Talavou—O ā o Outou Sini Faaleagaga?
1 Ua silafia e Ieova le tāua o galuega aogā ma ni sini e mafai ona ausia i le aumaia o le fiafia. (Tagai i le Kenese 1:28; 2:15, 19.) I aso nei, ua tuuina atu ai e Ieova i ona tagata se tofiga ina ia talaʻi ma aʻoaʻo atu. Ua ia i tatou foi se sini aupito sili o le mauaina o le ola e faavavau i le Parataiso. I le taimi nei, e manaomia ona tatou faataatitia ni sini faaleagaga e agaigai i luma pe afai tatou te mananao ina ia alofia le faaaogaseseina o lo tatou malosi ma a tatou alamanuia.—1 Kori. 9:26.
2 O Sini Moni mo Tagata Talavou: E tatau i talavou ona iai ni sini faatiokarate ia e mafai ona latou ausia e tusa ai ma o latou tomai taitoatasi. (1 Timo. 4:15) Ua ausia e nisi tamaiti laiti le sini o le taulotoina o tusi o le Tusi Paia e tusa lava pe lei iloa ona faitau. E ala i le suesuega faaleaiga, ua aʻoaʻoina ai e tamaiti le auala e sauniuni ai mo sauniga ina ia mafai ai ona latou ausia sini o le faia o ni tali uigā ma tusia o latou igoa i le Aʻoga o le Faiva Faatiokarate. A o ō atu tamaiti faatasi ma o latou mātua i le auaunaga i le fanua, e latou te aʻoaʻoina ai le faia o se vaega i le tuuina atu o se molimau a o latou agaʻi i luma i le sini o le avea ma tagata talaʻi e lei papatisoina. E ao i mātua ona faataatia pea i luma o a latou fanau laiti le sini o le tuuina atu ma papatisoina.
3 Afai o oe o se talavou ua sefulu ma ona tupu tausaga, o ā mea o aofia i ou sini faaleagaga? “O lenei, ia e manatua le na faia oe i ona po o lou taulealea” e ala i le tepa taulai atu i sini e tāua moni i le olaga. (Fai. 12:1; Sala. 71:17) Aisea e te lē paeonia lagolago ai i masina ia e tūua ai le aʻoga? O e manatunatu e uiga i le faia o le faiva faataimi atoa i le avea o se paeonia sauatoa? Ae faapefea le aʻoaʻoina o se gagana fou ina ia mafai ai i se taimi o i luma ona e fesoasoani atu i se vaega po o se faapotopotoga e tāutala i se isi gagana i lou vaipanoa po o se isi nofoaga? O le toatele o ē o loo auauna nei i Peteli po o le avea o ni ovasia faimalaga po o ni misionare, sa latou faatulagaina faapitoa le auaunaga faataimi atoa e avea ma o latou sini a o iai pea i aʻoga. Aisea e te lē faia ai faapena?
4 A o tamaitiiti lava, ia tauivi ina ia faataitai i le faaaoaoga a Iesu. E oo lava i le taimi a o talavou e na o le 12 ona tausaga, sa matuā faigofie ona ia talanoa atu e uiga i mea faaleagaga. (Luka 2:42-49, 52) O le faataatitiaina o sini aogā mo oe lava i le faia o suesuega totino, ia faitau le Tusi Paia i aso taitasi, ma ia mafuta faatasi e lē aunoa ma uso Kerisiano taumatuaina i sauniga ma le auaunaga, o le a fesoasoani ia te oe e maua ai le tomai e aʻoaʻo ai isi e uiga i le Malo o le Atua i le auala na faia ai e Iesu.