Molimau a Ieova i le Lalolagi Aoao—Le Atu Bahamas
O MALO o le Taupulega i Bahamas—o se atumotu e tusa ma le 3,000 motu ma motu laiti—e taatia mai e pei o se ulaamu o fofola atu e tusa ma le 550 maila po o le 900 kilomitaa o le sami faalanulauava i le va o Florida ma Cuba. Mai le 267,000 o loo aināina le atumotu, o loo tuputupu aʻe ai se vaega tele o ē folafolaina le Malo. O la latou pese o viiga, ua manatuaina ai le Isaia 42:10-12 e faapea: “Pepese ia Ieova i le pese fou, o lona viiga mai le tuluiga o le lalolagi, outou o e ō ifo i le sami, atoa ma e o tumu ai; outou nuu tu matafaga, ma e o nonofo ai. . . . latou te faataio mai tumutumu o mauga. Latou te avatu le faaneeneega ia Ieova, ma latou taʻu atu lona viiga i nuu tu matafaga.”
Luʻia le Faatuatuaga Fou
Ia Iulai 1992, na tuuina atu ai e se paeonia sauatoa (se tagata talaʻi sauatoa o le Malo) le fesoasoani mo suesuega faale-Tusi Paia E Mafai ona E Ola e Faavavau i Parataiso i Le Lalolagi, i se tagata faipisinisi la te masani. Ina ua uma ona faitau e le faipisinisi le tusi, ona fai ifo lea o ia ia te ia lava e faapea, ‘E tatau ona ou suesueina se mea e uiga i le tapuaiga lenei.’ I Aso Sa e lua na sosoo ai, na auai ai o ia i sauniga i Maota o le Malo e eseese e lua o Molimau a Ieova. Na sosoo ai ma le amataina o lana suesuega faale-Tusi Paia. Ae peitai, i le ono vaiaso talu ona amata ana lesona faale-Tusi Paia, ae mapuna aʻe loa se luʻi na tofotofoina ai lona faatuatuaga fou—o le faamanatuga o aso fanau.
Sa matuā aafia le aiga o le tagata faipisinisi i na faamanatuga, ae ona o le pele ia te ia o le Afioga a le Atua na uunaia ai o ia e faaauau ana lesona faale-Tusi Paia. A o faateleina lona poto i upu moni o le Tusi Paia, sa faapena foi ona tele ai ma lona malamalama i faamanatuga o aso fanau ma aso malōlō faalelalolagi, ma le silasila a Ieova e uiga i ai.
Ina ua fuafuaina e le avā a lenei tamaloa se aufaatasiga mo le Aso o Tamā, na teena ma le faaaloalo e le tamaloa lona auai. E ui i lea, na manatu ai lana avā e faapea, ua lē o toe alofa lana tane ia te ia, ma ua ia faamuamuaina lana tapuaiga na i lo o ia ma le aiga. Na faamatalaina ma le agalelei e le tamaloa e faapea, o le faatatauina o mea na ia aʻoaʻoina mai le Tusi Paia, ua fesoasoani lea e suia ai o ia e avea o se tane ma o se tamā lelei. Mulimuli ane, sa tuputupu aʻe le talisapaia e lana avā o lona alofa i le upu moni o le Tusi Paia, ma ioe ai e suesueina le Tusi Paia. I le taimi nei, ua ia faia le suesuega faale-Tusi Paia a lona aiga. Ma maeu se olioli na ia te ia i le Tauaofiaga Itumalo o “Aʻoaʻoga Mai le Atua” i le tausaga faatoʻā mavae atu! Na auai lana avā ma lona afafine ma matamata atu i lona papatisoga.
Lagona e Ē Faimalaga mai e Nonofomau le Pese Fou
E faitauafe tagata e faimalaga mai Haiti e nonofomau ua faatasi atu i le sosaiete a tagata Bahama. E manaomia foi e i latou ona faalogo i le pese fou o le upu moni o le Malo. Ua matuā fiafia tele Molimau o loo nonofo i Bahama ina ua taunuu atu ni ulugalii se toalua e ʻafa Haiti ʻafa Amerika. Ua fesoasoani nei tagata e faamalosia vaega fou faa-Haiti sa faatoʻā amataina i le motu o Grand Bahama ma Abaco.
I le avea o se fesoasoani atili i tagata Haiti e naunau i le feau o le Malo, na faia ai le uluai tauaofiaga itumalo i le gagana Haiti i Bahama mai ia Iulai 31 e oo ia Aokuso 1, 1993. Na oo atu le aofai o ē na auai i le 214, faatasi ma le toatolu na tuuina atu i le papatisoga. O le toatele o tagata Haiti na aʻoaʻoina le upu moni i Bahama, ua toe foi atu nei i o latou nuu moni, po o le toe ō atu i se isi nofoaga e faaopoopo atu ai lo latou leo i Molimau o lena lava atunuu i le alagaina o viiga ia Ieova.
[Pusa i le itulau 8]
FAAMAUMAUGA A LE ATUNUU
Tausaga Faaleauaunaga o le 1993a
TUMUTUMUGA O LE AU TALAʻI: 1,294
FAATATAUGA: 1 le Molimau i le 197
O Ē NA AUAI I LE FAAMANATUGA: 3,794
TUUFAATATAUGA O PAEONIA: 186
TUUFAATATAUGA O SUESUEGA FAALE-TUSI PAIA: 1,715
AOFAI O Ē NA PAPATISOINA: 79
AOFAI O FAAPOTOPOTOGA: 22
OFISA O LE LĀLĀ: NASSAU
[Faaopoopoga i lalo]
a Mo nisi faamatalaga faaopoopo, tagai i le 1994 Calendar of Jehovah’s Witnesses.
[Ata i le itulau 9]
Le uluai Maota o le Malo, ma le ofisa o le lālā ma le fale misionare
[Ata i le itulau 9]
O Molimau o loo maelega i le faalauiloaina o le tala lelei
[Ata i le itulau 9]
O Milton G. Henschel ma Nathan H. Knorr faatasi ma misionare i Nassau i le 45 tausaga ua mavae
[Ata i le itulau 9]
O le ofisa fou o le lālā, na umusaina ia Fepuari 8, 1992