50 Tausaga i le Auaunaga Faataimi Atoa

E TOʻASEFULU la matou fanauga, ma na matou feola aʻe i se vaipanoa i North Ostrobothnia i Finilani. Sa iai sa matou faatoʻaga. E ui ina mamao ese lo matou fale mai le nofoaga sa aafia i le Taua Lona Lua a le Lalolagi, ae na matou iloa le tulaga pagatia sa iai tagata. I se tasi pō, sa faatamaʻia ai aai o Oulu ma Kalajoki i ni pomu. Na aʻoaʻo e o matou mātua i matou e lalafi pe a vaaia ni vaalele tau. Na faamatalaina e lo matou tuagane matua o Tauno se lalolagi parataiso o le a lē toe iai ni mafatiaga. Sa matou fia iloa atili e faatatau i lenā parataiso.

Na maua e Tauno le upu moni i le 14 o ona tausaga, e ala i le faitauina o lomiga a Tagata Aʻoga o le Tusi Paia. O mea na ia aʻoaʻoina mai le Tusi Paia, na ia lē auai ai i vaegaau i le Taua Lona Lua a le Lalolagi. Sa faafalepuipui ma sauāina o ia, ae e leʻi faavaivai ai mai le auaunaga. Sa faaalu le tele o lona taimi i le faiva ina ua faasaʻolotoina o ia mai le falepuipui. O le faaaʻoaʻoga lelei a Tauno, na uunaʻia ai i matou e auai i sauniga sa faia i le isi nuu. E matou te totōina aniani, tau mai berries, ma suʻiina ofu mo o matou tuaoi, ina ia maua ai se seleni mo le tauaofiaga. O le tele o galuega e faia i le faatoʻaga, e lē mafai ai ona matou auai uma i se tauaofiaga.

Na faamalosia lo ma alofa mo Ieova, ona o mea na ma aʻoaʻoina e faatatau iā te ia ma ana fuafuaga. Na ma papatiso i le 1947, ina ua 15 tausaga o Annikki ae 17 tausaga o Aili. O le tausaga foʻi lenā na papatiso ai le isi o ma uso e igoa iā Saimi. Sa iai foʻi le isi o ma uso e igoa iā Linnea, ma na faia faatasi la matou suʻesuʻega. Na avea o ia ma lona aiga o ni Molimau a Ieova. Ina ua māeʻa ona ma papatiso, na ma filifili loa e paeonia lagolago mai lea taimi i lea taimi.

AUAUNAGA FAATAIMI ATOA

I le 1955, na ma siitia ai i le aai o Kemi. E ui sa ma faigaluega, ae sa fia avea i maʻua o ni paeonia. Peitaʻi, na ma popole i lē lava se tupe maua, pe afai e faaitiitia o ma aso faigaluega. Sa ma mafaufau e tatau ona faia se ma teugātupe. O le māfuaaga lea na fesoasoani mai ai le tuafafine lea na taʻua i le amataga. Na ma iloa ai e mafai ona ma paeonia. Nai lo o le faalagolago iā i maʻua po o ma aiga, e tatau ona ma maufaatuatuaina le tausiga a Ieova.

Ua lava le tupe e fai ai la ma paeonia mo le lua masina. O lea iā Me 1957, na ma talosaga e avea ma paeonia mo le lua masina i Pello i Lapland, ma na ma lagona le popole. Sa totoe le tupe ina ua mavae le lua masina. O lea, na ma toe paeonia ai mo le isi lua masina. Peitaʻi, na totoe pea le tupe ina ua mavae lenā lua masina. Na ma talitonu ai o loo tausia i maʻua e Ieova. Ua 50 tausaga o ma paeonia, ae o loo iai pea lenā vaegātupe. E pei o loo taʻitaʻia i maʻua e Ieova ma faapea mai: “Aua e te fefe. Ou te fesoasoani iā te oe.”​—Isa. 41:13.

I le 1958, na talosagaina ai i maʻua e le ovasia o le matagaluega pe mafai ona ma siitia atu i Sodankylä i Lapland, e galulue ai o ni paeonia faapito. E na o le toʻatasi le tuafafine sa nofo ai i inā, ma e mataʻina le auala sa ia maua ai le upu moni. Sa alu lana tama tama i se malaga a le latou vasega i Helsinki, le laumua o Finilani. A o savalia e le vasega le aai, na ofoina ai e se tuafafine matua i le tamaitiiti se Olomatamata, ma fai i ai e ave i lona tinā. Ina ua faitau i ai lona tinā, na ia mautinoa o le upu moni lea.

Sa iai se fale e tipi ai laupapa i Sodankylä, ma sa iai se potu i le pito i luga o le fale. O i inā sa ma nonofo ai, ma faia ai foʻi sauniga. I le taimi muamua, e na o i matou ma le tuafafine ma lana tama teine le sauniga. E matou te faitauina mataupu ua uma ona faatulaga e talanoaina i sauniga i vaiaso taʻitasi. Mulimuli ane, sa galue i le fale tipi laupapa se tamāloa sa suʻesuʻe ma Molimau a Ieova. Na amata ona ia auai ma lona aiga i sauniga, ma papatiso mulimuli ane ai ma lana avā. Ua iai nei se uso e faia sauniga. Na auai foʻi i sauniga isi tamāloloa sa galulue i le fale tipi laupapa, ma maua ai le upu moni. E leʻi umi ae avea la matou vaega o se faapotopotoga.

TULAGA FAIGATĀ

E mamao vaipanoa e ma te faimalaga e talaʻi ai. Pe a oo i le tau māfanafana, e ma te savavali, faimalaga i uila vilivae, po o se vaa alo foʻi ina ia oo ai i tagata. Sa matuā aogā uila vilivae, auā sa mafai ona ma faimalaga ai i tauaofiaga, ma asiasi foʻi i o ma mātua. I le tau mālūlū, e ma te usu i le vaveao e faatali se pasi. E ma te faimalaga i isi nuu, ona savavali lea mai lea fale i lea fale. Pe a māeʻa lenā, ona ma savavali lea i le isi nuu. E iai taimi e lilofia ai le auala i le kiona, ma faigatā ai ona asā e tagata. O le tulaga foʻi lenā e iai, pe a oo ina liusuavai le ʻaisa i le tau e totogo ai mea.

I le vaitau mālūlū, e fai o ma ofu māfanafana, lua i le tolu pea totini, ma seevae (boots). E malo tiaʻa pito o o ma ofu ona o le kiona. Pe a tatala ese o ma seevae pe a oo i le fale o se aiga, e lilofia uma totonu i ʻaisa. Na faapea mai se tinā na feiloaʻi ai i le talaʻiga: ʻE mautinoa le malosi o lo oulua faatuatua, ona o le mafai ona lua talaʻi e ui i le leaga o le tau.’ E silia ma le 11 kilomita (7 maila) le mamao na ma savalia ina ia oo ai i le fale o lea fafine.

E ma te talosaga i tagata o le nuu i nisi taimi mo se nofoaga e api ai i le pō. E ui e lē taugatā fale o aiga, ae e latou te faaalia uiga faaleuō ma agalelei. E latou te saunia se mea e ma te momoe ai, faapea se taumafataga. O le tele o taimi e ma te momoe ai i luga o paʻu o manu, ae o nisi taimi e maua ai se potu. O se faataʻitaʻiga, sa ave i maʻua e se fafine i se potu o se fale telē, ma sa iai se moega ua uma ona saunia mo i maʻua. O le tele o taimi e matou te talatalanoa ai ma le aiga e faatatau i le Tusi Paia, seʻia oo i le leva o le pō. I se tasi o aiga, e momoe le ulugalii i le isi itu o le potu, ae ma te momoe i le isi itu. E tele fesili a le ulugalii e faatatau i le Tusi Paia, ma e faaauau pea seʻia oo i le vaveao.

NA TAUIA LA MA AUAUNAGA

O Lapland o se nofoaga matagofie. Peitaʻi, sa sili atu le matagofie o uiga o tagata sa aʻoaʻoina e faatatau iā Ieova. O nisi o tane na ma talaʻi i ai, sa siitia mai i Lapland e galulue e tātuu i lalo laau. E iai taimi e ma te ō ai i se fale e toʻatele tamāloloa e nonofo ai. E lotofaafetai nei tamāloloa ona ua mafai ona latou faalogo i le feʻau mai le Tusi Paia, ma faitau i a tatou lomiga.

E tele isi mea mataʻina na tutupu. I se tasi aso, sa ma misia ai le pasi ona e lima minute sa vave ai le taimi i le fale faatali pasi. Na ma faatali loa mo le pasi e agaʻi atu i le isi nuu. E ma te leʻi talaʻi muamua i lea vaipanoa. Peitaʻi i le fale muamua, na ma feiloaʻi ai i se tamaʻitaʻi talavou. Na ia faapea mai ua leva ona ia faatalitalia i maʻua. Sa ma suʻesuʻe ma le uso o lea tamaʻitaʻi. Na ia talosagaina lona uso pe mafai ona ma asia o ia i lenā lava aso. Peitaʻi, e ma te leʻi mauaina le feʻau. Na amata le suʻesuʻega a lea tamaʻitaʻi faapea ona tauaiga. Na iʻu ina faia faatasi nei suʻesuʻega, ma e toʻasefulu lua i latou na auai. Talu mai lenā taimi, e toʻatele tagata o lea aiga ua avea o ni Molimau a Ieova.

I le 1965, na talosagaina ai i maʻua e siitia atu i le faapotopotoga i Kuusamo. E toʻaitiiti le ʻautalaʻi i lenā faapotopotoga. E leʻi faigofie ona talaʻi i lenā oganuu, ona e mapolotu tagata, ma lē fiafia i le galuega talaʻi. Ae na iai pea i latou sa faatāuaina le Tusi Paia. O lea, sa ma taumafai ai e faamasani i uiga o tagata. Sa faigofie ona amata ni suʻesuʻega faale-Tusi Paia, ina ua mavae le lua tausaga.

O LOO MAELEGA PEA I LE AUAUNAGA

E ui e lē o toe mafai ona ma galulue i le talaʻiga i le aso atoa, ae o loo ma talaʻi pea i le tele o aso. Ua faigofie ona ma talaʻi i oganuu tetelē, ona ua iloa e Aili avetaavale. Na faalaeiauina o ia e le atalii o Tauno e aʻo lana avetaavale, ma na maua lona laisene i le 1987 ina ua 56 ona tausaga. O loo ma nonofo nei i se potu e sosoo ma le Maota mo Sauniga.

E ma te fiafia ona e toʻatele tagata i le itu i mātū o Finilani ua taliaina le upu moni. E toʻaitiiti le ʻautalaʻi sa iai ina ua amata ona ma paeonia i inei, a o lea ua iai le matagaluega faapea faapotopotoga. Pe a ma auai i se fonotaga po o se tauaofiaga, e faafeiloaʻia i maʻua e se tasi ma faapea mai sa ma suʻesuʻe ma o latou aiga, a o latou talavou. Na faamanuia e Ieova la ma auaunaga.​—1 Kori. 3:6.

I le 2008, na atoa ai le 50 tausaga talu ona ma auauna o ni paeonia faapito. E faafetaia Ieova ona ua mafai ai ona ma fefaalaeiauaʻi le tasi i le isi e faaauau le auaunaga. Sa faafaigofie o ma olaga, ae na mafai pea ona tausia o ma manaʻoga. (Sala. 23:1) Sa lē tatau lava ona ma popole ina ua amata ona ma paeonia. I nei tausaga e tele o le auaunaga, ua faamalosia i maʻua i le folafolaga a Ieova e faapea: “Ou te faamalosi iā te oe. Ou te matuā fesoasoani iā te oe. Ou te matuā lagolagoina oe i loʻu lima taumatau o le amiotonu.”​—Isa. 41:10.