Ia Faaaogā Tatau a Tatou Lomiga
1 Ua faasoaina mai e le faalapotopotoga vaaia a Ieova ia i tatou le anoanoai o lomiga matalasi e fesoasoani ia i tatou i la tatou galuega talaʻi ma le aʻoaʻo atu. (Mata. 28:19, 20) O lo tatou sapaitalia la o lomiga a le Sosaiete e ao ona uunaia ai i tatou e faaaogā tatau i la tatou faiva.
2 I le tauaveina o la tatou faiva, tatou te mananao e fesoasoani i ē pei ni mamoe ia ui i le ala i le ola. E mafai ona fesoasoani lomiga ia i tatou ia faia lena mea. A talanoaina le Tusi Paia ma se tagata naunau, e mafai ona tatou iloa lona tosina i se mataupu patino. Afai la tatou te masani lelei ma faamatalaga tāua o loo i lomiga eseese, ona mafai lea ona fetuutuunai la tatou taulimaga ma ofo ai se lomiga e fitoi tonu ma faanaunauga o le tagata o loo tatou talanoa. Atonu e manaomia ai i lenei mea ona faia se toe asiga faatasi ma se lomiga talafeagai.
OFO LE MEA O LOO MANAOMIA
3 I le galueaʻiina maeʻaeʻa o la tatou oganuu, o le a tatou maua ai tagata o ē naunau faamaoni i le Tusi Paia ma mananao e aʻoaʻo atili e faatatau i ai. So o se tasi o a tatou lomiga e mafai ona fesoasoani ia i latou ia maua le malamalamaga o le Tusi Paia. Ae afai tatou te talanoa i se tagata na te lē maufaatuatuaina le Tusi Paia ma talitonu faapea e fetoaʻi pe lē faasaienisi, atonu la e talafeagai ona tuu i ai le The Bible—God’s Word or Man’s? Ua taliina atoatoa e lena lomiga faitioga a tagata i le Tusi Paia ma ua aumai ai se faamalamalamaga manino i le pogai e ao ai ona taliaina le Tusi Paia o le Afioga a le Atua. Pe e mafai foi ona e tuua i ai le tusi Mankind’s Search for God, e faaaogā ai mataupu e 15 ma le 16.
4 E toatele tagata ua fesagaʻi ma faafitauli i o latou lava olaga faaleaiga. Atonu e itiiti so latou iloa o fautuaga a le Tusi Paia po o le auala e faatatau ai. Ina ia fesoasoani la ia i latou e fesagaʻi ma faafitauli o le olaga ma sailia ni vaifofō aogā, e mafai ona tatou ofoina i ai le tusi Aiga Fiafia pe tatou te ono tataʻia foi i mataupu e 5 e oo i le 8 i le tusi Happiness. Atonu e lē vave ona oo mai ni suiga, peitai e mafai ona tatou faasino atu faapea e aogā moni lava fautuaga a le Tusi Paia.
5 A asiasi atu i tagata e fai fanau, ia manatu e ofo i ai lomiga ua saunia faapitoa mo le autalavou. Atonu e mafai ona e faaaogāina le lomiga o le Young People Ask. E toatele tagata talaʻi ua fesoasoani i mātua faapena ma talavou i le ofoina i ai o Laʻu Tusi o Tala o Le Tusi Paia po o le Listening to the Great Teacher.
6 E faigofie ona feaveaʻi sāvali, ma e mafai ona faaaogā e amata ai ni talanoaga pe a galulue i lea fale ma lea fale atoa ma le molimau lē fuafuaina. O se sāvali e sili ona faamafanafana loto, faatasi ma ni faamatalaga tāua o loo iai O le ā le Faamoemoe mo Ē Pele ua Maliliu? Pe e te feaveaʻia ni sāvali eseese faatasi ma oe? E te sauniunia ni faamatalaga mo le faailoaina atu o i latou?
7 A o tatou fetufaaʻia le tala lelei ma isi, tatou te mananao e faaaogā lelei le anoanoai o fesoasoani mo le suesueina o le Tusi Paia ua saunia e “le auauna faamaoni ma le mafaufau.” (Mata. 24:45-47) O lena fau ma soloi o meaʻai faaleagaga ua atagia ai le aao mafola o Ieova ma lona manatu mai i le fanau uma a tagata.