Tiaronao Va?

Nivakinao soa va Tilikambo Fiambena faramparany rey? Henteo moa vasa hainao ty mamaly an’ny fanontanea retoa:

Manino tsika ro manome voninahitsy an’i Jehovah?

Manome voninahitsy an’i Jehovah tsika satria tena manaja azy noho tena tea azy. Manome voninahitsy an’i Jehovah koa tsika satria teantsika hahay azy ty olo.​—w25.01, p. 3.

Lafa misy olo manao raha mampeloky anao, ino ty azonao atao mba ho parè hanenga hadisoa iha?

Tsy hoe manamaiva ty fihetseham-pontsika avao tsika, fa laha manapa-kevitsy tsy heloky amin’olo iny noho tsy hitanjaky lolompo sasy tsika, le miaro ty fontsika tsy ho simba.​—w25.02, p. 15-16.

Manino Marka ro modely soa ho an’ny rahalahy tanora?

Parè avao Marka lafa nisy asa fanompoa nampanaovy azy. Mety ho nalahelo noho diso fanantenà ie fe tsy nataony hahakivy azy raha zay. Ninama amy Paoly noho amin’olo matotsy hafa koa ie.​—w25.04, p. 27.

Ino ty tean’i Jesosy hovolany lafa nivavaky ie hoe: “Fa nambarako an-drozy ty anaranao”? (Jaona 17:26)

Fa nahay ty anara-Ndranahary mpianatsiny rey. Fe nampean’i Jesosy rozy mba hahay soa an’i Jehovah, zany hoe hahay ty maha ie azy. Tafilitsy amy zay ty raha teany hatao, ty raha fa nataony noho mbo hataony, noho ty toetsiny.​—w25.05, p. 20-21.

Ino ty raha ekèntsika laha miambany tsika?

Laha miambany tsika le hieky hoe misy raha tsy haintsika. Tsy haintsika, ohatsy, hoe ombia ty hiavian’ny farany, le ino ty raha mety hataon’i Jehovah amy fotoa zay. Tsy haintsika koa hoe ino ty raha hiseho hamaray na ino iaby ty raha hain’i Jehovah mikasiky antsika.​— w25.06, p. 15-18.

Ino ty azontsika atao mba hahasoa antsika ty lahatsoratsy vakintsika na ty lahateny ho ahi-ty maro?

Azontsika atao ty mieritseritsy hoe: ‘Ino ty porofo ampiasà etoa mba handresea lahatsy olo? Misy fanohara mety soa azoko ampiasà va lafa mampianatsy aho? Ia ty mety ho kinto amy foto-kevitsy toy?’​—w25.07, p. 19.

Ino ty ianarantsika mikasiky ty fomba anengàn’i Jehovah hadisoa laha hentea ty tantaran’i Davida?

Nanao fahotà bevata Davida, fe tena nibebaky ie ka nanenga ty fahotany Jehovah. (1 Mpanj. 9:4, 5) Lafa manenga hadisoa Jehovah, le tsy ifantohany sasy ze fahotà fa nengàny.​— w25.08, p. 17.

Ino ty azonao atao laha misy hevitsy raiky tsy takatsin’olo ampianarinao Baiboly?

Laha fa nanazava soa an’ny hevitsy iny baka amy Baiboly ao iha fe mbo tsy azony, le tohizo avao tse fianara iny. Afaky impolianareo ndraiky raha zay afarafara ao.​—w25.09, p. 24.

Mivola ty Baiboly hoe ‘mahavita mamitaky ty ota.’ (Heb. 3:13) Ino ty teany hovolany?

Mitariky antsika hanao raha raty ty ota sady mety hahavy antsika hisalasala hoe tea antsika va Jehovah sa tsy tea antsika.​—w25.10, p. 16.

Ino ty raha telo azonao atao mba hanampy anao hifandramby marìny amy Jehovah ty vavaky ataonao?

1) Vetsevetseo ty toetsin’i Jehovah. 2) Eritsereto hoe ino ty raha sarotsy atrehinao le resaho raha zay. Azonao resahy, ohatsy, laha misy olo tokony hengànao ty hadisoany. 3) Ka malisalisa lafa mivavaky. Hahavita hiresaky ty raha am-ponao noho an-tsainao ao iha amy zay.​—w25.10, p. 19-20.

Ino ty azontsika atao mba hanampea ty be tao?

Azontsika tsidihy na kaihy ty be tao. Afaky miaraky amin-drozy koa tsika lafa handeha amy dokotera rozy. Afaky miaraky manompo amin-drozy amy fomba sankarazany koa tsika.​—w25.11, p. 6-7.

Ino iaby ty azo atao mba hanome voninahitsy an’i Jehovah ty mariazy?

Oriho ty lalàna apetrakin’ny fanjakà. Anovo ze hahità ty vokatsin’ny fanahi-Ndranahary laha hanao fety na fiaraha misakafo. Ka manao akanjo tafahoatsy, le ialao ty fombafomba tsy mifanaraky amy Soratsy Masy. Mifampiresaha soa lafa manoma mariazy.​—w25.12, p. 21-24.