Le Auala e Faataunuu ai Ou Sini Faaleagaga
1. O ā ni sini faaleagaga o le tele o Kerisiano talavou?
1 I le avea ai o se Kerisiano talavou, e mautinoa o loo taaʻina ou sini o le olaga i lou alofa iā Ieova ma le fetalaiga a Iesu i Kerisiano uma ia “muaʻi saʻili le malo.” (Mata. 6:33) Atonu o lou sini o le faalautele atu o lau faiva e ala i le auauna o se paeonia po o le auauna i mea o loo tele ai le manaʻoga mo tagata talaʻi o le Malo. O nisi atonu e manatu e tauofo mo galuega o faugāfale faavaomalo, auauna i se lālā, po o le galue i le auaunaga faamisionare. Maʻeu ni sini e faamalieina ai ma faatāuaina!
2. O le ā e fesoasoani iā te oe ia ausia ou sini faaleagaga?
2 O se tasi o fesoasoani i le ausiaina o ou sini faaleagaga, o le tusia lea pe fai se lisi. Na faapea mai le Olomatamata o Iulai 15 2004: “E mafai ona malamalama i se manatu e faalēmanino pe a [e] filifilia lelei upu e faamatala ai. O le mea lea, atonu o le a [e] manaʻo loa e tusia i se api [ou] sini ma fuafua ina ia mafai ona ausia.” E lē gata i lea, o sini e lē matuā tetelē tele e fesoasoani iā te oe e iloilo ai lou agaʻigaʻi i luma ma faaauau ona taulaʻi atu i le faataunuuina o lou sini lea e umi se taimi e fai ai.
3. Taʻu mai ni sini pupuu lea e fesoasoani i se tasi e agavaa ai mo le papatisoga.
3 Sini mo ni Taimi Pupuu: Pe afai e te leʻi papatiso, ia manatunatu i mea e fai ina ia ausia lenā sini. Atonu e te manaʻomia se malamalamaga manino o aʻoaʻoga faavae a le Tusi Paia. Afai o le tulaga lenā, ia fai ma ou sini le suʻesuʻeina lelei o le tusi Aʻoaʻoga a le Tusi Paia, ma suʻe uma mau faasino o iai. (1 Timo. 4:15) Ia faatū se sini e faitau le Tusi Paia atoa mai le Kenese seʻia oo i le Faaaliga, e pei ona manaʻomia ona fai e tagata Peteli ma tagata aʻoga i Kiliata. Pe a uma lenā, ona tausia lea o se polokalame faifai pea o le faitauina e lē aunoa o le Tusi Paia. (Sala. 1:2, 3) Seʻi tomānatu i le fesoasoani o le a faia e lenā mea i lou tuputupu aʻe faaleagaga! Ia amata ma faaiʻu lau faitauga Tusi Paia i se tatalo mai le loto, ma ia taumafai e faatatauina mea ua e aʻoaʻoina.—Iako. 1:25.
4. O ā ni sini pupuu e ao ona faatulaga e se Kerisiano o loo iai sona sini e auauna mo se taimi umi i Peteli po o le auaunaga faamisionare?
4 Pe afai ua uma ona e papatiso, o ā nisi o sini e mafai ona e taumafai e faataunuu? Pe e manaʻomia ona e faaleleia ou tomai i le talaʻiga? O se faaaʻoaʻoga, pe e mafai ona fai ma ou sini le iai o sou tomai i le faaaogāina o le Afioga a le Atua i le faiva i le fanua? (2 Timo. 2:15) E faapefea ona e faalautele atu lau faiva? Ia faatulaga ni sini patino mo ni taimi pupuu ia e talafeagai ma lou matua ma lou tulaga o iai, lea e fesoasoani e ausia ai ou sini mo se taimi umi.
5. Na faapefea ona fesoasoani i se uso le faatulaga o ni sini mo ni taimi pupuu e ausia ai lona sini ia auauna i Peteli?
5 Se Tala i le Taulau Manuia: Ina ua asiasi atu Toni e 19 ona tausaga i se ofisa o le lālā o Molimau a Ieova, na tupu aʻe ai sona faanaunauga e auauna i Peteli. E ui i lea, sa ola o ia i se olaga leaga, ma e leʻi faia lava sona tuuina atu i le Atua. Ona filifili lea o Toni ina ia faaōgatasi lona olaga ma ala o Ieova ma faatulaga lona sini ia agavaa mo le papatisoga. Ina ua ausia lenā sini ona ia toe faatū lea o le isi sini o le paeonia lagolago, faapea foʻi ma le sini o le paeonia sauatoa, ma tusia na sini i lana kalena ma aso na ia manaʻo e amata ai. Seʻi manatu i lona olioli ina ua paeonia mo se taimi, ona valaaulia lea o ia i le auaunaga i Peteli!
6. O le ā e fesoasoani iā te oe e ausia ai ou sini faaleagaga?
6 E mafai foʻi ona e ausia ou sini faaleagaga a o e naunau e faamuamua manaʻoga o le Malo. Ia tuuina atu “au galuega” iā Ieova i le tatalo ma taumafai ma le filigā ia e ausia na sini.—Faata. 16:3; 21:5.