Lau Faalogo—O se Meaalofa e Ao Ona Faapelepeleina

O SE afiafi valevalenoa i se atunuu, o loo mamao ese mai le pisapisao o isi gaogaosa eseese o loo tutupu, e maua ai sina avanoa e faalogologo ai ma le olioli i leo mālie o le po. O le agi mai o le fisaga o loo paʻō ai le felueaʻi o lau o laau. Ua faaopoopo mai foi i ai ma leo o iniseti ninii, o manu felelei, ma manu vaefa. Maeu se lagona matagofie i le faalogo atu i na leo mālie! Po o mafai ona e faalogoina na leo?

E ofoofogia lava mea e mafai ona maua i le faalogo a le tagata. Ia faaalu se ʻafa itula e te nofo ai i totonu o se potu e lē mafai ona maua ai ni siuleo—se potu o loo faatulaga ese ua iai ni ona puipui ua fuafua ina ia mitiia uma ai leo—ona e iloa lea o le a faasolosolo mālie lava ona ‘faateleina lou lagonaina o mea’ ua mafai ai loa ona amata ona e lagonaina nisi leo sa lē masani ona e lagona, o ni leo o loo pogai mai i totonu lava o lou tino. O F. Alton Everest o se saienitisi e suesueina leo (acoustic scientist), ua ia faamatalaina mai le mea e tupu i le tusi The Master Handbook of Acoustics. Muamua, e oo ina leotele lava i se tulaga e mafai ona lagonaina le tātā mai o lou fatu. Pe a mavae le tusa ma se itula talu ona e iai i totonu o le potu, ona e lagonaina lea o le fetafeai solo o lou toto i totonu o alātoto. Ma le mea mulimuli, pe afai e lelei tele lau faalogo, “o le a tauia lou onosai i se isi leo faatopetope e lē masani aʻi, e lagonaina i le va o le leo o le ‘tātā’ o le fatu ma le leo o le fetafeai o le toto. O le ā lena leo? O le leo o vaega ninii o le ea o loo taia ai tagipalau o ou taliga,” o le faamatalaga lea a Everest. “O le leo lea e maua ona o le taia o nei vaega ninii o le ea i tagipalau o ou taliga e matuā ninii lava—e na o le 1/100 o le vaemiliona o se senitimita!” O le “amataga lena o le faalogo,” o se vaega aupito itiiti e mafai ona e pueina ai leo. E lē aogā mo oe se faaopoopoga atili o lou mafai ona e lagonaina o nisi leo, auā o lona uiga e oo lava i ni leo laiti o le a lē lagona talu ai le pisapisao o le fegaoioiai o vaega ninii o le ea lea e taia ai tagipalau o ou taliga.

Ua mafai ona lagonaina leo ona o le gaoioiga faifaatasi a le lautaliga, le vaega ogatotonu, ma le vaega pito i totonu o le taliga, faatasi ai ma le malosi o loo i o tatou neura ma le faiʻai lea e faamalamalama ma faailoa ai se leo. O le leo e alu i le ea a o fesuisuiai ona aave. O nei aave e māfua ai ona fegaoioiai i luma ma tua tagipalau o o tatou taliga, ma o lenei gaoioiga, e faasolo atu e le vaega ogatotonu o le taliga i le vaega pito i totonu. O iina loa e liliuina ai le gaoioiga lea i faalogona o neura po o musele, lea e faauiga e le faiʻai e faapea o le leo.a

Le Vaega Tāua a le Lautaliga o Lou Taliga

O le vaega pito i fafo o lou taliga lea e lavelave ona fegauiaʻiga e taʻua o le pinna (lautaliga). O le lautaliga na te aoaoina maia le leo, ae iai foi ma isi mea na te faia. Po ua e tau mānatu ea pe aisea e tele ai vaega laiti e fegauiaʻi i lou taliga? O ave o le leo lena o loo taia i vaega eseese o le lautaliga e faia i ai ni suiga lilo e tusa ma le pito e taia ai a o oo atu i totonu. E mafai e le faiʻai ona faaliliu nei fesuiaiga e matuā laiti o se leo, ma iloa ai po o fea o iai le tulaga e faapogaia mai ai le leo. E faia e le faiʻai lenei mea e faaopoopo atu i le faatusatusaina o le taimi ma le malosi o se leo a o ulu i totonu o ou taliga uma e lua.

Ina ia faataitai lenei mea, seʻi tago foi e faagapā ou tamatamailima ma ave i luga ma lalo i luma tonu lava o se tagata o loo moeiini ona mata. E ui o loo tutusa lelei le mamao o ou tamatamailima mai ona taliga uma e lua, ae o le a mafai lava e lena tagata o loo moeiini ona ia iloa po o le leo o loo sau mai luga, lalo, po o se isi lava mea i le va lena. O le mea moni, e oo lava i se tagata e na o le tasi sona taliga o lelei ai lana faalogo, e mafai lava ona ia iloa le mea o loo sau ai le leo.

Le Vaega Ogatotonu o Lou Taliga —Se Gaoioiga Ofoofogia

O le galuega autū a le vaega ogatotonu o lou taliga o le faaoo atu o gaoioiga a le tagipalau o lou taliga i le suavai lea o loo tumu ai le vaega pito i totonu o lou taliga. E sili atu ona mamafa lena suavai nai lo le ea. O lea, e pei ona moni i le tulaga o se tagata tietie uila vilivae o loo agaʻi atu lana uila i luga o se aʻega e faigata ona aʻea, e manaomia le ‘fetuunaiga saʻo o le kia’ ina ia faaliliu atu ai le malosi i se auala e sili ai ona aogā. I le vaega ogatotonu o le taliga, o le malosi lea e faasolo mai le tagipalau o le taliga, o loo faasolo mai e ni ponaivi laiti se tolu, e masani lava ona taʻua o le hammer, le anvil, ma le stirrup, e fesootai atu nei igoa i foliga mai o na mea. O le fesootaia o nei vaega iti ua maua ai se ‘fetuunaiga saʻo o le kia’ lea e toetoe lava atoatoa lona fetaui mo le vaega pito i totonu o le taliga. Ua fuafuaina faapea pe ana leai lenei fetuunaiga, semanū e lē mauaina le 97 pasene o le malosi o le leo!

E lua ni musele faaeteetegata lava o loo pipii atu i le fetaulaiga o musele i totonu o le vaega ogatotonu o lou taliga. I totonu o le vaeselau o se sekone o le vaega o lou taliga lea na te apoina se leo telē ae itiiti ona ave, e otometi ai lava ona faamalō nei musele, ona matuā taofiofia ai lava lea o le fegasoloaʻiga o le vaega o loo fesootai uma i ai musele, ma taofia ai loa se faaleagaina e ono oo i lau faalogo. O lenei gaoioiga e vave lava ona puipuia ai oe mai leo tetele uma o loo lagonaina i le natura o mea, ae e lē puipuia ai mai nisi o leo o masini ma mea faaelekitoronika. E lē gata i lea, e mafai e musele laiti ona latou taofiofia lenei vaega tau puipuiga mo se umi e oo atu i le sefulu minute. Peitai ua avatu ai e lenei mea ia te oe se avanoa e te alu ese ai mai se leo o loo faatiga i ou taliga. O le mea e mataina, pe afai e te tautala, ona momoli atu lea e lou faiʻai ni faailoilo i nei musele ina ia faaitiitia ai le malosi o lou lagonaina o mea, ina ia lē soona leotele ai lou lava leo mo lau faalogo.

Le Vaega Ofoofogia Pito i Totonu o Lou Taliga

O le vaega o le pito i totonu o lou taliga lea o loo aafia ai i le lagonaina o mea, o loo iai iina le cochlea, ua faaigoaina faapena ona o lona foliga mai e pei o se atigi sisi. O le ponaivi lea o loo puipuia lea gaoioiga faaeteetegata, o le ponaivi lena e sili ona malō o lou tino. I totonu o lona lavelave o loo maua i ai le basilar membrane, o se tasi o tisu (tissue) mai le tele o tisu o loo vaevaeina ai le umi o le cochlea e avea ma ni tamai vaega. O iina i le basilar membrane o loo iai le organ of Corti, lea e lagolagoina le faitau afe o sela o fulufulu—o sela o neura e iai o latou iu e pei o ni lauulu o loo papai atu i le suavai lea ua tumu ai le cochlea.

Pe a oo atu ina fesoloai le gaoioiga a ponaivi o le vaega ogatotonu o le taliga i le oval window o le cochlea, ona faapogaia ai lea o galugalu i totonu o le suavai. O nei galugalu e faagaoioia ai membranes, e pei lava o ni tamai galugalu i se vaituloto ona faagaoioia ai le opeopea o ni laulaau i luga ma lalo. O galugalu na latou te uunaia le basilar membrane i fegauiaʻiga e fetaui atu i nisi o ave malosi o leo. I na vaipanoa, o le a fegauiaʻi atu ai sela o fulufulu i le tectorial membrane i luga aʻe. O lenei fepaʻiaʻiga e faateia ai sela o fulufulu, ma o le iuga, e faatupu ai se gaoioiga e oo atu ai lena malosi i lou faiʻai. O le malosi lava la o le leo, o le tele foi lena o sela o fulufulu e faagaoioia ma o le vave foi lena o lo latou gaoioi. Ona maua ai loa lea e le faiʻai se leo leotele.

Lou Faiʻai ma le Faalogo

O lou faiʻai o se itu pito sili lea ona tāua o le vaega o lou tino o loo lagonaina leo. O loo iai se tomai ofoofogia e suia ai le anoanoai o faamatalaga e ala mai i gaoioiga o ni uunaiga o neura ma avea ai ma malamalamaga e avea ma leo. O lenei galuega tele a le faiʻai ua faaalia manino mai ai le sootaga faapitoa i le va o mafaufauga ma le faalogo, o se fesootaiga o loo suesueina i le mataupu ua taʻua o le psychoacoustics. Mo se faaaoaoga, o lou faiʻai ua mafai ai ona e lagonaina se talanoaga se tasi mai le tele o ni talanoaga a ni tagata o loo tumutumu i totonu o se potu. E lē o maua i se mea faaleoteleleo lenei tomai, o lea e toetoe ina a lē mafai ona malamalama i se lipine e pueina i totonu o le potu lava lea.

O le faatiga taliga e māfua ona o ni leo e lē o fia faalogoina, ua faataitaia ai foi se isi vala o lenei fesootaiga. E tusa lava po o le ā le maulalo o le malosi o se leo o loo iai, ae afai o loo mafai lava ona e lagonaina e ui ina e lē manao ai, e mafai lava ona faatiga taliga ia te oe. Mo se faaaoaoga, o le malosi o se leo o loo lagonaina mai se paipa o sinasina e matuā maulalo lava. Peitai e te iloa le matuā faatiga pe afai, ua leva le po, ae o loo fafagu ai pea lau moe e lea paʻō!

O le mea moni, e vavalalata le fesootaiga a o tatou faalogona ma la tatou faalogo. Seʻi tau ina manatu i āuga e oo i ai ona o se ʻata leotelē, po o le mafana e lagonaina mai sina upu faamaoni o lagona alofa pe faaviivii. I se tulaga tutusa, o le tele o ni mea tatou te aʻoaʻoina ma le tomai, e maua mai lea i mea o loo ui atu i totonu o o tatou taliga.

O se Meaalofa e Ao Ona Faapelepeleina

O le tele o mea mataina ua mafai ai ona maua la tatou faalogo e lei oo i ai se malamalama. Peitai o le malamalamaga faasaienitisi ua mauaina ua faalolotoina ai lo tatou talisapaia mo le atamai ma le alofa o loo faaalia mai ai. Ua tusi mai F. Alton Everest, o se tagata e suesueina vaega o le tino o loo lagonaina leo, e faapea: “I le iloiloina i se tulaga loloto o le vaega o le tino o le tagata lea na te lagonaina ai leo, e faigata ai tele ona sola ese mai le manatu e faapea, o ona faagaoioiga ma faatulagaga lavelave ua faaalia mai ai, e iai se tasi e alofa na aafia i lona fausaga mai.”

Sa lei maua e le tupu anamua o Tavita se poto faasaienitisi e pei ona iai i aso nei, e faatatau i gaoioiga o loo faagasolo i totonu o o tatou taliga ma lagonaina ai leo. Peitai, sa vaai ifo lava o ia i lona tino ma le tele o meaalofa o iai, ona ia vivii atu lea i lona Matai: “Na faia aʻu e ala ai ona matautia ma ofo tele ai.” (Salamo 139:14) O suesuega faasaienisi i mea ofoofogia ma mea lilo o le tino, e aofia ai le faalogo, ua faaopoopo atu lea i le faamaoniga e faapea, e moni lava upu a Tavita—e ofoofogia le auala na faia ai i tatou e Lē na Foafoaina Mea, o lē e atamai ma alofa!

[Faaopoopoga i lalo]

[Pusa i le itulau 20]

Fesoasoani mo i Latou ua Faaleagaina le Faalogo

O le faifai pea mo se taimi umi ona faalogologo i leo tetele e faapogaia ai se faaleagaina tumau o le faalogo. O le faia ma au masani le faalogologo i musika matuā leo tetele po o le faia o au galuega i autafa o ni meafaigaluega leoleoā e aunoa ma se mea o puipuia ai, e lē aogā lea. O mea ua faaaogā e faaleleia ai le faalogo e mafai ona maua ai sina fesoasoani mo i latou e lē atoatoa le faalogo, e oo lava i nisi na fananau mai e logonoa. Mo le toatele o tagata, o na mea faalogo ua mafai ai ona latou lagonaina le matalasi o leo eseese. Ina ua faapipii ni mea faalogo a se tasi tamaitai mo le uluai taimi lava, na ia lagonaina ai se leo uigaese i fafo atu o le faamalama o lona umukuka. “O leo o manufelelei!” o lana tala lea. “Ua fia tausaga ou te lē o toe faalogo i leo o manufelelei!”

E tusa lava foi pe lē o iai se mea matuia tele ua faaleagaina, peitai o le faasolo mai o le soifuaga matua e masani lava ona faaitiitia ai lo tatou tomai e puʻeina ai leo tetele. O se tulaga faanoanoa, ona o lenei faafitauli e aofia ai leo o konesane—o leo e masani ona tāua tele ina ia malamalama ai i ni tautalaga. O le mea lena atonu e avea ai ma faalavelave i tagata matutua pe a latou talanoa, le paʻōō mai o ni leo e masani ai i le aiga, e pei o le paʻō o se paipa o loo alu pea po o le paʻō o se pepa o loo nunumi, talu ai o loo iai i na paʻō ni ave malolosi e faalavelavea ai leo o konesane. E mafai e mea faalogo ona maua ai sina mapusaga, peitai e iai lava foi itu e lē lelei ai na mea faalogo. O se tasi o na lē lelei, ona e mafai ona matuā taugata ni mea faalogo o se ituaiga e sili ona lelei—e matuā lē gafatia lava e se tagata lautele i le tele o atunuu. Ma i so o se tulaga lava foi, e leai se mea faalogo e mafai ona ia toe faafoisia mai ia te oe le lelei atoatoa o lau faalogo. O le ā la e mafai ona fai?

O le faaalia o le magafagafa e mafai ona avea ma fesoasoani tele. A o lei talanoa atu i se tasi e logonoa, ia e faamautinoa o loo ia iloa o lea o le a fai atu sau tala. Taumafai e faasaga saʻo atu i le tagata. O le faia faapea e mafai ai ona ia iloa mai lou tino ma le gaoioi o ou laufofoga, ona ia lagona lelei ai lea o le malosi o leo o konesane o loo iai i au upu. Afai e mafai, ia sōsō tele atu i le tagata, ma ia faagesegese ma faamanino lau tautala; aua e te eē. O le mea moni lava o leo e soona leoleoā e faatiga tele i tagata ua leaga la latou faalogo. Pe afai e lē o malamalama se faamatalaga, ia taumafai e toe fetuunai le faaupuina nai lo le toe fai atu lava o upu ia. E faapena foi pe afai o lau faalogo ua lē o toe tutusa ma le mea sa masani aʻi, e mafai foi ona e faafaigofie mea mo isi ina ia mafai ai ona latou talanoa mai ia te oe, e ala i lou sōsō tele atu i le tagata o loo tautala ma ia e maua le onosai. O nei taumafaiga faaopoopo e tua lelei i ni faiā ua faaleleia, ma e mafai ona fesoasoani ia te oe e te malamalama ai i mea o loo iai i lou siomaga.

[Ata]

Pe a talanoa atu i se tagata ua logonoa, ia faasaga saʻo atu ia te ia ma tautala faagesegese atu i ai ma ia manino

[Siata i le itulau 19]

(Tagaʻi i le lomiga mo le ata atoa)

Lou Taliga

Lautaliga

Oval window

Neura mo le faalogo

Hammer (malleus)

Anvil (incus)

Stirrup (stapes)

Auditory canal

Tagipalau

Cochlea

Organ of Corti

Round window

Auditory nerve

Sela o fulufulu

Tectorial membrane

Nerve fibers

Basilar membrane