrany ty raha iaby. (Vakio 1 Korintianina 14:40.) Zao ty nivolanin’i Wayne, baka a Taïwan any: “Nivory kelikely niaraky amy azy hanampy anay rey zahay, andro vitsivitsy alohan’ny mariazinay iny. Nampolinay niresahy ndraiky ty hevitsy fa tampaky. Nanoharanay koa ty raha sisany hatao amy andron’ny mariazy io mba ho azo antoky hoe hilamy soa iaby.” Mba ho fanajà an’olo nasànareo rey, le ataovo ara-potoa ty raha iaby.

19. Ino ty azonareo atao mba ho voafehy soa ty raha hiseho amy fety iny?

¹⁹ Afaky miala problemo maro nareo laha eritseretinareo sandrany ty raha mety hiseho. (Ohab. 22:3) Laha atahora hisy olo tsy nasà, ohatsy, ho avy amy fety iny ao, le diniho sandrany ty raha azonareo atao mba tsy hisiani-zay. Ambarao amy ze longonareo tsy manompo an’i Jehovah koa hoe ino ty raha teanareo hataon-drozy, le hazavao amin-drozy hoe akory ty fahitanareo ty fombafomba sisany fataon’olo amy mariazy rey. Azonareo ampamakỳ an-drozy koa ty lahatsoratsy hoe “Manao Akory ty Mariazin’ny Vavolombelon’i Jehovah?” amy jw.org ao. Manendrea rahalahy matotsy raiky mba ho “mpiandraikitsy fanasà” amy zay ho azonareo antoky hoe ho voafehy soa ty raha hiseho amy fotoa io. (Jaona 2:8) Laha resahinareo soa amy rahalahy io ty fandamina teanareo hatao amy mariazinareo iny, le afaky hanampy anareo ie. Hataony azo antoky hoe hanome voninahitsy an’i Jehovah mariazy iny sady handeha soa araky ty itiavanareo azy.

20. Ino ty tokony ho tiarovin’olo roe manoma mariazy?

²⁰ Mety ho sahiran-tsay nareo lafa mandiniky ty raha iaby mila atao amy fanomana an’ny mariazinareo iny. Fe tiarovo hoe vo fanombohany avao mariazinareo io. Mbo afaky hahazo tavy raha maro nareo afarani-zay lafa miaraky manompo an’i Jehovah. Anovo ze azonareo atao mba ho tsotra noho manome voninahitsy an’i Jehovah ty mariazinareo. Matokisa an’i Jehovah. Ho vitanareo ty handamy ty mariazinareo laha manoriky ty tari-dalany nareo. Ka lafa mahatiaro an’ny mariazinareo iny amy zay nareo afara any, le tsy haneny mihintsy fa hana fahatiarova soa noho mahafalifaly.​—Sal. 37:3, 4.