O le Taimi Lenei
1 Ina ua tusia e le aposetolo o Paulo lana tusi lona lua i uso i Korinito, sa ia faamanatu i a i latou la latou filifiliga e faia galuega laveai mo ō latou uso talitonu i Ierusalema. Ae na mavae le tausaga e leʻi uma lava le galuega na amataina. Ona ia augani atu lea i a i latou: “Ia faauma ona fai: ia outou naunau e faauma le galuega e pei ona sa outou naunau e fai.”—2 Kori. 8:11, The New English Bible.
2 E iai taimi, e faataatitia ai e i tatou uma ni ō tatou lava sini. Atonu tatou te mafaufau e faatele so tatou sao i le faiva i le fanua, ia tatou faamasani lelei atu i ō tatou uso, ia tatou agavaa mo se faaeaga o le auaunaga, po o le faaleleia o ni vaivaiga. E ui atonu o ni uunaiga lelei na mafua ai ō tatou faanaunauga, ae atonu o le a tatou lē tausisi atu pea i ai ina ia ausia ai lo tatou sini. Ona iu lea ina galo i a i tatou, ae ua mavae atu lava vaiaso, o masina, po o tausaga foi, e leai se agaigai i luma i se mea e tasi. Pe ua lē manaomia ai ea la ona tatou faaaogā le fautuaga ina ia “faauma ona fai” le mea sa tatou amataina?
3 Ausiaina Ō Tatou Sini: E faigofie ona fai se filifiliga totino, ae faafaigata ona faataunuu lena filifiliga. O le tolopo soo e ono faaleagaina ai so o se agaigai i luma. E manaomia ona fai sa tatou filifiliga, ona maumauai lea e faaauau ae aua le tolopoina. E manaomia tele ai ni faamaopoopoga lelei a le tagata lava ia. E tāua le faatulaga o le taimi manaomia mo le faia o se galuega, ma ia mautinoa ua faaaogā lena taimi mo lea fuafuaga. E lelei le faatulaga o se taimi maʻoti e maeʻa ai, ona matuā pulea totino lea o i tatou ina ia mautinoa ua faataunuuina.
4 Pe a faigata ona tatou ausia ō tatou sini, e faigofie lava ona faapea ifo: ‘Seʻi fai ia i se isi taimi.’ Ae tatou te lē iloa le mea o le a tupu i le lumanai. Fai mai le Faataoto 27:1: “Aua e te mitamita i le aso taeao; auā e te le iloa se mea e tupu a taeao.” Na lapatai mai le soo o Iakopo i le soona mautinoa naua i le lumanai auā “e le iloa e outou se mea e tupu a taeao. . . . O le ua iloa e fai le mea lelei, a e le faia, o le agasala lea ia te ia.”—Iako. 4:13-17.
5 Ona o le tele o le mau faasalavei ma mea e tagisā mai ai isi tagata, e faigofie ai lava ona toe soloia ō tatou sini. E manaomia ai se taumafaiga maumauai ina ia tatou manatua ai pea na sini. E aogā foi pe a taʻua lena mataupu i a tatou tatalo. O le fai atu foi i isi o ē tatou te mafana i ai ina ia latou faamanatu mai ma faamalosiau i a i tatou, e mafai ona maua ai foi se fesoasoani. O se faamatalaga ua tusia i la tatou kalena o le a avea o se faamanatu ina ia iloa ai po o tatou agaʻi atu e fai. E ao i le tagata ona fai sana faaiuga ia faia le mea “e pei ona filifili i [ai] lona loto.”—2 Kori. 9:7.
6 Ua iai i a Oketopa se avanoa lelei e uai ai i ō tatou sini. O le a tatou ofoina kopi o Le Olomatamata, le Watchtower ma le Awake! E mafai ona ofo tusiga mo nei mekasini pe a iai le naunau moni, ae maise i toe asiga. Pe mafai ona tatou faataatitia ni sini fetaui ina ia ausia? Ae ā le taumafai ia tele ni ā tatou mekasini e ofo? O le filifili ia tele ni asiga ma amata se suesuega fou faale-Tusi Paia, e ono avea ma sini fetaui mo le toatele.
7 E lē atamai le tolopo o se mea tāua, auā o loo “mavae atu foi [lenei] lalolagi.” (1 Ioa. 2:17) Ua avanoa mo i tatou i le taimi nei, faaeaga faapitoa ma faamanuiaga i le auaunaga a Ieova. Ae faitalia i tatou pe tatou te fia faaaogaina.