Miezaha Hiambany Manahaky an’i Jehovah

1. Manino ro mampieky antsika ty mahay hoe miambany Jehovah?

LAFA manenty an’ny olo mana fahafà henanizao rey iha, miambany iaby va ty fahitanao an-drozy? Azo antoky fa tsy zay. Mifanohitsy amy zay fa ndre farany anabo aza Jehovah, le miambany. (Sal. 113:5-8) Toetsy raiky mampiavaky an’i Jehovah ty hoe miambany. Tsy ho hitanao aminy mihintsy ty fanambonian-tena. Ndao tsika handiniky toetsy efatsy mampiavaky an’i Jehovah, le ho henteantsika hoe manino toetsy reo ro ahità hoe tena miambany ie. Ho hitantsika koa hoe niambany manahaky an’ny Babany Jesosy. Lafa mianatsy an’ny raha reo tsika, le vomaiky hifandramby marìny amy Jehovah sady hiambany manahaky azy.

MORA IFANDRAMBESA JEHOVAH

2. Ino ty raha haintsika mikasiky an’i Jehovah, lafa hentea ty Salamo 62:8? (Henteo koa sary io.)

² Sarotsy matetiky ty mifandramby amin’olo manambony tena. Miavonavo marè ie, farany misalasala hamonjy azy ty olo, na tsy ta hifandramby aminy mihintsy. Mifanohitsy tanteraky amy zay Jehovah! Miambany Babantsika an-danitsy any iny, ka taominy hifandramby aminy tsika sady teany laha ambarantsika azy ty raha mampiasa loha antsika noho ty raha tsapantsika. (Vakio Salamo 62:8.) Parè hijanjy avao ty baba soa fanahy lafa mitaray aminy ty anany. Manahaky ani-zay koa Jehovah. Tena teany ty mijanjy ty vavaky ataon’ny mpanompony. Misy vavaky maro mihintsy aza nampanoratiny amy Baiboly. Hita baka amy zay fa mora ifandrambesa ie. (Jos. 10:12-14; 1 Sam. 1:10-18) Ka manao akory laha mahatsapa tsika kindraiky hoe tsy maeva hamonjy an’i Jehovah?

3. Manino iha ro afaky matoky hoe tean’i Jehovah hivavaky aminy matetiky?

³ Mbo afaky mivavaky amy Jehovah avao tsika, ndre mahatsapa aza hoe tsy maeva hampisehoany fitiava. Manino tsika ro mivola ani-zay? Lafa nanao fanohara mikasiky an’ny anaky adala iny Jesosy, le nampitoviziny amy baba raiky soa fanahy Jehovah. Nahatsapa ty raiky amy anakilahin’ny nahoda iny hoe tsy maeva himpoly miaraky amy ty fianakaviany sasy ie, satria nanao hadisoa. Fe ino ty nataon’ny nahoda iny lafa noly an-trano any anakilahiny iny? Nivola Jesosy hoe laha vo nahajilo azy baka lavitsy eny nahoda iny, le ‘nilailay nandrakoky an’ny anakilahiny iny sady nanoroky azy.’ (Lioka 15:17-20) Manahaky an’ny baba soa fanahy io Jehovah. Mety halahelo na ho kivy marè ty olo sisany satria miasa loha na manenjiky azy ty eritseritsiny. Laha vo mivavaky aminy olo rey, le mijanjy soa an-drozy Jehovah satria miambany ie. (Fitom. 3:19, 20) Ferinesan’i Jehovah rozy, le sahala milailay mamonjy an-drozy ie, mba hampahery noho hanome toky an-drozy hoe be fitiava noho mamindra fo ie. (Isaia 57:15) Lafa manao akory Jehovah ro sahala milailay mamonjy antsika? Matetiky ie mampiasa ty anti-panahy, ty longontsika manompo azy, na ty rahalahy noho anabavy hafa mba hanampy antsika. (Jak. 5:14, 15) Manao ani-zay Jehovah satria teany hifandramby marìny aminy tsika.

4. Akory ty nampisehoan’i Jesosy hoe mora ifandrambesa ie?

⁴ Miambany manahaky an’ny Babany Jesosy. Ka lafa tan-tany tetoy amy zay ie, le nitean’olo ty nifandramby aminy. Tsy nisalasala nametraky fanontanea taminy rozy. (Mar. 4:10, 11) Lafa nanontany ty hevitsin-drozy koa Jesosy, le niresaky ty raha am-pon-drozy ao rozy. (Mat. 16:13-16) Ndre nanao hadisoa aza rozy, le tsy natahotsy marè, satria hain-drozy hoe soa fanahy Jesosy, manam-pahareta, sady azony soa ty raha mahazo an-drozy. (Mat. 17:24-27) Nanahaky an’ny Babany vatany Jesosy, ka nanampy ty mpanori-dia azy hahay soa an’i Jehovah raha zay. (Jaona 14:9) Lasa nihain-drozy hoe miambany noho mora ifandrambesa Jehovah. Tsy sarotsarotsiny ie, na mirengeringy, na miavonavo manahaky ty mpitariky fivavaha tamy fotoa zay.

5. Manino ty fiambanea ro manampy antsika ho mora ifandrambesa?

⁵ Akory ty anahafantsika an’i Jehovah? Lafa miezaky hiambany tsika, le vomaiky ho mora ifandrambesa. Laha tsy miambany tsika le hialona, hirengirengy noho tsy hanenga hadisoa. Ihatakatahan’olo tsika laha mana an’ny toetsy reo. Fa laha miambany tsika le ho soa fanahy, hanam-pahareta, noho hanenga hadisoa. Tean’olo inamà tsika laha mana an’ny toetsy reo. (Kol. 3:12-14) Tokony hiezaky ho mora ifandrambesa tsika, sirtò ty anti-panahy. Mila mifankahita matetiky amy rahalahy noho anabavy reo rozy mba hahavitan-drozy ani-zay. Tokony hiezaky hanatriky fivoria mivanta, ohatsy, rozy fa tsy ho tea manaraky fivoria baka an-trano any avao. Laha mbo azon-drozy atao koa, le tokony handeha hanompo miaraky amy rahalahy noho anabavy reo rozy. Lafa mifankazatsy soa amy anti-panahy ty olo amy fiangona eo, le tsy hisalasala hangataky fanampea amin-drozy.

MANDEFITSY JEHOVAH

6-7. Manomeza ohatsy ahità hoe parè handefitsy Jehovah lafa mangataky aminy ty mpanompony.

⁶ Tsy manekineky hiova hevitsy ty olo manambony tena. Tsy manahaky ani-zay Jehovah, ndre ie aza ro farany anabo amy kila raha iaby zao. Mahay mandanjalanja ie, zany hoe mandefitsy. Ahitantsika ani-zay ty tantaran’i Miriama anabavin’i Mosesy. Nimenimeny tamy Mosesy rozy amy Arona. Tsy nanaja an’i Jehovah rozy lafa nanao ani-zay, satria solontenan’i Jehovah, Mosesy. Neloky tamy Miriama amy zay Jehovah, ka nataony boka ie. Fe lafa nitaray Arona, le nisoloho amy Jehovah, Mosesy, mba hanafaky an’ny habokan’i Miriama iny. Ino amy zay ty nataon’i Jehovah? Laha olo nanambony tena aloha, le tsy ho niova hevitsy mihintsy. Fe tsy nanao ho zay Jehovah satria miambany. Nandefitsy tamy Miriama ie, le nitaha azy.​—Nom. 12:1-15.

⁷ Nasehon’i Jehovah koa hoe niambany ie, lafa nijanjy an’i Hezekia Mpanjaka. Naniraky mpaminany Jehovah mba hivola aminy hoe hahafaty azy aretiny iny. Nitany amy zay Hezekia, ka nisoloho amy Jehovah mba hitaha azy. Nisoa fanahy taminy Jehovah, ka nijanjy ty fangatahany, le nampeany 15 tao ty andro niainany. (2 Mpanj. 20:1, 5, 6) Miambany vatany Jehovah ka miferinay noho mandefitsy.

8. Ino iaby ty mampiseho hoe mandefitsy Jesosy? (Marka 3:1-6)

⁸ Miambany manahaky an’ny Babany Jesosy. Nanao raha soa amin’olo avao Jesosy tamy ie tan-tany etoy, lafa nihitany hoe mbo azony atao raha zay. Nitaha olo tamy andro Sabata, ohatsy, ie ndre nanohitsy azy azy mpitariky fivavaha tsy miferinay olo rey. (Vakio Marka 3:1-6.) Mbo soa fanahy noho mandefitsy avao Jesosy henanizao, lafa mitariky ty fiangona Kristiana. Lafa misy manao fahotà bevata, ohatsy, amy fiangona eo, le manam-pahareta aminy ie, ka manome fotoa ampy mba hahafahany miova.​—Apok. 2:2-5.

9. Akory ty ampisehoantsika hoe mahay mandanjalanja tsika? (Henteo koa sary reo.)

⁹ Akory ty anahafantsika an’i Jehovah? Soa laha miambany tsika ka hiezaky handefitsy manahaky an’i Jehovah, ndre amy ty raha eritseretintsika zay, ndre amy ty raha ataontsika. (Jak. 3:17) Manahaky an’i Jehovah, ohatsy, ty ray aman-dreny laha ze raha mety ho vitan’ny anany avao ro ampanaoviny azy, arakaraky ty taony. Lafa manao ani-zay rozy le mahay mandanjalanja, na mandefitsy. Nanao ani-zay tamy anany rey Jakoba, laha hentea ty Genesisy 33:12-14. Tokony hotiarovin’ny ray aman-dreny koa hoe tsy mitovy ty raha mety ho vitan’ny anany rey, ka tsy tokony hampitahany rozy. Tokony handefitsy koa ty anti-panahy. Manao ani-zay rozy laha maneky ty hevitsy tampakin’ny ankamaroan’ny anti-panahy, laha mbo tsy mandika ty torolalan’ny Baiboly. (1 Tim. 3:2, 3) Afaky manao manahaky ani-zay koa tsika, ka hiezaky hahatakatsy ty hevitsin’olo hafa, ndre tsy mitovy hevitsy aminy aza tsika. (Rom. 14:1) Tokony hiezaky zany ty olo iaby amy fiangona eo mba “ho hain’olo iaby hoe mahay mandanjalanja” rozy.​—Fil. 4:5.

MANAM-PAHARETA JEHOVAH

10. Manino ty tantaran’i Noa noho Abrahama ro mampiseho hoe manam-pahareta Jehovah?

¹⁰ Ambinao va hoe tsy tean’olo manambony tena ty hoe ampandinasy? Tsy mahaliny raha rozy. Mifanohitsy tanteraky amy zay Jehovah satria tsy misy manam-pahareta mandilatsy azy! Tamy andron’i Noa, ohatsy, le nivola Jehovah fa handiny 120 tao ie, zay vo handripaky ty raty fanahy. (Gen. 6:3) Nanam-potoa hitezà an’ny anany rey noho hanamboara an’ny sambofiara iny miaraky amy ty fianakaviany Noa. Tafara tatoy, le naniraky anjely Jehovah, mba hiresaky amy Abrahama hoe haripaky Sodoma noho Gomora. Nametraky fanontanea maro mikasiky ani-zay Abrahama, fe nanam-pahareta nijanjy azy anjely iny. Laha olo manambony tena ro nataony ani-zay, le ho nanao ho zao hoe: “Ataonao tsy haiko va ty tokony hataoko?” Fe nanahaky an’i Jehovah anjely iny, ka nanam-pahareta tamy Abrahama.​—Gen. 18:20-33.

11. Manino Jehovah ro manam-pahareta amintsika laha hentea ty 2 Petera 3:9?

¹¹ Mbo manam-pahareta avao Jehovah zisiky henanizao. Mandiny avao ie zisiky hiavian’ny fotoa hanamperany ty raha raty iaby. Manino ie ro manam-pahareta? “Satria tsy teany hisy ho ripaky ty olo fa teany hibebaky iaby.” (Vakio 2 Petera 3:9.) Misera avao va ty faharetan’i Jehovah? Aha! Fa an-tapitrisany henanizao ty olo nifandramby marìny aminy, le mitamà tsika fa mbo hisy olo an-tapitrisany maro hanao ho zay koa. Fe tsy hoe handiny avao zisiky farany Jehovah. Teany ty olombelo, fe tsy maintsy hanao raha ie, fa tsy hengany ho eo avao zisiky farany ty raty fanahy.​—Hab. 2:3.

12. Manino tsika ro mivola hoe manam-pahareta manahaky an’ny Babany Jesosy?

¹² Miambany manahaky an’ny Babany Jesosy. Nanam-pahareta manahaky an’ny Babany Jesosy, tanatin’ny anarivony tao. Namoro vandy mikasiky an’i Jehovah noho ty mpanompony tsy nivaliky Satana, le nanatri-maso an’ny raha rey Jesosy. (Gen. 3:4, 5; Joba 1:11; Apok. 12:10) Nihitany koa hoe tena niaritsy fijalea maro ty olombelo. Azo antoky hoe tena fa tsy linin’i Jesosy ty “handrava ty asan’ny Devoly”! (1 Jaona 3:8) Fe mbo mandiny ty fotoa mety amy Jehovah ie. Ino ty manampy azy hahaliny? Mahaliny ie satria miambany. Matoky ie hoe Jehovah ro mana fahefà hamaritsy ty fotoa tena mety hiavian’ny farany.​—Asa. 1:7.

13. Akory ty nampisehoan’i Jesosy hoe nanam-pahareta tamy apostoliny reo ie, le ino ty antony?

¹³ Nanam-pahareta tamy apostoliny rey koa Jesosy tamy ie tan-tany etoy. Matetiky mihintsy apostoliny reo ro nialy varotsy hoe ia ty farany anabo amin-drozy, fe tsy niangoay amin-drozy ie. Nanam-pahareta amin-drozy avao Jesosy. (Lioka 9:46; 22:24-27) Natoky ie hoe mbo hiova avao rozy lafa mandeha ty fotoa. Fa nahatsapa koa va iha hoe nampimpolimpoly fahadisoa raiky avao? Tsy mahafalifaly anao va ty mahay hoe mana Mpanjaka miambany noho manam-pahareta iha?

14. Ino ty hanampy antsika hanam-pahareta?

¹⁴ Akory ty anahafantsika an’i Jehovah? Laha ta hiambany noho hanam-pahareta manahaky an’i Jehovah tsika, le mila mana ty “sain’i Kristy.” (1 Kor. 2:16) Ino ty hanampy antsika hitovy hevitsy amy Kristy? Tsy mandehandeha hoazy raha zay. Mila mamaky ty tantaran’i Jesosy amy Baiboly ao tsika, le manoka fotoa mba hametsevetsea ty raha nataony noho ty antony nanaovany ani-zay. Mila mivavaky amy Jehovah koa tsika mba hanampy antsika hiambany noho hanam-pahareta manahaky an’i Jesosy. Lafa mitovy hevitsy amy Kristy tsika, le vomaiky hanahaky a Ndranahary, ka hanam-pahareta amy ty vatantsika noho ty mpiara-manompo amintsika.​—Mat. 18:26-30, 35.

HITAN’I JEHOVAH TY OLO MIAMBANY

15. Ino ty porofo hoe “manenty ty olo miambany” Jehovah? (Salamo 138:6)

¹⁵ Vakio Salamo 138:6. Lafovily amy Jehovah ty olo miambany. Voninahitsy bevata raha zay, satria ie ro farany anabo amy kila raha iaby zao! Bakanibakany zay, le maro ty olo eritseretin’olo hoe ambany, fe voamarikin’i Jehovah rozy. Mety tsy de haintsika soa ty sisany amin-drozy, fe nampanoratiny amy Baiboly ao. Nampanoratin’i Jehovah an’i Mosesy, ohatsy, ty anaran’ny mpanompovavy raiky kaihy hoe Debora. Nanompo tamy fianakavian’Isaka noho Jakoba ao ie tanatin’ny 125 tao! Kelikely avao ty raha haintsika mikasiky an’ny ampela tsy nivaliky io, fe voamarikin’i Jehovah ie, ka nampanoratiny amy Baiboly ao ty fitiavan’olo azy. (Gen. 24:59; 35:8, f.a.p.) Tao maro tafara atoy, le nisy pamaraky mpiarak’aondry mana anara hoe Davida, nifilin’i Jehovah ho mpanjakan’Israely. (2 Sam. 22:1, 36) Tafara kelikelin’ny nahaterahan’i Jesosy koa, le naniraky anjely Jehovah mba hiresaky amy mpiarak’aondry rezay. Namean’i Jehovah voninahitsy rozy, satria rozy ro nanambarà voalohany hoe teraky a Betlehema ao ty Mesia. (Lioka 2:8-11) Fa antitsy Simeona noho Ana lafa nanday an’i Jesosy amy tempoly ao Josefa noho Maria, fe namean’i Jehovah tombontsoa hahita an’ny Mesia iny koa rozy. (Lioka 2:25-30, 36-38) Marina vatany hoe “ndre anabo aza Jehovah, le manenty ty olo miambany”!

16. Akory ty nanahafan’i Jesosy an’ny Babany lafa nifandramby amin’olo ie?

¹⁶ Miambany manahaky an’ny Babany Jesosy. Nanahaky an’ny Babany Jesosy, ka nanome voninahitsy ty olo ambany. Nampianariny ty ‘olo tsotra noho tsy nianatsy’ mba hahay ty marina mikasiky ty Fanjakà-Ndranahary. (Asa. 4:13; Mat. 11:25) Lafa nitaha ty marary koa Jesosy, le nasehony hoe nidary noho nanaja an-drozy ie. (Lioka 5:13) Tamy haly talohan’ny nahafatesany iny, le nanao ty asan’ny mpanompo Jesosy ka nanasa ty tombokin’ny apostoliny rey. (Jaona 13:5) Lafa hiakatsy an-danitsy any amy zay ie, le nameany tombontsoa bevata ty mpanori-dia azy iaby. Naniraky antsika ie mba hanampy ty olo hahazo fiaina zisiky farany.​—Mat. 28:19, 20.

17. Akory ty azontsika anomeza voninahitsy olo? (Henteo koa sary io.)

¹⁷ Akory ty anahafantsika an’i Jehovah? Manome voninahitsy olo tsika lafa mitory ty vaovao soa amy ze mijanjy antsika, ndre ino ndre ino ty karazany, ty fari-painany, na ty fahaizany. Ameantsika voninahitsy koa rahalahy noho anabavintsika reo, ka ataontsika anabo mandilatsy antsika, ndre ino ndre ino ty fahaiza na tombontsoam-panompoa ananantsika. (Fil. 2:3) “Voalohany” amy fanomeza voninahitsy ty hafa tsika lafa manao raha manahaky ani-reo. Mampifalifaly an’i Jehovah raha zay, satria hitany hoe miambany tsika.​—Rom. 12:10; Zef. 3:12.

18. Manino iha ro ta hiambany manahaky an’i Jehovah?

¹⁸ Laha miezaky hiambany manahaky an’ny Babantsika an-danitsy any iny tsika, le vomaiky ho mora ifandrambesa, handefitsy, noho hanam-pahareta. Hanome voninahitsy ty hafa manahaky an’i Jehovah koa tsika. Loniky lahy tsika hiezaky avao mba hiambany manahaky an’ny Ndranaharintsika iny. Vomaiky ho lafovily anatrehany eo tsika laha manao ani-zay!​—Isaia 43:4.