SUʻESUʻEGA

E tatau i auauna a le Atua ona taumafai tuputupu aʻe faaleagaga ma ia oo ina matutua faaleagaga. E tatau ona toleniina o latou lotofuatiaifo mai i le Atua. O le a iloiloina i nei mataupu vala o le olaga e tāua ai le lotofuatiaifo ma le matua faaleagaga, ma ua saunia mai e nei mataupu ni taʻiala aogā.

E tatou te aʻoaʻoina mai ni lesona tāua e faatatau i le faatuatua mai i le mea na tupu iā Peteru, a o taumafai e savali i luga o le sami o Kalilaia. O le a fesoasoani lenei mataupu iā i tatou e iloa ai ni vala o loo vaivai ai lo tatou faatuatua, ma le auala e faamalosia ai.

O le iloaina o le alofa o Ieova iā i tatou, ma le faaalia atu o lenā alofa iā te ia, e faamalieina ai i tatou ma fiafia i le olaga. O le a tatou iloiloina i nei mataupu e lua auala ua faaalia mai ai le alofa o Ieova iā i tatou, ma auala e faaalia atu ai lo tatou alolofa iā te ia.